Read idege ỌMWỤ ỌDADA 19 Bible Online

ỌMWỤ ỌDADA 19 - idege bible

ỌMWỤ ỌDADA 19

¹Alegu ẹrụ imiiye ịwẹ jẹdịyẹ nyaa gbee kị pwụ epweji nya ịSọdọm lobyi ọọwa. Ụka ọọwa, ịLọtụ hụhụ ọ-ọnụ ogirigba nya epweji ọọwa. Ahyaahị ká ịLọtụ yaa lẹ, ọ wuleji kaka taa ụ-ụgbẹyị juwa kpụ eteji ị-ịlahị nyaa lẹlẹ.

²Ọ byaa yẹkẹẹ, “Anụ ayịbam anyị, anụ chuchuu kanụ kẹwẹ kaka hyehe obyi ẹ-ẹpwa nyam am ọnchẹ nyanụ alẹ chẹẹ mẹ. Kam ka chị́ enyi hụụnụ ata ene kanụ ka nune mẹ. Ụka ká ahị pyẹ lẹ, ene kanụ ka rụ ka ẹga ọlẹ kanụ wẹẹ jẹ ka mẹ.” Ụka ọọwa, angga ịwẹ pwa, byoo yẹkẹẹ, “Ehe, ahị ka nune ẹ-ẹpwa nyang ka. Ojiya nya ayịlọ nyaa, ahị ka nọ gbee ká ahị nyị ka pyẹ lẹ.”

³Ụka ká ịLọtụ juwa bịlaa gbegbegbe lẹ, ị kele kaka ju ụga ẹ-ẹpwa nyamwụ ịnyịlẹhị lẹlẹ. Ụka kị pwụ ẹpwa nya ịLọtụ lẹ, ọ byi anjwo nyamwụ yẹkẹẹ, nyị họ ang oriri ọtụka-ọtụka haa bala ịkaa ọmịrị mịrị-ka mẹ lẹlẹ. Ụka ká ang oriri myị kpá lẹ, angga ịwẹ a ri ang oriri ọọwa lẹlẹ.

⁴Ụka kị hụ ehe gbee pwụ ụka nya une ọnọnọ lẹ, alẹng nya ala ịSọdọm wuu tụ ikolobya bala angịgbahị nyaa a warị wẹ ẹga nya ịLọtụ bwu ẹga myị ẹga nya epweji ọwẹ lẹlẹ. Ahyaahị kị pwụ ụwa, ị kele kaka da koko ju ube nya ịLọtụ ẹga kọọwa ayịdang bala angga nyamwụ ịwẹ hụ.

⁵Ị be ẹkọ byi ịLọtụ yẹkẹẹ, “ịLọtụ, gba alẹng ịlẹ kị jung ụga kpehe hahị kahị họ ụya taa lẹẹlẹẹ mẹ!”

⁶Ịnyị lẹ, ịLọtụ a gba kpehe kele ka ẹga nyaa lẹ, ọ tụ ụgbẹyị ku angga nyamwụ ịwẹ lẹlẹ.

⁷Ọ byaa yẹkẹẹ, “Anụ aligu nyam alẹng ịlọpyị nya Sọdọm, anụ chuchuu, anụ ba. Ọ́ chịla kanụ ka họ ang onyobyi ọlịịwẹ kpong-kpong ka.

⁸Anụ wo mẹ. Am ayịdang la anjwo ịyẹẹnọ ịlẹ kị jẹ ọlẹng ẹnẹnẹhẹ lẹka jam. Am ka gbaa kpehe warị kaka danụ igu, kanụ ka họ ang ọlẹ kọ tọnụ ẹ-ẹga nyaa lẹ. Chajị alẹng ịlẹ lẹ, ị ri angga nyam lẹ, anụ chuchuu kanụ bahyaa ham.”

⁹Ụka ọọwa, angịwẹ byi ịLọtụ yẹkẹẹ, “ịLọtụ, tụ kele hi ẹgẹlẹ pyii! Ahụ ọngga nyahị, a ka dachichi ya jehi ụma nya ang ọlẹ kahị ka họ lẹlẹ? Ó-ri ká tụ kịnyaa hiihi ka aalẹ, ụma nya ang ọlẹ kahị ka họng ẹgẹlẹ lẹẹlẹẹ ka tịpyọ gụ ọlẹ kahị ka họ angga nyang ịwẹ wẹẹ.” Ọọwa lẹ, ị kele juwa tụ ịLọtụ pịpyị, juwa tịtọ kị ka be ukpileku nya ube nyamwụ ene lẹlẹ.

