Read idege ỌMWỤ ỌDADA 21 Bible Online

ỌMWỤ ỌDADA 21 - idege bible

ỌMWỤ ỌDADA 21

¹Amkpaa họ ọnụ ọmyịmyị nyamwụ jịra ẹ-ẹga nya iSera ịnyịlẹhị jaabwọ kọ myị ọnụ họọ ene-ene ya, ọwa nyị ka họ lẹ, ịnyị lẹ, ọ wahị kụrụ iSera, ahụ nya Ebiraham lẹlẹ.

²Ọọwa, iSera a jẹnyị lẹ, ọ ma ọnyị ọlẹng ha Ebiraham ịnyịlẹhị lụka ọlẹ ká Ohe Oluhye hunọ ene kọ ya je Ebiraham chajị nyamwụ lẹlẹ. Ebiraham ayịdang chị okwirichi kụnyẹ-kụnyẹ ene ká iSera ma ọnyị ọọwa họọ.

³Ebiraham wụrụ ẹnyị nya ọnyị ọọwa Ayịsiki.

⁴Ebiraham da Ayịsiki ụwụwụ ẹnụtụrụ ohaneku nya ọmama nyamwụ jaabwọ ká Ohe Oluhye dọọ ehile ya, nyị họ.

⁵Ebiraham gu ẹka ohu ookpokpo (100) ụka ọlẹ kị ma Ayịsiki ọnyị nyamwụ.

⁶Ị wụrwọọ Ayịsiki chajị iSera yẹkẹẹ, “Ohe Oluhye hu ẹhụ nya ọkẹkẹnị ọtụka ham lẹ. Ọng myị ọng ọlẹ kọ wo oja nya ọkẹkẹnị okpori-kpori ọọwa ka hụlọ ẹhụ nya ọkẹkẹnị ọlẹ tam ịnyịnyị pyii lẹ.”

⁷ISera myịmyị yẹkẹẹ, “Oowo kpá a tị́ ka jẹ-ẹ byi Ebiraham ọrụm yẹkẹẹ, am iSera ahụ nyamwụ ọlẹ nyị ka jẹ-ẹ ri ịnọnyị juwa ya ẹmẹ họọ nyẹ ẹ-ẹpwa nyamwụ ọwa Ebiraham myị wẹẹ? Ma, Ohe Oluhye tị họ kam ma ọnyị ọlẹng ha Ebiraham la okwirichi lẹ.”

⁸Ụka ká Ayịsiki nwa ẹmẹ ọchịchị lẹ, Ebiraham a họ ang oriri ọtụka-ọtụka wụrụ iru nya angịnyị lụmẹ-lụmẹ kele kaka chị ọkẹkẹnị tọọ u-uhye nya ọọwa lẹlẹ.

⁹Ụka ọhẹ juwa ká iSera yẹ Ichimẹlụ ọlẹ ká ịHẹga ọla Ijipiti ma ha Ebiraham kọ juwa kọ ayịlọ ta Ayịsiki ọnyị nyamwụ.

¹⁰Ọọwa, ọ kele kaka byi Ebiraham yẹkẹẹ, “Ayịbam, ku ịHẹga ahụ-ọnchẹ nyang ọwẹ rụ hi ẹpwa nyang bala ọnyị nyamwụ mẹ, chajị am tịtọ ká Ichimẹlụ ọnyị nyamwụ ọwẹ ka ba ịngịngịhyẹ nya ugu nyang la bala Ayịsiki ọnyị nyam kpong-kpong ka.”

¹¹Ụka ọọwa, ọ tọ Ebiraham olujwo lụmẹ chajị, ọ́ há Ebiraham kọọ ku Ichimẹlụ ọnyị nyamwụ ọwẹ rụ hi ịlọmwụ kpong-kpong ka.

¹²Ma, Ohe Oluhye byi Ebiraham yẹkẹẹ, “Ebiraham, a wụ ẹjẹ chajị nya Ichimẹlụ ọnyị nyang lee ịnamwụ, ahụ-ọnchẹ nyang ọwẹ kaka. Ọkọkọ nya ọọwa lẹ, aa họ jaabwọ ká iSera ya wẹ mẹ, chajị bwu ẹga nya Ayịsiki bala anyị ịtụma nyamwụ wuu, ị ka wo ẹnyị-ehe nyang ahụ Ebiraham odehe ọlẹ wuu pyịyọọ lẹlẹ.

