Read idege ỌMWỤ ỌDADA 31 Bible Online

ỌMWỤ ỌDADA 31 - idege bible

ỌMWỤ ỌDADA 31

¹Ụka kọ nụwa ịnyịnyịịnyị, iJekọbụ wo ká anyị nya iLeban juwa yẹkẹẹ, “IJekọbụ go ang myị ang nya iLeban adahị la wuu lẹ. Ang nya adahị ịlẹ kọ go la a du kọ kpụ ụdụ ọtụka-ọtụka wẹ lẹ.”

²IJekọbụ myịmyị yẹ jaabwọ ká ọháha ọlẹ ká iLeban ayịdang la ẹ-ẹga nyamwụ juwa chụ hi gụ olene-ene ịnyịnyị.

³Ụka ọọwa, Amkpaa byi iJekọbụ yẹkẹẹ, “IJekọbụ, wuleji ká rụ tịrẹkpẹ kele ka ẹga nya alẹpwa nyanụ ọ-ọpyị nya adang anyị mẹ. Am ayịdang ka juwa tang ụka wuu.”

⁴Ụka ọọwa, iJekọbụ du ẹrụ kaka wụrụ iRichẹlụ bala iLiya ịhụ nyamwụ byaa nyị ba ọwa warị wẹ ẹpwamẹ ẹ-ẹga ọlẹ kọọwa nyị juwa kpa ịkpịlọ ri amẹ.

⁵Ụka kị pwụ ụwa, iJekọbụ byaa yẹkẹẹ, “Anụ wo mẹ, m jẹ kam há adanụ yẹẹyẹẹ lẹẹlẹẹ jaabwọ kam họ́ọ lụka nya ọgbanyẹ kaka. Ma, Ohe Oluhye nya adam anyị á tị tụụbwọ him kpong-kpong ka.

⁶Anụ ayịdang ka rim ibeenu yẹkẹẹ, am nyị kpa ọngịrị nyam wuu lẹpwụ-lẹpwụ myị ẹrụ ha adanụ pyịyọọ daalẹ.

⁷Adanụ họm ri lụmẹ kaka kpoye. Ọ tụ uri nyam wẹ ẹkpẹ bwula ọlẹ kọ yẹ uri oyeye nyam da lala ugbabwọ iwo. Ịnọ adanụ lẹ, ọ họm tịpyọ lụmẹ lẹ. Ma, Ohe Oluhye á tị myị jwoo kaka lẹ, ọ́ họm ịngịngịhyẹ myị kiji kaka.

⁸Ụka ká adanụ ya ịmwụ ịlẹ kịị nyị chị ịna ịkpọyị-kpọyị nyaa ka ri ịnyam lẹ, anyị ị-chị ịna ịlịnyị kem, ị kaa ma lẹlẹ. Ụka kọ tị yẹkẹẹ, uri nyam nyị ka ri ịmwụ ịlẹ kịị nyị chị ịna owule-wule lẹ, anyị ịlịnyị kem, ị kaa ma ịnyịnyị lẹlẹ.

⁹Ịịwẹ Ohe Oluhye a bwu họ ká ịmwụ nya adanụ yẹ ri ịnyam lẹ.

¹⁰Ụka ọhẹ juwa kam la ụlaa lụka nya ịmwụ o-che awụlẹ che. Ọọwa lẹ, m yẹ ká iyichi ịlẹ kị chị ịna owule-wule bala ịlẹ kị chị ịna ịkpọyị-kpọyị bala ịlẹ kị chị ịna ịnwụrwẹ-nwụrwẹ wuu kem juwa che ịmwụ anyang ịlẹ wuu kam juwa kpẹhị rịrị ẹ-ẹpwụ nya ụ-ụlaa lẹlẹ.

¹¹Ụka ọọwa, olegu-ẹrụ nya Ohe Oluhye ọhẹ juwa ya ẹla tam ụ-ụlaa ọọwa yẹkẹẹ, ‘IJekọbụ ee.’ M wẹ byoo yẹkẹẹ, ‘M lẹẹ ẹ-ẹgẹlẹ.’

