Read idege ỌMWỤ ỌDADA 41 Bible Online

ỌMWỤ ỌDADA 41 - idege bible

ỌMWỤ ỌDADA 41

¹Ụka ká ẹka imiiye chịpwụrụ bwu ụka ọlẹ kị gba ọnchẹ nya iFero kpehe hi ube nya agba, adịrahụ nya ala Ijipiti la ụlaa ọhẹ. Ẹ-ẹpwụ nya ụlaa ọọwa, ọ chẹhị kaka yẹ ịlọmwụ ọ-ọnụụka nya Ihu ịNayịlị.

²Ụka kọ gọdayị rịrị ụ-ụwa, ọ chẹhị kaka yẹ ịna irwiye ịhyẹ ịlẹ kị gba kpehe bwu ẹpwụ nya ihu ọọwa. Ịna ịịwa ri ịtụka lụmẹ. Ị hwo kpumkpum lịnyịrọ dịrẹ-dịrẹ. Ịna ịịwa juwa ri amẹ ọ-ọnụ nya Ihu ịNayịlị ọọwa.

³Ọ myịmyị chẹhị kaka yẹ ịna irwiye ịkịla kị gba kpehe bwu ẹpwụ nya ihu ọwẹ ịnyịnyị. Ịna irwiye ihyẹẹkpẹ ịịwa ri ekpinegu-ekpinegu kwoncho-kwoncho. Ịna irwiye ihyẹẹkpẹ ịwẹ kele kaka gọdayị ta ịna irwiye nya ọgbanyẹ ịlaanyị meme ọ-ọnụụka nya ihu ọwẹ.

⁴IFero chẹhị kaka yẹ ká ịna ikwoncho-kwoncho ịwẹ go ịna ịtụka nya ọgbanyẹ ịlaanyị mile. Ọọwa, iFero a chị ahị-une lẹlẹ.

⁵Ụka ká iFero nọnọ myịmyị, ọ la ụlaa ọkịla. Ẹ-ẹpwụ nya ụlaa ọọwa, ọ chẹhị kaka yẹ ụmbakpa ookpokpo ọhẹ ọlẹ kọ ba anyị irwiye ịlẹ kị chị ịgbịlọ kụchọ-kụchọ hiigu-hiigu.

⁶IFero a myịmyị chẹhị kaka yẹ anyị nya ambakpa irwiye ịkịla u-uhye nya ụmbakpa ookpokpo ọọwa-ọọwa kị la piroro, ju ajẹ-ka, ju ajẹ-ka lẹlẹ. Ụka ọọwa, iFero yẹ ẹ-ẹpwụ nya ụlaa ọọwa jaabwọ ká anyị nya ambakpa irwiye ihyẹẹkpẹ ịwẹ gbu wombooo, chajị ọhụ nya ogo yaa akama lụmẹ kaka kpoye.

⁷Ọ yẹ jaabwọ ká anyị nya ambakpa irwiye ihyẹẹkpẹ ịháha-ka ịwẹ go anyị nya ambakpa irwiye nya ọgbanyẹ ịlẹ kị hiigu lụmẹ mile. Ọọwa lẹ, iFero a chị ahị-une lẹ, ọ jẹ ká ụlaa ọ wẹẹ la lẹlẹ.

⁸Ụka ká ahị pyẹ lẹ, ọhụ á ba iFero e-eji kpong-kpong ka. Ọọwa, ọ be ẹkọ wụrụ alegino bala angị jẹ ẹla nya ala Ijipiti wuu kaka jịra lẹ, ọ wa alaa imimiiye ịwẹ ya jaa lẹlẹ. Ma, ọngọngọhẹ nyaa á tị jẹ etu nyaa bwuru ya joo myị kpong-kpong kaka.

⁹Ụka ọọwa, olegbeju ọkpẹhị rịrị ere ọnwanwa nya iFero Adịrahụ warị wẹ ẹga nya adịrahụ kaka byoo yẹkẹẹ, “Agaba Idu, m kpịtịya nya abyị ọlala nyam alẹ lẹ.

¹⁰Ụka ọlẹ kam bala olegbeju ọgbahị ọ-họ ịkaa nyang họ ẹla wụng ẹjẹ ugbeene, ká wuhi kaka ju agba ẹ-ẹpwa nya olegbeju ọgbahị nya angịdẹwụ ịlẹ kị kaa kpẹhị rịrị ọdọdẹpwa nyang lẹ, ahị la alaa ịhyẹ ụ-ụwa.

¹¹Ahị angị imimiiye la ụlaa lodu ookpokpo. Ụlaa nya ọngọngọọng nyahị bala etu nyamwụ tị datị hi awụlẹ.

