Read idege ỌMWỤ ỌDADA 39 Bible Online

ỌMWỤ ỌDADA 39 - idege bible

ỌMWỤ ỌDADA 39

¹Ụka ọọwa, ala Ichimẹlụ kpa iJosẹfụ kele kaka rịra ọla Ijipiti ọlẹ kị wụrụ ịPọtịfa. ỊPọtịfa ọọwa a ri olegbeju ọgbahị nya alebwo nya angịdẹwụ ịlẹ kị kaa gbe iFero Adịrahụ nya ala Ijipiti lẹ.

²Ụka ọọwa, Amkpaa juwa ta iJosẹfụ ẹ-ẹpwụ nya ang myị ang nyamwụ wuu ọ-ọpyị nya Ijipiti. Ịnyị, iJosẹfụ a hụwa ẹ-ẹpwa nya ịPọtịfa ayịbamwụ ọọwa lẹlẹ.

³Ụka ọọwa, ịPọtịfa ayịbaba nya iJosẹfụ ri ibeenu ya Amkpaa nyị juwa ta iJosẹfụ ụka wuu ịnyịlẹhị. Ọ myịmyị jẹ ká Ohe Oluhye ayịdang nyaa wẹẹ da iJosẹfụ ụbwọ du ká ang myị ang nya iJosẹfụ nyị wẹẹ kịlahị hiigu-hiigu ịnyị lẹ.

⁴Ịnyị, ẹla nya iJosẹfụ a há ịPọtịfa ayịbamwụ lụmẹ-lụmẹ lẹlẹ. Ọọwa lẹ, ọ hu iJosẹfụ olegbeju ọgbahị nya anchẹ nyamwụ ịkịla wuu lẹ, ọ tụụbwọ hi ang myị ang nyamwụ wuu ju iJosẹfụ ụ-ụbwọ kọọwa a ka kpẹhị rịraa họọ lẹlẹ.

⁵Bwu ụka ọlẹ ká ịPọtịfa hu iJosẹfụ olegbeju nya ẹpwa bala olegbeju nya ang myị ang nyamwụ wuu, Amkpaa a dọmwụ nya ahị ọwawa kụrụ ịPọtịfa ẹ-ẹpwụ nya ang myị ang nyamwụ ọlẹ kọ la wuu ẹ-ẹpwa bala ẹrụ nyamwụ ịnyịnyịịnyị pyịyọọ lẹlẹ. Amkpaa wahị kụrwọọ ịnyị chajị nya iJosẹfụ.

⁶Ụka ká ịPọtịfa yẹ ịnyị lẹ, ọ tụụbwọ hi ang myị ang nyamwụ wuu ju iJosẹfụ ụ-ụbwọ lẹlẹ. Ụka ọọwa, ịPọtịfa ayịdang á kaa họ ịngịngịhyẹ ẹ-ẹpwa nyamwụ dala ọ-kụ chekeee hu ang ri kaka, chajị iJosẹfụ ụbwọọmwụ a kaa họ ang myị ang nyamwụ wuu họọ lẹlẹ. Ụka ọọwa, iJosẹfụ ayịdang ri okolobya ọlẹ kọ há ụhị nwurwo-nwurwo lụmẹ.

⁷Ụka kọ nụwa ịnyịnyịịnyị lẹ, iJosẹfụ a ju ahụ nya ayịbamwụ ẹ-ẹhị lụmẹ-lụmẹ gbee lẹ, ọ byoo yẹkẹẹ, “IJosẹfụ, kẹwẹ kahị bánọ lawụlẹ chẹẹ mẹ!”

⁸IJosẹfụ pwa byoo yẹkẹẹ, “Eheehe, yẹ wẹẹ, ayịbam ọrụng tụụbwọ hi ang myị ang ọlẹpwa nyamwụ wuu jum ụ-ụbwọ. Ọ gu ahị gboo hi ang myị ang nyamwụ wuu ham.

⁹Ayịbang kọ ri ayịdẹpwa riri lẹ, ọ yam kpẹhị rịrị ang wuu ẹ-ẹpwa nyamwụ. Ahụ ká ri ahụ nyamwụ ụbwọng kẹnẹ-kẹnẹ à hi kam kpẹhị rịrị kaka lẹlẹ. Ee lẹ, anyị, m̄ tị́ ka jẹ-ẹ họ ang onyobyi ọlịịwẹ kpụ m̄ ka họ pyị Ohe Oluhye ịnyị mẹ? Ịgọgọ ẹnẹnẹhẹ.”

¹⁰Ọ ri nya ịlẹhị, ọnyang ọwẹ kaa yẹ rịrị iJosẹfụ ẹnụ myị ẹnụ yẹkẹẹ, nyị wẹ ẹga nyọwa pyii mẹ. Ma, iJosẹfụ-ụ́ tị myị nọ tọọ lee o-ja oja tọọ kpong-kpong ka.

¹¹Ịnyị, ẹnụtụrụ ọhẹ lẹ, iJosẹfụ a juwa u-ube nya ayịbamwụ ụbwọọmwụ-ụbwọọmwụ juwa họ ụkụrwọ, ụka ọlẹ ká ọnchẹ ọkịla ọhẹ-lọhẹ á ji ọnaabwọ kaka lẹlẹ.