¹²Ụka ọọwa, olegu-ẹrụ ọwẹ byim yẹkẹẹ, ‘IJekọbụ, chẹhị kele kaka yẹ iyichi ịlẹ kị chị ịna la datị-datị kị lalẹẹ che ịmwụ anyang mẹ, chajị Ohe Oluhye chẹhị kaka yẹ ang ọtịpyọ ọlẹ ká iLeban wẹẹ họng ịnyịnyịịnyị lẹ.’

¹³Ụka ọọwa, olegu-ẹrụ ọọwa ya ẹrụ ọlẹ ká Ohe Oluhye doo tọm yẹkẹẹ, ‘IJekọbụ wo mẹ, Am a ri Ohe Oluhye ọlẹ kọ chị ịlọmwụ ehe hang ị-ịBẹtẹlụ lẹ. Am a ri Ohe Oluhye ọlẹ ká gbịgba ha ụ-ụwa lụka ọlẹ ká ya ẹjwọ ọhẹ ju eji ụ-ụwa ene ká yẹ ida hwọọ lẹ. Ẹ-ẹga ọọwa kpangga, a myị ọnụ chị ang ọlẹ ká ka họ ham Am Ohe Oluhye ịnyịnyị lẹ. Lẹẹlẹẹ, wuleji ká hu ang rụ kele ka ịpyị nya adang anyị ẹ-ẹga ọlẹ kị mang mẹ.’ ”

¹⁴Ụka ọọwa, iRichẹlụ bala iLiya wẹ byi iJekọbụ yẹkẹẹ, “Ahị ayịdang lẹ, ahị jẹ ká ang-ugu nya adahị ọhẹ-lọhẹ-ẹ́ ka hi pwụụhị kaka,

¹⁵chajị adahị ayịdang huuhi lala aloja ịkịla ị-ịlahị nyamwụ ene-ene lẹ. Adahị wuhi ra lẹ. Ọ tị ri okpoko nyahị ọọwa kpá wuu ịnyịnyị lẹ.

¹⁶Ang myị ang ịlẹ wuu ká Ohe Oluhye nu adahị hang lẹ, tị ri ụdụ nyahị ahị ayịdang bala ịnya anyị nyahị wuu ịnyịnyị lẹ. Chajị nya ọọwa lẹ, jaabwọ myị abwọ ká Ohe Oluhye á ya tang lẹ, a họ ịnyị odu mẹ. Ọọwa, á wụụhị ẹjẹ kaka.”

¹⁷Ịnyị lẹ, iJekọbụ a nwụlanọ ahyaahị lẹ, ị hu ang ẹdịyẹ nya ẹpwa nya adamwụ ọ-ọpyị nya iKenan lẹlẹ. Ọ byi anyị nyamwụ wuu tụ ịhụ nyamwụ wuu, anụ nyị kụ ịkamẹlụ mẹ.

¹⁸Ọọwa lẹ, iJekọbụ ayịdang a juwa gbe ịmwụ bala ịkpịlọ bala ịna nyamwụ ịlẹ wuu kọ la ị-ịPadan-aram juwa kpaa rụ bala ụdụ nyamwụ ịkịla wuu tịrẹkpẹ kele ka ọpyị nya iKenan ka ẹga nya Ayịsiki adamwụ lẹlẹ.

¹⁹Ụka kị juwa nwụlanọ nya ọrụrụ, iLeban juwa pwọ ịkpịlọ nyamwụ egbii ẹ-ẹpwamẹ. Ịnyị, iRichẹlụ a go ekpeku nya ojiga nya adamwụ ịhyẹ yoyi lẹlẹ.

²⁰IJekọbụ la ịjẹẹhị gụ iLeban ọla Aram, chajị iJekọbụ á myị ya je iLeban chajị nya ọrụrụ nyamwụ ene ka.

²¹IJekọbụ nwụla ang myị ang nyamwụ ịlẹ kọ la bwu ụwa wuu kpa rụnyẹ rụ. Ọ rụnyẹ gbe kọ kpoye nya Ihu iYufuretisi. Ọọwa lẹ, ọ juwa jẹ yahị da ịgbọdọ nya ịpyị nya iGiliyadị lẹlẹ.

