Read idege ỌMWỤ ỌDADA 14 Bible Online

ỌMWỤ ỌDADA 14 - idege bible

ỌMWỤ ỌDADA 14

¹Ụka ọhẹ juwa ká alẹng ịlẹ ri ịdịrịhụ: Amrafẹlụ ri adịrahụ nya iChinaa. IRiyọkụ ri adịrahụ nya ala Ẹlasa. ỊKẹdọlawomẹẹ ri adịrahụ nya ala Ẹlam. ỊTayịdalụ ri adịrahụ nya ala iGoyim ịnyịnyị.

²Ụka ọwẹ ịwa ịdịrịhụ angịnyị angị inine ịwẹ yẹ ju awụlẹ, wuleji kele kaka da ịdịrịhụ angịnyị angị ịrụ ịkịla ẹwụ. Ẹnyị nya ịdịrịhụ ịrụ ịkịla ịịwa a lẹẹ lẹ: ịBẹra Adịrahụ nya ala ịSọdọm bala iBicha Adịrahụ nya ala iGomora bala iChinabụ Adịrahụ nya ala Adịmaa, ịChẹmẹbẹẹ Adịrahụ nya ala iSeboyim bala Adịrahụ nya ala ịBẹla. Ẹnyị ọkịla nya ịBẹla ri iSowa.

³Ịdịrịhụ angị ịrụ ịwẹ yẹ julawụlẹ kele kaka dẹwụ ta ịdịrịhụ angịnyị angị ine ịwụlẹ ịlaanyị ọ-Ọkpọọ nya iSidim ká ẹnyị nyamwụ ri Ihu Ọlịma-ịma.

⁴Ịdịrịhụ ịrụ ịwẹ wuu bala angịnyị nyaa ịnọ ji ekpeleji nya adịrahụ ịKẹdọlawomẹẹ lala ẹka iwo kụrụ imiiye kẹkpẹ lẹ. Ọọwa lẹ, ẹka ọkụrụ ọhata lẹ, ịwa wuu a pwa, ịwa nyị́ ka ji ekpeleji nyamwụ kaka lẹlẹ.

⁵Ịnyị lẹ, ẹ-ẹpwụ nya ẹka ọkụrụ ohene lẹ, adịrahụ ịKẹdọlawomẹẹ ọwẹ ayịdang bala ịdịrịhụ ịkịla ịlẹ wuu kị yẹ ju lọọ ẹ-ẹpwụ nya ẹwụ ọdada ọọwa a kụrụ aluji nyaa wuu lẹlẹ. Ẹnyị nya angịịwa kị kụrụ a lẹẹ lẹ: Ị kụrụ ala iRẹfa ụ-ụwa a-Achịtẹrotu-ịkanayịm bala ala iSusi ụ-ụwa ị-ịHam. Ị kụrụ ala Ẹmim ụ-ụwa o-oye nya iKiriyatayịm.

⁶Ị kụrụ ala ịHọọ ụ-ụwa ị-ịgbọdọ nya Ẹdọm ẹ-ẹga ọlẹ kị kụ. Ị kwaa rụ pyiipyii kele gbee kị pwụ Ẹlị-ịparan ọlẹ kọ ju ugbileji ọhẹ chwẹẹ.

⁷Ịnyị, ị myịmyị jahị kpata lẹ, ị rụ kele ka Ẹn-iMichipatị ọlẹ kị wụrụ ịKadẹchị wẹ alẹ. Ị kụrụ ala Amalẹkị bala ala Amọ ịlẹ kị kụ ị-ịHasasọn-ịtamaa ịnyịnyị.

⁸Ịnyị lẹ, ịdịrịhụ ịlẹ wuu a hu ang yẹjula awụlẹ kele kaka dẹwụ ụ-ụwa ọ-Ọkpọọ nya iSidim lẹlẹ. Ẹnyị nyaa ri, adịrahụ nya ala ịSọdọm bala adịrahụ nya ala iGomora bala adịrahụ nya ala Adịmaa bala adịrahụ nya ala iSeboyim bala adịrahụ nya ala ịBẹla ọlẹ kị wụrụ ala iSowa ịnyịnyị.