¹³Ma, am Ohe Oluhye ka họ ká Ichimẹlụ ka ri adịda ogogo nya epwoja ọtụka-ọtụka chajị nyọlẹ kọ bwu ẹpwụ nyang kpehe.”

¹⁴Ọọwa lẹ, Ebiraham a chị ahị lụtụrụ gbegbegbe lẹ, ọ hu ịbang nya ugba nya iyo ọlẹ kịị ya enyi ju lẹ, ọ chị́ enyi ọnwanwa ju u-ugba ọọwa lẹ, ọ hwoo chụ ịHẹga ụmwụchwọ lẹ, ọọwa lẹ, ọ hu ịkaa họọ ịnyịnyị lẹ. Ọ byaa yẹkẹẹ, “Anụ nyị rụ hi ẹpwa nya ọọwa alẹ mẹ lẹlẹ.” Ịnyị lẹ, ịHẹga ọwẹ bala ọnyị nyamwụ a rụ bwu ẹpwa nya Ebiraham ịnyịlẹhị lẹ, ị juwa ga tụ ugbileji-ugbileji nya iBiyẹchẹba da ịnyịnyịịnyị lẹlẹ.

¹⁵Ụka ká enyi ọnwanwa nya ịHẹga anyị myị, ká Ichimẹlụ ọnyị nyamwụ juwa kpịbwọ nya imyi-enyi lẹ, ọ tụụbwọ hyoo hụhụ ụ-ụrụrụ nya okoji ochiche ọhẹ lẹlẹ.

¹⁶Ọọwa lẹ, ịHẹga a juwa ya ẹla ju ịlọmwụ yẹkẹẹ, “Ám a ka hụ ám ẹgẹlẹ, juwa kpẹhị yẹ igu ogbugbu nya Ichimẹlụ ọnyị nyam ọlẹ koo.” Ịnyị lẹ, ụka ká ịHẹga rụ bwu ẹga nya Ichimẹlụ hwẹ̀ẹẹ lala apatẹ ohu ịta (300) lẹ, ọ hụhụ ụ-ụwa juwa jida gboo lẹlẹ.

¹⁷Ụka ká Ohe Oluhye wo omyi nya ida ojeje nya Ichimẹlụ ịnyịnyị, olegu-ẹrụ nyamwụ ọhẹ ya ẹla bwu epwoohe. Ọ byi ịHẹga yẹkẹẹ, “ỊHaga, ịịyẹ a tị́ ri akama nyang? A ju uhi ka. Ohe Oluhye wo omyi nya ida ojeje nya Ichimẹlụ ọnyị nyang lẹ.

¹⁸Wuleji ká kele ka ẹga nya Ichimẹlụ ká kọọ ida mẹ ẹnwa. Ọ́ juwa ka gbu ka, chajị Ohe Oluhye ka họọ kọ ka yẹ ri adịda ogogo nya epwoja ọtụka-ọtụka ị-ịlahị kpá wẹẹ.”

¹⁹Ịnyị lẹ, Ohe Oluhye a wụrụ ahị nya ịHẹga lẹ, ọ chẹhị kaka yẹ ịwẹẹlụ ọhẹ ụ-ụwa lẹlẹ. Ọọwa lẹ, ọ kele kaka chị́ enyi myị ịbang nya ugba nya iyo ọlẹ kị kpa ụ-ụwa lẹ, ọ myịmyị chị́ enyi ha ọnyị nyamwụ nwa ịnyịnyị lẹlẹ.

²⁰Ịnyị lẹ, Ohe Oluhye a juwa kpẹhị rịrị Ichimẹlụ ọwẹ bwu ụka nya enjwo-enjwo nyamwụ gbee ju ka ọgbahị nyamwụ lẹlẹ. Ichimẹlụ kụ ẹpwa nyamwụ u-ugbileji ọhẹ ẹ-ẹga ọlẹ kọ ri ọmwụkpẹ ọtụka-ọtụka.

²¹Ẹnyị nya ugbileji ọọwa a ri ịParan lẹ. Ịnamwụ ye ahụ họọ bwu ọpyị nya ala Ijipiti.

²²Ụka ọọwa, Adịrahụ Abimẹlẹkị bala iFikolu ọgẹwụ nya angịdẹwụ nyamwụ kele ka ẹga nya Ebiraham. Ọọwa lẹ, adịrahụ à byi Ebiraham yẹkẹẹ, “Ahị ri ibeenu yẹkẹẹ, Ohe Oluhye kaa juwa tang lụmẹ ẹ-ẹpwụ nya ang myị ang nyang wuu.