²²Ụka ká iJekọbụ rụ gu ụtụrụ ịta lẹ, angịhyẹ a kele kaka ya je iLeban lẹlẹ.

²³Ịnyị lẹ, iLeban a hu ang ẹdịyẹ bala angịnyị nyamwụ juwa ku iJekọbụ bala angịnyị nyamwụ ọwa lẹlẹ. Ị juwa rụnyẹ baa kele lala ụtụrụ irwiye gbee kịị kaka wu iJekọbụ anyị ọyị ụ-ụwa ị-ịgbọdọ nya iGiliyadị.

²⁴Ene ká iLeban ka wu iJekọbụ ọyị lẹ, Ohe Oluhye ya ẹla tọọ ụ-ụlaa la odu ọhẹ byoo yẹkẹẹ, “ILeban, wo mẹ! Ḿ tịtọ ká ka kpa ọngịrị ọhẹ-lọhẹ tịrị iJekọbụ ẹkpẹ wẹ ẹpwa nyang kpong-kpong koko.”

²⁵Ụka ọọwa, iLeban bala angịnyị nyamwụ wu iJekọbụ bala alẹpwa nyamwụ ọwa ọyị ụ-ụwa ị-ịgbọdọ nya iGiliyadị. Ịnyị lẹ, iLeban bala angịnyị nyamwụ a kele kaka ju iwe, ụ-ụwa u-uhye nya ọgbọdọ ọhẹ lẹpwụ nya ịgbọdọ nya iGiliyadị ịnyịnyị lala iJekọbụ bala angịnyị nyamwụ lẹlẹ.

²⁶Ịnyị, ụka kị yẹ awụlẹ ụ-ụwa lẹ, iLeban a byi iJekọbụ yẹkẹẹ, “IJekọbụ, ẹla ọlanyị a tị́ họm họ ịnyị? Ká kpa anyị anyang nyam wuu rụnyẹ rụ ẹ-ẹkpẹ-ẹkpẹ nyam lala ahụ nyaa waa wu kpa rụ bwu ẹwụ mẹ?

²⁷Ịịyẹ a tị́ du ká rụnyẹ rụ yoyi-yoyi, ká ya jem ene ka-á? Ó-ri ká ya jem ene lẹẹ lẹ, ịnọ á jẹ kam ka wụrụ alayịlọ i-du ogum bala samba, kị ka warị kaka du ayịlọ ọ-danụ ọkpahị mẹ ka?

²⁸Ọọhọ! IJekọbụ a mịla chị́ uchi ọtụka ọlịịwẹ-ẹ́? Kọ du ká myị kam ju ịhụ nyang wuu bala anyị nyaa ọnụ kpong-kpong ene ká-a ka kpaa rụ ka?

²⁹IJekọbụ, wo mẹ. Am ayịdang la ọngịrị nyọka họng ang myị ang ọlẹ kọ hám myị. Ma, Ohe Oluhye nya adang anyị, ya ẹla tam la odu ịnịyẹ ya am nyị kpa ọngịrị ọhẹ-lọhẹ tịrịng ẹkpẹ wẹ ẹpwa nyam kpong-kpong kaka.

³⁰M jẹ ká ajị nya iwoo nya adang anyị ọlẹ kọ juwa wung lụmẹ a du ká rụ lẹ. Lẹ, ịịyẹ a tị́ du ká go ekpeku nya ijiga ịlẹpwa nyam wu u lẹẹ yoyi kpa rụ kpịlọ mẹ?”

³¹IJekọbụ wẹ byi iLeban yẹkẹẹ, “A wụ ẹjẹ ka adam. M mẹ á ka num ịhụ nyam la agbụrụ. Ịnyị a du kam ya jeng ene kam rụ bwu ẹpwa nyang ka lẹ.

