Read idege ỌMWỤ ỌDADA 42 Bible Online

ỌMWỤ ỌDADA 42 - idege bible

ỌMWỤ ỌDADA 42

¹Ụka ká iJekọbụ wo oja ya nyị juwa kpa ajẹ nya ambakpa ra ọ-ọpyị nya ala Ijipiti lẹ, ọ be ẹkọ wụrụ anyị nyamwụ wuu warị kaka jịra lẹ, ọ byaa yẹkẹẹ, “Ịyẹ a tị́ du kanụ jam hụhụ chịng juwa chẹhị ẹhị yẹ awụlẹ kem ịnyị?

²Ị ya jem ya nyị juwa kpa ambakpa ra ụ-ụwa Ijipiti. Lẹ, anụ wuleji kanụ kele kaka ra warị mẹ. Ọ́-ri ịnyị ka aalẹ, ahị jam ka gbu igu-imyi lẹ.”

³Ịnyị, anyadịda nya iJosẹfụ angị iwo chiriri a hu ang ẹdịyẹ kele ka Ijipiti kaka ra ambakpa lẹlẹ.

⁴IJekọbụ á myị ha iBenjamịn ọnyịnịna nya iJosẹfụ ayịdang ya nyị baa rụ kele mẹ ka, chajị iJekọbụ chuko ká ịngịhyẹ ka họ iBenjamịn ụ-ụgbẹyị.

⁵Ịnyị, anyị nya Isirẹlụ ịwẹ a hu ang ẹdịyẹ nya Ijipiti bala angịkịla juwa rụ kele kaka ra ang oriri bwu Ijipiti lẹlẹ, chajị uhi ọtụka-ọtụka onyobyi ọwẹ pyẹ ju ka ọpyị nya iKenan nyaa ịnyịnyị.

⁶Ụka ọọwa, iJosẹfụ ri olegbeju ọtụka-ọtụka ọ-ọpyị nya Ijipiti wuu lẹ. Ọwa juwa kpa ambakpa rịra angịnyị wuu lẹ. Ụka ká anyadịda nya iJosẹfụ ịwẹ pwụ ẹga nyamwụ, ịwa wuu juwa hiri egbeju nyaa kpẹẹ weji ha iJosẹfụ.

⁷Ụka ká iJosẹfụ yẹ anyadamwụ ịwẹ lẹ, ọ jáa ogu ya anyadịdọwa nyaa wẹ lẹ. Ma, iJosẹfụ tị hwaa lala angga, juwa ya ẹla taa la ọngịrị-ọngịrị. Ọ taa ịtọ yẹkẹẹ, “Anụ angịwẹ, ale anụ tị́ bwu warị? Ị wẹ ya ịwa nyị bwu ọpyị nya iKenan warị kaka ra ang oriri ẹgẹlẹ.”

⁸Ẹla ọwẹwẹ nyaa ọọwa myịmyị họ ká iJosẹfụ jẹ ịnyịlẹhị ya angịwẹ nyị ri anyadịdọwa ịnyịlẹhị. Ma, ịwa ayịdang á tị jẹ iJosẹfụ ogu datị kpong-kpong kaka.

⁹Ụka ọọwa, iJosẹfụ kpịtịya nya alaa ịlẹ kọọ la chajị nyaa lụka nya enjwo nyamwụ wuu. Ịnyị iJosẹfụ a byaa yẹkẹẹ, “Anụ ekpilo nya angịnyị a wẹ wuu lẹ. Anụ ri alịbaje nya aluji nyahị. Ị duunu ẹrụ du warị kaka wụla ọpyị nyahị ọlẹ yẹ, chajị kanụ ka rụ kaka ya jaa jaabwọ kahị la dẹwụ-dẹwụ kaka ba.”

¹⁰Ị wẹ byi iJosẹfụ yẹkẹẹ, “Ịgọgọ ẹnẹnẹhẹ! Ang oriri kem, ahị anchẹ nyang a wẹ la ọrara lẹ, Ịjachi!

¹¹Ahị wuu ri anyị nya ọlẹng ookpokpo. Angịnyị ịlam-ịlam, ahị anchẹ nyang a ri lẹ, Agaba Idu! Áalịbaje ị-wụla ọpyị yẹ, ahị ri kpong-kpong ka.”

