Read idege ỌMWỤ ỌDADA 35 Bible Online

ỌMWỤ ỌDADA 35 - idege bible

ỌMWỤ ỌDADA 35

¹Ụka ọọwa, Ohe Oluhye à byi iJekọbụ yẹkẹẹ, “IJekọbụ ee, rụ kele kaka kụ ịBẹtẹlụ mẹ. Aa me ogidi okiliya ụ-ụwa ham am Ohe Oluhye ọlẹ kam mẹ ịlọm jẹng ụ-ụgbẹyị ụka ká lẹẹ rụnyẹ rụ hi Ịsọ ọnyịnang mẹ.”

²Ọọwa, iJekọbụ à byi alẹpwa nyamwụ tụ angịlẹ wuu kị juwa tọọ yẹkẹẹ, “Ọng myị ọng nyanụ ā mwụ ijiga nyamwụ hụrụ, kanụ hụ́ ịlọnụ charị-charị bala o-go ịwụrụ icheri-cheri kụrụ ịnyịnyị mẹ.

³Ahị jam ka rụ ka ịBẹtẹlụ ẹga kam ka me ogidi okiliya ha Ohe Oluhye lẹ. Ọwa-à dam ụbwọ ụka kam ji ẹpwụ nya akama bala ọ-hụ tam ẹ-ẹga myị ẹga wuu ọlẹ kam bwu wuu lẹ.”

⁴Ọọwa, ị kpa ijiga nyaa wuu bala ang i-gu arụ nyaa kịla iJekọbụ lẹ, ọ yaa chị ụjẹ ju eji ọ-ọmwụ nya okoji nya ooku ọlẹ kọ ju iChekem chwẹẹ lẹlẹ.

⁵Ụka ká iJekọbụ anyị juwa jẹ rụ, Ohe Oluhye họ ká uhi ọtụka-ọtụka ju alepweji ịdagaga jwaa wuu. Lẹẹlẹ, ị́ ku iJekọbụ anyị kaka mwẹla taa ka.

⁶Ọọwa, iJekọbụ bala angịnyị nyamwụ wuu à jẹ gbee kịị pwụ ịBẹtẹlụ ọlẹ ká ẹnyị ọkịla nyamwụ ri iLusi ọ-ọpyị nya iKenan lẹlẹ.

⁷Ụka kị pwụ ụwa, iJekọbụ kele kaka me ogidi okiliya ha Ohe Oluhye. Ọ wụrụ ẹnyị nyamwụ Ẹlịbẹtẹlụ ọlẹ ká etu nyamwụ ri Ohe Oluhye nya ịBẹtẹlụ, chajị ẹ-ẹgẹwẹ, Ohe Oluhye a mẹ ịlọmwụ jẹ iJekọbụ ụka ọlẹ kọ juwa rụnyẹ rụ hi Ịsọ ọnyịnamwụ lẹ.

⁸Ụ-ụwa, iDebora ọlẹ kọ ri ọngọ kpa iRibeka la enjwo à gbu lẹ. Ị ju ogu nyamwụ eji ọ-ọmwụ nya okoji ooku ọhẹ ọlẹ kọ ji ka edii nya ịBẹtẹlụ. Ịnyị a du kị wụrụ ẹnyị nya ụwa Alọn-ịBakutu lẹ.

⁹Ụka ká iJekọbụ nya bwu ịPadan-aram kpá, Ohe Oluhye chị ịlọmwụ ehe mẹjọọ myịmyị. Ọ wahị kụrụ iJekọbụ

¹⁰byoo yẹkẹẹ, “IJekọbụ, wo mẹ, ịnọ, ẹnyị nyang a ri iJekọbụ lẹ, ma, bwu alẹ ọlẹ kele kịlahị, ẹnyị onyeewe nyang a ka ri Isirẹlụ lẹlẹ.” Ịnyị lẹ, ị wụrụ iJekọbụ Isirẹlụ jaabwọ ká Ohe Oluhye ya lẹlẹ.

¹¹Ohe Oluhye myịmyị byi iJekọbụ yẹkẹẹ, “Wo mẹ, Am ayịdang a ri Ohe Oluhye Agụgụ lẹ. Anyị nyang ka ri ẹpwụma bala ọ-pyẹ ka ri pwụma datị-datị. Ịdịrịhụ lụmẹ-lụmẹ ka bwu ẹpwụ nyang kpehe ịnyịnyị.

¹²Ọpyị ọlẹ kam ya ha Ebiraham bala Ayịsiki lẹẹ lẹ, m ya hang ịnyịnyị bala anyị ịtụma nyang wuu pyịyọọ lẹ.”

¹³Ịnyị, Ohe Oluhye a rụ bwu ụwa kele ka uhye hi iJekọbụ ẹ-ẹga ọlẹ ká Ohe Oluhye ya ẹla tọọ lẹlẹ.

