Read idege ỌMWỤ ỌDADA 22 Bible Online

ỌMWỤ ỌDADA 22 - idege bible

ỌMWỤ ỌDADA 22

¹Ụka kọ nọ chẹẹ, Ohe Oluhye tịtọ kọ ka ma ọmyịmyị ọlala nya Ebiraham yẹ. Ọọwa, Ohe Oluhye a be ẹkọ wụrwọọ yẹkẹẹ, “Ebiraham ee!” Ebiraham myị ẹkọ yẹkẹẹ, “Ayịbahị, am lẹẹ.”

²Ohe Oluhye byoo yẹkẹẹ, “Ebiraham, kele ká hu ọnyị nyang olookpokpo, Ayịsiki ọlẹ kọ háng lụmẹ, ká kpọọ kele ká nwọọ, ká hwoo kịla iya ọ-rụ ila ham am Ohe Oluhye u-uhye nya ọgbọdọ ọhẹ ọ-ọpyị nya iMoriya mẹ. Ụka ká pwụ ụ-ụwa kpá, m ka mẹ ọgbọdọ ọlẹ ká ka ka jẹng.”

³Ịnyị lẹ, Ebiraham a chahị lụtụrụ gbegbegbe lẹ, ọ mwụ ịwụ ọ-kpa kịla iya lẹlẹ. Ọ kpa Ayịsiki bala anchẹ alẹng nyamwụ angị imiiye bala ụnyịrẹ obyiyó nyamwụ. Ụka kị hu olo chụ obyiyó ọọwa kpá lẹ, ị hu ang ẹdịyẹ nya ẹga ọlẹ ká Ohe Oluhye chabwọ ya joo, ya nyị kaka hu Ayịsiki kịla iya mẹ lẹlẹ.

⁴Ẹnụtụrụ ọhata nya ẹdịyẹ nyaa lẹ, Ebiraham a chẹhị kele kịlahị nyamwụ ka yẹ ọgbọdọ ọọwa ẹ-ẹga ọlụrụ pyiipyii lẹlẹ.

⁵Ụka ọọwa, Ebiraham byi anchẹ alẹng ịwẹ yẹkẹẹ, “Anụ bala ụnyịrẹ a hụ ám ẹ-ẹgẹlẹ gbem am bala Ayịsiki mẹ. Ahị jam ka kele kaka gbịgba ha Ohe Oluhye u-uhye ọgbọdọ ọlaanyị wẹẹ. Ụka kahị họ kpá lẹ, ahị ka nya tịrẹkpẹ warị kaka tọnụ ẹ-ẹgẹlẹ lẹlẹ.”

⁶Ọọwa lẹ, Ebiraham a hu ịwụ ọ-kpa kịla iya ha Ohe Oluhye ịịwa chụ Ayịsiki ọnyị nyamwụ lẹ, ọwa ayịdang a hu ila ọlẹ kị ka kpa kịla iya kpa ụ-ụbwọ bala ẹma lẹlẹ. Ịnyị lẹ, Ebiraham bala Ayịsiki a hu ang ẹdịyẹ nya ọgbọdọ ola iMoriya ọọwa ụbwaa lẹlẹ.

⁷Ụka kị juwa jẹ ịnyịnyịịnyị lẹ, Ayịsiki a be ẹkọ wụrụ adamwụ Ebiraham yẹkẹẹ, “Adada ee!” Ebiraham myị yẹkẹẹ, “Ayịsiki, am myị lẹ.” Ọọwa lẹ, Ayịsiki a byoo yẹkẹẹ, “Ahị kpa ịwụ lẹ, ahị kpa ila lẹ, ee lẹ, ale, ọnyị-ọkpịlọ ọlẹ kahị ka kpa kịla iya a tị́ ji mẹ?”

⁸Ebiraham wẹ byi Ayịsiki yẹkẹẹ, “A chuko ka, ọnyị nyam. Ohe Oluhye ayịdang ka hu ọnyị ọkpịlọ ọlẹ kahị ka kpa kịla iya họọ hahị la ịlọmwụ kpá.” Ịnyị lẹ, ịwa angị imimiiye a juwa rụ ka ẹga ọlẹ kị juwa jẹ ka lẹlẹ.

⁹Ụka ká Ebiraham bala Ayịsiki pwụ ẹga ọlẹ ká Ohe Oluhye byaa, Ebiraham me ogidi ọlẹ kọ ka kịla iya ọọwa. Ọ mwụ ịwụ guru ụ-ụwa, ọ wu Ayịsiki ọnyị nyamwụ, chị ori mẹnẹ-mẹnẹ lẹ, ọ hwoo nụwa u-uhye nya ịwụ nya iya ọkịlakịla ọọwa lẹlẹ.

¹⁰Ịnyị, Ebiraham a hu ẹma nyamwụ lẹ, ọ nịra ụbwọ kpaaa, kọ ka nwụ Ayịsiki lẹlẹ.

¹¹Ahyaahị ká Ebiraham juwa ka nwụ Ayịsiki lẹ, olegu-ẹrụ nya Amkpaa Ohe Oluhye ọhẹ a be ẹkọ ya ẹla gboo ta Ebiraham bwu epwoohe yẹkẹẹ, “Ebiraham, Ebiraham!” Ebiraham myị ẹkọ yẹkẹẹ, “Am lẹẹ ẹgẹlẹ.”

