Read idege ỌMWỤ ỌDADA 37 Bible Online

ỌMWỤ ỌDADA 37 - idege bible

ỌMWỤ ỌDADA 37

¹IJekọbụ kụ ị-ịpyị nya iKenan ẹ-ẹga ọlẹ ká Ayịsiki adamwụ kụ gbee kọ gbu.

²Ịịlẹ oja nya alọdọdẹpwa nya iJekọbụ a la lẹ. Ụka ká iJosẹfụ gu ẹka iwo kụrụ irwiye, ọ juwa gbe ịkpịlọ ta anyadamwụ ịkịla ẹ-ẹpwamẹ. Anyadamwụ ịịwa ri anyị alẹng nya iBiliha bala iSilipa ịlẹ kị ri ịhụ-anchẹ nya iJekọbụ. Ụka ọọwa, iJosẹfụ kaa wụrụ anyadamwụ ịịwa eje ẹ-ẹga nya adaa lụmẹ.

³Isirẹlụ hu iJosẹfụ ọnụ-ọnyị nyamwụ chajị iJosẹfụ ri ọnyị ọlẹ kọ ma la ọgbahị. Isirẹlụ gá awụrụ ọtụka ogbileji ọnyịịla-ọnyịịla ọlẹ kọ la abwọ gbọng ha iJosẹfụ.

⁴IJosẹfụ wụ anyadamwụ ịkịla wuu ẹjẹ lụ mẹ lẹ. Ị́ kaa ya ẹla tọọ la ẹhị okpunyi kpong-kpong ka, chajị ị jẹ ya iJosẹfụ nyaa há adịdịwa gụ ịwa angịkịla wuu lẹ.

⁵IJosẹfụ la ụlaa ọhẹ. Ụka kọ wa ụlaa ọọwa je anyadamwụ, ọ họ ká iJosẹfụ waa ẹjẹ lụmẹ gụ olene-ene.

⁶IJosẹfụ wa ụlaa ọọwa jaa yẹkẹẹ, “Anụ wo ụlaa ọlẹ kam la wẹẹ!

⁷M̀ la ụlaa kaahị wuu juwa chị ẹbwọ nya ịngịhyẹ lala ịrayịsị ẹ-ẹrụ. Ọọwa lẹ, ẹbwọ nya ịnyam a wuleji gọdayị kọkọ lẹ, ọọwa lẹ, ẹbwọ nya ịnya ọngọngọọng lẹpwụ nyanụ a wuleji kaka gọdayị dọgịlẹ ju ẹbwọ nya ịnyam juwa gbịgba họọ lẹlẹ.”

⁸Ụka ọọwa, anyadamwụ wẹ byoo yẹkẹẹ, “IJosẹfụ, ọ ri aahụ a ka ri adịrahụ nyahị wuu wẹ lẹka lee? Kaahị wuu ka juwa e-ekpeleji nyang ịnyịnyị lẹka lee?” Ọọwa lẹ, iJosẹfụ a wụ anyadamwụ ẹjẹ myịmyị gụ olene-ene chajị nya ụlaa bala ẹla ọlọnụ nyamwụ lẹlẹ.

⁹IJosẹfụ myịmyị la ụlaa ọkịla. Ọ wọọ je anyadamwụ yẹkẹẹ, “Anụ wo ụlaa ọkịla ọlẹ kam la lẹẹ wẹẹ. M̀ yẹ ẹnụ bala ọya bala ịdịchụ iwo kụrụ ookpokpo kị juwa hirikpẹẹ ham.”

¹⁰Ma, ụka ká iJosẹfụ wa ụlaa ọwẹ je adamwụ bala anyadamwụ ịwẹ kpá lẹ, ụlaa ọọwa wụ adamwụ ẹjẹ lụmẹ. Ọ yalibyi ta iJosẹfụ byoo yẹkẹẹ, “IJosẹfụ, alaa ịlanyị a tị́ lala ịnyị? Ọ ri am bala ịnang bala anyadang ịkịla wuu ka kpụ eteji hang lẹ?”

¹¹Ịnyị lẹ, anyadịda nya iJosẹfụ ịwẹ a juwa la ọkịlẹtụ ijiiji ẹ-ẹga nya iJosẹfụ lụmẹ lẹlẹ. Ma, adamwụ ju ẹla nya iJosẹfụ ọọwa ẹjẹẹ nụwa u-uhye.

¹²Ụka ọhẹ juwa ká anyadịda nya iJosẹfụ juwa kpa ịkpịlọ nya adaa ri amẹ i-iChekem.

¹³Ọọwa, Isirẹlụ a wụrụ iJosẹfụ kaka byoo yẹkẹẹ, “IJosẹfụ ee, anyadang lalẹẹ kpa ịkpịlọ ri amẹ i-iChekem? Kẹwẹ kam dung ẹrụ kele kaka yaa wẹẹ.” IJosẹfụ wẹ byoo yẹkẹẹ, “Adam ee, m̀ lẹẹ lẹ, dum kele mẹ.”

