Read idege ỌMWỤ ỌDADA 13 Bible Online

ỌMWỤ ỌDADA 13 - idege bible

ỌMWỤ ỌDADA 13

¹Ịnyị lẹ, Ebiram bala ahụ nyamwụ bala ịLọtụ à kpa ang myị ang ịlẹ kọ la wuu juwa rụ bwu oye nya ẹtẹ nya Ijipiti kele ka edii nya ọpyị nya iKenan lẹlẹ.

²Ụka ọwẹ lẹ, Ebiram ri ọlụdụ ọtụka lẹ. Ọ la iru nya ịna bala iyo ịlẹpwa ịkịla lụmẹ-lụmẹ. Ọ la okpoko onyoowuru bala okpoko ịgọm hiigu-hiigu ịnyịnyị.

³Ịnyị, Ebiram a hu ang ẹdịyẹ bwu edii nya ọpyị ọwẹ juwa jẹ ịnyịnyịịnyị jahị da ka epweji nya ịBẹtẹlụ gbee kọ pwụ ẹga ọlẹ kọ ya ọdụ nyamwụ yeji nya ọgbanyẹ-ọgbanyẹ ene-ene lẹlẹ.

⁴Ẹpwa nyamwụ ọọwa juwa ẹ-ẹpwarịrị nya Bẹtẹlụ bala Ayị. Ụ-ụwa kpangga, ọ họ ogidi okiliya ha Ohe Oluhye lụka nya ọgbanyẹ-ọgbanyẹ lẹ. Ọọwa, ọ gbịgba ha Amkpaa ụ-ụwa lẹlẹ.

⁵Ụka ọọwa, ịLọtụ ayịdang la iru nya ịkpịlọ bala ịmwụ bala ịna lụmẹ-lụmẹ ịnyịnyị. Ọ la iru nya anchẹ lụmẹ ịnyịnyị.

⁶Jaabwọ ká ịna bala ịmwụ nya Ebiram bala ịLọtụ angị imimiiye ju iru lụmẹ-lụmẹ lẹ, amẹ ilekpo-lekpo ịlẹga ookpokpo á ju iru nwa ịna nyaa ịwa wuu myị kaka.

⁷Chajị nya ọọwa a du ká angịgbikpịlọ nya Ebiram bala angịgbikpịlọ nya ịLọtụ anyị kaa juwa mwẹla ta awụlẹ u-uhye nya amẹ ịlẹ ká iyo nyaa ka ri ịnyịnyịịnyị lẹ. Ụka ọọwa lẹ, ala iKenan bala ala ịPẹrisi anyị ayịdang kụ ụwa ọ-ọpyị nya iKenan ọọwa wẹẹ.

⁸Ịnyị lẹ, Ebiram a wụrụ ịLọtụ ẹnụtụrụ ọhẹ lẹ, ọ byoo yẹkẹẹ, “ỊLọtụ yẹ mẹ! Aanịna, am bala ahụ a ri lẹ. Ọ́ chịla ká anchẹ nyam bala anchẹ nyang ahụ ka juwa mwẹla tọ awụlẹ ụka wuu kpong-kpong ka.

⁹Yẹ mẹ, ọpyị ọlẹ kọ dẹẹ lẹ, ẹpwụ ojuju nyamwụ lụmẹ kpụ kọ ka nwahị. Lẹ, aa chụ ẹga ọlẹ kọ háng gụ mẹ! Ó-ri ọlụpụpịla ká chụ lẹ aalẹ, am a ka la olupwuriri lẹlẹ. Ọ́ tị ri olupwuriri kọ háng gụ lẹ aalẹ, a chwọọ kam la ọlụpụpịla mẹ.”

¹⁰Ịnyị, ụka ká ịLọtụ wụla ọpyị ọọwa yẹ lẹ, ọ yẹ jaabwọ ká ụtẹẹji nya ọkpọọ nya ihu nya ịJọdan ju amẹ ilekpo-lekpo lụmẹ chajị nya enyi ọlụwa. Ụtọ nya ịJọdan ọọwa dụwa lụmẹ gbam lalaala ju kele koye ọlẹ kị wụrụ iSowa. Ụtọ ọwẹ ju eyo hiigu-hiigu lala Ẹrụ nya Amkpaa ayịdang. Ọ myịmyị ju eyo hiigu-hiigu lala ọpyị nya ala Ijipiti ịnyịnyị. Ụka ọọwa lẹ, Amkpaa-á ta epweji nya ịSọdọm bala iGomora ayịreji lẹka.

¹¹Ọọwa, ịLọtụ à chụ Ọkpọọ nya ịJọdan koye nya ọmwẹnụ-ụtụrụ ọwẹ ha ịlọmwụ lẹlẹ. Ịnyị, ịLọtụ a mwụ kele kaka kụ ụwa lẹlẹ. Ịịwẹ, ịLọtụ bala Ebiram a bwu chị ebwo hi awụlẹ ẹnụmwụ ọọwa lẹlẹ.

¹²Ebiram ayịdang lẹ, ọ hi kụ ụwa ọ-ọpyị nya iKenan. Ma, ịLọtụ tị kụ ẹpwa ụ-ụwa ịkịka nya epweji ịSọdọm, ẹ-ẹpwarịrị nya iru nya epweji ịkịla lụmẹ-lụmẹ ịlẹ kị kụ ụ-ụwa ọ-ọkpọọ nya Ihu ịJọdan.

¹³Alepweji nya ịSọdọm ịwẹ la egbeju-ọngịrị jahị da Amkpaa lụmẹ bwula ang onyobyi nyaa ọlẹ kị kaa họ ịnyịnyịịnyị.

¹⁴Ụka ká ịLọtụ chị ebwo hi Ebiram kpá, Amkpaa warị wẹ ẹga nya Ebiram, ọ byoo yẹkẹẹ, “Ebiram, chẹhị yẹ ọpyị ọwẹ wuu kọ dokoko jung ịkịka ine wẹẹ!

¹⁵Ebiram, à tị́ yẹ ọpyị ọwẹ kọ wẹẹ wuu lẹ. Ahụ ayịdang bala anyị ịtụma nyang wuu, m̄ ka ya ha gbe oyi myị oyi lẹlẹ. M̀ hwoo ga hanụ lẹ.

¹⁶Ebiram aa wo mẹ! M̀ ka họ ká anyị ịtụma nyang ka pyẹ ju iru lụmẹ-lụmẹ lala ugburuja ọlọpyị, chajị ká ọngọngọhẹ á ka jẹ-ẹ jụ anyị ịtụma nyang wuu wa kpá myị ẹnẹnẹhẹ kaka.” Ịnyị lẹ, Amkpaa Ohe Oluhye a myịmyị byi Ebiram yẹkẹẹ,

¹⁷“Ebiram, wuleji ká myịmyị wụla ọpyị ọwẹ wuu yẹ yẹẹyẹẹ mẹ. Chajị am ayịdang juwa ka hwoo wuu hang jaabwọ kam ya ịnyịlẹhị-ịlẹhị lẹ.”

¹⁸Ịnyị lẹ, Ebiram a mwụ kele kaka da ọdụ nyamwụ kụrụ eji ụ-ụwa ba ègbiji ịla ịMamrẹ i-iHebirọn ba lẹlẹ. Ebiram myịmyị me ogidi okiliya ha Amkpaa ụ-ụwa ẹ-ẹga ọọwa ịnyịnyị.