Read idege ỌMWỤ ỌDADA 32 Bible Online

ỌMWỤ ỌDADA 32 - idege bible

ỌMWỤ ỌDADA 32

¹Ụka ká iJekọbụ juwa jẹ rụ kele ka iKenan ịnyịnyịịnyị, alegu-ẹrụ nya Ohe Oluhye tọọ ụ-ụgbẹyị.

²Ụka ká iJekọbụ yaa, ọ juwa ya ẹla ta ịlọmwụ ụ-ụwa yẹkẹẹ, angịlẹ ka ri angịdẹwụ nya Ohe Oluhye pyii. Ịnyị a du kọ wụrụ ẹnyị nya ẹga ọọwa ịMahanayịm lẹ.

³IJekọbụ du alẹng ịhyẹ ẹrụ ji ịlahị nya ịlọmwụ kele kaka tọ Ịsọ ọnyịnamwụ ọlẹng e-epweji nya ịSẹyii, ọ-ọpyị nya ala Ẹdọm.

⁴IJekọbụ byi alẹrụ nyamwụ ịwẹ yẹkẹẹ, “Anụ kele kanụ byi Ịsọ ayịbam yẹkẹẹ, am ọnchẹ nyamwụ nyị ya ụ-ụwa ọdọdẹpwa nya iLeban, am nyaa kụ ẹpwa gbee kaam nyị lẹẹ nya alẹ lẹ.

⁵Am nyị la iru nya ịna lụmẹ-lụmẹ bala iru nya anyịrẹ lụmẹ-lụmẹ bala ịmwụ lụmẹ-lụmẹ lẹẹlẹẹ lẹ. Am nyị la iru nya anchẹ anyang bala anchẹ alẹng lụmẹ-lụmẹ ịnyịnyị lẹ. Anụ byoo mẹ, am ị-iJekọbụ nyị yẹkẹẹ, ahụ Ịsọ ayịbam, ahụ nyị chuchuu kaahụ nyị yẹm ahyẹẹrwẹrwa kaahụ nyị hịnyọhi ham odu mẹ. Kaahụ nyị yem bajẹ nya warị wẹ ẹpwa ịnyịnyị odu mẹ!”

⁶Ụka ká alẹrụ nya iJekọbụ nya, ị tịrọnụ nya ẹdịyẹ nyaa yẹkẹẹ, “Ahị ya ẹrụ nyang je Ịsọ ọnyịnang ọlẹng lẹ, Ịsọ ayịdang yẹkẹẹ, ọwa bala alẹng nyọwa ịhyẹ lala angịnyị angị ohu ine (400) nyị juwa warị kaka tọng ụ-ụgbẹyị lẹ.”

⁷Ụka ká iJekọbụ wo ya Ịsọ nyị juwa warị lẹ, ọ lọọ uhi-uhi lụmẹ. Ọ juwa chuko. Ọ mẹ irya gbee lẹ, ọ yẹkẹẹ, ọwa nyị jẹ jaabwọ kọọwa nyị ka họ lẹ. Ọọwa lẹ, ọ chị angịnyị nyamwụ wuu bala ịmwụ tụ ịna bala ịkamẹlụ nyamwụ wuu ebwo imiiye kpoo lẹlẹ.

⁸Chajị iJekọbụ ayịdang mẹ irya yẹkẹẹ, ọ́ ri ká Ịsọ nyị́ nwụ alebwo ọhẹ lẹ, alebwo ọkịla ihihi nyị tị ka jẹ-ẹ rụnyẹ rụ chajị kịị nyị ka be hi Ịsọ myị lẹ!