⁹Ịnyị lẹ, ịdịrịhụ angị ịrụ ịwẹ a kele kaka tọ ịdịrịhụ angị ine ịkịla ịlaanyị ụ-ụwa ọ-ọgbẹwụ i-iSidim lẹlẹ. Ịdịrịhụ ine ịịwa a lẹẹ lẹ: ịKẹdọlawomẹẹ adịrahụ nya ala Ẹlam bala ịTayịdalụ adịrahụ nya ala iGoyim bala Amrafẹlụ bala adịrahụ nya ala iChịnaa bala Ariyọkụ Adịrahụ nya ala Ẹlasa. Ịịwẹ, ịdịrịhụ angị ine ịwẹ a bwu dẹwụ ta ịdịrịhụ angị ịrụ ịkịla lẹlẹ.

¹⁰Ụka ká ẹwụ chị ila lụmẹ lẹ, ịdịrịhụ nya ala ịSọdọm bala iGomora à juwa rụnyẹ nya ọhịhị nyaa lẹlẹ. Ịnyị, ị chabwọ ju ka ẹpwụ nya ajẹ-ịpyị ikpori-kpori ịhyẹ ịlẹ ká ida nya ikorota myị ẹpwụ nyaa kpọngkpọng lẹlẹ. Ọọwa lẹ, ịdịrịhụ ịlịta ihihi a rụnyẹ rụ kaka kpịbaa u-uhye nya ịgbọdọ ịtụka-ịtụka lẹlẹ.

¹¹Ọọwa lẹ, aluji nyaa a kele kaka go ang myị ang nya ala ịSọdọm bala iGomora tụ ang oriri nyaa wuu kpa rụ lẹlẹ.

¹²Jaabwọ ká ịLọtụ ọnyị nya ọnyịnịna nya Ebiram ọlẹng, kụ ụ-ụwa ị-ịSọdọm ịnyịnyị lẹ, aluji ịwẹ wu ịLọtụ ọwẹ kpa rụ tụ ang myị ang ịlẹ wuu kọ la.

¹³Ịnyị, ọlẹng ọhẹ ọlẹ kọọwa be bwu ọgbẹwụ ọlẹ kị wu ịLọtụ kpa rụ bwu, a rụnyẹ kele kaka tịrọnụ ya je Ebiram jaabwọ ká ẹla ọọwa wuu la lẹlẹ. Ụka ọọwa, Ebiram ọla iHiburu ọwẹ kụ ju ègbiji nya ịMamrẹ chwẹẹ. ỊMamrẹ ọwẹ ayịdang ri ọla Amọ. ỊMamrẹ ọwẹ ayịdang bala Ẹchịkolu bala Anẹẹ anyịnamwụ anyị a ri angịlẹ kịịwa bala Ebiram anyị kaa yẹjula awụlẹ juwa dẹwụ ta aluji nyaa lẹ.

¹⁴Ahyaahị ká Ebiram wo yẹkẹẹ, nyị wu ịLọtụ ọnyị nya ọnyịnịnọwa kpa rụ bwu ẹwụ lẹ, Ebiram a tụ alẹga ịlẹpwa nyamwụ ịlẹ kị jẹ ẹwụ ọdada guru chajị kị ka rụ ka ọgbẹwụ lẹlẹ. Angịịwa wuu la angịnyị angị ohu ịta da angị iwo kụrụ ineku (318). Ọọwa, ị juwa tịtọ nya aluji ịịwa gbee kị pwụ ịDan ene kị yaa lẹlẹ.

¹⁵Ụka kị pwụ ụwa, Ebiram chị alẹwụ nyamwụ ịwẹ ebwo lụmẹ-lụmẹ. Ọọwa, ị dẹwụ ta aluji nyaa ịwẹ lụka nya odu gbee kị kụrwaa chẹẹchẹẹ lẹ, ị kwaa gbee kị pwụ iHoba o-oye nya ẹtẹ nya epweji nya ịDamasịkọsị lẹlẹ.