¹²Ụka ọọwa, onjwo okolobya ala iHiburu ọhẹ juwa u-ube nya agba tahị ịnyịnyị. Okolobya ọọwa ri ọnchẹ nya olegbeju ọgbahị nya angịdẹwụ ịlẹpwa nyang. Ụka ká ahị angị imimiiye wa alaa nyahị ịịwa joo, ọ bwuru etu nya ụlaa nya ọngọngọọng nyahị ya joo.

¹³Jaabwọ kọ bwuru etu nya alaa ịịwa ya jehi, ị họ jịra hahị ịnyịnyị ịnyịlẹhị. Ị tịrịm am ẹkpẹ kele ka ahụrụ nya ụkụrwọ nyam. Ị tị wu olegbeju ọgbahị nya ịkaa nya adịrahụ kpa kele kaka ju orinwa.”

¹⁴Ahyaahị ká iFero Adịrahụ wo oja ọwẹ lẹ, ọ du angịnyị ẹrụ kele kaka gba iJosẹfụ kpehe bwu ube nya agba, chajị ká iJosẹfụ ka kele kaka bwuru etu nya alaa nya adịrahụ jwoo ịnyịnyị lẹlẹ. Ụka ká iJosẹfụ gba kpehe, ọ kele ka pwọ inyi nyamwụ gbịlẹ-gbịlẹ lẹ, ọ go ịwụrụ inyeewe nyamwụ kụrụ lẹ, ị kpọọ kele ka ẹga nya iFero Adịrahụ lẹlẹ.

¹⁵Ụka ká iFero yẹ iJosẹfụ, ọ byoo yẹkẹẹ, “IJosẹfụ yẹ mẹ, m la ụlaa ọhẹ ọlẹ ká ọngọngọhẹ Ijipiti á jẹ etu nyamwụ bwuru ya jem myị kaka. Ma, m tị wo oja ká kaa bwuru etu nya alaa je angịnyị myị. Ịnyị a du kam du ẹrụ tọng lẹ.”

¹⁶IJosẹfụ wẹ byi iFero Adịrahụ yẹkẹẹ, “Ám ayịdang a kaa bwuru etu nya ụlaa ka. Ohe Oluhye ayịdang a ka bwuru etu nya ụlaa nyang ọọwa jeng, la ọgụ ọlẹ kọ ka wung ẹpwụ lẹ, Agaba Idu.”

¹⁷IFero Adịrahụ byi iJosẹfụ yẹkẹẹ, “Ẹ-ẹpwụ nya ụlaa nyam, am kele kaka gọdayị rịrị ụ-ụwa ọ-ọnụụka nya Ihu ịNayịlị.

¹⁸M̀ chẹhị kaka yẹ ịna irwiye ịtụka i-hwo kpumkpum lịnyịrọ dịrẹ-dịrẹ ịhyẹ kị gba kpehe bwu ẹpwụ nya ihu ọwẹ juwa ri amẹ ọ-ọnụ ihu.

¹⁹M̀ myịmyị chẹhị kaka yẹ ịna irwiye ịkịla ịlẹ kị hi ekpinegu-ekpinegu kwoncho-kwoncho, kị gba kpehe bwu ẹpwụ nya ihu ọwẹ. Ḿ yẹ ịna ikwoncho ịlịịwẹ Ijipiti ẹnẹnẹhẹ lẹka.

²⁰Ịna irwiye ikwoncho-kwoncho ịwẹ kele kaka wu ịna irwiye ịtụka-ịtụka ilene mile wuu.

²¹Ụka kị wu ịna irwiye ịtụka ịwẹ mile ịnyị kpá lẹ, ọ́-ri ká ọngịnyị á yaa, ọ́ ka jẹ ya nyị wu ịngịngịhyẹ ọtụka ọlịnyị mile kpong-kpong ka, chajị, ị myịmyị la kwoncho-kwoncho jaabwọ kị la ene-ene. Ọọwa lẹ, m chị ahị-une lẹlẹ.

²²Ụka kam nọnọ myịmyị, m la ụlaa ọkịla kam chẹhị kaka yẹ ụmbakpa ọhẹ kọ ba anyị irwiye ịlẹ kị ri ịtụka-ịtụka hiigu-hiigu.

²³M myịmyị yẹ anyị nya ambakpa irwiye ịkịla ịlẹ kị la kpalị-kpalị, ju ajẹ-ka, ju ajẹ-ka, kị be kpehe u-uhye nya ụmbakpa ookpokpo-ookpokpo ọọwa ịnyịnyị, chajị ọhụ nya ogo gbaa wombooo lụmẹ kaka kpoye.

