Read idege ỌMWỤ ỌDADA 26 Bible Online

ỌMWỤ ỌDADA 26 - idege bible

ỌMWỤ ỌDADA 26

¹Ụka ọhẹ juwa ká imyi ọtụka-ọtụka nwụ ọ-ọpyị ọlẹ ká Ayịsiki anyị kụ. Imyi ọtụka ọlịnyị nwụ ọ-ọpyị ọọwa lụka nya Ebiraham ayịdang ẹnẹhẹ ịnyịnyị lẹ. Imyi ọọwa nwụ lụmẹ gbee ká Ayịsiki mwụ rụ kele ka epweji nya ịGẹra. Ọ kele kaka kụ ta Abimẹlẹkị Adịrahụ nya ala iFilisitiya lẹlẹ.

²Ene ká Ayịsiki ka mwụ rụ kele ka epweji nya ịGẹra, Amkpaa kele ka ẹga nya Ayịsiki kaka byoo yẹkẹẹ, “A mwụ rụ ka ọpyị nya ala Ijipiti koo! E-epweji ọkịla ọlẹ kam wẹẹ ka mẹjẹng, ọ-ọpyị nya ala iFilisitiya ịlẹ, a ka mwụ rụ ka kụ lẹ.”

³Ọọwa lẹ, Amkpaa a byi Ayịsiki yẹkẹẹ, “Ayịsiki, aa kụ ám ọ-ọpyị nya ala iFilisitiya ọlẹ mẹ. Ó-ri ká myị họ ịnyị aalẹ, Am Ohe Oluhye ayịdang ka hụ tang ụka wuu, Am ka wahị kụrụng nya ịlẹhị-ịlẹhị. Am ka hu ọpyị ọlẹ wuu hang bala anyị ịtụma nyang wuu, chajị am ayịdang ka họ ọnụ ọmyịmyị nya iro ọnwanwa ọlẹ kam nwa ha adang Ebiraham ene-ene jịra pyii lẹ.

⁴M ka họ ká anyị ịtụma nyang ka pyẹ ju iru lala ịdịchụ iluhye-ọgba. M̀ ka hu ọpyị ọlẹ wuu ha anyị ịtụma nyang wuu. Bwu ẹga nya anyị ịtụma nyang, am Ohe Oluhye a ka wahị kụrụ alẹpwụma ịkịla ilodehe ọlẹ wuu lẹlẹ.

⁵Am ayịdang ka họ ọnụ ọmyịmyị nyam ịwẹ wuu jịra chajị Ebiraham ju ihi nya ehile bala ọna ọdada bala myị kpa ehile nyam ịlẹ wuu kam dọọ. Ọ họ ẹla ọlọnụ nyam wuu jịra ịnyịnyị.”

⁶Ọọwa, Ayịsiki a kụ e-epweji nya ịGẹra lẹlẹ.

⁷Ụka ọọwa, ala ịGẹra tọ Ayịsiki ịtọ chajị nya iRibeka ahụ nyamwụ yẹkẹẹ, “Ọnyang oyina a tị́ wẹ kaahụ bala ọwa bajẹ?” Ayịsiki wẹ byaa yẹkẹẹ, “Ọnyadam ọnyang ịnyị.” Ayịsiki ya ịnyị chajị, ọ mẹ irya yẹkẹẹ, ọ́-ri kọọwa nyị ya ẹla nya ịlẹhị, ala ịGẹra ịwẹ nyị ka nwụ ọwa, kịị nyị ka ye iRibeka, chajị iRibeka há ụhị lụmẹ.

⁸Ụka kọ nụwa ịnyịnyịịnyị, Abimẹlẹkị Adịrahụ nya ala iFilisitiya chẹhị kaka yẹ Ayịsiki bala iRibeka ahụ nyamwụ bwu iwindo nya ube nyamwụ. Ọ yaa kị juwa kọ ayịlọ ta awụlẹ lala ahụ bala ọrụ.

⁹Ahyaahị ká Abimẹlẹkị yaa, ọ be ẹkọ wụrụ Ayịsiki kele. Ọ tọọ ịtọ yẹkẹẹ, “Ayịsiki, ịịyẹ a tị́ du ká mẹ ọnụ ọkịla jem yẹkẹẹ, iRibeka ahụ nyang ọlẹ nyị ri ọnyadang ọnyang?” Ayịsiki wẹ byoo yẹkẹẹ, “Am chuko ọ́-ri kanụ jẹ iRibeka nyị ri ahụ nyam, anụ ka nwụm hyoo la, a du kam ya ịnyị lẹ.”

¹⁰Abimẹlẹkị wụ ẹjẹ tọọ yẹkẹẹ, “Ẹla ọlanyị a tị́ họhọ ịnyị? Ịnọ, ọ́-ri ká ọngọhẹ nya angịnyị nyam á da ẹla-ahụ nyang bẹ-ẹ̀? Ayịsiki, ịnọ à mịla jam tụụhị ọnụ nya igu kahị ka họ ang onyobyi ba Ohe Oluhye lẹ.”

