Read idege ỌMWỤ ỌDADA 25 Bible Online

ỌMWỤ ỌDADA 25 - idege bible

ỌMWỤ ỌDADA 25

¹Ebiraham ye ahụ ọkịla ọlẹ kị wụrụ iKetura.

²Ẹnyị nya anyị nyamwụ ịlẹ kọ ma ha Ebiraham ri iSimran bala iJokichan bala iMedan bala iMidiyan bala Ichibakị bala iChuwa.

³Anyị nya iJokichan ri ịChẹba bala ịDẹdan. ỊDẹdan a ma ụma nya ala Achurim bala ala iLetuchim bala ala iLewumim lẹ.

⁴Ọnyị nya Ebiraham ọlẹ kị wụrụ iMidiyan ma anyị alẹng angị ịrụ. Ị wụrwaa Efa bala Ẹfẹẹ bala ịHanọkụ bala Abida bala Elidaa. Ịịwẹ anyị ịlẹ ká iKetura ma ha Ebiraham a la lẹ.

⁵Ene ká Ebiraham ka gbu, ọ go ang-ugu nyamwụ wuu ha Ayịsiki.

⁶Ụka ọọwa, ọ chị ang-abwọ nyamwụ ịhyẹ ebwo ga ha anyị nya ịhụ-anchẹ ịlẹ ká Ebiraham ye ịnyịnyị. Ụka kọ gaa ahị ịnyị kpá lẹ, ọ kwaa rụ kele kaka kụ ọ-ọpyị ọkịla hi Ayịsiki lẹlẹ. Ọpyị ọọwa ji koye nya ọmwẹnụ-ụtụrụ.

⁷Ebiraham ri ehe lala ẹka ohu ookpokpo da ẹka iwo irwiye kụrụ ịrụ (175) ene kọọ gbu.

⁸Ụka ká Ebiraham chị okwirichi kụnyẹ-kụnyẹ lẹ, ọ gbu lẹlẹ. Ọọwa lẹ, ị jwoo eji lala anyadamwụ anyị ịkịla lẹlẹ.

⁹Ayịsiki bala Ichimẹlụ a ju adaa eji lẹ. Ị jwoo eji ụgbụ nya iworu ọlẹ kị wụrụ ịMakịpẹla ọlẹ kọ ju ịMamrẹ chwẹẹ. Ọ juwa koye nya ọmwẹnụ-ụtụrụ nya ịMamrẹ. Ọpyị o-ju egu eji ọọwa a ri ọpyị nya Ẹfụrọn ọnyị nya iSohaa ọla iHiiti ene-ene lẹ.

¹⁰Ebiraham a ra ọpyị ọọwa bwu ẹga nya Ẹfụrọn bala alịnyaa ene-ene lẹ. Ụ-ụwa, ọ ju iSera ahụ nyamwụ eji ene-ene ịnyịnyị lẹ.

¹¹Ụka ká Ebiraham gbu kpá, Ohe Oluhye wahị kụrụ Ayịsiki ọnyị nyamwụ lụmẹ. Ụka ọọwa, Ayịsiki kụ ẹ-ẹga ọlẹ kị wụrụ iBiyẹlahayị-ịrọyị.

¹²Ẹnyị nya anyị nya Ichimẹlụ ọlẹ ká ịHẹga ọla Ijipiti ọnchẹ nya iSera ma ha Ebiraham a lẹẹ lẹ.

¹³INebayotu kọ ri ọgbahị nyaa wuu. Angịkịla ri ịKẹdaa bala Adibiilu bala iMibisam

¹⁴bala iMchima bala iDumaa bala ịMasa

¹⁵bala ịHadad bala ịTẹma bala iJetuu bala ịNafichi bala iKedemaa kọ ri ọnyị ohyẹẹkpẹ nyaa wuu.

¹⁶Ọnyị ọnyọnyọọnyị lẹpwụ nya anyị alẹng angị iwo kụrụ imiiye ịlẹ ká Ichimẹlụ ma ri adịda ogogo nya ẹpwụma nya ịlọmwụ wuu. Ẹpwụma iwo kụrụ imiiye nyaa ịwẹ myị ẹnyị nya adaa ogogo ẹ-ẹga myị ẹga bala epweji myị epweji ọlẹ kị kụ ịnyịnyị.

¹⁷Ichimẹlụ gu ẹka ohu ookpokpo da ẹka iwo ịta kụrụ irwiye (137) ene kọọ gbu. Ọọwa lẹ, ị jwoo eji lala anyadamwụ anyị ịkịla lẹlẹ.

¹⁸Anyị ịtụma nya Ichimẹlụ wuu nọ ẹpwa nyaa bwu ọpyị nya ịHavila kele kaka pwụ ọpyị nya iChuu. Ịwa bala ala Ijipiti a ri oyi ẹpwa kele koye nya ọmwẹnụ-ụtụrụ lẹ. Ị kụ ụ-ụgbẹyị ọlẹ kịị bwu kele ka ọpyị nya ala Asiriya. Anyị ịtụma nya Ichimẹlụ bala anyị ịtụma nya Ayịsiki kụ ẹpwa lụrụ hi awụlẹ lụmẹ lala aluji nya awụlẹ.

¹⁹Ọlẹ a ri oja chajị nya anyị ịtụma nya Ayịsiki ọnyị nya Ebiraham lẹ.