⁹IJekọbụ raabwọ ha Ohe Oluhye ụ-ụwa yẹkẹẹ, “Ahụ Ohe Oluhye nya adam ọgbahị Ebiraham bala Ohe Oluhye nya Ayịsiki adam ochiche ee! Ahụ Amkpaa-à tị́ byim ó-ri kaam nyị rụ nyà tịrẹkpẹ kaka tọ alẹpwa nyam ọ-ọpyị nyahị lẹ aalẹ, ọwa nyị ka họ ká ang myị ang wuu nyị ka hiigu ham lẹ. Lẹ, aa wo ọbịlẹ-bịlẹ nyam ọlẹ mẹ.

¹⁰Ịnọ, am ayịdang jẹ ḿ chịla kpá ụpẹnị-ụpẹnị ị-ịlahị nyang pwoku ọnahị ọtụka bala iru nya ang ịnyịịla ịlẹ wuu ká họ ham am ọnchẹ nyang lẹẹ ka. Ugbeene lẹ, ọkụta ocheji ọlam-ọlam ọlẹ m kpa tụ ịlọm da kpoye nya Ihu ịJọdan ọlẹ lẹ. Ma, lẹẹlẹẹ lẹ, m jam kpa angịnyị ju iru ogu imiiye nyà lẹ.

¹¹Lẹ, Ohe Oluhye adam, chuchuu chịm da bwu ẹpwụtụbwọ nya Ịsọ ọnyịnam ọlẹng mẹ! Ó-ri ịnyị ka aalẹ, ọ ka warị kaka goohi nwụ tụ ịhụ bala anyị nyam ịlẹ wuu lẹ!

¹²Ohe Oluhye ee! Chuchuu kpịtịya nya ọnụ ọmyịmyị nyang ọlẹ ká myị ham wẹẹ! Chajị ahụ ayịdang byim yẹkẹẹ, ahụ nyị ka họ ká ang myị ang wuu nyị ka kịlahị ham ụka wuu lẹ. A myịmyị ya am nyị ka ma anyị ju iru lụmẹ lala ugburuja ọlọnụụka nya ihu, chajị kịị nyị ka ju iru lụmẹ gbee ká ọngọngọhẹ nyị́ ka jẹ-ẹ waa kpá myị ẹnẹnẹhẹ kaka ịnyịnyị.”

¹³IJekọbụ hyehe ẹ-ẹga ọọwa lodu ọwẹ. Ọ go ang myị ang ịlẹ kọ tịtọ kọ ka ya ga ha Ịsọ guru ụ-ụwa datị ịnyịnyị.

¹⁴Ọ wu ịmwụ embiri iwo imiiye bala iyichi iwo imiiye bwọ eji gbe Ịsọ. Ọ wu ịkpịlọ ohu imiiye (200) bala imilodo iwo imiiye bwọ eji gbe Ịsọ ịnyịnyị.

¹⁵Ọ myịmyị wu ịnịna nya ịkamẹlụ ịhyẹ ịlẹ kị juwa kpa ẹmẹ ha anyị nyaa nyẹ wẹẹ iwo ịta bala anyị nyaa bwọ eji gbe Ịsọ ịnyịnyị. Ọ wu ịna anyang iwo ine bala alẹng nyaa iwo chiri bwọ eji gbe Ịsọ, tụ anyịrẹ anyang iwo imiiye bala alẹng nyaa iwo chiriri ịnyịnyị.

¹⁶Ịnyị lẹ, iJekọbụ a chị iyo ịlẹpwa ịwẹ kọ wu bwọ eji ebwo lẹ, ọọwa lẹ, ọ hu ogu nya ebwo ọnyọnyọọnyị ju ọnchẹ ọnyọnyọọnyị ụ-ụbwọ kọọwa a ka kpaa kele kịla Ịsọ họọ lẹlẹ. Ọọwa lẹ, ọ byi anchẹ ịwẹ yẹkẹẹ, “Anụ kpa iyo ịwẹ ji ịlahị kịla Ịsọ ham mẹ. Anụ wẹẹ kele lẹ, anụ ju awụlẹ chwẹẹrịị kokoo. Anụ-ụ̀ chị apewa da ịlọnụ hwẹẹẹ mẹ.”