¹²IJosẹfụ myịmyị byaa yẹkẹẹ, “M̀ jẹẹnụ ene lẹ! Anụ warị kanụ ka jẹ ọdẹwụ-dẹwụ nyahị.”

¹³Ị wẹ byi iJosẹfụ yẹkẹẹ, “Agaba Idu, jaabwọ ká ya wẹ lẹ, ịnyị, ọ́ la ka! Adahị mahị anyị alẹng angị iwo kụrụ imiiye ọ-ọpyị nya iKenan. Ọnyị ọlẹ kọ ri ohyẹẹkpẹ nyahị juwa ẹ-ẹpwa ta adahị. Ọngọkịla nyahị tị gbu lẹ.”

¹⁴IJosẹfụ myịmyị wẹ byaa yẹkẹẹ, “M̀ jẹ ẹnụ myịmyị lẹ, anụ warị kanụ ka jẹ ọdẹwụ-dẹwụ nyahị chajị kanụ ka jẹ-ẹ warị kaka dahị ẹwụ.

¹⁵Kpá la ọngịrị nya iFero adịrahụ, ọ́-ri kanụ kpa ọnyadanụ ochiche ọọwa warị wẹ ẹgẹlẹ kpá ka aalẹ, ánụ ka rụ bwu Ijipiti ọlẹ kaka! Ọwẹ ụbwọọmwụ, a ka ri ang ọlẹ kam ka kpa jẹ ẹla nya ịlẹhị oyaya nyanụ datị lẹlẹ.

¹⁶Anụ du ọngọ ookpokpo nyanụ ẹrụ kele kaka kpa ọnyị ohyẹẹkpẹ nya adanụ ọọwa warị ene kaanụ angị hihi ka gba kpehe hi ube nya agba mẹ, chajị, ọọwa ụbwọọmwụ kẹnẹ-kẹnẹ a ka mẹ ẹla nya ịlẹhị oyaya nyanụ jẹẹhị lẹlẹ. Ó-ri ịnyị ka aalẹ, kpá la ọngịrị nya iFero adịrahụ, m jẹ yẹkẹẹ, anụ angịwẹ warị kanụ ka jẹ ọdẹwụ dẹwụ nyahị pyii lẹ.”

¹⁷Ịnyị, iJosẹfụ a waa ịwa wuu kpa kele kaka ju ka ube nya agba lala ẹnụtụrụ ịta gbẹgbịlẹ lẹlẹ.

¹⁸Ẹnụtụrụ ọhata lẹ, iJosẹfụ a kele kaka byaa yẹkẹẹ, “Anụ wo mẹ. Am ayịdang ri ọngọ ju uhi nya Ohe Oluhye lẹ, ọ́-ri kanụ ka myị-ị họ ang ookpokpo ọwẹ kam wẹẹ ka ya jenu lẹ aalẹ, m ka chịnụ da kanụ ka rụ lẹ.

¹⁹Ó-ri kanụ jẹ yẹkẹẹ, ịwa nyị ri angịnyị ịlam-ịlam ịnyịlẹhị lẹ aalẹ, anụ tụụbwọ hi ọngọ ookpokpo nyanụ hụ ám u-ube nya agba ọlẹ mẹ. Kaanụ angị hihi a kpa ang oriri ọlẹ kanụ ra rụ kele kịla alẹpwa nyanụ ịlẹ kị lalẹẹ limyi ẹ-ẹpwa mẹ.

²⁰Ụka kanụ pwụ ẹpwa lẹ, anụ-ụ kpa ọnyadanụ ohyẹẹkpẹ ọọwa warị chajị kam jẹ ká ẹla nya ịlẹhị a wẹ kanụ wẹẹ ya lẹ mẹ. Ụka ọọwa, anụ ka jẹ-ẹ be bwu ụbwọ nyahị myị wẹẹ lẹ.” Ọọwa lẹ, anyadịda nya iJosẹfụ ịwẹ a myị ju ẹla nya iJosẹfụ ọọwa lẹlẹ.