²⁴Ambakpa irwiye ịháha-ka ịwẹ go ambakpa irwiye nya ọgbanyẹ ịlẹ kị hiigu lụmẹ mile wuu. Ụka kam be ẹkọ wụrụ alegino ịla Ijipiti wuu, kam wa ụlaa nyam ọlẹ ya jaa lẹ, ọngọngọhẹ lẹpwụ nyaa á jẹ etu nyamwụ bwuru ya jem myị kpong-kpong kaka.”

²⁵IJosẹfụ wẹ iFero Adịrahụ yẹkẹẹ, “Agaba Idu, alaa nyang imimiiye ịịwa la etu ookpokpo. Ohe Oluhye tịtọ kọ ka ya jeng ang ọlẹ kọ juwa ka họ ị-ịlahị.

²⁶Ịna irwiye ịtụka ịwẹ ku ọmwakpa nya ẹka irwiye. Ambakpa irwiye ịnyịịla ịwẹ ku ọmwakpa nya ẹka irwiye ịnyịnyị. Etu nya alaa imiiye ịwẹ la ookpokpo ookpokpo.

²⁷Ịna ikwoncho-kwoncho irwiye ịkịla ịwẹ kị gba kpehe hi ẹkpẹ ku ọmwakpa nya ẹka irwiye ọkịla. Ambakpa ịkpalị-kpalị irwiye ịkịla ịlẹ ká ọhụ nya ogo họ kị gbu wombooo wẹ lẹ, ị ku ọmwakpa nya ẹka irwiye nya uhi ọtụka-ọtụka.

²⁸Lẹ, Agaba Idu, jaabwọ kam ya jeng ene-ene wẹ lẹ, ịnyị, ọ la lẹ, Ohe Oluhye tịtọ kọ ka mẹ ang ọlẹ kọ juwa ka họ ị-ịlahị jẹng.

²⁹Ẹka irwiye bawụlẹ-bawụlẹ, ang oriri ka dịda kpọrịkọọ ọ-ọpyị nya Ijipiti wuu.

³⁰Ẹka irwiye ọkịla ọ-bọọ ba, uhi ọtụka-ọtụka ka kpeji gbee ká angịnyị ka deeri nya ẹka irwiye nya ang oriri ọdịda lụmẹ ọlaanyị, chajị uhi ọtụka ọọwa ka chị angịrị lụmẹ kaka kpoye ju ka ẹga myị ẹga.

³¹Jaabwọ ká imyi ọọwa ka nwụ lụmẹ-lụmẹ kaka kpoye lẹ, ọngọngọhẹ á ka kpịtịya nya ang oriri ọdịda lụmẹ ọlaanyị lụka ọọwa kpong-kpong kaka.

³²Ang odudu ká la ụlaa ookpokpo-ookpokpo ọwẹ ụka imiiye ri Ohe Oluhye ayịdang cheje nyọka họ ẹlẹwẹ ene lẹlẹ, ọ ka dayi kaka. Ọ́ tị ka bịrị ụka ene kọ ka họọ jịra kaka ịnyịnyị.”

³³IJosẹfụ myịmyị byi iFero Adịrahụ yẹkẹẹ, “Agaba Idu, lẹ, ọ hiigu kaahụ adịrahụ ka chụ ọngọhẹ ọlẹ kọ jẹ ẹla hiigu-hiigu, kọ la irya ọnyịịla ịnyịnyị, ká ọngọọwa ka ri olegbeju ọ-ọpyị nya Ijipiti wuu.

³⁴Ọ chịla ká ka myịmyị-ị̀ chụ alegbeju ịhyẹ ịkịla ịlẹ kị ka da ọngọọwa ụbwọ nya ụkụrwọ ọọwa ịnyịnyị. Ụkụrwọ nyaa ka ri ọ-tụ ebwo ọhẹ bwu ẹpwụ nya ebwo ịrụ nya ang-ẹrụ ịlẹ ká angịnyị nyang wuu ka la ẹ-ẹpwụ nya ẹka irwiye nya ang oriri ọdịda ọwẹ guru ịnyịnyịịnyị.

³⁵Lẹ, ya ọngịrị ha alegbeju ịịwa kị kele kaka tụ ang oriri guru e-epweji ọnyị myị ọnyị nya ala Ijipiti wuu ẹ-ẹpwụ nya ẹka irwiye nya ang oriri ọdịda ọwẹ, ká byaa kị kpẹhị rịraa ụ-ụwa ịnyịnyị mẹ.