¹²Ọọwa, ọnyang ọwẹ a ba iJosẹfụ kele ka ẹga ọlẹ kọ juwa họ ụkụrwọ lẹ, ọ yụbwọ dụrụ iJosẹfụ a-awụrụ ọtụka oluhye nyamwụ kịrẹkpẹ lẹ, ọ byoo yẹkẹẹ, “IJosẹfụ, chuchuu nọ tam chẹẹ mẹ.” Ụka ká iJosẹfụ pwa, ká ọnyang ọwẹ á myị kaka gbee lẹ, iJosẹfụ a pwọ awụrụ nyamwụ ọọwa jwoo ụ-ụbwọ lẹ, iJosẹfụ a rụnyẹ rụ kpehe hi ube ọọwa lẹlẹ.

¹³Ahyaahị ká ọnyang ọwẹ jẹ ya iJosẹfụ nyị pwa nya ịlẹhị-ịlẹhị, kpụ nyị pwọ awụrụ nyamwụ ju ọwa ụ-ụbwọ, rụnyẹ rụ ịnyị lẹ,

¹⁴ọọwa, ọ be ẹkọ wụrụ anchẹ ịkịla ịlẹpwa nyaa wuu kaka jịra lẹ, ọ byaa yẹkẹẹ, “Anụ tị́ yẹ uguru nya ang ọlẹ ká ọnyị nya ala iHiburu ọlẹ ká ayịbam kpa wẹ ẹpwa ọlẹ, wẹẹ tịtọ kọ ka chị oyoyi juhi lẹ. Ụka kam juwa u-ube nyahị lẹ, ọ warị, juwa tịtọ kọ ka họ ụya tam lẹ, m pwa, juwa cheko gboo nya ịlẹhị-ịlẹhị lẹlẹ.

¹⁵Ọọwa lẹ, ụka kọ wo eko ọchịchị nyam ọọwa lẹ, ọ rụnyẹ rụ kpehe bwu ube nyahị hi awụrụ nyamwụ ọlẹ jum ụ-ụbwọ lẹẹ lẹlẹ.”

¹⁶Ọọwa lẹ, ọnyang ọwẹ a hu awụrụ nya iJosẹfụ nụwa a-ang gbe ụka ọlẹ ká ayịbamwụ ka nya bwu ẹga ọlẹ kọ ka lẹlẹ.

¹⁷Ụka ká ayịbamwụ nya lẹ, ọ ya joo yẹkẹẹ, “Ayịbam ee, yẹ ụma nya uguru nya oyoyi ọlẹ ká ọnchẹ nyang ọla iHiburu ọlẹ ká kpa warị wẹ ẹpwa ọlẹ chị jum wẹ alẹ wẹẹ?

¹⁸Ụka ọlẹ kam juwa u-ube nyahị ụbwọm-ụbwọm lẹ, ọ warị juwa tịtọ kọ ka họ ụya tam lẹlẹ. Ụka kam pwa, kam juwa cheko gboo lẹ, ọ rụnyẹ rụ kpehe bwu ube nyahị hi awụrụ nyamwụ ọlẹ jum ụ-ụbwọ lẹlẹ.”

¹⁹Ahyaahị ká ịPọtịfa wo jaabwọ ká ahụ nyamwụ tịrọnụ ya joo jaabwọ ká iJosẹfụ juwa maga nyọka da ẹla-ahụ nyamwụ lẹ, agbama nyamwụ a wuru jahị da iJosẹfụ nya ịlẹhị-ịlẹhị lẹlẹ.

²⁰Ọọwa, ịPọtịfa a wu iJosẹfụ kpa kele kaka ju agba ụ-ụwa u-ube nya agba ọlẹ kị nwụ ha angịlẹ wuu kị da ẹla nya iFero Adịrahụ lẹlẹ. IJosẹfụ hụ u-ube nya agba ọọwa lụka ọtata.

²¹Amkpaa juwa ta iJosẹfụ ẹ-ẹpwụ nya ube nya agba ọọwa ịnyịnyị. Ohe Oluhye chị ọháha ọnahị nyamwụ ọlẹ kọ kaa gbu enyi ka ehe, ẹ-ẹga nya iJosẹfụ. Ọ họ ká olegbeju ọgbahị nya ube nya agba ọlụwa la ọháha ọtụka-ọtụka ẹ-ẹga nya iJosẹfụ ịnyịnyị.

²²Ọọwa lẹ, olegbeju ọgbahị nya ube nya agba ọọwa a hu iJosẹfụ olegbeju nya alagba ịkịla wuu lẹlẹ. Ọọwa lẹ, ọ tụụbwọ hi ụkụrwọ myị ụkụrwọ olube nya agba ọọwa wuu ju iJosẹfụ ụ-ụbwọ lẹlẹ.

²³Ụka ọọwa, ụbwọ-lẹta nya olegbeju ọgbahị nya ube nya agba ọọwa-á juwa ẹ-ẹpwụ nya ụkụrwọ ọhẹ-lọhẹ ọlẹ kọ ya ju iJosẹfụ ụ-ụbwọ kaka, chajị Amkpaa kaa juwa ta iJosẹfụ ẹ-ẹga myị ẹga bala ọ-juwa kpa ang myị ang nyamwụ wuu kịlahị ụka wuu ịnyịnyị.