³²Ẹla nya ekpeku nya ijiga ịlẹpwa nyang ịlẹ ká ya lẹ, wo mẹ. Ọng myị ọng ọlẹ ká yẹ laa lẹ aalẹ, igu, ọngọọwa a ka gbu lẹlẹ. Kẹwẹ ka wụla olo nyam wuu yẹ ị-ịlahị nya angịnyị nyahị wuu mẹ. Ang myị ang ọlẹ kọ ri ịnyang lẹ, ká hwoo kpa rụ mẹ.” Ma, ụka ọọwa, iJekọbụ á tị jẹ yẹkẹẹ, iRichẹlụ ahụ nyamwụ nyaa go ekpeku nya ijiga ịịwa yoyi lẹ ka.

³³Ịnyị, iLeban a dọmwụ nya ọpịlahị nya ekpeku nya ijiga nyamwụ ịịwa ka ẹpwụ ube nya ọdụ nya iJekọbụ lẹlẹ. Ọ bwu ụwa kele ka ube nya iLiya bala ube nya anchẹ anyang nya iLiya bala iRichẹlụ. Ọ́ yaa u-ube nya ọngọngọhẹ lẹpwụ nya angịwẹ ka. Ọọwa lẹ, ọ jụ kele ka ube nya iRichẹlụ ịnyịnyị lẹlẹ.

³⁴Ma, iRichẹlụ ayịdang tị go ekpeku nya adamwụ ịịwa kpịbaa ẹ-ẹpwụ nya ịbang ịlịkịka nya ugba ọ-da hụhụ oluhye nya ịkamẹlụ nyamwụ ọlẹ kọ ya nụwa u-ube nyamwụ lẹ, ọ hụrwaa u-uhye lẹlẹ. ILeban kpa ahị nya ekpeku ịịwa ẹ-ẹga myị ẹga nya ube nya iRichẹlụ. Ma, ọ́ tị yaa kpong-kpong kaka.

³⁵Ụka ọọwa, iRichẹlụ byi iLeban yẹkẹẹ, “Adada, a wụ ẹjẹ ko! Am ka jẹ-ẹ wuleji hi ẹga kam hụhụ lẹẹlẹẹ kaka, chajị m ji odehe lẹẹlẹẹ jam.” Ịnyị a du ká iLeban pịlahị nya ekpeku nya ijiga ịịwa la ọpịlẹẹ-pịlẹ lẹ, kọ yaa ẹ-ẹgẹgẹhẹ kpong-kpong kaka lẹlẹ.

³⁶Ụka ọọwa, iJekọbụ juwa wụ ẹjẹ lụmẹ. Ọ rwarụ ta iLeban byoo yẹkẹẹ, “ILeban wo mẹ! Ẹla nyang ọlẹ wụm ẹjẹ lụmẹ. Ẹẹla ịyẹ onyobyi, m tị́ họng kpong-kpong? Lee ọhọbịrị oyina, m tị́ họ du ká lẹẹ kum lụnyẹ ọtụka ọlịịwẹ mẹ?

³⁷A tị warị kaka bwu olo nyam apwụ wuu, pịlahị nya ang myị ang nyang wuu wẹ lẹ. Ang nyang ịlẹ kam go yoyi a tị́ lee lẹẹ mẹ? Gba ang ịịwa kpehe ká angịnyị nyang bala angịnyị nyam a cheje nyahị mẹ!

³⁸Ahyu! ILeban, kpịtịya wẹẹ! Ang lala ẹka iwo imiiye gbẹgbịlẹ kaam ayịdang hụ ẹ-ẹpwa nyang lẹ, ẹmwụ embiri nyang lee ọkpịlọ ọhẹ-lọhẹ nyang á juwa kọ pwọ ọnyị ụka ọhẹ-lọhẹ kpong-kpong ka. Ḿ tị wu omilodo nyang lee oyichi nyang ọhẹ-lọhẹ nwụ ri ẹnẹnẹhẹ lẹka.

³⁹Ẹmwụ nyang ọnyị myị ọnyị ọlẹ ká iyo ọnyẹẹgẹga á wu ri, ḿ kaa kpa eje nyamwụ wẹ ẹga nyang ka. Am la ịlọm a kaa nwụng uri nyamwụ lẹ. Ó-ri alẹpwẹnụ lee alepwodu kị wu ẹmwụ nyang ọnyị myị ọnyị yoyi, ám a kaa byi, nyị nwụ ọwa uri nyamwụ pyii mẹ ka?

