Read idege ỌMWỤ ỌDADA 12 Bible Online

ỌMWỤ ỌDADA 12 - idege bible

ỌMWỤ ỌDADA 12

¹Ẹnụtụrụ ọhẹ lẹ, Amkpaa a ya ẹla ta Ebiram yẹkẹẹ, “Ebiram ee, wuleji ká rụ gba kpehe hi alepweji nyanụ wuu bala alẹpwa nyanụ wuu tụ epwoja nyanụ wuu ká kịnyaa kele ka ọpyị onyeewe ọlẹ kam wẹẹ ka mẹjẹng mẹ.

²“M̀ ka họng ká ka yẹ ri adịda nya epwoja ọtụka-ọtụka, m̀ ka wahị kụrụng lụmẹ-lụmẹ bala ọ-ka họ ká ẹnyị nyang ka yẹ ri ẹnyị ọtụka-ọtụka, chajị ká ahị ọwawa nyang ka jẹ-ẹ chị wu angịkịla wuu.

³M̀ ka wahị kụrụ ọng myị ọng ọlẹ kọ wahị kụrụng. Ma, ọng myị ọng kọ tị gọlọ jung m̀ tịtị ka gọlọ ju ọngọọwa hang ịnyịnyị. Bwu ẹga nyang ahụ Ebiram m̄ ka wahị kụrụ alodehe ọlẹ wuu lẹlẹ.”

⁴Ịnyị, Ebiram a gba kpehe rụ hi epweji nya ịHaran ịnyịlẹhị jaabwọ ká Amkpaa byoo lẹlẹ. Ụka ọọwa, ịLọtụ juwa bọọ rụ kele ịnyịnyị. Ebiram ayịdang gu ẹka iwo irwiye kụrụ ịrụ ụka ọwẹ lẹ.

⁵Alogu ẹdịyẹ nya Ebiram wuu a lẹẹ lẹ: Ebiram ayịdang bala iSerayị ahụ nyamwụ bala ịLọtụ ọnyị nya ọnyịnamwụ ọlẹng bala anchẹ nyaa ịlẹ kị la ị-ịHaran. Ọọwa, ị hu ang ẹdịyẹ nya ọpyị nya iKenan lẹlẹ. Ụka kị pwụ ọpyị nya iKenan lẹ,

⁶Ebiram anyị a juwa jẹ ịnyịnyịịnyị gbee kọ pwụ ọmwụ nya ùgboji nya ooku ọla iMore ọhẹ ọlẹ kị chị ịgọgọ ju lẹlẹ. Ùgboji ọọwa juwa e-epweji nya iChekem. Ụka ọọwa lẹ, alọpyị nya iKenan ayịdang kụ ụwa wẹẹ.

⁷Ịnyị lẹ, Amkpaa-à kele ka chị ịlọmwụ ehe ha Ebiram ụ-ụwa, juwa ya ẹla tọọ yẹkẹẹ, “Ebiram wo mẹ! Anyị ịtụma nyang wuu am Amkpaa-à ka ya ọpyị ọlẹ wuu ha lẹlẹ.” Ọọwa lẹ, Ebiram a me ogidi okiliya ha Amkpaa ọlẹ kọ chị ịlọmwụ ehe họọ lẹlẹ.

⁸Ụka kọ nọ chẹẹ lẹ, Ebiram a myịmyị mwụ rụ hi iChekem ọwẹ juwa rụ kele koye nya ọpyị olikiti ọlọmwẹnụ-ụtụrụ nya ịBẹtẹlụ lẹ, ọ chịkụ ụ-ụwa lẹlẹ. Ọpyị ọọwa juwa apewa nya ịBẹtẹlụ bala Ayị. ỊBẹtẹlụ ji ka ọmwẹnụ-obyi, Ayị ji ka ọmwẹnụ-ụtụrụ. Ịnyị lẹ, Ebiram a myịmyị me ogidi okiliya ha Amkpaa ẹ-ẹgẹwẹ lẹ, ọ gbịgba ha Amkpaa ụ-ụwa myịmyị lẹlẹ.

⁹Ụka ọọwa, Ebiram juwa jẹ bwu ẹgẹhẹ ka ẹga ọkịla ịnyịnyịịnyị yahị da ka edii nya ọpyị nya iKenan.

¹⁰Ụka ọhẹ juwa ká uhi kpeji ọ-ọpyị nya iKenan. Uhi ọọwa lụmẹ gbee ká Ebiram mwụ bwu ụwa ka edii kaka kụ Ijipiti lụka okpii.