¹⁰Ma, ụka ọọwa, angga nya ịLọtụ ịwẹ kele kaka yụbwọ chị ịLọtụ, gbịlọọ ju ka ube ahyaahị, tụ ụgbẹyị ku gbirong.

¹¹Ịnyị lẹ, angga nya ịLọtụ ịwẹ a họ lẹ, alẹng nya ala ịSọdọm ịwẹ wuu kị juwa gọdayị odehe a kpụ idu chwiichwii lẹ, ị juwa kpa abwọ nyaa ma kpokpokpo, juwa pịlahị nya ụgbẹyị ube lẹlẹ. Ma, ị́ tị yọọ kpong-kpong kaka.

¹²Angga alẹng angị imiiye nya ịLọtụ ịwẹ byoo yẹkẹẹ, “ịLọtụ wo mẹ! Ó-ri ká la ọngọngọhẹ nyang ám e-epweji ọlẹ lẹ aalẹ, a kele kaka ya jaa kanụ ka gba kpehe hi epweji ọlẹ mẹ. Ó-riri kị ri anyị alẹng lee anyị anyang bala ọrụ nyaa wuu lee ọngọngọhẹ nyang ọkịla, aa ya jaa mẹ,

¹³chajị ọlẹ kahị warị lẹẹ lẹ, Ohe Oluhye ayịdang a duuhi ẹrụ warị kahị ka ta epweji ọlẹ ayịreji gbanggbang lẹ. Chajị ọmọnyọ nya ọhọbịrị ọhọhọ bala ang onyobyi ọtụka ọhọhọ nya ala ịSọdọm ịlẹ wuu, chị Ohe Oluhye aga lẹ. Ịnyị a du kọ duuhi ẹrụ warị nyọka tọọ ayịreji lẹẹ lẹ.”

¹⁴Ahyaahị ká ịLọtụ wo ẹla ọọwa lẹ, ọ kele ka ẹga nya alẹng ịlẹ kị juwa tịtọ kị ka ye anyị anyang nyamwụ lẹlẹ. Ọ byaa yẹkẹẹ, “Anụ ịrụ ịhụ nyam, anụ wo mẹ. Anụ wuleji kahị rụ gba kpehe hi epweji ọlẹ ahyaahị mẹ. Chajị Amkpaa Ohe Oluhye jam ka ta epweji nya ịSọdọm ọlẹ ayịreji gbanggbang lẹ.” Ma, ụka kọ ya jaa lẹ, ọ laa lala ọnọọkịla lẹ, ị́ myị jwoo kpong-kpong ka.

¹⁵Ahyaahị ká ahị pyẹ lẹ, alegu-ẹrụ ịwẹ a juwa chị ịLọtụ agaga lẹlẹ. Ị byoo yẹkẹẹ, “ịLọtụ, byi ahụ nyang bala anyị anyang nyang ilimiiye ịlẹ kị jam tang kanụ rụ gba kpehe hi epweji ọlẹ ahyaahị chajị kanụ ka ta ayịreji balaala ịSọdọm ọlẹ kaka mẹ!”

¹⁶Ụka ọọwa ịLọtụ ayịdang juwa họ ịnẹkpẹ, ma, Amkpaa Ohe Oluhye tị yọọ ahyẹẹrwẹrwa. Ịnyị lẹ, alegu-ẹrụ ịwẹ ayịdang a yụbwọ nyaa chị ịLọtụ bala ahụ nyamwụ bala anyị anyang nyamwụ angị imimiiye ịwẹ, juwa gbile aa, juwa kpaa kpehe kele gbee kị pwụ ugumẹ ẹpwa nya ịSọdọm lẹlẹ.

¹⁷Ụka kị kpaa pwụ ugumẹ kpá lẹ, ị byaa yẹkẹẹ, “ịLọtụ, anụ rụnyẹ nya ọhịhị nyanụ mẹ. Anụ chẹhị ẹkpẹ lee ọ-gọdayị ẹ-ẹgẹgẹhẹ ọ-ọkpọọ ọlẹ kpong-kpong koko. Anụ-ụ̀ juwa rụnyẹ gbegbegbe kanụ ka pwụ ịgbọdọ ịlaanyị, chajị kanụ ka be mẹ!”

¹⁸Ma, ịLọtụ wẹ byaa yẹkẹẹ, “Anụ Ayịbam anyị, anụ ya ịnyị ka, chuchuu!

