Read idege ỌMWỤ ỌDADA 18 Bible Online

ỌMWỤ ỌDADA 18 - idege bible

ỌMWỤ ỌDADA 18

¹Amkpaa Ohe Oluhye myịmyị kele ka ẹga nya Ebiraham lụka nya ẹnụ ochipwuu ọhẹ. Ụka ọọwa, Ebiraham hụhụ ọ-ọnang nya ube nyamwụ ọlẹ kọ kpa ọdụ nwụ́. Ẹpwa nyamwụ ọọwa juwa ọ-ọnụ ipinu ịgọgọ nya Mamrẹ.

²Ụka ọọwa, Ebiraham hu ahị nyamwụ hwaa ka uhye. Ọ chẹhị kaka yẹ anyị alẹng angị ịta ịhyẹ kị gọdayị rịrị ị-ịlahị nyamwụ. Ọ wuleji bwu ọnang nya ube nyamwụ ẹga kọ hụ, rụnyẹ kele ka taa, juwa kpụ eteji haa ụ-ụwa lẹlẹ.

³Ịnyị lẹ, Ebiraham a wẹ yẹkẹẹ, “Ọngọlam, ọ́-ri ká la ẹhị okpunyi ẹ-ẹga nyam lẹ aalẹ, anụ chuchuu kanụ kẹwẹ kaka ju ụga ẹ-ẹpwa nyam chẹẹ mẹ!

⁴Anụ kẹwẹ kaka hụhụ lẹẹ ọ-ọnụ nya okoji kanụ mwụ ịnyọ ẹ-ẹgẹlẹ, ká anjwo a chị́ enyi hanụ hụ́ ata mẹ.

⁵Anụ ba kam kele kaka maga nya ang oriri ochiche-ochiche ọhẹ warị wẹ anụ wẹẹ. Ụka kanụ ri ang oriri ọọwa ene kanụ ka jẹ-ẹ la ogogo, jẹdịyẹ nyanụ kele kịlahị-ịlahị mẹ. Ọlẹ kanụ myị warị wẹ ẹpwa nyam lẹẹ, ịịlẹ la ihi la ihi ene lẹlẹ, anụ cheri kanụ họ ihi ọọwa jịra ham mẹ.” Ọọwa lẹ, angịwẹ a myị jaabwọ ká Ebiraham byaa lẹlẹ.

⁶Ọọwa lẹ, Ebiraham a chị agaga kele ka ẹga nya iSera ahụ nyamwụ u-ube nya ọdụ nyaa lẹ, ọ byoo yẹkẹẹ, “Sera kele ká mẹ ịrụ nya ambakpa ịlẹ kị ka myị abang imiiye, ká ya họ ang oriri ahyaahị ha angga nyahị mẹ.”

⁷Ebiraham myịmyị rụnyẹ-rụnyẹ kele kaka wu ụgba nya ẹna ọlẹ kọ ju eyo hiigu-hiigu ha ọnchẹ nyamwụ nyị nwọọ kịị nyị wọọ kpa warị ahyaahị mẹ.

⁸Ụka kị kpụ ang oriri ọọwa bala iyo nya ẹna ọọwa kpá lẹ, Ebiraham ayịdang la ịlọmwụ a kpa ang oriri ọọwa bala iyo bala enyi ẹmẹ ọ-chụka nya ẹna bala ida nya ẹna kele kịla angga nyamwụ ịwẹ lẹlẹ. Ọọwa lẹ, Ebiraham ayịdang a gọdayị rịrị juwa kpẹhị rịraa ụka kị juwa ri ang oriri ọọwa ọ-ọmwụ nya okoji gbee kị ri kpá lẹlẹ.

⁹Ụka kị ri ang oriri ọọwa kpá, ị tọ Ebiraham ịtọ yẹkẹẹ, “Ale, iSera ahụ nyang a tị́ ji?” Ebiraham wẹ byaa yẹkẹẹ, “Ọ juwa ẹ-ẹpwụ ube nyamwụ.”

¹⁰Ụka ọọwa ọngọhẹ lẹpwụ nya alẹng ịwẹ byi Ebiraham yẹkẹẹ, “Ebiraham wo mẹ! Ụka kọ ka pwụ ịhwọngkịla amachanyị ịịlẹ kpá, am ayịdang juwa ka tịrẹkpẹ warị wẹ ẹga nyanụ. Ụka ọọwa, iSera ahụ nyang ka jẹnyị, ọ ka ma ọnyị ọlẹng hang.” Sera ayịdang tị gọdayị rịrị ọ-ọnụ nya ube nyaa ụka ọọwa lẹ, ọ wo ẹlẹwẹ ká ọlẹng ọọwa juwa ya ta Ebiraham ịnyịnyị.

¹¹Ụka ọwẹ lẹ, Ebiraham ayịdang bala iSera ahụ nyamwụ angị imimiiye chị okwirichi kpá kụnyẹ-kụnyẹ lẹ. Sera ayịdang kpụ oye nya ụrụrụ oyeye lẹ, chajị ụka nya umobyi ọkpụkpụ nyamwụ chịpwụrụ lụka tata kẹkpẹ ene-ene lẹ.