²³Bwula ọọwa lẹ, am tịtọ ká ka nwa iro lẹnyị nya Ohe Oluhye ham lẹẹlẹẹ yẹkẹẹ, ahụ Ebiraham ọwẹ nyị́ ka mị-ị họm ri lee ọ-họ anyị nyam wuu bala anyị ịtụma nyam wuu ri kpá ẹnẹnẹhẹ kaka, chajị jaabwọ kaam ayịdang jene họng ọnahị lẹ, ká tịtị ka họm am ayịdang ọnahị bala alẹpwa nyam tụ alọpyị ọlẹ ịkịla wuu, ịnyịnyị mẹ.”

²⁴Ọọwa lẹ, Ebiraham a myị lẹ, ọ nwa iro ọọwa họọ ịnyịlẹhị lẹlẹ.

²⁵Anchẹ nya Abimẹlẹkị Adịrahụ tị nu Ebiraham ịwẹẹlụ nya enyi ọhẹ ọlẹ kọ wu. Ịnyị lẹ, Ebiraham a tịrọnụ nya ẹla ọọwa ya je Abimẹlẹkị jaabwọ kọ la kaka ba lẹlẹ.

²⁶Abimẹlẹkị wẹ byi Ebiraham yẹkẹẹ, “Ebiraham, ḿ wo ẹlẹwẹ koo chajị ahụ ayịdang á ya ẹla ọlẹ jem ẹnẹnẹhẹ lẹka. Am tị wo ẹlẹwẹ bwu ọnụ nya ọngọngọhẹ ọkịla ka ịnyịnyị lẹ, ḿ jẹ ọngọlẹ kọ họ ẹlẹwẹ kpong-kpong ka.”

²⁷Ịnyị lẹ, Ebiraham a go ịna bala ịkpịlọ lụmẹ-lụmẹ kpa kịla Abimẹlẹkị Adịrahụ lẹ, ị nwa iro ọọwa ha awụlẹ lẹlẹ.

²⁸Ebiraham chụ agba nya ịkpịlọ irwiye ịhyẹ, kpaa kele kaka gọdayị datị-datị.

²⁹Ọọwa lẹ, Abimẹlẹkị a tọọ ịtọ yẹkẹẹ, “Ebiraham, ịịyẹ a tị́ ka họ lagba nya ịkpịlọ irwiye ịlẹ ká chụ gọdayị datị?”

³⁰Ụka ọọwa, Ebiraham wẹ byi Abimẹlẹkị yẹkẹẹ, “M tụụbwọ hi ịkpịlọ irwiye ịwẹ hang, chajị kaahụ ayịdang ka ri ibeenu nyam yẹkẹẹ, ịwẹẹlụ nya enyi ọlẹ nyị ri ịnyam ịnyịlẹhị lẹ.”

³¹Ịnyị, ụka kọ ye ịkpịlọ ịịwa kpá, kọọwa bala Ebiraham angị imimiiye nwa iro ha awụlẹ ụ-ụwa chajị nya ịwẹẹlụ ọọwa lẹ, ị wụrụ ẹnyị nya ẹga ọọwa iBiyẹchẹba jaabwọ ká etu nyamwụ ri lẹlẹ.

³²Ụka ká Abimẹlẹkị Adịrahụ bala Ebiraham nwa iro ọọwa ha awụlẹ ụ-ụwa i-iBiyẹchẹba kpá lẹ, Abimẹlẹkị bala iFikolu ọgẹwụ nya angịdẹwụ nyamwụ à hu ang rụ tịrẹkpẹ kele ka ọpyị nya ala iFilisitiya nyaa lẹlẹ.

³³Ịnyị lẹ, Ebiraham a hu ẹjẹ nya okoji ọhẹ ọlẹ kị wụrụ ịtamarisiki kaka tọ ị-iBiyẹchẹba lẹlẹ. Ebiraham gbịgba ha Amkpaa ọlẹ kọ juwa hịhị gbe oyi myị oyi ụ-ụwa ẹ-ẹga ọọwa ịnyịnyị.

³⁴Ebiraham kụ ọ-ọpyị nya ala iFilisitiya lala ọngga lụka tata.