⁴⁰Ahyu! ILeban, kpịtịya wẹẹ! Ẹnụ á chị la ọchịchị, m juwa ẹ-ẹpwụ nyamwụ. Ohu-ú họ la ọhọhọ, m juwa ẹ-ẹpwụ nyamwụ. Une ẹ-ẹhị ọlẹrwa ọlẹ, ḿ nọ kpong-kpong ka. Ọọ la ụkụrwọ nya ịkpịlọ ogbegbe hang ahụ iLeban ọwẹ ịnyị.

⁴¹Ịịwẹ m myị ẹrụ hang ịnyịnyịịnyị jịra ẹ-ẹpwụ nya ẹka iwo imiiye gbẹgbịlẹ ka? Ụkụrwọ ọlẹpwụ nya ẹka iwo kụrụ ine lẹpwụ-lẹpwụ ri chajị nya anyị anyang nyang imiiye ịlẹ kam ye. Ẹka ịrwọnyẹ ohihi ri ụkụrwọ nya uri oyeye kam họ hang ene ká ya ịmwụ ham kwiwa nya ọọwa. Ẹ-ẹkpẹ nyọlẹ kaam bala ahụ ya ọnụ nya uri nyam gu awụlẹ kpá lẹ, á tụ uri nyam ọọwa wẹ ẹkpẹ bwula ọlẹ ká yẹ uri oyeye nyam da lala ugbabwọ iwo chiriri ka? A họ ịnyị lẹ, m ya ẹlẹlẹhẹ tang?

⁴²Ó-ri ká Ohe Oluhye nya Ebiraham adam bala Ohe Oluhye nya Ayịsiki adam anyị ọlẹ kịịwa ayịdang kaa gbịgba ha bala ọ-juwa ju uhi nyamwụ á kpa ahị jum ka, ịnọ, á ka dum rụ bwu ẹpwa nyang labwabwọ lẹka? Á yẹ jaabwọ ká Ohe Oluhye ọlẹ kọ yẹ akama ọyẹyẹ lụmẹ bala ụkụrwọ ọhọhọ lụmẹ nyam ọlẹpwa nyang, yalibyi lang ham ịnịyẹ lodu wẹ ka bẹ?”

⁴³ILeban wẹ byi iJekọbụ yẹkẹẹ, “IJekọbụ wo mẹ. Ịhụ nyang ịwẹ wuu ri anyị nyam. Anyị ịlẹ kị ma hang wuu ri ịnyam-ịnyam ịnyịnyị. Ịmwụ bala ịna ịlẹ ká la wẹ bala ang myị ang ịkịla wuu ri ịnyam riri, ịnọ ịnyịnyị. Ma, lẹẹlẹẹ lẹ, ọngịrị oyina, m tị́ la nyọka nung ịhụ lee ọnyị ọhẹ-lọhẹ tụ ang myị ang nyang ịwẹ wuu wẹẹ?

⁴⁴Ọkẹnẹ-kẹnẹ ri m tịtọ kaam bala ahụ ka nwa iro ha awụlẹ alẹ. Iro ọọwa a ka ri ibeenu nyam bala ahụ lẹlẹ.”

⁴⁵Ịnyị lẹ, ụka kị nwa iro ọọwa kpá lẹ, iJekọbụ a hu ẹjwọ ọhẹ wu eji ụ-ụwa kọkọ, chajị kị ka kpa kpịtịya nya iro nyaa ọọwa lẹlẹ.

⁴⁶Ụka kị họ kpá lẹ, iJekọbụ a byi angịnyị nyamwụ nyị tụ ajwọ ịhyẹ ịkịla lụmẹ-lụmẹ guru gbudum ụ-ụwa mẹ lẹlẹ. Ịnyị lẹ, ịwa wuu a hụhụ juwa ri ang lawụlẹ ẹ-ẹga nya ajwọ igbudum ịịwa lẹlẹ.