¹²Ịnyị lẹ, olegu-ẹrụ ọwẹ a wẹ yẹkẹẹ, “Ebiraham, ba chịng mẹ. A nwụ Ayịsiki ọnyị nyang ọwẹ lee ọ-họọ abwaabwọhẹ kokoo! Ebiraham, wo mẹ! Am ayịdang ri ibeenu jẹ yẹkẹẹ, ahụ Ebiraham ri ọngọ ju Ohe Oluhye nyang ihi lụmẹ lẹ, chajị Ayịsiki ọnyị ọlẹng nyang olookpokpo ọwẹ á kọng ẹhị la o-hu kpa ka kịla iya ha Ohe Oluhye kpong-kpong kaka.”

¹³Ahyaahị ká Ebiraham jahị kpata kọ chẹhị kẹkpẹ nyamwụ lẹ, ọ yẹ omilodo ọhẹ ọlẹ ká anyiri wu a-achụ nyamwụ ụ-ụwa lẹlẹ. Ọọwa, ọ kele kaka woo lẹ, ọ hwoo kpa kaka kịla iya ọ-rụ ila ha Ohe Oluhye, ọkọnụ nya Ayịsiki ọnyị nyamwụ ụ-ụwa lẹlẹ.

¹⁴Ebiraham wụrụ ẹnyị nya ọgbọdọ ọọwa yẹkẹẹ, “Amkpaa ri Ọngọ họ ọbaba ha ọngịnyị ehe họọ myị.” Ịnyị a du ká angịnyị kaa kpa ya pyịyọọ daalẹ yẹkẹẹ, “Ohe Oluhye ayịdang a ri Ọngọ họ ọbaba nya ọngịnyị ehe họọ, u-uhye nya ọgbọdọ nya Amkpaa lẹ.”

¹⁵Olegu-ẹrụ ọwẹ myịmyị be ẹkọ ya ẹla ta Ebiraham ụka oheeye bwu epwoohe.

¹⁶Ọ byi Ebiraham yẹkẹẹ, “Amkpaa Ohe Oluhye nyị yẹkẹẹ, am Ohe Oluhye a wẹẹ ya ẹla tang lẹ. Am jam kpa ẹnyị nya ịlọm am Ohe Oluhye nwa iro hang alẹ lẹ. Ang odudu nya ọọwa ri chajị nyọlẹ ká ọnyị nyang olookpokpo Ayịsiki ọlẹ kọ háng lụmẹ, á kọng ẹhị la o-hu kpa kaka kịla iya ham am Ohe Oluhye ka.

¹⁷Am Ohe Oluhye ka wahị kụrụng lụmẹ-lụmẹ. M̀ ka họ ká anyị ịtụma nyang ka pyẹ ju iru lala ịdịchụ iluhye-ọgba lee lala apwụ bala amẹ. Anyị ịtụma nyang ka kụrụ aluji nyaa chẹẹchẹẹ, ye ọpyị nyaa wuu la.

¹⁸M̀ ka wahị kụrụ anyị ịtụma nyang lụmẹ-lụmẹ gbee ká alepwoja ịkịla la datị-datị nya odehe ọlẹ wuu ka juwa bịlẹm am Ohe Oluhye yẹkẹẹ, Am nyị wahị kụrụ ịwa ịnyịnyị lala anyị ịtụma nyang mẹ. Am Ohe Oluhye a ya ịnyị chajị nyọlẹ kaahụ Ebiraham ju ihi nya ẹla ọlọnụ nyam lẹlẹ.”

¹⁹Ịnyị lẹ, ụka ká Ohe Oluhye ya ẹlẹwẹ ta Ebiraham kpá lẹ, ọwa bala Ayịsiki a rụ tịrẹkpẹ kele ka ẹga ọlẹ ká anchẹ nyamwụ angị imiiye ịwẹ juwa gọdayị bala ụnyịrẹ nyamwụ gbaa lẹlẹ. Ọọwa lẹ, Ebiraham bala alẹdịyẹ nyamwụ anyị ịwẹ wuu a hu ang ẹdịyẹ rụ kele ka ẹpwa nyaa i-iBiyẹchẹba ọlẹ kị kụ lụka ọọwa lẹlẹ.

²⁰Ụka kọ nọ chẹẹ lẹ, Ebiraham a wo oja yẹkẹẹ, iMilika, ahụ nya ịNahọ ọnyịnamwụ ọlẹng nyị ma anyị alẹng lụmẹ-lụmẹ ha ịNahọ lẹlẹ.

²¹Ẹnyị nya anyị ịịwa a lẹẹ lẹ: Uusi ri ọgbahị nyaa wuu bala iBusi ọlẹ kị ma hiloo bala iKemwẹlụ ọlẹ kọ ri adịda nya Aram.

²²Anyị ịkịla ri ịKẹsẹdị bala ịHasọ bala iPilidachị bala iJidilafụ bala

²³ỊBẹtụwẹlụ adịda nya iRibeka. Anyị ineku ịlẹ iMilika a ma ha ịNahọ ọnyịnịna nya Ebiraham lẹ.

²⁴ỊNahọ myịmyị ma anyị ine ịkịla wẹẹ. IRewuma ahụ-ọnchẹ ọlẹ ká ịNahọ ye a maa họọ lẹ. Ẹnyị nyaa ri ịTẹba bala ịGaham bala ịTahachị bala Maaka.