¹⁹Anụ yẹ mẹ, ọlẹ kanụ la ẹhị okpunyi ẹ-ẹga nyam am ọnchẹ nyanụ du kanụ yẹm ahyẹẹrwẹrwa chịm da lẹlẹ. Uhye nya ịgbọdọ ịlẹ kanụ ya, ahị nyị rụ ka lẹ, ọ lam ụrụ lụmẹ. Ọhẹka, ọ́-ri kam kele, ayịreji ọtata ka tọm ụ-ụgbẹyị gbee ká igu ka nwụm ụ-ụwa.”

²⁰ịLọtụ myịmyị bịlẹ byaa yẹkẹẹ, “Anụ chuchuu kanụ bahim kam rụ kaka kpịbaa e-epweji ochiche ọlaanyị chẹẹ mẹ. Ọwa kọ ju chwẹẹ lẹ, ọ ka chịm kpẹẹ la ọpwụpwụ gụ. Ọ ri epweji ochiche odu ịnyị. Anụ bahim kam kele mẹ.”

²¹Ọọwa lẹ, olegu-ẹrụ ọhẹ a byoo yẹkẹẹ, “Ọ hiigu, am ka myịmyị dang ụbwọ lẹ. Aa kele ka epweji ọwẹ ká ya mẹ. Am chị epweji ọwẹ da chajị nyang lẹ.”

²²Olegu-ẹrụ ọwẹ myịmyị byi ịLọtụ bala alẹpwa nyamwụ wuu yẹkẹẹ, “Anụ chị agaga rụ kele ka epweji ọlẹ kị ịLọtụ ya ẹla rụ́ wẹ mẹ. Am juwa ka họ ịSọdọm abwaabwọhẹ ka, gbee kanụ ka pwụ ụwa kpá ene.” Ị wụrụ ẹnyị nya epweji ọọwa, iSowa. Etu nya iSowa ri ang ochiche.

²³Ụka ọlẹ ká ịLọtụ ka pwụ iSowa kpá lẹ, ẹnụ kpehe jajaja lẹ.

²⁴Ahyaahị, lụka ọ-mwaa lẹ, Amkpaa Ohe Oluhye a do ila bala ajwọ lala ekpawẹ nya ila bwu uhye-ọgba kaka rụ epweji nya ịSọdọm bala iGomora wuu lẹlẹ.

²⁵Ila ọọwa kele ta ang myị ang ilepweji imimiiye ịwẹ ayịreji gbanggbang. Tụ angịnyị ehe wuu bala ẹrụ nyaa wuu, tụ apwụ bala amẹ ịlụwa wuu. Ọhẹ-lọhẹ á hi ka, ila ọwẹ rwaa wuu.

²⁶Ọ ri ịnyịlẹhị, olegu-ẹrụ byi ịLọtụ anyị yẹkẹẹ, “Anụ nyị chẹhị ẹkpẹ kpong-kpong koo.” Ma, ahụ nya ịLọtụ lẹ, ọwa tị chẹhị ẹkpẹ. Ịnyị lẹ, ọ gbu, yẹ la ukpeku nya ịma gọdayị rịrị kọkọ ụ-ụwa gbọng lẹlẹ.

²⁷Ụka ká ahị ọọnamwụ pyẹ lẹ, Ebiraham a chị ahị kele la ụtụrụ kaka gọdayị rịrị ẹ-ẹga ọlẹ kọ gọdayị juwa raabwọ bịlẹ ha Ohe Oluhye chajị nya ịSọdọm lala ịnịyẹ chị ehe alẹ lẹlẹ.

²⁸Ịnyị lẹ, Ebiraham a chẹhị kele ka ọkpọọ ẹga ọlẹ ká ala ịSọdọm bala ala iGomora anyị kụ ene-ene lẹlẹ. Ọọwa lẹ, ọ chẹhị kaka yẹ ịmwụ-ila ọlẹ kọ lala ịmwụ-ila nya utiyo ụ-ụwa lẹlẹ.

²⁹Ene ká Ohe Oluhye ta ala ịSọdọm balaala iGomora anyị ịwẹ ayịreji, ọwa ayịdang mẹ irya ju Ebiraham du kọ gba ịLọtụ kpehe bala ọdọdẹpwa nyamwụ wuu bwu ịSọdọm lahị-lahị.

³⁰Ụka ká ịLọtụ kụ epweji nya iSowa chẹẹ, ká uhi ojuju á kpọọ ahị kaka gbee lẹ, ọ mwụ rụ bwu ụwa bala anyị anyang nyamwụ angị imimiiye ịwẹ lẹlẹ. Ọọwa lẹ, ị rụ kele kaka kụ ẹ-ẹpwụ nya ụgbụ nya ajwajwọ u-uhye nya ịgbọdọ lẹlẹ.