¹⁷IJekọbụ byi ọnchẹ ọlẹ kọ ji ịlahị nyaa wuu yẹkẹẹ, “Ụka ká Ịsọ ọnyịnam á yẹng bala iyo ịlẹpwa ịlẹ wuu kọ tọng ịtọ yẹkẹẹ, ‘Ahụ ọnchẹ nya owo a tị́ wẹẹ? Ale, a tị́ wẹẹ jẹ ka ene? Oowo a tị́ la iru nya iyo ịlẹpwa ịwẹ kaa wẹẹ tụ da ẹ-ẹkpẹ-ẹkpẹ wuu ene?’

¹⁸Ó-ri kọ tọng ịtọ ịnyị lẹ aalẹ, aa wẹ byoo yẹkẹẹ, ọwa ayịdang nyị ri ọnchẹ nya iJekọbụ ọlẹ kịị nyị ri ọnchẹ nyang ahụ Ịsọ ayịbam. IJekọbụ ayịbam a lẹẹ ya iyo ịlẹpwa ịlẹ dum ẹrụ warị kaka ga hang ahụ ayịbamwụ lẹ. IJekọbụ ayịdang wẹẹ jẹ warị bwu ẹkpẹ ịnyịnyị!”

¹⁹Jaabwọ ká iJekọbụ byi ọnchẹ nya ọgbanyẹ ọwẹ ya nyị byi Ịsọ mẹ, wẹẹ, ịnyịnyị-ịnyịnyị, ọ byi ọnchẹ ọnyọnyọọnyị ọlẹ kọ juwa kpa iyo ịlẹpwa ịwẹ kele kịla Ịsọ lẹlẹ.

²⁰IJekọbụ byi ọngọngọọng lẹpwụ nya anchẹ ịwẹ yẹkẹẹ, “Anụ nyị byi Ịsọ yẹkẹẹ, iJekọbụ ọlẹ kịị nyị ri ọnchẹ nyang ahụ Ịsọ ayịbamwụ nyị wẹẹ jẹ warị bwu ẹkpẹ ịnyịnyị.” Chajị iJekọbụ kụ irya ha ịlọmwụ yẹkẹẹ, ọ́ ri ká Ịsọ ayịbam á kiji ye ang ọgahị ịlẹ kam wẹẹ ya du tọọ lẹ, ọhẹka, ọkịlẹtụ nyamwụ ka kpụba ẹ-ẹga nyam, ọ ka yem lokpunyi kpáá.

²¹Ụka ká iJekọbụ ya ang ọgahị ịwẹ wuu du ẹrụ ji ịlahị kele kịla Ịsọ kpá lẹ, ọwa ayịdang a hi, hyehe ụ-ụwa ẹnụ ọọwa lẹlẹ.

²²Lodu-odu ọọwa, iJekọbụ hu ang ẹdịyẹ la ịhụ ịlam-ịlam nyamwụ imiiye bala ịhụ-anchẹ nyamwụ imiiye bala anyị nyamwụ angị iwo kụrụ ookpokpo. IJekọbụ kpaa ịwa wuu kpoye nya Ihu ịJabọkụ.

²³Ụka ká iJekọbụ kpa angịnyị nyamwụ ịwẹ wuu kpoye nya ihu ọọwa bala ang myị ang nyamwụ ọlẹ kọ la wuu lẹ,

²⁴iJekọbụ a hi hyehe o-oye ọkịla nya ihu ọwẹ ụbwọọmwụ-ụbwọọmwụ lẹlẹ. Lụka nya odu ọọwa, ọlẹng ọhẹ kele ka ẹga nya iJekọbụ. Ọọwa lẹ, iJekọbụ bala ọlẹng ọọwa a juwa ma uya ta awụlẹ la odu-odu gbee pwụ ụka ọlẹ ịnọ ká ahị juwa ka gwaa pyẹ lẹlẹ.