²¹Ụka ọọwa, ị juwa ya ẹla ta awụlẹ yẹkẹẹ, “Nyẹla ịlẹhị, uri nya ang onyobyi ọlẹ kahị họ ẹ-ẹga nya ọnyadahị ọlẹ kahị wu ra, a lẹẹ kahị lẹẹ ye alẹ lẹlẹ. Ụka ọọwa lẹ, ahị ayịdang yọọ yẹ ẹ-ẹpwụ nya akama nyamwụ kpá nyaa lẹ, ahị́ myị ke ụrụ la ọbịlẹ-bịlẹ nyamwụ ọlẹ kọ juwa bịlẹhị ụka ọọwa kpong-kpong kaka.”

²²IRubẹn wẹ byaa yẹkẹẹ, “Anụ tị́ yẹ lẹ. M̀ pwa lẹẹ ugbeene, ma ịnyam á háanụ ka. Ọ rụwẹ lẹ. Ohe Oluhye jam wuhi uri nya igu nyamwụ alẹ lẹ!”

²³Ụka kị juwa ya ẹlẹwẹ ta awụlẹ la oja nyaa lẹ, iJosẹfụ juwa wo. Ma, ịwa ayịdang á tị jẹ yẹkẹẹ, iJosẹfụ nyị juwa wo kpong-kpong ka, chajị ọngọhẹ juwa yẹ ẹla dodehe haa bala iJosẹfụ.

²⁴Ụka ká iJosẹfụ wo ẹlẹwẹ kị juwa ya ịịwẹ wuu lẹ, ọ rụ bwu ẹga nyaa kele kaka jida yoyi-yoyi ene kọọ gba kpehe kaka ya ẹla taa myịmyị lẹlẹ. Ịnyị lẹ, iJosẹfụ a gba iSimyọn kpehe bwu ẹpwụ nya anyadamwụ ịwẹ lẹ, ọ chọọ ori ị-ịlahị nyaa ịwa wuu lẹlẹ.

²⁵Ụka ọọwa, iJosẹfụ byi anchẹ nyamwụ yẹkẹẹ, “Anụ mẹ ambakpa myị awụtọọ nya angịwẹ wuu, kanụ tụụbwọ hi okpoko nyaa wuu juwa ẹ-ẹpwụ nya olo nyaa haa mẹ. Anụ-ụ̀ ya ang oriri ọlẹ ká angịwẹ ka ri ụ-ụgbẹyị haa kpa rụ ịnyịnyị mẹ.” Ọọwa lẹ, anchẹ ịịwa a họ jaabwọ ká iJosẹfụ byaa wuu lẹlẹ.

²⁶Ụka kị ju olo nya ambakpa ịlẹ kị ra chụ anyịrẹ nyaa kpá lẹ, ị hu ang ẹdịyẹ nya ẹpwa nyaa lẹlẹ.

²⁷Ụka kị jẹ pwụ ẹga ọmwịịnyọ, ọngọhẹ nyaa wụrụ olo nyamwụ kọ ka hu ang oriri ha ụnyịrẹ nyamwụ lẹ, ọ yẹ okpoko nyamwụ ụ-ụwa ọ-ọnụ nya awụtọọ nyamwụ lẹlẹ.

²⁸Ụka ọọwa, ọ chị ọchahoho, juwa byi anyadamwụ ịkịla yẹkẹẹ, “Ẹla ọlanyị a tị́ lẹẹ alẹ? Ị tụụbwọ hi okpoko nyam jum olo lẹ! Anụ kẹwẹ kaka yọọ lẹẹ ọ-ọnụ nya awụtọọ nyam mẹ! Ụka ká anyadamwụ ịkịla ịwẹ yẹ okpoko ọọwa, ọ laa ịwa wuu ahịbwuu lụmẹ. Ị juwa ju uhi juwa hụ kpakpakpa, juwa byi awụlẹ yẹkẹẹ, ẹla ọlanyị a tị́ lẹẹ ká Ohe Oluhye lẹẹ họhị ịịlẹ-ẹ̀?”

²⁹Ụka kị nya pwụ ẹpwa nya iJekọbụ adaa i-iKenan lẹ, ị tịrọnụ nya ang myị ang ọlẹ wuu kọ họ ẹ-ẹga nyaa i-Ijipiti ya je adaa lẹlẹ.