³¹Ẹnụtụrụ ọhẹ lẹ, ọnyị anyang ọgbahị nya ịLọtụ a byi ochiche yẹkẹẹ, “Ẹnwa, yẹ wẹẹ, ịLọtụ adahị ọlẹ jam chị okwirichi lẹ! Ọlẹng ọkịla ọhẹ-lọhẹ á tị ji odehe ọlẹ wuu ka ya ẹhị kpụ, ahị ka ma ọnyị ọhẹ-lọhẹ lala anyang ịkịla wuu kaka.

³²Lẹ, kẹwẹ kahị ya ere ha adahị nwa mẹ. Ụka kọ gbu ere lẹ, kahị ka kele chajị kọ ka nọ tahị kahị ma anyị mẹ.” Ọọwa lẹ, ọnyịnamwụ ochiche a myị lẹlẹ.

³³Ụka ká odu hi lẹ, ị kele kaka hu ere ha ịLọtụ adaa nwa gbegbegbe kọ gbu ere nya ịlẹhị-ịlẹhị lẹlẹ. Ọọwa lẹ, ọnyị ọnyang ọgbahị nya ịLọtụ ọwẹ a kele kaka nune ta adamwụ ị-ịbẹẹdị nyamwụ lẹlẹ. Ịnyị lẹ, ịLọtụ adamwụ a jẹbị tọọ lẹlẹ. Ma, jaabwọ ká ere ọwẹ họ ịLọtụ tibi-tibi lụmẹ lẹ, ọwa ayịdang á jẹ ụka ọlẹ kọ họ ẹlẹwẹ datị kpong-kpong lee, ọ́ jẹ ụka ọlẹ ká ọnyị nyamwụ ọwẹ wuleji rụ lụka nya ewu-ụtụrụ hyoo kaka ịnyịnyị.

³⁴Ụka ká ahị pyẹ lẹ, ọnyị ọnyang ọgbahị ọwẹ a byi ochiche yẹkẹẹ, “Am bala adam a nune ẹ-ẹga ookpokpo la awụlẹ la odu ịnịyẹ lẹ. Ma, ụka kọ nọ tam lẹ, ọwa ayịdang á jẹ datị ka. Lẹ, ahị họ lẹ, ahị myịmyị da ere họọ nwa alẹ la odu chajị kọ gbu ere myịmyị mẹ. Kaahụ ka kele alẹ chajị kọ ka jung ẹnyị mẹ. Ọ́ lịnyị lẹ, kaahị angị imimiiye ka ma anyị mẹ.”

³⁵Ịnyị lẹ, ị chị ere ha ịLọtụ adaa nwa gbegbegbe kọ gbu ere la odu ịnyịlẹhị lẹlẹ. Ọọwa lẹ, ọnyị ọnyang ochiche nya ịLọtụ ọwẹ a kele kaka nune ta adamwụ lẹlẹ. Ịnyị lẹ, ịLọtụ a jẹbị tọọ ịnyịnyị lẹlẹ. Ma, ịLọtụ ayịdang a tị jẹ ụka ọọwa datị kpong-kpong kaka lala onyogo.

³⁶Ịịwẹ, ịLọtụ a bwu ju anyị anyang nyamwụ ịwẹ angị imimiiye ẹnyị lụka ọọwa lẹlẹ.

³⁷Ụka ká ọnyị ọnyang ọgbahị nya ịLọtụ ọwẹ ya ẹnyị nyamwụ ọọwa ma ọnyị ọlẹng lẹ, ọ wụrwọọ Mọab lẹlẹ. Etu nya Mọab ri ọnyị o-bwu ẹpwụ nya adam. Mọab ọwẹ ayịdang a ri adịda ogogo nya alụpwọma ọlẹ kị wụrụ ala Mọab wẹ pyịyọọ daalẹ lẹ.

³⁸Ụka ká ọnyị ọnyang ochiche nya ịLọtụ ya ẹnyị nyamwụ ọwa ma ọnyị ọlẹng ịnyịnyị lẹ, ọ wụrwọọ ịBẹnami lẹlẹ. Etu nya ịBẹnami ri, ọnyị o-bwu ẹpwụ nya ọọnam. ịBẹnami ọwẹ ayịdang a ri adịda ogogo nya alụpwọma ọlẹ kị wụrụ ala Amọn wẹ pyịyọọ daalẹ ịnyịnyị lẹ.