³⁶Ang oriri ọọwa ọlẹ kị ka tụguru a ka chị ala Ijipiti wuu da bwula imyi ọnwụnwụ onyobyi ọwẹ kọọ wẹẹ ka warị ẹ-ẹpwụ nya ẹka irwiye gbẹgbịlẹ lẹ, chajị ká ala Ijipiti nyanụ ka gbu igu-imyi kaka mẹ.”

³⁷Irya ọnyịịla ọlẹ ká iJosẹfụ ju iFero kpụ iFero ayịdang bala alukido nyamwụ ịpyọ lụmẹ.

³⁸Ụka ọọwa, iFero Adịrahụ byi alukido nyamwụ ịịwa yẹkẹẹ, “Anụ ya kahị ka ye ọngọngọhẹ ọkịla chụ dala iJosẹfụ ọlẹ ká Olegu nya Ohe Oluhye juwa tọọ wẹẹ?”

³⁹Ụka ọọwa, iFero byi iJosẹfụ yẹkẹẹ, “IJosẹfụ, wo mẹ, ahụ ọngọlẹ ká Ohe Oluhye bwuru etu nya ụlaa ọlẹ ya jeng lẹ, ahụ ụbwọng, m jẹ lẹ, chajị ọngọngọhẹ ọkịla á jam kọ jẹ ẹla lee ọ-la irya ọhịlẹ-hịlẹ lala ahụ ẹ-ẹgẹlẹ kpong-kpong kaka.

⁴⁰Lẹ, ahụ m chụ olegbeju nya ọdọdẹpwa nyam wẹ alẹ lẹlẹ. Ala Ijipiti wuu ji ekpeleji nyang lẹ. Ang myị ang ọlẹ ká ya lẹ, ọọwa ị ka họ lẹ, chajị ahụ a ri olegbeju ọ-bam ba ọ-ọpyị nya Ijipiti ọlẹ wuu lẹlẹ.

⁴¹IJosẹfụ wo mẹ. Am iFero hung olegbeju lẹ. Aa kpẹhị rịrị ọpyị nya Ijipiti ọlẹ wuu mẹ.”

⁴²IFero Adịrahụ pwọ ọmapẹ o-ju ụkụchụ nyamwụ ọlẹ kọ ri ang-ẹjẹẹ nya ọngịrị nya adịrahụ oriri nyamwụ, hwoo kpa kaka ju iJosẹfụ ụ-ụkụchụ. Ọ myịmyị go ịwụrụ ịtụka-ịtụka ịlẹ kị la ịnya lụmẹ kpa kaka kụrụ iJosẹfụ. IFero myịmyị hu ang odoomyi nya adịrahụ ọlẹ kị kpa okpoko ịgọm họ da iJosẹfụ o-omyi ịnyịnyị.

⁴³IFero myịmyị kele kaka hu ụma nya ang ọrụnyẹ ochiche ọlẹ ká ụnyịrẹ kaa gbile nyamwụ ha iJosẹfụ ịnyịnyị. Ẹga myị ẹga ká iJosẹfụ á tụ aha ka, angịhyẹ juwa ka da ọna gboo yẹkẹẹ, “Anụ chị arụụ eji ha iJosẹfụ olegbeju nyanụ mẹ oo!” Ịịwẹ, iFero a bwu hu iJosẹfụ olegbeju nya ala Ijipiti wuu lẹ.

⁴⁴IFero myịmyị byi iJosẹfụ yẹkẹẹ, “Am iFero Adịrahụ ọlẹ, m ya ọngịrị hang lẹ. Ọngọngọhẹ á jam ka hu ụbwọ lee, ẹta nyamwụ chụtẹ kpa họ ịngịngịhyẹ ọ-ọpyị nya Ijipiti ọlẹ wuu myị kaka, kẹnẹ-kẹnẹ ọ́-ri ká ahụ iJosẹfụ ayịdang á myị ene lẹ, mẹ ịnyị.”

⁴⁵IFero ju iJosẹfụ ẹnyị onyeewe yẹkẹẹ, kọ ri ịSafẹnatị-ịpaniya. IFero hu Asẹnatị ọnyị nya ịPọtịfẹra ha iJosẹfụ ye. ỊPọtịfẹra adịda-ẹpwa nya iJosẹfụ ọwẹ ri ọngọkiliya ha alepweji nya Ọọn ọlẹ ká ẹnyị ọkịla nyamwụ ri iHeliyopolisi. Ụka ọọwa, iJosẹfụ juwa tụ aha wụla alọpyị nya Ijipiti wuu yẹ.