¹⁶Ịnyị lẹ, Ebiram bala angịdẹwụ nyamwụ ịwẹ a nu ang myị ang ịlẹ wuu ká aluji nyaa go kpa rụ bwu ẹwụ lẹlẹ. Ị kpa ịLọtụ ayịdang bala anyang bala angịkịla ịlẹ wuu ká aluji ịwẹ wuu kpa rụ lahị-lahị nya, tụ ang-abwọ nyaa wuu ịnyịnyị.

¹⁷Ụka ká Ebiram dẹwụ kụrụ adịrahụ ịKẹdọlawomẹẹ bala ịdịrịhụ aanamwụ ịkịla ịwẹ wuu kpá kọ juwa jẹ nya lẹ, ọ tọ adịrahụ nya ala ịSọdọm ụ-ụgbẹyị ọ-Ọkpọọ nya ịChave lẹlẹ. Ị wụrụ ẹnyị ọkịla nya ọkpọọ ọọwa yẹkẹẹ, “Ọkpọọ nya adịrahụ” ịnyịnyị.

¹⁸Ụka ọọwa, iMelikisẹdẹkị Adịrahụ nya ala ịSalẹm kọ ri ọngọkiliya nya Ohe Oluhye Agụgụ hu ịkaa bala ere ha Ebiram.

¹⁹Ọ wahị kụrụ Ebiram yẹkẹẹ, “Ebiram, ká Ohe Oluhye Agụgụ a wahị kụrụng, ká Ohe Oluhye ọngọ họ uhye-ọgba bala odehe a wahị kụrụng.

²⁰Ká ogbo ā ri nya Ohe Oluhye Agụgụ ọlẹ kọ họ ká kụrụ aluji nyang wuu bwu ẹwụ.” Ịnyị, Ebiram a chị ang myị ang ịlẹ wuu kọ go kpa nya bwu ẹwụ ebwo iwo chiriri lẹ, ọ hu ebwo ọhẹ bwu ẹpwụ nya ebwo iwo ọwẹ ha iMelikisẹdẹkị lẹlẹ.

²¹Ụka ọọwa, adịrahụ nya ala ịSọdọm byi Ebiram yẹkẹẹ, “Ebiram, ang myị ang ịlẹ wuu ká kpa nya bwu ẹwụ lẹ, aa kpa rụ kaka la mẹ. Ká tụụbwọ hi angịnyị nyam ham kị nya chịm ọgụ mẹ.”

²²Ebiram wẹ byoo yẹkẹẹ, “Adịrahụ, wo iro ọlẹ kam wẹẹ nwa ị-ịlahị nya Amkpaa Ohe Oluhye Agụgụ ọngọ họ uhye-ọgba bala odehe mẹ.

²³Iro ọnwanwa nyam ọọwa ri yẹkẹẹ, ḿ juwa ka hu ịngịngịhyẹ nyang ọhẹ-lọhẹ kpa rụ kpong-kpong ka. Ḿ dọmwụ ka ye ukoowu ochiche ọ-kpa gá ang lee ori nya ugbẹtẹ nyang, ọhẹ-lọhẹ kaka. Chajị ọ́-ri ịnyị ká ahụ ayịdang ka yẹkẹẹ, ọwa nyaa họ du kam Ebiram ọlẹ nyị yẹ ri ọlụdụ wẹ lẹlẹ.

²⁴Am ayịdang á juwa ye ịngịngịhyẹ bwu ẹga nyang kpong-kpong dala ang oriri ọlẹ ká angịnyị nyam ri ka ẹpwụ nyaa kaka. Kẹnẹ-kẹnẹ Anẹẹ bala Ẹchịkolu bala ịMamrẹ angịlẹ kị dam ụbwọ ọ-ọgbẹwụ a ka hu ebwo nya ịnyaa haa ụbwaa kem lẹlẹ.”