⁴⁷ILeban wụrụ ẹnyị nya ẹga ọọwa ịJẹga-ịsahaduta ọlẹ ká etu nyamwụ ri “ẹwụụ nya ịtịya ọkpụkpụ” loja nya ala Arameyiki nyaa. IJekọbụ tịtị wụrwọọ ịGaliidi loja nya iHiburu nyaa ịnyịnyị. Etu nyamwụ bala ịJẹga-ịsahaduta la ookpokpo.

⁴⁸Ụka ọọwa, iLeban yẹkẹẹ, “IJekọbụ, wo mẹ. Ẹwụụ nya ajwọ ọlẹ ka ri ibeenu nyam bala ahụ alẹ u-uhye nya iro ọlẹ kahị nwa ha awụlẹ lẹ.” Ịnyị a du ká iJekọbụ wụrụ ẹnyị nya ẹga ọọwa ịGaliidi lẹ.

⁴⁹ILeban ya ịnyịnyị yẹkẹẹ, “Amkpaa ayịdang ā wụla ọhọhọ nyam am bala ahụ u-uhye nya awụlẹ yẹ ụka kahị chị ebwo hi awụlẹ alẹ kpá mẹ.” Ọọwa, ị wụrụ ẹnyị nya ẹgẹwẹ iMisipa[12] ịnyịnyị lẹlẹ.

⁵⁰IJekọbụ, aa jẹ mẹ. “Ó-ri ká kpa anyị nyam ịlẹ kam ya hang ye-è wẹ lụbwọ onyobyi lee ká kele kaka ye ịhụ ịkịla baa u-uhye aalẹ, am ayịdang-ńg ka jẹ ka myị, Ohe Oluhye tị juwa yẹhị wuu.”

⁵¹Ọ myịmyị byi iJekọbụ yẹkẹẹ, “IJekọbụ, yẹ mẹ! M jam hu ẹwụụ nya ajwọ ịlẹ kanụ tụguru lẹẹ ẹgẹlẹ bala ẹjwọ ọlẹ ká ya wu eji lẹẹ kọkọ ịnyịnyị nya ang ibeenu ham am bala ahụ alẹ lẹ!

⁵²Etu nya ẹjwọ ọrịrị kọkọ ọlẹ bala ẹwụụ nya ajwọ ịlẹ kanụ tụguru lẹẹ wuu imimiiye ri ahụ iJekọbụ ọwẹ lee am iLeban ọlẹ, á ka kpoye nya ọya nya ajwọ ịwẹ kaka họ ọngọkịla nyahị abwaabwọhẹ onyobyi kpong-kpong kaka, chajị ajwọ ịwẹ chịhị ebwo hi ang onyobyi ọ-họ awụlẹ họ lẹ.

⁵³Ohe Oluhye nya Ebiraham bala ịNahọ ọlẹ kọ ri Ohe Oluhye nya adaa ịnyịnyị a ka cheje nya ọhọhọ nyam am bala ahụ ụ-ụwa ị-ịlahị lẹlẹ.” Ịnyị, iJekọbụ a nwa iro ha iLeban ụ-ụwa o-oluhi-uhi nya Ayịsiki adamwụ lẹlẹ.

⁵⁴Ụka ọọwa, iJekọbụ a hu iyo ọlẹpwa ọhẹ kịla iya ha Ohe Oluhye ụ-ụwa u-uhye ọgbọdọ ọọwa. Ọ họ ang oriri ọtụka-ọtụka wụrụ angịnyị nyamwụ ẹpwa kaka ri ang oriri ọọwa. Ị hu ehe tọọ la odu-odu gbee ká ahị pyaa kpakpịrakpaa u-uhye nya ọgbọdọ ọọwa.

⁵⁵Ụka ká ewu-ụtụrụ warị, iLeban kele kaka ju anyị nyamwụ anyang ọnụ, juwa baa ajẹ bala anyị nyaa wuu. Ọ myịmyị wahị kụrwaa. Ọọwa lẹ, ọ hu ang ẹdịyẹ nya ẹpwa nyamwụ lẹlẹ.