¹²Ụka ká iSera juwa mẹ irya chajị nya ẹla nya ọnyị ọmama nyaa ọọwa, ọ lọọ ahịbwuu lụmẹ. Ọ juwa hụlọ ẹhụ la ịlọmwụ-ịlọmwụ juwa yẹkẹẹ, “Ọlẹ kaam bala Ebiraham ayịbam chị okwirichi kpá kụnyẹ-kụnyẹ wuu lẹ, ahị ka jẹ-ẹ ma ọnyị myị wẹẹ lẹ? Kaam ayịdang á họ ịpyọ la alẹng ọhẹ alẹ kaka lee ayịbam ayịdang ọ-ka ka ẹga nya ọnyang ọhẹ myị alẹ kaka ịnyịnyị.”

¹³Ụka ọọwa, Amkpaa byi Ebiraham yẹkẹẹ, “Ịịyẹ a tị́ du ká iSera ahụ nyang hụlọ ẹhụ, kọ myịmyị juwa yẹkẹẹ, ọwa ayịdang nyị chị okwirichi kụnyẹ-kụnyẹ lẹlẹ, ọwa nyị́ juwa ka ma ọnyị ọhẹ myị alẹ kaka ịnyị?

¹⁴Ebiraham ee! Anụ mẹ ká ịngịngịhyẹ chị Amkpaa ayịdang ọha la ọhọhọ? Ánụ́ jẹ ka aalẹ, ụka kọ ka pwụ ịhwọngkịla amachanyị ịịlẹ kpá, am ayịdang juwa ka mwẹẹkpẹ warị wẹ ẹga nyanụ jaabwọ kam ya jenu ene-ene. Ụka ọọwa, iSera ayịdang ka jẹnyị ma ọnyị ọlẹng pyii lẹ.”

¹⁵Ụka ká iSera wo ịtọ ọlẹ ká Ohe Oluhye Amkpaa juwa tọ Ebiraham, ọ la iSera ayịdang uhi-uhi lụmẹ. Ọ juwa pwa rwarụ yẹkẹẹ, “Ḿ hụlọ ẹhụ ọhẹ ka.” Ụka ọọwa, Ohe Oluhye Amkpaa wẹ byoo yẹkẹẹ, “Sera a hụlọ ẹhụ ịnyịlẹhị, a pwa kaka.”

¹⁶Ụka ká alẹng ịwẹ ya ẹlẹwẹ je Ebiraham kpá lẹ, ị yegiri, myịmyị hu ang ẹdịyẹ nyaa, juwa rụ jahị da koye nya ọpyị nya ịSọdọm lẹ. Ebiraham a kpaa chị pwụ ẹgẹhẹ lẹ. Ọ tịrẹkpẹ rụ hyaa ụ-ụwa lẹlẹ.

¹⁷Ụka ọọwa, Amkpaa juwa ya ẹla ta ịlọmwụ yẹkẹẹ, “Am ka ya ẹla ọlẹ kam lẹẹ ka họ kpụ Ebiraham ịbaa kpong-kpong ka.

¹⁸Chajị alụma nya Ebiraham ayịdang wuu ka ri alụpwọma ọtụka-ọtụka ọnyọọngịrị ị-ịlahị wẹẹ. Chajị bwu ẹga nya Ebiraham ọwẹ, am Ohe Oluhye ayịdang a ka wahị kụrụ alepwoja la datị-datị nya odehe ọlẹ wuu lẹ.

¹⁹Ee, ịnyịlẹhị ịnyị. Am ka ya je Ebiraham pyii lẹ. Chajị Am Amkpaa a chụ Ebiraham kọ ka da anyị nyamwụ ayịdang bala alụma nyaa wuu, ehile kị ka ba ụgbẹyị nyam wuu jẹ, bwula abwẹla ọnyịịla ọhọhọ bala ọ-juwa họ ẹla ọchịla-chịla ẹ-ẹga nya awụlẹ ụka wuu. Chajị kị họ ịnyị lẹ, kaam Amkpaa ayịdang ka jẹ-ẹ họ ọnụ ọmyịmyị nyam wuu jịra ha Ebiraham bala ịwa wuu.”

²⁰Ịnyị lẹ, Amkpaa a wụrụ Ebiraham, ya ẹla tọọ lẹlẹ. Ọ byoo yẹkẹẹ, “Ebiraham, yẹ mẹ. Oja nya ang onyobyi ọhọhọ bala ọhọbịrị ọtụka nya ala ịSọdọm bala ala iGomora wuu, wum Am Amkpaa ayịdang ọyị lẹ!

²¹Chajị nya ọọwa lẹ, Am ayịdang jam hiri eji kele la ịlọm kam ka jẹ jaabwọ ká ẹla ọọwa la ịnyịlẹhị.”

²²Ịnyị lẹ, angị imiiye nyaa a yegiri juwa rụ jahị da koye nya Sọdọm. Ma, Ebiraham ayịdang a gọdayị rịrị chịng ị-ịlahị nya Amkpaa ụ-ụwa lẹlẹ.

