Read icen Nabos Abik AYohana 20 Bible Online

Nabos Abik AYohana 20 - icen bible

Nabos Abik AYohana 20

¹In di atomaza akak na tsin tisik, a ne azanɛn, a bereng kufet itarak katitu ibong fi ise tsik vit nkum, a bereng inyang iratek ni bɔk wu.

²A kɔrɔk kuhwyen e, kuhwyen kuzen ayame me, fi ku yet amaan e, ke aShetan ayi. A rosom iko ayɛ agup azining.

³A barak iko ayɛt kubong fi kutsik ko se vit nkum e, a te kpaf, a di basak nagang-ice-igwɔm, a ku ko ro ni iwɔrɔk banet azatse, tit ma ama ayɛ agup azining e shining. Ama anɔng, ba bi ne ba ku ko nɔɔk kawat nfi kizen gyet.

⁴In di ata igwɔm, bayɔng fɛ́ ba di sosok ni na yet bayɔng fɛ́ ba mi ka ba nɔɔk kukyem ira ishɔt. In di nabik bayɔng fɛ́ ba kin tɛsɛng ice bà mok itot ifɛ̀ aYeso, ni ifɛ̀ Adakunom. Bayɔng fɛ́ da ba mang ya kukyɛng ashi me, ni kubannom wu ntong awo. Iba fɛ́ da ba kin shan izizɔ wu na natii bà, ni ni mbɔk bà awo. Ba mi tɛ ba sɛ kutset, ba tsin ya igwɔm na Anet-Isheshek ayɛ agup azining.

⁵(Ishɛrɛp bafaben dorok awo, tit ma ayɛ agup azining e shining.) Idoro bafaben ifi imɛsɛng yɔng.

⁶Awɛng nɛ ajɛrɛ yet afɛ́ bayɔng fɛ́ ba bi se ni idoro bafaben ifi imɛsɛng e. Iku ifɛ́ afaa bɛ̀ agap naton bá awo, awɛt iba bi yet áware Adakunom nɛ Anet-Isheshek. Ba bi ya igwɔm ni wu ayɛ agup azining.

⁷Ama fɛ́ ayɛ agup azining e mi gang, ba bi bisik aShetan na ari inyang e.

⁸AShetan e bi wuruk, nɔng i da bin wɔrɔsɔ mben azatse na atsok anaas afɛ́ azatse, fɛ́ ba yet aGog nɛ aMagog, nek ira itsom. Kudot banet e bi se ti izɛk anu izek.

⁹Ba nes na narɔ zizɛɛt azatse, ba te karɔ isot banet Adakunom nate, kuwɔp fi iwu shim ko. Awɛt kurong ne azanɛn ku ka ba ya hwyii.

¹⁰Awɛt amaan e, fɛ́ a ka ba wɔrɔsɔ, ba ku worok ni kubong árong fɛ́ a ya na abing-irong-iruk, karɔ fɛ́ ba kin di worok kukyɛng ashi nɛ atan mbɔɔs e. Ba da ka ba nesek izot kunom na katuk, ayɛ na ayɛ.

¹¹Wat in di kuta igwɔm kukan e, ayɔng fɛ́ a sonong ni ko. Kazatse nɛ kaza wat ka te bit ashon wu, ba bit karɔ inyeseng ni ba.

¹²In di bafaben, baratek nɛ babane, ni nyeseng ashon kuta igwɔm e. Ba tarak afumung, ba tɛ ba tarak kufumung kukak, kuyɔng fi ku yet kufumung kutset. Ba ras bafaben ishɔt, kpaf ni ikyɛng fɛ́ ba raas, fi i se ni ijɛk na afumung e.

¹³Izek turung nkom banet fi nse ayɛt na, iku nɛ ari-irong nesek bafaben fɛ́ ba se ni na, kaakyɛ anet ba ku ra ishɔt kpaf ni ikyɛng fɛ́ a mi ra.

¹⁴Ama anɔng, ba sok iku ni ari-irong sak ni kubong árong. Kubong árong e yet iku ifɛ́ afaa.

¹⁵Ngma ayɔng fɛ́ da ba sɛ iyerek wu ni jɛk ayɛt kufumung kutset e awo, ba ku barak ni kubong irong e.