¹⁴Ọ byi iJosẹfụ yẹkẹẹ, “Kele ka ẹga nya anyadang ká nyà kaka ya jem ó-ri kị juwa lokpunyi bala ịkpịlọ nyaa wẹẹ.” Ịnyị, iJosẹfụ a yegiri bwu Ọkpọọ nya iHebirọn ba anyadamwụ kele ka iChekem lẹlẹ.

¹⁵Ụka kọ pwụ iChekem, ọ́ jẹ ẹga ká anyadamwụ ji datị ka. Ọ juwa ga tụ ẹpwamẹ-ẹpwamẹ da gbee ká ọlẹng ọhẹ yọọ. Ọlẹng ọọwa tọọ wo yẹkẹẹ, “Okolobya, ịyẹ a tị́ juwa tịtọ?”

¹⁶IJosẹfụ wẹ byoo yẹkẹẹ, “M̀ jam tịtọ nya anyị nya iJekọbụ ịlẹ kị jam gbe ịkpịlọ ẹgẹlẹ. A jẹ ẹga kị ji, a ka ya jem?”

¹⁷Ọlẹng ọwẹ byi iJosẹfụ yẹkẹẹ, “Ị́ jam ẹgẹlẹ kaka. M wo kị lẹẹ byi awụlẹ yẹkẹẹ, ịwa nyị rụ ka epweji nya iDotan mẹ.” Ịnyị lẹ, iJosẹfụ a rụ kele ka iDotan lẹ, ọ yẹ anyadamwụ ụ-ụwa ịnyịlẹhị lẹlẹ.

¹⁸Ụka ọlẹ ká anyadịda nya iJosẹfụ chẹhị kaka yọọ ẹ-ẹga ọlụrụ kọ juwa jẹ warị, ị mẹ obyi nya igu ju iJosẹfụ yẹkẹẹ,

¹⁹“Ẹhẹẹ, anụ chẹhị kaka yẹ olegbeju nya ụlaa ọlala kọ lalẹẹ warị moo!

²⁰Ụka kọ warị lẹ, ahị nwọọ kahị hu ogu nyamwụ ju ka ẹpwụ nya ụjẹ-ọpyị ọhẹ mẹ. Ụka kahị nwọọ kpá lẹ, kahị byi angịnyị yẹkẹẹ, iyo ọnyọọngịrị ọhẹ a nwụ iJosẹfụ wẹ boo ri lẹlẹ mẹ. Ụka kahị họ ịnyị kpá lẹ, kahị yẹ jaabwọ ká alaa nyamwụ ịịwa ka bwu họ jịra myị mẹ.”

²¹Ma, ụka ká iRubẹn wo obyi omeme nyaa ọọwa lẹ, ọ́ họ́ọ ka. Ọ tịtọ kọ ka chị iJosẹfụ da. Ọọwa, ọ byi anyadamwụ yẹkẹẹ, “Anụ ba wẹẹ. Ọ́ hiigu kahị ka nwọọ nwụ ịịwẹ ka.

²²Ọkọkọ nya ọọwa lẹ, anụ kẹwẹ kahị woo wu ju ka ẹpwụ nya ụjẹ-ọpyị ọhẹ lahị-lahị mẹ, chajị ọ́ chịla kahị ka nwụ ọnyadahị lịlọhị ịịwẹ kpong-kpong ka.” IRubẹn byaa ịnyị, chajị kọ ka jẹ-ẹ kele kaka gba iJosẹfụ kpehe du rụ kele kịla adaa ẹ-ẹkpẹ-ẹkpẹ nyaa.

²³Ahyaahị ká iJosẹfụ pwụ ẹga nyaa lẹ, ị woo, pwọọ awụrụ ogbileji chabwọ-chabwọ nyamwụ ọlẹ kọ kụrụ lẹlẹ.

²⁴Ọọwa lẹ, ị wu iJosẹfụ ju ka ẹpwụ nya ụjẹ-ọpyị ọhẹ ọlẹ kọ juwa lẹlẹ. Enyi ọhẹ-lọhẹ á juwa ẹ-ẹpwụ nya ụjẹ-ọpyị ọọwa ka.

²⁵Ụka kị họ kpá, kị kele kaka hụhụ juwa ri ang, ị chẹhị kaka yẹ iru nya alọhị i-bwu Ichimẹlụ kị juwa chịpwụrụ kam bwu iGiliyadị kele ka Ijipiti. Ị kpa olo nya etiji ichoru kwọkwọ ịlẹ kị ri ọja bala etiji i-gu wụ́ ang ọ-họ ọngịnyị bala ịmaa. Ị juwa jẹ ya ogu da awụlẹ lolo nyaa u-uhye nya anyịrẹ-ịkamẹlụ juwa kpa kele kaka ra ọ-ọpyị nya Ijipiti.

²⁶Ụka ọọwa, iJuda byi anyadamwụ yẹkẹẹ, “Anụ anyadam, anụ ba wẹẹ, ọ́-ri kahị nwụ iJosẹfụ ọnyadahị tụ ju oyi. Ịịyẹ a tị́ ka ri apyobwuna nyamwụ hahị?

