Read idege ỌMWỤ ỌDADA 11 Bible Online

ỌMWỤ ỌDADA 11 - idege bible

ỌMWỤ ỌDADA 11

¹Ụka nya ọgbanyẹ lẹ, alodehe wuu kaa ya oja ookpokpo.

²Ụka ọọwa kị juwa mwụ ẹpwa tụ ẹgẹgẹẹga da ọ-ọmwẹnụ-ụtụrụ lẹ, ị jẹ ka pwụ ụteeji ọhẹ ọ-ọpyị nya ịBabịlọn lẹ, ị kụ ụwa lẹlẹ.

³Ọọwa, ị byi awụlẹ yẹkẹẹ, “Anụ kẹwẹ kahị mẹ ịbịlọọkụ kahị hyaa i-ila kị ya gbonggbong mẹ.” Ọọwa, ị mẹ ịbịlọọkụ ịịwa lẹlẹ. Ị kpa ida nya ikorota kị ka kpa ju apewa nya ịbịlọọkụ kpa mẹ ube.

⁴Ọọwa, ị byi awụlẹ myịmyị yẹkẹẹ, “Anụ kẹwẹ kahị nwụ epweji ọhẹ ha ịlọhị ọlẹ ká ube-oluhye nyamwụ ka luhye teneee pwụ uhye-ọgba mẹ. Āhị họ ịnyị chajị ká ẹnyị nyahị ka ru ohi, kahị tụtụm ka nyi epepe yịrị odehe yịrị kaka mẹ.”

⁵Ọọwa, Amkpaa-à hireji warị kaka yẹ epweji bala ube-oluhye ọlẹ ká angịwẹ juwa kpa nwụ lẹlẹ.

⁶Ọọwa, Amkpaa-à yẹkẹẹ, “Ọlẹ ká angịnyị ehe wuu ri ụma ookpokpo juwa ya oja ookpokpo à du kị jẹ wẹẹ họ ang wuu lawụlẹ lẹ. Ọlẹ tị ri ọmwụ ọdada nya ang ọlẹ kị ka jụ họ ị-ịlahị wẹẹ! Ọ nọ chẹẹ lẹ, ịngịngịhyẹ-ẹ́ ka chaa ọha la ọhọhọ kaka.”

⁷Lẹẹlẹ, Amkpaa-à yẹkẹẹ, “Anụ kẹwẹ kahị hireji kele kaka kpịla oja nya alodehe ịwẹ ahị chajị kị ka jẹ-ẹ̀ wo lawụlẹ kaka mẹ.”

⁸Ịnyị, Amkpaa-à nyi alodehe ịwẹ wuu epepe yịrị odehe yịrị lẹ, ị hwabwọ la epweji ọtụka ọọwa ọnwụnwụ lẹlẹ.

⁹Ị wụrụ ẹnyị nya epweji ọọwa ịBabịlọn[1] lẹlẹ. Ị wụrwọọ ịnyị, chajị ụ-ụwa kpangga Amkpaa-à kpịla oja nya alodehe ọlẹ ahị bala o-nyi angịnyị epepe bwu rụ kele kaka kụ ẹga datị-datị nya odehe ọlẹ wuu lẹ.

¹⁰Anyị nya ịChẹm a lẹẹ lẹlẹ. Ụka ká ịChẹm gu ẹka ohu ookpokpo (100) lẹ, ọ ma Apakịchadị lẹlẹ. Ụka kọ ma Apakịchadị ọwẹ lẹ, ukpenyi ọtụka-ọtụka ọlẹ kọ do ụka ọọwa, chịpwụrụ lala ẹka imiiye kam kẹkpẹ ene-ene lẹ.

¹¹ỊChẹm ri ehe lala ẹka ohu ịrụ (500) gbẹgbịlẹ ẹ-ẹkpẹ nyọlẹ kọ ma Apakịchadị kpá. Ọ myịmyị ma anyị anyang bala anyị alẹng ịkịla hile Apakịchadị ịnyịnyị.

¹²Ụka ká Apakịchadị gu ẹka iwo ịta kụrụ ịrụ lẹ, ọ ma iChela lẹlẹ.

¹³Apakịchadị myịmyị gu ẹka ohu ine kụrụ ịta (403) ẹ-ẹkpẹ nya ọmama nya iChela. Ọ ma anyị anyang bala anyị alẹng ịkịla hile iChela ịnyịnyị.

¹⁴Ụka ká iChela gu ẹka iwo ịta lẹ, ọ ma Ẹbẹẹ lẹlẹ.

