Read idege ỌMWỤ ỌDADA 16 Bible Online

ỌMWỤ ỌDADA 16 - idege bible

ỌMWỤ ỌDADA 16

¹Ụka ọọwa, iSerayị ahụ nya Ebiram-ḿ ma ọnyị ka. Ọ tị la ọnchẹ ọnyang ọhẹ bwu ọpyị nya ala Ijipiti ká ẹnyị nyamwụ ri ịHẹga.

²Ụka kọ nụwa ịnyịnyịịnyị lẹ, iSerayị à byi Ebiram yẹkẹẹ, “Ayịbam ee, wo mẹ! À tị́ yẹ jaabwọ ká Amkpaa-á ya ọnyị ọhẹ-lọhẹ ham ma kaka-à wẹ lẹ. Lẹẹlẹ, ka ẹga nya ọnchẹ ọnyang nyam mẹ. Ọhẹka, m̀ ka ye ọnyị bwuloo myị.” Ọọwa, Ebiram à myị ju iSerayị lẹlẹ.

³Ebiram kụ ọpyị nya iKenan ẹka iwo chiriri ụka ká iSerayị hu ịHẹga ọnchẹ ọnyang nyamwụ họọ ye nya ahụ-ọnchẹ.

⁴Ịnyị, Ebiram à ka ẹga nya ịHẹga lẹ, ọ jẹnyị lẹlẹ. Ụka ká ịHẹga jẹ ọwa nyị juwa lẹnyị lẹ, ọ dọmwụ nyọka ya ẹhị da iSerayị ayaamwụ bwee lẹlẹ.

⁵Ọọwa lẹ, iSerayị à chị eru ju Ebiram yẹkẹẹ, “Ayịbam, ahụ à ju ọmwụ nya ẹpẹpẹ ọlẹ kam la ịHẹga lẹẹ lẹ. M̀ hu ọnchẹ nyam jung u-ube kpụ ọ jẹnyị kpá lẹ, m̄ dachichi wẹẹ lọọ ẹpẹpẹ wẹ lẹka le? Amkpaa-à jẹ ó-ri am lee ahụ ká ri oku ẹ-ẹpwụ nya ẹlẹwẹ lẹlẹ.”

⁶Ọọwa, Ebiram à wẹ byi iSerayị yẹkẹẹ, “Ọ́ lịnyị aalẹ, ọnchẹ ọlata nyang ịHẹga ayịdang à tị́ ri, jaabwọ kọ háng lẹ, à họọ mẹ.” Ịnyị, iSerayị à juwa kpa ịHẹga nmaanmaa lụmẹ-lụmẹ gbee kọ rụnyẹ rụ hi ẹpwa nya Ebiram lẹlẹ.

⁷Ụka ká ịHẹga juwa jẹ ịnyịnyịịnyị lẹ, olegu-ẹrụ nya Amkpaa ọhẹ a tọọ ọ-ọnụ ẹmwụ nya enyi ọhẹ, ụ-ụgbẹyị nya iChuu ọlẹ kọ dụwa u-ugbileji lẹlẹ.

⁸Olegu-ẹrụ ọọwa byoo yẹkẹẹ, “ỊHẹga, ọnchẹ ọnyang nya iSerayị, ale a tị́ wẹẹ bwu? A tị́ juwa jẹ ka ale?” ỊHaga wẹ byoo yẹkẹẹ, “M̀ jam rụnyẹ rụ hi ayam iSerayị ọlẹ kọ juwa tụm pyịpyị lụmẹ-lụmẹ.”

⁹Ọọwa lẹ, olegu-ẹrụ nya Amkpaa ọwẹ a byoo yẹkẹẹ, “Rụ tịrẹkpẹ kele ka ẹpwa nya ayang ka kpa ịlọng keji họọ yẹẹyẹẹ mẹ.”

¹⁰Olegu-ẹrụ ọwẹ myịmyị byoo yẹkẹẹ, “ỊHẹga, Amkpaa ka họ ká anyị nyang ka pyẹ gbee lụmẹ kị ka jẹ-ẹ waa kpá myị kaka ị-ịlahị wẹẹ.

¹¹Yẹ mẹ, ẹnyị nyang ọwẹ ká jẹ wẹẹ, a ka ya ma ọnyị ọlẹng. A ka wụrụ ẹnyị nyamwụ Ichimẹlụ,[3] chajị a tị́ yẹ jaabwọ ká Amkpaa wo omyi nyang ẹ-ẹpwụ nya akama wẹ lẹ.”

¹²Olegu-ẹrụ ọọwa myịmyị byoo yẹkẹẹ, “ỊHẹga, wo mẹ! Ichimẹlụ ọnyị nyang ọwẹ á ka wo ẹla ka, lala ụnyịrẹ ọlẹ kọ chochi. Ichimẹlụ ayịdang bala angịnyị angịkịla wuu ka ri aluji nya awụlẹ. Ọ ka chị ebwo ẹpwa nyamwụ datị hi aanamwụ ịkịla wuu ịnyịnyị.”

¹³Ọọwa lẹ, ịHẹga a ju Amkpaa ọlẹ kọ ya ẹla tọọ ụ-ụwa ẹnyị yẹkẹẹ, “A ri Ohe Oluhye ọngọ yọyị,” chajị ịHẹga ayịdang yẹkẹẹ, “Ahyu! Am a jẹ yẹ Ohe Oluhye kpá, m̄ jẹ jam hịhị wẹẹ lẹ-ẹ́?”

¹⁴Ọọwa, ị wụrụ ẹnyị nya ịwẹẹlụ ọlụwa “Ịwẹlụ nya iBiyẹlahayị-ịrọyị[4]” lẹlẹ. Ẹmwụ enyi ọọwa juwa ẹ-ẹpwarịrị nya Kades bala Bẹrẹd.

¹⁵Ịnyị lẹ, ịHẹga a ma ọnyị ọlẹng ọọwa ha Ebiram lẹ, Ebiram a wụrụ ẹnyị nyamwụ Ichimẹlụ lẹlẹ.

¹⁶Ebiram gu ẹka iwo ineku kụrụ ịrwọnyẹ (86) ụka ká ịHẹga ma Ichimẹlụ họọ.