¹¹Ụka ká Ebiram anyị jẹ ju ọnụ-ẹpwa nya ala Ijipiti ịwẹ chwẹẹ, ọ byi iSerayị ahụ nyamwụ yẹkẹẹ, “ISerayị ahụm ee, à tị́ jẹ ká ri ọnyang ọ-há ụhị lụmẹ lẹ.

¹²Lẹ, ọ́-ri ká ala Ijipiti a jẹ yẹkẹẹ, ahụ ọnyang ọlụhị ọtụka ọwẹ, nyaa ri ahụ nyam lẹ, ị ka nwụm hing la lẹlẹ.

¹³Chajị nya ọọwa lẹ, ịnam, ọ́-ri kị tọng wo lẹ, a yẹkẹẹ, ọwa nyị ri ọnyịnam ọnyang mẹ! Chajị ọ́-ri ká myị byaa ịnyị lẹ aalẹ, ị́ ka nwụm kaka. Ọkọkọ nya ọọwa lẹ, ị ka la ẹhị okpunyi ẹ-ẹga kam ayịdang ji ọ-ọlahụ lẹ.”

¹⁴Ahyaahị kị pwụ Ijipiti ayịdang, alụwa wuu ri ibeenu jaabwọ ká iSerayị ayịdang ri ọnyang ọlụhị ịnyịlẹhị.

¹⁵Ụka ká alẹnyị ịtụka ịlẹ kị kaa họ ụkụrwọ ha iFero[2] dịrahụ nya ala Ijipiti juwa chabwọ ụhị nya iSerayị joo, ọ byaa yẹkẹẹ, “Nyị wụrụ iSerayị warị kaka ju ụga ẹ-ẹpwa nya ọọwa mẹ.” Ịnyị lẹ, angịwẹ a kele kaka wụrụ iSerayị kaka ju ụga ẹ-ẹpwa nya iFero Adịrahụ ịnyịlẹhị lẹlẹ.

¹⁶Ịnyị lẹ, iFero Adịrahụ ọwẹ a da Ebiram ụbwọ lụmẹ ọ-ọla iSerayị ahụ nyamwụ lẹlẹ. IFero ya iru nya ịkpịlọ bala ịna bala ibyiyó bala anyịrẹ-ịkamẹlụ lụmẹ-lụmẹ ha Ebiram, tụ iru nya anyịhị anyang bala alẹng lụmẹ-lụmẹ ụ-ụwa ịnyịnyị.

¹⁷Ma, Amkpaa du ẹdụrụ inyibyi ịhyẹ datị-datị kele kaka jụ iFero Adịrahụ ọwẹ ayịdang bala alẹpwa nyamwụ wuu ọọ-lajị nya iSerayị, ahụ nya Ebiram ọlẹ ká iFero kpa ụ-ụwa.

¹⁸Ụka ká iFero Adịrahụ ayịdang jẹ iSerayị nyị ri ahụ nya Ebiram, ọ wụrụ Ebiram warị. Ọ byoo yẹkẹẹ, “Ebiram, ẹla ọlanyị a tị́ họm họ ịnyị? Ịịyẹ tị́ du ká myị ya jem yẹkẹẹ, iSerayị ọlẹ nyị ri ahụ nya ọọwa kpong-kpong ka?

¹⁹Ịịyẹ a tị́ du ká byim yẹkẹẹ, ‘ISerayị ọlẹ nyị ri ọnyịnịnọwa du ká hum ujiji ụka kam ya, m ka yoo nya ahụ nyam lẹ mẹ?’ ISerayị ahụ nyang-ǹg wẹ lẹẹ, kpọọ rụ kele hi ẹgẹlẹ mẹ!”

²⁰Ọọwa lẹ, iFero Adịrahụ ọwẹ a da angịnyị nyamwụ ehile yẹkẹẹ, anụ nyị ku Ebiram ọwẹ rụ bala alẹpwa nyamwụ wuu hi ọpyị nya Ijipiti nyịwa ahyaahị mẹ lẹlẹ. Ọọwa lẹ, angịwẹ a kele kaka kpa Ebiram chị rụ bala iSerayị ahụ nyamwụ ọwẹ tụ ang myị ang nyamwụ wuu rụ kele gbegbegbe kịị kpoye nya Ijipiti lẹlẹ.