²⁷Ahị bala ọwa bwu ẹpwụ nya adịda ookpokpo lẹ, ọ́ chịla kahị ka họọ abwaabwọhẹ kpong-kpong ka. Lẹ, anụ kẹwẹ kahị hu iJosẹfụ rịra ala Ichimẹlụ ịlaanyị mẹ.” Ịnyị lẹ, anyadamwụ ịkịla wuu a myị jwoo lẹlẹ.

²⁸Ụka ká anyadịda nya iJosẹfụ juwa kpa ẹla ọọwa ọ-ọnụ wẹẹ lẹ, ị chẹhị kaka yẹ alọhị ịlẹ kị bwu ọpyị nya iMidiyan kị juwa chịpwụrụ kam lẹlẹ. Ọọwa lẹ, anyadamwụ a kele kaka gba iJosẹfụ kpehe bwu ẹpwụ nya ụjẹ-ọpyị ọọwa ọlẹ kị hwoo ju ka lẹ, ị hu iJosẹfụ rịra ala Ichimẹlụ lokpoko onyoowuru iwo imiiye lẹlẹ. Ịnyị, ala Ichimẹlụ ịwẹ a kpa iJosẹfụ rụ kele ka ọpyị nya Ijipiti lẹlẹ.

²⁹Ụka kọ nọ chẹẹ, iRubẹn yi oyi ẹpẹtẹ kele ka ẹga nya iJosẹfụ, ma ọ́ tị yọọ ẹ-ẹpwụ nya ụjẹ-ọpyị ọọwa ọlẹ kị hwoo ju kaka. Ụka ọọwa, ọ la iRubẹn ahịbwuu lụmẹ. Ọ wọọ ẹjẹ lụmẹ gbee kọ gu awụrụ nyamwụ ene hi ịlọmwụ.

³⁰Ahyaahị, iRubẹn rụnyẹ kele ka ẹga nya anyadamwụ. Ọ byaa lida-lida yẹkẹẹ, “IJosẹfụ á juwa ẹ-ẹpwụ nya ụjẹ-ọpyị kaka. Anyị, m tị́ ka họ kpá wẹ mẹ?”

³¹Ụka ọọwa, anyadịda nya iJosẹfụ ịwẹ kele kaka wu ẹmwụ ọhẹ chimyi, ya ịwọ nyamwụ yẹ hụ awụrụ nya iJosẹfụ la ịwọ jwoo chwẹẹchwẹẹ.

³²Ị wuleji hu ang kele ka ẹga nya adaa. Ị mẹ awụrụ nya iJosẹfụ ọwẹ jọọ. Ị byoo yẹkẹẹ, “Adada ee, yẹ awụrụ ọlẹ tahị wẹẹ. Ọ́ meng awụrụ nya iJosẹfụ ọnyị nyang ka? Ahị yọọ dụwa ọ-ọnụ ụgbẹyị.”

³³Ụka ká iJekọbụ yọọ, ọ jẹ kọ ri awụrụ nya iJosẹfụ ịnyịlẹhị. Ọ cheko lomyi gboo yẹkẹẹ, “Ijwo adam ee, awụrụ nya iJosẹfụ ọnyịm a lẹẹ lẹ oo! Iyo ọnyẹẹgẹga ọhẹ kaka nwụm ọnyị, boo ri hwẹẹhwẹẹ wuu lẹ.”

³⁴IJekọbụ juwa jida bala o-bida juwa gu ịwụrụ nyamwụ ene, chajị ọ tọọ olujwo lụmẹ nya igu nya iJosẹfụ ọnyị nyamwụ. IJekọbụ bida nya iJosẹfụ lụka tata, juwa kụrụ ịwụrụ nya owuru ọkpakpa.

³⁵Anyị anyang nya iJekọbụ bala anyị alẹng nyamwụ wuu wuleji kele ka kpọọ ẹjẹ ya nyị ba mẹ. Ma, iJekọbụ á tị myị ba kaka. Ọ byi anyị nyamwụ yẹkẹẹ, “Anụ bahim mẹ. M̀ ka gbu ta iJosẹfụ jẹ lẹ.” Ịịwẹ iJekọbụ a bida nya iJosẹfụ lụmẹ-lụmẹ lẹ.

³⁶Ụka ọwẹ lẹ, ala iMidiyan ịlẹ kị ra iJosẹfụ lẹ, ị kpọọ rụ kele kaka rịra ọlẹng ọhẹ ọlẹ kị wụrụ ịPọtịfa ọ-ọpyị nya ala Ijipiti lẹ. ỊPọtịfa ọọwa ri olegbeju ọtụka-ọtụka ẹ-ẹpwa nya adịrahụ nya ala Ijipiti wuu. ỊPọtịfa ọwẹ a ri olegbeju ọgbahị nya angịdẹwụ ịlẹ kị kaa gbe ọdọdẹpwa nya iFero Adịrahụ lẹ.