¹⁵ỊChẹla myịmyị gu ẹka ohu ine kụrụ ịta (403) ẹ-ẹkpẹ nya ọmama nya Ẹbẹẹ. Ọ myịmyị ma anyị anyang bala anyị alẹng ịkịla hile Ẹbẹẹ.

¹⁶Ụka ká Ẹbẹẹ gu ẹka iwo ịta kụrụ ine lẹ, ọ ma ịPẹlẹgị lẹlẹ.

¹⁷Ẹbẹẹ myịmyị gu ẹka ohu ine da ẹka iwo ịta (430) ẹ-ẹkpẹ nya ọmama nya ịPẹlẹgị. Ọ myịmyị ma anyị anyang bala anyị alẹng ịkịla hile ịPẹlẹgị ịnyịnyị.

¹⁸Ụka ká ịPẹlẹgị gu ẹka iwo ịta lẹ, ọ ma iRewu lẹlẹ.

¹⁹ỊPẹlẹgị myịmyị gu ẹka ohu imiiye kụrụ ihikichu (209) ẹ-ẹkpẹ nya ọmama nya iRewu. Ọ myịmyị ma anyị anyang bala anyị alẹng ịkịla hile iRewu ịnyịnyị.

²⁰Ụka ká iRewu gu ẹka iwo ịta kụrụ imiiye lẹ, ọ ma iSerugu lẹlẹ.

²¹IRewu myịmyị gu ẹka ohu imiiye kụrụ irwiye (207) ẹ-ẹkpẹ nya ọmama nya iSerugu. Ọ myịmyị ma anyị anyang bala anyị alẹng ịkịla hile iSerugu ịnyịnyị.

²²Ụka ká iSerugu gu ẹka iwo ịta lẹ, ọ ma ịNahọ lẹlẹ.

²³ISerugu myịmyị gu ẹka ohu imiiye (200) ẹ-ẹkpẹ nya ọmama nya ịNahọ. Ọ myịmyị ma anyị anyang bala anyị alẹng ịkịla hile ịNahọ ịnyịnyị.

²⁴Ụka ká ịNahọ gu ẹka iwo imiiye kụrụ ihikichu lẹ, ọ ma iTera lẹlẹ.

²⁵ỊNahọ myịmyị gu ẹka ohu da ẹka iwo kụrụ ihikichu (119) ẹ-ẹkpẹ nya ọmama nya iTera. Ọ myịmyị ma anyị anyang bala anyị alẹng ịkịla hile iTera ịnyịnyị.

²⁶Ụka ká iTera gu ẹka iwo irwiye lẹ, ọ ma Ebiram bala ịNahọ bala ịHaran lẹlẹ.

²⁷Anyị ịtụma nya iTera a lẹẹ lẹ: ITera ma Ebiram bala ịNahọ bala ịHaran. ỊHaran a ri adịda nya ịLọtụ lẹ.

²⁸ỊHaran a gbu jene nya iTera adamwụ lẹ. Ọ gbu e-epweji ọhẹ ọlẹ kị wụrụ Uu ẹ-ẹga ọlẹ kị mọọ, ụ-ụwa ị-ịpyị nya ala ịKalụdiya.

²⁹Ebiram bala ịNahọ angị imimiiye ye ịhụ. Ebiram ye iSerayị. ỊNahọ ye iMilika ọlẹ kọ ri ọnyị ọnyang nya ịHaran. Ọnyị ọlẹng nya ịHaran ọwẹ a ri Isika lẹ.

³⁰ISerayị á ma ọnyị ọhẹ-lọhẹ ka.

³¹ITera a hu ang ẹdịyẹ bwu epweji nya Uu ụ-ụwa ọ-ọpyị nya ala ịKalụdiya nyaa, juwa rụ kele ka ọpyị nya iKenan lẹlẹ. Ọ kpa Ebiram ọnyị nyamwụ ọwa ayịdang bala iSerayị ahụ nya Ebiram ba ịlọmwụ. Ọ kpa ịLọtụ ọlẹ kọ ri ọnyị nya ịHaran ọlẹ kọ ri ọnyịnịna nya Ebiram ba ịlọmwụ ịnyịnyị. Ụka kị pwụ epweji nya ịHaran lẹ, ị nọ ẹpwa ụ-ụwa lẹlẹ.

³²Ụka ká iTera gu ẹka ohu imiiye kụrụ ịrụ (205) lẹ, ọ gbu ụ-ụwa ị-ịHaran lẹlẹ.