³⁰Ị byoo yẹkẹẹ, “Ụka kahị pwụ ụwa lẹ, ọngọlẹ kọ ri olegbeju ọtụka-ọtụka nya ala Ijipiti wuu la ẹhị ọngịrị-ọngịrị tahị lụmẹ. Ọ rwarụ tahị juwa byihi ya ahị wuu nyị mẹ ọwa alịbaje ịlẹ ká aluji nyịwa nyị dudu warị kaka wụla ọpyị nyịwa yẹ kem.

³¹Ụka ọọwa, ahị wẹ byoo yẹkẹẹ, ‘Ehe! Ẹẹdịyẹ nya ẹla ọlịnyị, ahị jẹ warị kpong-kpong ka. Ahị ri angịnyị ịlam-ịlam!

³²Adahị mahị anyị alẹng angị iwo kụrụ imiiye. Ọngọhẹ nyahị gbu lẹ. Ọngọlẹ kọ ri ọnyị onjwo nyahị wuu juwa ẹ-ẹpwa ta adahị ọ-ọpyị nya iKenan.’

³³Ụka ọọwa, olegbeju ọtụka-ọtụka nya alụwa ọwẹ, wẹ byihi yẹkẹẹ, ‘Ang ọlẹ kam ka kpa jẹ ẹla ịlẹhị nyanụ ụbwọọmwụ a lẹẹ lẹlẹ. Anụ tụụbwọ hi ọngọ ookpokpo nyanụ hụ ám ẹgẹlẹ kaanụ angị hihi a kpa ang oriri kele kịla alẹpwa nyanụ ịlẹ kị juwa la imyi mẹ.

³⁴Kanụ kpa ọnyadanụ ohyẹẹkpẹ ọọwa warị chajị kam ka jẹ yẹkẹẹ, anụ ri angịnyị i-ya ẹla nya ịlẹhị mẹ. Aalẹ, m ka jẹ kánụ ri alịbaje ịlẹ kị du warị kaka wụla ọpyị nyahị yẹ kaka ịnyịlẹhị. Ụka ọọwa, m ka tụụbwọ hi ọnyadanụ ọlẹ hanụ lẹ. Aalẹ, anụ ka hụ am̀ ẹgẹlẹ juwa da ọhị nyanụ jaabwọ kọ háanụ lẹ.’ ”

³⁵Ụka kị yi olo nyaa ori, ọngọngọọng nyaa yẹ jaabwọ kị tụụbwọ hi okpoko nyaa wuu juwa tịrẹkpẹ haa. Ụka kị yẹ ịnyị, ọ kpaa ịwa wuu ọkịlẹtụ enyi lụmẹ bala iJekọbụ adaa.

³⁶Ụka ọọwa, iJekọbụ wẹ byaa yẹkẹẹ, “Anụ ka kpam anyị kaka chị hụrụ wuu lẹẹ. IJosẹfụ gbu him lẹ. Anụ tụụbwọ hi iSimyọn tụwa i-Ijipiti lẹ. Anụ tụtụm myịmyị ka wu iBenjamịn kaka bọọ u-uhye? Ẹla-ẹla nyam am-am ọngọ ookpokpo a myụwẹ wuu lẹ!”

³⁷Ụka ọọwa, iRubẹn wẹ byi iJekọbụ yẹkẹẹ, “Adada, aa tụụbwọ hi iBenjamịn jum ụ-ụbwọ mẹ. M̀ ka kpọọ ụ-ụbwọ ba ịlọm nya wang pyii lẹ. Ó-ri kam nya labwọ-abwọ lẹ aalẹ, aa nwụ anyị alẹng nyam imimiiye ịlaanyị kwiwa nyamwụ ụka ọọwa mẹ.”

³⁸IJekọbụ wẹ byoo yẹkẹẹ, “Am bala ahụ ka, adam. IBenjamịn ọnyị nyam á juwa ka baanụ ka ẹgẹgẹhẹ kpong-kpong ka. IJosẹfụ ọnyịnamwụ gbu him lẹ. IBenjamịn ọlẹ ụbwọọmwụ a hi lẹẹ kile-kile lẹlẹ. Ó-ri kam tụụbwọ hyoo hanụ ká ịngịhyẹ á họọ ụ-ụgbẹyị tụmwụtị lẹ ọọwa lẹ, ọjụjụ nyamwụ a ka ba inyi inyiiwuru nyam ịlẹ rụ kele ka ejegu ugbẹnyị lẹka lee! Ịgọgọ ẹnẹnẹhẹ.”