²³Ụka ọọwa, Ebiraham myịmyị tụ ju Amkpaa chwẹẹ gụ olene-ene. Ọ byoo yẹkẹẹ, “Amkpaa ee! A ya ká ka ta angịlẹ kị ji ẹpwụ nya ẹla onyobyi ọhọhọ-ka ayịreji kpịlọ bala angịnyị inyibyi lẹ?”

²⁴Ebiraham bịlẹ Amkpaa yẹkẹẹ, “A ya kọ ri ká ye alabwẹla ọnyịịla lala angịnyị angị iwo ịrụ (50) ụ-ụwa ị-Sọdọm, á ka chajị nyaa, āà hịnyọhi alepweji ọwẹ myị wẹẹ ka Adam?

²⁵Ịgọgọ ẹnẹnẹhẹ! Am jẹ ká ahụ Amkpaa ayịdang á ka myị ta alabwẹla ọnyịịla ayịreji bala alabwẹla onyobyi kpong-kpong ka. Ahụ ayịdang lẹpwụ-lẹpwụ ká ri Agaba ọ-cheje ọtụka-ọtụka nya alodehe wuu, anyanyị a tị́ ka jẹ-ẹ họ alabwẹla ọnyịịla ri juwa yaa akama kpịlọ ịnyịnyị? Am ayịdang jẹ yẹkẹẹ, a ka cheje ọchịla-chịla pyịyọọ.”

²⁶Amkpaa wẹ byoo yẹkẹẹ, “Ó-ri kam ka ye alabwẹla ọnyịịla lala angịnyị angị iwo ịrụ (50) ụ-ụwa ị-Sọdọm ị-ịlẹhị aalẹ, Am ka hịnyọhi alụwa chajị nya angịịwa.”

²⁷Ebiraham myịmyị bịlẹ Amkpaa byoo yẹkẹẹ, “Ịnọ, am jẹ kaam ayịdang á ri ịngịngịhyẹ ị-ịlahị nyang ka. Chajị ọrụ nya ọpyị ọlam-ọlam, m ri lẹ. Ma, tị ke ụrụ la ọbịlẹ bịlẹ nyam odu mẹ, Adam.

²⁸Ọ́ tị ri ká alabwẹla ọnyịịla ịwẹ á pwụ ọnụ ka, kị la angịnyị angị iwo ine da ịrụ (45) kem bẹ? A ka ta ala ịSọdọm ayịreji wẹẹ?” Amkpaa wẹ byoo yẹkẹẹ, “Ó-ri ká alabwẹla ọnyịịla ịwẹ á la angịnyị angị iwo ine da ịrụ (45) myị lẹ aalẹ, Ḿ ka taa ayịreji kaka.”

²⁹Ebiraham myịmyị bịlẹ yẹkẹẹ, “Ó-ri ká alabwẹla ọnyịịla á la angịnyị ohu-iye chiriri kem bẹ? Á ka hịnyọhyaa myị ka?” Amkpaa wẹ byoo yẹkẹẹ, “Ó-ri kam ye pwụ angịnyị angị ohu-iye myị ịnyịlẹhị aalẹ, am ka hịnyọhi haa.”

³⁰Ebiraham myịmyị juwa bịlẹ Amkpaa yẹkẹẹ, “Amkpaa, a wụ ẹjẹ koo. Am tị myịmyị jam bịlẹng lẹ. Ọ́ tị ri kị la alabwẹla ọnyịịla iwo ịta kem bẹ?” Amkpaa wẹ byoo yẹkẹẹ, “Ó-ri kam ye pwụ angị ohu kụrụ iwo myị ịnyịlẹhị aalẹ, Am ka hịnyọhi haa.”

³¹Ebiraham myịmyị yẹkẹẹ, “Am ka myịmyị bịlẹ lẹ. Ó-ri ká ye alabwẹla ọnyịịla angị ohu chiriri kem tị bẹ? A ka taa ayịreji wẹẹ?” Amkpaa wẹ byoo yẹkẹẹ, “Ó-ri kam ye pwụ angịnyị angị ohu chiriri myị ụ-ụwa ịnyịlẹhị aalẹ, Am ka chaa da.”

³²Ebiraham myịmyị bịlẹ yẹkẹẹ, “Amkpaa, a wụ ẹjẹ ka Adam. Am ka myịmyị bịlẹng ụka ookpokpo kẹnẹ-kẹnẹ wẹẹ. Ó-ri ká ye alabwẹla ọnyịịla angị iwo chiriri ị-Sọdọm tị bẹ? A ka taa ayịreji wẹẹ?” Amkpaa wẹ byoo yẹkẹẹ, “Ó-ri kam ye pwụ angịnyị angị iwo ụ-ụwa myị ịnyịlẹhị aalẹ, Am ka hịnyọhi haa.”

³³Ụka ká Amkpaa ya ẹla ta Ebiraham kpá lẹ, ọ rụ lẹ, Ebiraham a rụ ka ẹpwa nyamwụ ịnyịnyị lẹlẹ.