Read idege ỌMWỤ ỌDADA 28 Bible Online

ỌMWỤ ỌDADA 28 - idege bible

ỌMWỤ ỌDADA 28

¹Ụka ká Ayịsiki wo ẹla nya iRibeka ọọwa, ọ wụrụ iJekọbụ. Ọ byoo yẹkẹẹ, “IJekọbụ wo mẹ, am wahị kụrụng lẹ, a ka pyẹẹẹ. Ẹla ọlẹ kam ya dang e-eji alẹ ri yẹkẹẹ, á ka ye ahụ bwu ọpyị nya ala iKenan ịlẹ kahị kụ lẹẹ kpong-kpong ka.

²Lẹẹlẹ, wuleji ká rụ kele ka ẹpwa nya ịnang kaka ye ahụ bwu ụwa mẹ. Ụka ká pwụ ịPadan-aram lẹ, aa kele ka ẹpwa nya ịBẹtụwẹlụ adịda nya ịnang mẹ. Ọnyị ọnyang nya iLeban ọnyịnịna nya ịnang a ka ye lẹ.”

³Ọọwa lẹ, Ayịsiki a wahị kụrụ iJekọbụ myịmyị yẹkẹẹ, “Ohe Oluhye Agụgụ ka họ ká anyị nyang ka lụmẹ myị ẹga myị ẹga wuu. Ọ ka họng ká ka yẹ ri adịda ogogo nya ẹpwụma lụmẹ-lụmẹ.

⁴Ohe Oluhye ka wahị kụrụng bala anyị ịtụma nyang wuu lụmẹ-lụmẹ jaabwọ ká ahị ọwawa ọọwa dọmwụ bwu ẹga nya Ebiraham ugbeene lụka nyamwụ. Ohe Oluhye a họ ká ọpyị ọlẹ ká ri ọngga lẹẹ ám alẹ, a yẹ kaka ri ọpyị nyang ahụ ayịdang lụbwọ-lẹta ị-ịlahị pyịyọọ, jaabwọ ká Ohe Oluhye ayịdang hwoo ha Ebiraham ene-ene.”

⁵Ịịwẹ Ayịsiki a bwu tụụbwọ hi iJekọbụ rụ kele ka ọpyị nya ịPadan-aram, kele ka ẹpwa nya ịnamwụ, kọ ka kele ka ẹga nya iLeban ọlẹ kọ ri ọnyị nya ịBẹtụwẹlụ ọla Aramịya lẹ. ILeban ayịdang a ri ọnyịnịna ọlẹng nya iRibeka ọlẹ kọ ma Ịsọ bala iJekọbụ lẹ.

⁶Ụka ọọwa, ká Ịsọ wo oja yẹkẹẹ, Ayịsiki nyị wahị kụrụ iJekọbụ, doo ẹrụ kele ka ịPadan-aram kaka ye ahụ bwu ụwa lẹ, chajị Ayịsiki adaa nyị da iJekọbụ ehile ịnyịnyị yẹkẹẹ, “IJekọbụ, a ye ahụ bwu ọpyị nya ala iKenan kpong-kpong ka.”

⁷Ịsọ jẹ yẹkẹẹ, iJekọbụ nyị ju ihi nya ẹla ọlẹ ká adamwụ bala ịnamwụ nyị ya kpụ nyị rụ ka ịPadan-aram ịnyị ịnyịlẹhị lẹlẹ.

⁸Ụka ọwẹ kpangga, Ịsọ ayịdang a jẹ yẹkẹẹ, ahụ oyeye bwu ọpyị nya iKenan nyịwa nyị́ há adịdọwa kpong-kpong ka wẹẹ lẹ.

⁹Ọọwa lẹ, Ịsọ a kele ka ẹga nya Ichimẹlụ ọnyị nya Ebiraham kaka ye ọnyị ọnyang nyamwụ ọlẹ kị wụrụ ịMahalatị ọlẹ kọọwa bala iNebayotu bwu ịnịna lẹlẹ. ỊMahalatị ọọwa, a ri ahụ ọhata nya Ịsọ lẹ.

¹⁰Ahyaahị ká Ayịsiki wahị kụrụ iJekọbụ kpá lẹ, iJekọbụ a hu ang nya ẹdịyẹ bwu iBiyẹchẹba kele ka ịHaran lẹlẹ.

¹¹Ụka kọ jẹ gbegbegbe ká odu gwọọ hi ụ-ụgbẹyị lẹ, ọ pẹ ka ẹpwamẹ kaka hyehe ụ-ụwa lẹlẹ. Ọ kele kaka hu ẹjwọ ọhẹ da ịlọmwụ e-egbeju lẹ, ọ nune ụ-ụwa lẹlẹ.