⁴⁶IJosẹfụ gu ẹka iwo ịta ụka ọlẹ kị hwoo olegbeju ụ-ụwa Ijipiti. Ụka ọọwa, iJosẹfụ hu ang kpehe bwu ọdọdẹpwa nya iFero adịrahụ, juwa ga wụla ẹga myị ẹga nya ọpyị nya Ijipiti yẹ ịnyịnyịịnyị.

⁴⁷Ụka ká ụka nya ẹka irwiye nya ang oriri ọdịda ọọwa pwụ eji lẹ, ang-ẹrụ nya ala Ijipiti wuu há lụmẹ-lụmẹ bawụlẹ-bawụlẹ jịra ẹka irwiye ọọwa gbẹgbịlẹ ịnyịlẹhị.

⁴⁸Ụka ọọwa, iJosẹfụ tụ ang oriri nya ẹrụ ịwẹ guru ẹka myị ẹka wuu gbee ká ẹka irwiye nya ang oriri ọháha ịwẹ chịpwụrụ. Ọ tụ ang oriri ịịwa guru dọgịlẹ ju bwu epweji ọnyọnyọọnyị nya ala Ijipiti wuu.

⁴⁹IJosẹfụ tụ ang oriri ịịwa guru gbudum lụmẹ-lụmẹ gbee kị lala ugburuja ọlẹpwụ nya ihu ọtụka. Ị lụmẹ kịlaakịla gbee ka iJosẹfụ á jwaa mẹ myị kpong-kpong kaka.

⁵⁰Ene ká ụka nya uhi ọtụka-ọtụka ọọwa ka pwụ kpá lẹ, Asẹnatị ahụ nya iJosẹfụ ọlẹ kọ ri ọnyị nya ịPọtịfẹra ọngọkiliya ha epweji nya Ọọn ma anyị alẹng angị imiiye ha iJosẹfụ lẹ.

⁵¹IJosẹfụ wụrụ ẹnyị nya ọnyị ọgbahị nyamwụ, ịManasẹ, ọlẹ ká etu nyamwụ ri “eeri ọdada,” chajị iJosẹfụ yẹkẹẹ, “Ohe Oluhye kpa ọnyị ọlẹng ọlẹ dam eeri nya akama ọlẹ kam yẹ lụmẹ lẹ. Ọ myịmyị dam eeri hi alẹpwa nya adam ịnyịnyị lẹ.”

⁵²IJosẹfụ wụrụ ẹnyị nya ọnyị oheeye, Ifurem, ọlẹ ká etu nyamwụ ri “ugbe ọnwụnwụ,” chajị iJosẹfụ myịmyị yẹkẹẹ, “Ohe Oluhye kiji jam ya anyị ham ma, ám ọ-ọpyị ọlẹ ká akama yẹm lụmẹ lẹ.”

⁵³Ịnyị lẹ, ẹka irwiye nya ang oriri ọdịda ọla Ijipiti ọwẹ a chịpwụrụ lẹlẹ.

⁵⁴Ụka ọọwa lẹ, ẹka irwiye nya uhi ọtụka-ọtụka a warị ịnyịlẹhị jaabwọ ká iJosẹfụ ya ene-ene lẹlẹ.

⁵⁵Ụka ká imyi ọtụka ọọwa juwa nwụ ala Ijipiti wuu nya ịlẹhị-ịlẹhị lẹ, ịwa wuu a kele kaka tụguru iFero lẹ, ị bịlọọ byoo yẹkẹẹ, “IFero Adịrahụ, ya ang oriri hahị mẹ.” IFero wẹ byaa yẹkẹẹ, “Anụ kele ka ẹga nya iJosẹfụ mẹ. Jaabwọ myị abwọ kọ byinu lẹ, anụ-ụ họ ịnyị mẹ!”

⁵⁶Ịnyị lẹ, ụka ká uhi ọtụka-ọtụka ọọwa juwa họ ala Ijipiti ịwẹ elego lụmẹ-lụmẹ ju ka ẹga myị ẹga wuu lẹ, iJosẹfụ a kele kaka wụrụ ebe nya ang oriri ịwẹ, juwa kpa rịra ala Ijipiti wuu lẹlẹ.

⁵⁷Alẹpwụma myị ẹpwụma wuu datị-datị juwa kele ka ọpyị nya Ijipiti kaka ra ang oriri bwu ẹpwụtụbwọ nya iJosẹfụ ịnyịnyị, chajị uhi ọtụka-ọtụka onyobyi ọwẹ pyẹ ju ka ẹga myị ẹga nya alodehe wuu.