¹¹Ahyaahị lẹ, Abimẹlẹkị a da ọna juwa gbile angịnyị nyamwụ wuu ụbwọ ụ-ụrụ yẹkẹẹ, “Anụ wo mẹ, ọngọngọhẹ nyanụ a yụbwọ gu Ayịsiki lee ọ-họ iRibeka ahụ nyamwụ abwaabwọhẹ koo. Ọng myị ọng ọlẹ kọ haa abwọhẹ lẹ aalẹ, ahị ka nwụ ọngọọwa kẹhị pyịyọọ lẹlẹ.”

¹²Ẹ-ẹpwụ-ẹpwụ nya ẹka ọọwa, Ayịsiki wu ẹrụ ụ-ụwa ị-ịGẹra. Amkpaa wahị kụrụ ẹrụ nyamwụ ọọwa lụmẹ gbee ká ang nya ẹrụ nyamwụ ịịwa chị anyị da ịlaa mwụba-mwụba lụmẹ-lụmẹ.

¹³Amkpaa juwa wahị kụrụ Ayịsiki kele kịlahị-ịlahị gbee ká Ayịsiki yẹ kaka ri ọlụdụ ọtụka-ọtụka.

¹⁴Ọ la iru nya ịna bala ịmwụ lụmẹ-lụmẹ. Ọ la anchẹ lụmẹ-lụmẹ ịnyịnyị. Ụka ká ala iFilisitiya yẹ ụdụ ọtụka nya Ayịsiki ịwẹ wuu lẹ, Ayịsiki a juwa jwaa ẹ-ẹhị lụmẹ-lụmẹ lẹlẹ.

¹⁵Bwula ijiiji nya ala iFilisitiya ọọwa, ị kele kaka go ịpyị tụ ịwẹẹlụ ịlẹ wuu ká anchẹ nya Ebiraham wu họọ ụ-ụwa ene-ene kọọ gbu ku.

¹⁶Ụka ká Abimẹlẹkị yẹ ká Ayịsiki juwa nwa kele kịlahị-ịlahị ẹ-ẹpwụ nya ang ọlala nyamwụ, ọ be ẹkọ wụrụ Ayịsiki. Ọ byoo yẹkẹẹ, “Ayịsiki, wo mẹ! Ụmụmẹ ọlala nyang jam kịlaahị ahị alọpyị ọlẹ kịla lẹ. Lẹ, wuleji ká go ang-abwọ nyang wuu ká rụ hi ịpyị nyahị alẹ mẹ!”

¹⁷Ụka ká Abimẹlẹkị byi Ayịsiki ịnyị lẹ, Ayịsiki a wuleji rụ kele kaka kụ ụ-ụwa ọ-Ọkpọọ nya ala ịGẹra lẹlẹ.

¹⁸Ayịsiki kele ka ma ịwẹẹlụ nya Ebiraham adamwụ ịwẹ wu myịmyị, chajị ala iFilisitiya táa ku ụka ká Ebiraham gbu kpá. Ọọwa lẹ, Ayịsiki a wụrwaa ẹnyị jaabwọ ká adamwụ jwaa ẹnyị ene-ene lẹlẹ.

¹⁹Anchẹ nya Ayịsiki kele kaka wu ịwẹẹlụ ọkịla ọhẹ ọ-Ọkpọọ nya ala ịGẹra ẹ-ẹga ọlẹ kị nọ ẹpwa. Enyi lụmẹ ẹ-ẹpwụ nya ịwẹẹlụ ọọwa, chajị ị woo gbee kị be enyi ene kumm.

²⁰Ụka ọlẹ ká angịgbikpịlọ nya ala ịGẹra yẹ ịwẹẹlụ ọọwa, ị mwẹla ta angịgbikpịlọ nya Ayịsiki. Ị byaa yẹkẹẹ, “Ịwa ala ịGẹra nyaa la ịwẹẹlụ lẹ.” Ụka ọọwa, Ayịsiki wụrụ ẹnyị nya ịwẹẹlụ ọọwa Ẹsẹkị ọlẹ ká etu nyamwụ ri ịwẹẹlụ ọlẹ kị mwẹla ju.

²¹Anchẹ nya Ayịsiki tụụbwọ hyoo haa. Ị kele kaka wu ịwẹẹlụ ẹ-ẹga ọkịla. Ala ịGẹra ịwẹ myịmyị rwarụ taa u-uhye nyamwụ. Ayịsiki myịmyị wụrụ ịwẹẹlụ ọọwa iSitina[6].

²²Ọọwa lẹ, Ayịsiki a mwụ rụ hi ẹgẹwẹ kele kịlahị kaka kụ ụ-ụwa lẹlẹ. Ọ myịmyị wu ịwẹẹlụ ọkịla ụ-ụwa. Ugbẹnyị lẹ, ala ịGẹra á ya ẹlẹlẹhẹ taa u-uhye nyamwụ kaka. Ọọwa, Ayịsiki a wụrụ iwẹẹlụ ọọwa iRehobotu[7] lẹlẹ. Ang odudu ri ọwa ayịdang yẹkẹẹ, “Ụgbẹnyị lẹ, Amkpaa ya ẹga ọpwọọ da hahị lẹ. Ang wuu ka nwa kele kịlahị-ịlahị hahị ẹgẹlẹ lẹ.”