²⁵Ụka ká ọlẹng ọwẹ jẹ yẹkẹẹ, ọwa nyị́ kụrụ iJekọbụ myị kaka lẹ, ọọwa lẹ, ọ yụbwọ nyamwụ ba iJekọbụ pyẹẹ ọ-ọhị nyamwụ lẹ, ẹdịrẹ nya ụkụ bala ọhị nya iJekọbụ a pyị iloo hi awụlẹ kiroko lẹlẹ.

²⁶Ụka kị juwa ma uya ọọwa ịnyịnyịịnyị ká iJekọbụ juwa wu ọlẹng ọwẹ kpanya-kpanya lụmẹ, ká ahị tị juwa ka gwaa pyẹ lẹ, ọlẹng ọwẹ a bịlẹ iJekọbụ byoo yẹkẹẹ, “IJekọbụ, chuchuu, tụụbwọ him kam rụ mẹ, chajị ahị juwa ka pyẹm lẹ.” Ma, iJekọbụ wẹ byoo yẹkẹẹ, “Ó-ri ka wahị kụrụm ka aalẹ, ḿ ka tụụbwọ hing, aa rụ kpong-kpong kaka.”

²⁷Ụka ọọwa, ọlẹng ọwẹ tọ iJekọbụ ịtọ byoo yẹkẹẹ, “Ẹnyị nyang a tị́ ri ịyaa ene?” IJekọbụ wẹ byoo yẹkẹẹ, “Am a ri iJekọbụ lẹ.”

²⁸Ọlẹng ọwẹ byi iJekọbụ yẹkẹẹ, “Ẹnyị nyang á ka ri iJekọbụ bwu alẹ kele kịlahị kaka. Isirẹlụ ọlẹ ká etu nyamwụ ri ‘ọngọ ma uya ta Ohe Oluhye,’ a ka ri ẹnyị nyang lẹ, chajị a ri ọngọ ma uya ta Ohe Oluhye bala angịnyị kpụ ā kụrụ lẹ.”

²⁹Ụka ọọwa, iJekọbụ byi ọlẹng ọwẹ yẹkẹẹ, “Ẹnyị nyang ahụ tị bẹẹ?” Ọlẹng ọwẹ wẹ byoo yẹkẹẹ, “Ịịyẹ a tị́ du ká juwa tịtọ ká ka jẹ ẹnyị nyam ene?” Ịnyị lẹ, ọ wahị kụrụ iJekọbụ ụ-ụwa lẹlẹ.

³⁰IJekọbụ wụrụ ẹnyị nya ẹga ọọwa ịPẹnịyẹlụ ọlẹ ká etu nyamwụ ri “ahị nya Ohe Oluhye,” chajị ọ yẹkẹẹ, “Am ayịdang yẹ Ohe Oluhye lẹhị-lẹhị nyam ọlẹ, ma, m tị myịmyị jam la ọhịhị nyam wẹẹ.”

³¹Ụka ọlẹ ká iJekọbụ juwa ka rụ bwu ịPẹnịyẹlụ kpá lẹ, ẹnụ juwa kpehe lụtụrụ ọọwa lẹ. Ụka ọọwa, iJekọbụ juwa jẹdịyẹ kpẹnggẹẹ-kpẹnggẹẹ chajị nya ụkụ nyamwụ ọlẹ kọ pyị iloo.

³²Pịyọọ daalẹ ọlẹ, ala Isirẹlụ wuu á kaa myị-ị ri ukpooji ọjwọọjwọọ ọlẹ kọ hịla ẹdịrẹ nya ụkụ bala ọhị nya iyo ọhẹ-lọhẹ kpong-kpong ka. Ang odudu nya ọọwa ri ẹ-ẹga nya ukpooji ọlịnyị nya IJekọbụ kpangga, ọlẹng ọ-ma uya tọọ a yụbwọ nyamwụ bọọ pyẹẹ lẹ.