²⁰Ayịsiki gu ẹka iwo ine ene kọọ ye ahụ. Ẹnyị nya ahụ nyamwụ ọọwa ri iRibeka. Ẹnyị nya adamwụ ẹpwa ri ịBẹtụwẹlụ. IRibeka la ọnyịnịna ọlẹng ọhẹ ọlẹ kị wụrụ iLeban. Ịwa wuu ri ala Aramiya ịlẹ kị kụ ọ-ọpyị nya ịPadan-aram.

²¹Ụka ọọwa, Ayịsiki raabwọ bịlẹ Ohe Oluhye ọnyị chajị ahụ nyamwụ iRibeka-á ma ọnyị lẹka. Ohe Oluhye wo abwọ ọrịrị nyamwụ. Ọ họ ká ahụ nyamwụ jẹnyị.

²²Ụka kọ nọ chẹẹ, ẹpwụ juwa họ iRibeka lala anyị imiiye nyaa juwa ma uya ta awụlẹ ẹ-ẹpwụ nya ẹpwụ nyamwụ. Ụka kọ lọọ ahịbwuu lụmẹ, ọ juwa tọ ịlọmwụ ịtọ yẹkẹẹ, ang ọlanyị a tị́ lẹẹ họm ịlẹ mẹ? Ọọwa lẹ, ọ kele kaka tọ Amkpaa wo kọ ka ya joo lẹlẹ.

²³Ụka ọọwa, Amkpaa wẹ byoo yẹkẹẹ, “IRibeka wo mẹ! Anyị la imiiye juwa ẹ-ẹpwụ nyang lẹ! Ụka ká maa kpá, ị ka yẹ ri ẹpwụma imiiye. Anyewa nyang ịwẹ ka ri alẹla nya awụlẹ. Ọngọhẹ lẹpwụ nyaa ka la ọngịrị gụ ọngọkịla. Ọngọgbahị ka yẹ kaka ji ekpeleji nya onjwo nyamwụ.”

²⁴Ụka ọlẹ ká ụka nya ọnyị ọmama nya iRibeka pwụ, ọ ma anyewa ịnyịlẹhị.

²⁵Ọlẹ kọ ma jene la ọmịla gbuu lala ụgbọlẹ. Ọ bwu egbii pwọọọ ẹ-ẹga myị ẹga nyamwụ wuu lala adu nya ọbagụ. Ịnyị a du kị wụrụ ẹnyị nyamwụ Ịsọ lẹ.

²⁶Ahyaahị, ọ ma ọngọkịla ọlẹ kọ yụbwọ chị Ịsọ ị-ịchẹtẹ nyamwụ. Ịnyị a du kị wụrụ ẹnyị nyamwụ iJekọbụ lẹ. Ayịsiki gu ẹka iwo ịrwọnyẹ ụka ọlẹ kị ma anyewa ịlẹ họọ.

²⁷Ụka ọlẹ ká Ịsọ bala iJekọbụ nwa angịnyị, Ịsọ ayịdang ri ọngọ durwe, chajị ọmwụkpẹ ọtụka-ọtụka, ọ ri lẹ. Ma, iJekọbụ tị ri ọngọlẹ kọ kaa hụ ẹ-ẹpwa-ẹpwa kem. Ọ la wụlẹlẹ lụmẹ. Ọ́ kaa ya ẹla bwu ọnụ ka.

²⁸Ịsọ há Ayịsiki gụ iJekọbụ, chajị Ịsọ kaa nwụ iyo họọ ri ụka myị ụka. Ma, iRibeka lẹ, iJekọbụ a tị há ọwa gụ Ịsọ lẹ.

²⁹Ẹnụtụrụ ookpokpo ọhẹ juwa ká iJekọbụ juwa kpa ang iyiyi họ. Ụka ọọwa, Ịsọ tị nya wẹ bwu urwe limyi-limyi.

³⁰Ụka ọọwa, Ịsọ bịlẹ iJekọbụ ang oriri nyamwụ yẹkẹẹ, “IJekọbụ, chuchuu bwu ang iyiyi nyang ịnyẹrị-nyẹrị ịwẹ ham ri chẹẹ mẹ! M̀ jam ka kpụ ịbwọ limyi lẹ.” Ịnyị a du kị wụrụ ẹnyị ọkịla nyamwụ Ẹdọm[5] lẹ.

³¹IJekọbụ byi Ịsọ yẹkẹẹ, “Tụụbwọ hi ọngọgbahị oriri nyang ham kam bwu ang iyiyi nyam hang kwiwa mẹ.”

³²Ịsọ yẹkẹẹ, “Kam lẹẹ ka gbugbu limyi lẹ, ịịyẹ ọngọgbahị oriri a tị́ ka họ ham ene?”

³³IJekọbụ byi Ịsọ yẹkẹẹ, “Ó-ri ká ka hu ọngọgbahị oriri nyang ham ra ịnyịlẹhị lẹ aalẹ, a nwa iro ham ịnyị mẹ.” Ọọwa lẹ, Ịsọ a nwa iro ha iJekọbụ lẹ, ọ tụụbwọ hi ọngọgbahị oriri nyamwụ rịra iJekọbụ ịnyịlẹhị lẹlẹ.

³⁴Ịnyị lẹ, iJekọbụ a ya ịkaa bala ang iyiyi nyamwụ ọọwa ha Ịsọ ri bala ang ọnwanwa lẹlẹ. Ụka ká Ịsọ ri ang oriri ọọwa kpá lẹ, ọ wuleji rụ kpehe yẹhị da ọngọgbahị oriri nyamwụ bwee lẹlẹ.