Read icen Nabos Abik AYohana 7 Bible Online

Nabos Abik AYohana 7 - icen bible

Nabos Abik AYohana 7

¹Ama ideng, in di batomaza banaas ni nyeseng na atsok azatse anaas, ba tɛnɛng nwun na atsok azatse anaas, kɔng in bi fɛsɛm ke na a beseng mben, ke izek, ke nakon awo.

²Ama anɔng, in ti in di atomaza akak na tsin ngarak abace, a bereng nagang-ice-igwɔm Adakunom fɛ́ ayet atset. Ni kutɔ kuratek, a yes batomaza banaas e, fɛ́ ba mi ka ba nɔk agap ibeseng mben ni izek.

³A fɛ̀ yɛ, “I bi beseng yin mben, ke izek, ke nakon ninyen awo, ma in di te nagang-ice-igwɔm Adakunom na natii basam Adakunom yit ninyen.”

⁴Wat in fok kudot bayɔng fɛ́ ba mi ka ba te nagang-ice-igwɔm Adakunom: agup anakat azining ni nsɔk nnaas nɛ anaas (144,000) fɛ́ ba nes ni icɛn aIsrela.

⁵Bayɔng fɛ́ ba ne ni izɔrɔk aYahuda fɛ́ ba di te nagang-ice-igwɔm ba se banet agup kusɔk abe afaa (12,000). Bayɔng fɛ́ ba ne ni izɔrɔk aRuben fɛ́ ba di te nagang-ice-igwɔm ba se banet agup kusɔk abe afaa (12,000). Bayɔng fɛ́ ba ne ni izɔrɔk aGad fɛ́ ba di te nagang-ice-igwɔm ba se banet agup kusɔk abe afaa (12,000).

⁶Bayɔng fɛ́ ba ne ni izɔrɔk Asha fɛ́ ba di te nagang-ice-igwɔm ba se banet agup kusɔk abe afaa (12,000). Bayɔng fɛ́ ba ne ni izɔrɔk aNaftali fɛ́ ba di te nagang-ice-igwɔm ba se banet agup kusɔk abe afaa (12,000). Bayɔng fɛ́ ba ne ni izɔrɔk aManase fɛ́ ba di te nagang-ice-igwɔm ba se banet agup kusɔk abe afaa (12,000).

⁷Bayɔng fɛ́ ba ne ni izɔrɔk aSimiyɔn fɛ́ ba di te nagang-ice-igwɔm ba se banet agup kusɔk abe afaa (12,000). Bayɔng fɛ́ ba ne ni izɔrɔk aLawi fɛ́ ba di te nagang-ice-igwɔm ba se banet agup kusɔk abe afaa (12,000). Bayɔng fɛ́ ba ne ni izɔrɔk aIsaka fɛ́ ba di te nagang-ice-igwɔm ba se banet agup kusɔk abe afaa (12,000).

⁸Bayɔng fɛ́ ba ne ni izɔrɔk aZebulum fɛ́ ba di te nagang-ice-igwɔm ba se banet agup kusɔk abe afaa (12,000). Bayɔng fɛ́ ba ne ni izɔrɔk aYusufu fɛ́ ba di te nagang-ice-igwɔm ba se banet agup kusɔk abe afaa (12,000). Bayɔng fɛ́ ba ne ni izɔrɔk aBanyami fɛ́ ba di te nagang-ice-igwɔm ba se banet agup kusɔk abe afaa (12,000).

⁹Ama anɔng, in yɛrɛk, in di kugbat kudyɛng banet fɛ́ vit ayɔng fɛ́ a da kyem a fa ashon hom, ba nes ni mben zizɛɛt, ni icɛn zizɛɛt, ni izɔrɔk zizɛɛt nɛ alem zizɛɛt, ni nyeseng ashon kuta igwɔm e, nɛ ashon Kitsamang Adakunom. Ba tes agboo akpin akan, ba berese ahwyang izizerek ni mbɔk bá.

¹⁰Ba tang ntɔ gbɛrɛy na ba nye, “Isheshek yit nes na Adakunom, iwu fɛ́ a sosok naton kuta igwɔm, ni kitsamang e.”

¹¹Ngma batomaza me, nɛ bashɔn e, ni nkyɔrɔk ntset nnaas e te kuta igwɔm e nate. Ba kpas pak aben ashon kuta igwɔm e, na ba ya Adakunom ntong,

¹²na ba nye, “Anɔng! Itere ni ízɔk, ni kutsitsɛng, ni ifeng, ni iratek, ni kukyem, ne agap ni in sot nfɛ́ Adakunom ayɛ nɛ ayɛ. Anɔng!”

¹³Awɛt azining ayɛt bashɔn e di rip fok, “Ba bá fɛ́ ba tes agboo ákpin akan nà, ba yet bangan ɛ? Ba ne akɛ?”

¹⁴Awɛt imi fɛ̀ ni wu, “Akɔk-ashon, ngɔn wu i rēn.” Iwu ma fɛ̀, “Ba bang yet banet fɛ́ ba wuruk ayɛt aduk izot; ba mi kusu nkpin bá, na nasok Kitsamang e in sot nkan.

¹⁵Nek anɔng wu, ‘Fɛ́ ba di nyeseng ashon kuta igwɔm Adakunom ba ku ya ntong katuk ni kunom nitu iya ntong wu. Iwu fɛ́ a sosok naton kuta igwɔm e, bi ka ba fam ni kubut wu.

¹⁶Vit i ti ifok nzong ni ba; vit i ti ifok iyɛ ngash ni ba. Kunom bi ti ku ka ba shosh awo, ke ikikak i ti ka ba ta vɛt awo.

¹⁷Nek Kitsamang fɛ ka se nate kuta igwɔm e, bi sot anek bá. Iwu bi tsees ni iba ni ikang fi i nesek ashi kutset. Adakunom bi ka ba rɛng ngma nayisi fɛ́ na se na yisi bá.’ ”