²³Ayịsiki rụ bwu ẹgẹwẹ kele ka iBiyẹchẹba.

²⁴Lodu ọọwa, Amkpaa chị ịlọmwụ ehe mẹjọọ ụ-ụwa. Ọ ya ẹla tọọ byoo yẹkẹẹ, “Am ayịdang a ri Ohe Oluhye nya adang Ebiraham lẹ. A ju uhi ka. Am ka juwa tang. Am ka wahị kụrụng. Am ka họ ká anyị ịtụma nyang ka pyẹ lụmẹ-lụmẹ jaabwọ kam myị ọnụ ha ọnchẹ nyam Ebiraham ene-ene.”

²⁵Ayịsiki me ogidi okiliya ha Amkpaa ụ-ụwa. Ọọwa, ọ gbịgba ha Ohe Oluhye ụ-ụwa lẹlẹ. Ịnyị lẹ, Ayịsiki a ya ube nya ọdụ nyamwụ yeji ụ-ụwa lẹ, anchẹ nyamwụ a wu ịwẹẹlụ ọkịla ụ-ụwa lẹlẹ.

²⁶Ụka ọọwa, Abimẹlẹkị Adịrahụ bala Ahusatị ọngọ jwoo irya nya ụkụrwọ bala iFikolu ọgẹwụ nya angịdẹwụ nyamwụ bwu ịGẹra kaka yẹ Ayịsiki.

²⁷Ịnyị lẹ, Ayịsiki a taa ịtọ byaa yẹkẹẹ, “Ẹẹla ịyẹ, a tị́ kpanụ kpa wẹ ẹpwa nyam alẹ? M mẹ anụ a tị́ jum uji gbee kanụ kum rụ hi ọpyị nyanụ?”

²⁸Ịnyị lẹ, angịwẹ a wẹ byi Ayịsiki yẹkẹẹ, “Ayịsiki wo mẹ. Ahị ayịdang ri ibeenu jẹ myịmyị yẹkẹẹ, Amkpaa ayịdang kaa juwa tang ụka wuu. Ịnyị a du kahị warị lẹẹ wẹ ẹga nyang alẹ, kaahị bala ahụ ka nwa iro ha awụlẹ ẹ-ẹpwụ nya ọnụ ọmyịmyị nya ịlẹhị-ịlẹhị lẹlẹ.”

²⁹Ị byi Ayịsiki myịmyị yẹkẹẹ, “Lẹ, ahị tịtọ ká ka nwa iro hahị alẹ ya ọwa Ayịsiki ọlẹ nyị́ ka họhị ịngịngịhyẹ onyobyi kpong-kpong ka, jaabwọ kahị ayịdang á họng ịngịngịhyẹ onyobyi ka. Ma, kahị họ ọnahị kpang yẹẹyẹẹ gbee pwụ ụka ọlẹ kahị tụụbwọ hing rụ la okpunyi. Lẹẹlẹẹ, ahị wo jẹ yẹkẹẹ, ahụ Ayịsiki ri ọngịnyị nya ahị ọwawa ọtụka nya Amkpaa lẹ.”

³⁰Ịnyị lẹ, Ayịsiki a họ ang oriri ọtụka-ọtụka ha angịwẹ lẹ, ị ri ang nwa ang ọnwanwa ịnyịnyị ẹ-ẹpwa nyamwụ lẹlẹ.

³¹Ụka ká ahị pyẹ lụtụrụ gbegbegbe lẹ, Ayịsiki bala angịwẹ a nwa iro ọọwa ha awụlẹ lẹlẹ. Ịnyị lẹ, Ayịsiki a kpaa chị rụ lokpunyi lẹ, ị yẹ ri aligu ẹnụ ọọwa lẹlẹ.

³²Ẹnụtụrụ ọọwa-ọọwa, anchẹ nya Ayịsiki kele kaka ya joo yẹkẹẹ, “Ayịbahị, ahị wu ịwẹẹlụ nyahị gbee kahị wu enyi ọyị alẹ lẹ!”

³³Ayịsiki wụrụ ẹnyị nya ịwẹẹlụ ọọwa iChiba[8]. Ịnyị a du kị wụrụ ẹnyị nya epweji ọọwa iBiyẹchẹba pyịyọọ daalẹ lẹ.

³⁴Ụka ká Ịsọ gu ẹka iwo ine lẹ, ọ ye ịhụ imiiye lẹlẹ. Ẹnyị nyaa ri iJuditi ọnyị nya iBiyeri ọla iHiiti bala ịBasịmatị ọnyị nya Elọn ọla iHiiti ịnyịnyị.

³⁵Ịhụ nya Ịsọ angị imimiiye ịwẹ yẹ ọhịhị nya Ayịsiki bala iRibeka akama lụmẹ kaka kpoye.