¹⁴Ụka ọọwa, iJekọbụ kele kaka hu ẹjwọ ọtụka-ọtụka ọhẹ kele kaka wu eji ụ-ụwa gbọng ẹ-ẹga ọlẹ ká Ohe Oluhye ya ẹla tọọ. Ọọwa, ọ hu ere bala ida nya olivu kele kaka yẹ hụ ẹjwọ ọọwa lẹlẹ.

¹⁵IJekọbụ wụrụ ẹnyị nya ẹga ọọwa ọlẹ ká Ohe Oluhye ya ẹla tọọ ịBẹtẹlụ.

¹⁶IJekọbụ anyị hu ang ẹdịyẹ bwu ịBẹtẹlụ juwa rụ kịlahị. Ụka kị jẹ lụrụ hi ẹga ọlẹ kị wụrụ Ẹfụratị lụmẹ lẹka lẹ, ang nya ọnyị a juwa họ iRichẹlụ lụmẹ kaka kpoye ụ-ụgbẹyị lẹlẹ.

¹⁷Ụka ká iRichẹlụ chị ụma nụwa ọ-ọbẹ nya igu, ọnyang ọlẹ kọ juwa kpọọ ụma byoo yẹkẹẹ, “IRichẹlụ, a ju uhi ka. A juwa tụbwọọ ka ma ọnyị ọlẹng ọkịla hile iJosẹfụ lẹ.”

¹⁸IRichẹlụ gbu ụ-ụwa ụ-ụbwụma. Ahyaahị, ká iRichẹlụ wụrụ ẹnyị nya ọnyị ọọwa, iBenoni kpá bwaaa lẹ, ọ chị ẹjẹ lẹlẹ. Ma, iJekọbụ adịda nya ọnyị wụrụ ẹnyị nya ọnyị ọọwa, iBenjamịn.

¹⁹IRichẹlụ a gbu lẹ, ị jwoo eji ụ-ụwa ụ-ụgbẹyị nya Ẹfụratị lẹlẹ. Ẹfụratị ọọwa, ị wụrụ ịBẹtịlẹhẹm ịnyịnyị lẹ.

²⁰IJekọbụ ju ẹjwọ ọtụka ọhẹ eji u-uhye nya iworu nya iRichẹlụ. Ẹjwọ ọọwa juwa pyịyọọ daalẹ lala ang o-ju iworu nya iRichẹlụ ẹjẹẹ.

²¹Ụka ká ọwẹ chịpwụrụ kpá, Isirẹlụ bala angịnyị nyamwụ juwa jẹdịyẹ nyaa kele kịlahị ịnyịnyịịnyị gbee kị kaka chịkụ ẹ-ẹgẹhẹ. Ẹga ọọwa ju ọdana ọhẹ ọlẹ kị wụrụ Ẹda chwẹẹ lụmẹ.

²²Ụka kị kụ ẹ-ẹga ọọwa, ị ya je iJekọbụ ya iRubẹn ọnyị nyang nyị kele kaka jẹbyị ta iBiliha ahụ-ọnchẹ ọlẹ kaahụ nyị ye lẹ. Ẹla ọọwa wụ Isirẹlụ ẹjẹ lụmẹ kaka kpoye. Anyị alẹng nya iJekọbụ wuu la angị iwo kụrụ imiiye.

²³Anyị alẹng ịlẹ ká iLiya ma ha iJekọbụ a lẹẹ lẹ: IRubẹn ọlẹ kọ ri ọnyị ọgbahị nya anyị nya iJekọbụ wuu, bala iSimyọn bala iLivayị bala iJuda bala Ịsakaa bala ISẹbụlọn.

²⁴Anyị ịlẹ ká iRichẹlụ ma ha iJekọbụ a lẹẹ lẹ: IJosẹfụ bala iBenjamịn.

²⁵Anyị nya iBiliha ọlẹ kọ ji ata nya iRichẹlụ a lẹẹ lẹ: ịDan bala ịNafụtali.

²⁶Anyị nya iSilipa ọlẹ kọ ji ata nya iLiya a lẹẹ ịnyịnyị lẹ: ịGadị bala Achẹẹ. Ịịwẹ anyị alẹng ịlẹ ká iJekọbụ ma kpa nya bwu ịPadan-aram a la lẹ.

²⁷IJekọbụ jẹ gbee kọ pwụ ẹga nya Ayịsiki adamwụ ụ-ụwa ẹ-ẹga ọlẹ kị wụrụ ịMamrẹ. ỊMamrẹ ọọwa ju iKiriyatị-aba ọlẹ ká ẹnyị ọkịla nyamwụ ri iHebirọn chwẹẹ. Ebiraham bala Ayịsiki kụ ụwa ẹnẹhẹ ene-ene lẹ.

²⁸Ehe oriri nya Ayịsiki wuu la ẹka ohu ookpokpo da ẹka iwo ineku gbẹgbịlẹ.

²⁹Ịịwẹ Ayịsiki a bwu gbu la ụchẹ ị-ịnyịrọ lẹlẹ. Ịsọ bala iJekọbụ a ju ogu nya adaa eji la awụlẹ lẹ.