Read idege ỌMWỤ ỌDADA 23 Bible Online

ỌMWỤ ỌDADA 23 - idege bible

ỌMWỤ ỌDADA 23

¹ISera ahụ nya Ebiraham ri ehe lala ẹka ohu ookpokpo da ẹka iwo imiiye kụrụ irwiye (127) ene kọọ gbu.

²ISera gbu ụ-ụwa i-iKiriyatị-aba ọlẹ kị wụrụ iHebirọn ọ-ọpyị nya iKenan. Ọ tọ Ebiraham olujwo lụmẹ lẹ, ọ juwa jida bala o-bida chajị nya igu nya iSera ahụ nyamwụ lẹlẹ.

³Ịnyị lẹ, Ebiraham a wuleji bwu ẹdawụ nyamwụ kele ka ẹga nya ala iHiiti lẹ, ọ byaa yẹkẹẹ,

⁴“Anụ ala iHiiti wuu, anụ wo mẹ. Anụ wuu jẹ kam ri ọngga ám ọ-ọpyị nyanụ. Lẹ, am jam bịlẹnụ kanụ ka be ọpyị nyanụ ham ra kam ka ju ogu nya ahụ nyam iSera eji ụ-ụwa.”

⁵Ụka ọọwa, ala iHiiti ịwẹ byi Ebiraham yẹkẹẹ,

⁶“Agaba Idu olihi ọtụka, ahị wuu jẹng ká ri adịrahụ ọtụka ọhẹ ám ọ-ọpyị nyahị ẹgẹlẹ. Lẹ, ọpyị o-ju ogu eji ọlẹ kọ hiigu gụ wuu ọ-ọpyị nyahị lẹ, a mẹ ụchụ nyamwụ mẹ. Aalẹ, ọngọ la ọpyị ọọwa ka tụụbwọ hyoo hang, aa ju ahụ nyang eji ụ-ụwa lẹ, chajị ahị wuu myị ọnụ hang lẹ.”

⁷Ọọwa, Ebiraham a wuleji gọdayị kọkọ ẹ-ẹpwarịrị nya ala iHiiti wuu lẹ, Ọ hiri egbeju nyamwụ kpẹẹ haa ụ-ụwa lẹlẹ.

⁸Ọọwa lẹ, Ebiraham a wẹ byaa yẹkẹẹ, “Am jẹ kanụ tịtọ nyọka be ọpyị nyanụ ham ịnyịlẹhị lẹlẹ, anụ chuchuu, kanụ bịlẹ Ẹfụrọn ọnyị nya iSohaa ham chẹẹ mẹ!

⁹Anụ byi Ẹfụrọn kọ tụụbwọ hi Ụgbụ nya ịMakịpẹla ọlẹ kọ lalẹẹ ọ-ọnụmẹ nya ọpyị nyamwụ, chajị kam ka rọọ lokpoko bwu ụbwọ nyamwụ jịra lẹẹlẹẹ ị-ịlahị nyanụ alẹ mẹ, chajị kọ ka yẹ ri ọpyị o-ju ogu eji nyam am ayịdang mẹ.”

¹⁰Ụka ọọwa, Ẹfụrọn ọwẹ ayịdang hụhụ hụwa ẹ-ẹpwarịrị nya ala iHiiti ịkịla ịlẹ wuu kị jịra ụ-ụwa ọ-ọnụ ogirigba nya epweji nyaa. Ọọwa lẹ, Ẹfụrọn a wẹ Ebiraham ẹlẹwẹ gboo ị-ịlahị nya aluche nya ala iHiiti ịwẹ wuu yẹkẹẹ,

¹¹“Ayịbahị, chuchuu, a ya ịnyị ka, adam! Am tịtọ kam ka hu ọpyị nyam ọlẹgẹwẹ wuu ga hang tụ ụgbụ ọlụwa ọwẹ ịnyịnyị. Am jam hwoo ga hang lẹẹlẹẹ i-ijata nya alịnyahị wuu lẹ. Aa ju ahụ nyang eji ụ-ụwa mẹ, ayịbahị.”

¹²Ịnyị lẹ, Ebiraham a myịmyị hirikpẹẹ ha ala iHiiti myịmyị lẹlẹ.

¹³Ọọwa lẹ, Ebiraham a wẹ Ẹfụrọn ụ-ụwa ị-ịlahị nya ala iHiiti ịịwa wuu yẹkẹẹ, “Ẹfụrọn, wo mẹ! A họ lụmẹ lẹ, adam. Ma, chuchuu, ye okpoko bwu ụbwọ nyam mẹ, chajị am tịtọ kam ka ra ọpyị ọwẹ ra wuu lẹpwụ-lẹpwụ bwu ẹpwụtụbwọ nyang pyii, ene kam ka ju ogu nya ahụ nyam eji ụ-ụwa lẹ.”

¹⁴Ẹfụrọn myịmyị wẹ byi Ebiraham yẹkẹẹ,

¹⁵“Ọ hiigu ayịbahị. Ịịyẹ okpoko onyoowuru ohu ine (400) a tị́ ri ẹ-ẹga nyam am bala ahụ ene? Lẹ, ye ọpyị ọwẹ ká ju ahụ nyang eji ụ-ụwa mẹ.”

¹⁶Ịnyị lẹ, ụka ká Ebiraham myị ọnụ ká ihi ọọwa gu awụlẹ lẹ, ọ kele kaka kpa okpoko onyoowuru ohu ine ọọwa warị kaka nwụ Ẹfụrọn uri nya ọpyị ọọwa ụ-ụwa i-ijata nya ala iHiiti ịkịla wuu jaabwọ ká ịnya nya ọpyị ọọwa la lẹlẹ. Ịnyị lẹ, ụka kị me ilo ọlala nya okpoko ọọwa kpá, kọ jịra jaabwọ ká alụwa kaa họ lẹ, Ẹfụrọn a ye okpoko ọọwa bwu ụbwọ nya Ebiraham ị-ịlahị nya aluche wuu lẹlẹ.

¹⁷Ịịwẹ, ọpyị ọla ịMakịpẹla nya Ẹfụrọn wuu tụ ụgbụ ọlụwa bala ekeji ịlụwa wuu kaka ju ka ọbaba nyamwụ wuu a yẹ ri nya Ebiraham ẹnụmwụ ọọwa lẹlẹ. Ọpyị ọọwa juwa koye nya ọmwẹnụ-ụtụrụ nya Mamrẹ.

¹⁸Ala iHiiti ịlẹ wuu kị juwa ọ-ọnụ ogirigba nya epweji nyaa wuu ri ibeenu nya Ebiraham ẹnụ ọọwa yẹkẹẹ, Ebiraham nyị ra ọpyị ọwẹ bwu ụbwọ nya Ẹfụrọn ịnyịlẹhị lẹ.

¹⁹Ahyaahị ká Ebiraham nwụ uri nya ọpyị ọọwa kpá lẹ, ọ kele kaka ju ogu nya iSera ahụ nyamwụ eji ẹ-ẹpwụ nya ụgbụ ọọwa ị-ịMakịpẹla lẹlẹ. ỊMakịpẹla ọọwa juwa ọ-ọmwẹnụ-ụtụrụ nya ịMamrẹ ọlẹ kị wụrụ iHebirọn ọpyị nya iKenan.

²⁰Ịnyị lẹ, ọpyị ọlẹ kọ ri nya ala iHiiti bala ụgbụ ọlụwa ene-ene a yẹ ri ang-ugu nya Ebiraham ọlẹ kọ tụụbwọ hi da nya ọpyị o-ju ogu eji nya angịnyị nyamwụ wuu lẹlẹ.