¹²Ụka kọ juwa nune ịnyịnyịịnyị, ọ la ụlaa la odu, kọ chẹhị kaka yẹ ọchọọnyẹ oludiyo ọhẹ ọlẹ kọ bwu epwoohe warị lalaala kaka yi eji ẹ-ẹga nyamwụ. Ọ chẹhị kaka yẹ alegu-ẹrụ ịhyẹ lụmẹ-lụmẹ kị juwa kpụ uhye nya ọchọọnyẹ ọwẹ kele ká ịkịla nyaa juwa hireji wúrū-wùrū ịnyịnyịịnyị.

¹³Ọọwa, ọ chẹhị kaka yẹ Amkpaa u-uhye nya achinege nya ọchọọnyẹ ọọwa lẹlẹ. Ịnyị lẹ, Ohe Oluhye a yẹkẹẹ, “IJekọbụ, Am ayịdang a ri Amkpaa Ohe Oluhye nya Ebiraham adang ọgbahị bala Ohe Oluhye nya Ayịsiki adang lẹ. Wo mẹ, am Ohe Oluhye ka hu ọpyị ọlẹ ká kụ wẹ alẹ hang bala anyị ịtụma nyang wuu kọ ka yẹ ri ịnyanụ pyịyọọ lẹ.

¹⁴Anyị ịtụma nyang wuu ka pyẹ ju iru lala ugburuja ọlọpyị. Ị ka pyẹ kele ka ọmwẹnụ-ụtụrụ bala ọmwẹnụ-obyi. Ị ka pyẹ ka ẹtẹ-ẹtẹ ka edii-edii. Bwu ẹga nya anyị ịtụma nyang wuu, am Ohe Oluhye a ka wahị kụrụ alẹpwụma ịkịla ilodehe ọlẹ wuu lẹlẹ.

¹⁵M̀ ka juwa tang ụka wuu. M̀ ka juwa keng ụka wuu ẹ-ẹga myị ẹga ọlẹ wuu ká ka ka ịnyịnyị. M̀ ka kpẹhị rịrịng gbee kam ka kpang tịrẹkpẹ warị wẹ ọpyị ọlẹ myịmyị wẹẹ. Ḿ ka jẹkpẹ dang kpá ẹnẹnẹhẹ kaka gbee pwụ ụka ọlẹ kam ka họ ọnụ ọmyịmyị nyam wuu jịra hang jaabwọ kaam ayịdang myị ọnụ hang ene-ene.”

¹⁶Ụka ká iJekọbụ chị ahị-une, ọ yẹkẹẹ, “Etemeee! Ọ ri Amkpaa ayịdang mịla jam ẹ-ẹgẹlẹ, ọọwa, m jẹ ka lẹẹ lẹ?”

¹⁷Ụka kọ la iJekọbụ uhi-uhi lụmẹ, ọ yẹkẹẹ, “Ahyu! Ẹga ọlịgọgọ ọtụka ọlanyị a tị́ lẹẹ mẹ? M jẹ ká ẹgẹlẹ kpangga a ri ube nya Ohe Oluhye ayịdang lẹ. Ẹgẹlẹ ayịdang kpangga a myịmyị ri ọnụ ogirigba nya epwoohe mịlẹ-mịlẹ ịnyịnyị lẹlẹ.”

¹⁸Ahyaahị ká iJekọbụ chị ahị la ụtụrụ gbegbegbe lẹ, ọ kele kaka hu ẹjwọ ọlẹ kọ ya da egbeju wu eji ụ-ụwa rịrị kọkọ lẹlẹ. Ọọwa, ọ hu ida yẹ hụ ẹjwọ ọọwa ẹ-ẹpwayịrẹtẹ lẹlẹ.

¹⁹Ịnọ, ị wụrụ ẹnyị nya epweji ọọwa iLusi ene-ene. Ma, iJekọbụ wụrwọọ ịBẹtẹlụ[9].

²⁰Ụka ọọwa, iJekọbụ myị ọnụ ha Ohe Oluhye ụ-ụwa yẹkẹẹ, “Ohe Oluhye, ọ́-ri ká ka myị-ị hụ tam, ká ka juwa gbem ẹ-ẹpwụ nya ẹdịyẹ nyam wuu, ká ka juwa kpam la ang oriri bala ang o-ye kụrụ,

²¹bala ọ-kpam nya tịrẹkpẹ wẹ ọpyị nya adam myịmyị ẹ-ẹpwụ nya okpunyi ịnyịnyị aalẹ, Ahụ Amkpaa a ka ri Ohe Oluhye nyam nya ịlẹhị-ịlẹhị pyịyọọ lẹlẹ.

²²Lẹ, ẹjwọ ọ-kpa kpịtịya ọlẹ kam ya wu eji lẹẹ, ẹgẹlẹ tịtị ka ri ang o-ju ẹgẹlẹ ẹjẹẹ yẹkẹẹ, ẹgẹlẹ kpangga nyị ka ri ẹga ọraabwọ hang ahụ Ohe Oluhye pyii lẹ. M̀ ka hu ebwo ọhẹ ẹ-ẹpwụ nya ebwo iwo bwu ẹpwụ nya ang myị ang ọlẹ wuu kaahụ Ohe Oluhye ka ya ham, tịrẹkpẹ hang.”