Read idege ỌMWỤ ỌDADA 45 Bible Online

ỌMWỤ ỌDADA 45 - idege bible

ỌMWỤ ỌDADA 45

¹Ụka ká iJosẹfụ wo ẹla ọlẹ ká iJuda ya kpá wuu lẹ, ọ́ wu ịlọmwụ kpa myị kpong-kpong kaka. Ọọwa, ọ byi ala Ijipiti ịlẹ wuu kị juwa taa ya nyị rụ kpehe hi ịwa mẹ lẹlẹ. Ụka ká iJosẹfụ ya ịlọmwụ dodehe je anyadamwụ lẹ, ala Ijipiti ọhẹ-lọhẹ á juwa wo taa ka.

²Ụka ọọwa, iJosẹfụ juwa jida gboo lụmẹ-lụmẹ gbee ká ala Ijipiti ịlẹ kị juwa odehe wo. Oja nya ida ojeje nya iJosẹfụ ọọwa ru ohi pwụ ọdọdẹpwa nya iFero ịnyịnyị.

³Ụka ọọwa, iJosẹfụ byi anyadamwụ ịwẹ yẹkẹẹ, “Am a ri iJosẹfụ ọnyadanụ lẹ. Anụ myị ká iJekọbụ adam juwa lahị-lahị ịnyịlẹhị wẹẹ?” Ụka ọọwa, anyadịda nya iJosẹfụ ịwẹ wuu ju uhi dapwụ hụ amẹ ị-ịlahị nya iJosẹfụ. Ọngọngọhẹ nyaa á ya ẹla bwu ọnụ nyamwụ myị kpong-kpong kaka.

⁴Ụka ọọwa, iJosẹfụ myịmyị byaa yẹkẹẹ, “Anụ tụ bam warị wẹẹ.” Ụka kị tụ bọọ kele, ọ myịmyị byaa yẹkẹẹ, “Am a ri iJosẹfụ ọlẹ kanụ wu ra gbee kị kpam pwụ ọpyị nya ala Ijipiti lala ọnyọhị lẹ.

⁵Ma, anụ myị ká ọkịlẹtụ nyanụ a juwa ya eje wunu u-uhye nya ọọwa lẹẹlẹẹ kokoo. Anụ tị juwa wụ ẹjẹ ta awụlẹ, juwa kpụ awụlẹ abyị chajị nya ọọwa lẹẹlẹẹ kaka ịnyịnyị, chajị am ayịdang jẹ ká Ohe Oluhye lịlọmwụ a dum ẹrụ warị wẹ ọpyị nya ala Ijipiti jene nyanụ nyọka chịnụ da lụka nya imyi ọnwụnwụ ọtụka ọlẹ lẹ.

⁶Ẹka oheeye nya uhi ọtụka onyobyi ọlẹ a lẹẹ wẹẹ lẹ. Ọlẹ á tị ri ọhẹ-lọhẹ lẹka chajị ụka nya uhi ọwẹ hi lala ẹka ịrụ gbẹgbịlẹ, ene ká ang-ẹrụ ka há wẹẹ.

⁷Ẹla nya ịlẹhị ịnyị, Ohe Oluhye tọchị dum du ẹrụ jene nyanụ warị wẹ ẹgẹlẹ kaka nwụlanọ gbenu bala anyị nyanụ ịlẹ kị ka wo ẹnyị-ehe nyanụ odehe ọlẹ, chajị ká imyi ọnwụnwụ onyobyi ọlẹ á ka tanụ ayịreji gbanggbang kaka.

⁸Lẹ, aanụ ayịdang à kpam warị wẹ ọpyị nya Ijipiti ọlẹ ka. Ma, Ohe Oluhye lịlọmwụ a dum ẹrụ warị lẹ. Lẹẹlẹẹ lẹ, Ohe Oluhye hum hụhụ wuu lala adịda nya iFero ayịdang alẹ lẹ. Ọ hum olegbeju nya ọdọdẹpwa nya iFero wuu lẹ. Ohe Oluhye myịmyị hum olegbeju nya ọpyị nya ala Ijipiti ọlẹ wuu alẹ ịnyịnyị lẹ.

⁹Lẹẹlẹẹ, m tịtọ kanụ ka chị agaga kele ka ẹga nya iJekọbụ adam. Anụ kele kanụ byoo ya am iJosẹfụ ọnyị nyamwụ nyị ya Ohe Oluhye nyị hu ọwa agaba ọtụka nya ala Ijipiti wuu lẹ. Am nyị ya nyị kẹwẹ-kẹwẹ ahyaahị wẹ ẹga nyọwa mẹ.

¹⁰Am nyị myịmyị ya ọpyị nya iGochin nyị jam kịị nyị ka kụ ẹpwa nyamwụ ụ-ụwa jum chwẹẹ lẹ. Ọpyị ọọwa nyị lụmẹ ka nwọọ ọwa ayịdang bala anyị nyamwụ wuu bala anyị nya anyị nyamwụ wuu ịnyịnyị. Ẹga nyị ka juwa ha ịna bala ịmwụ nyamwụ wuu bala ang myị ang ịkịla ịlẹ kịị nyị la wuu lẹ.

¹¹Anụ myịmyị byoo mẹ ọ́-ri kịị nyị́ kụ ọ-ọpyị nya iGochin lẹ aalẹ, ụ-ụwa am nyaa ka kpọọ la ang oriri bala alẹpwa nyamwụ wuu chajị kịịwa wuu nyị ka gbu igu nya ẹbyahị kaka lẹlẹ. Ọ hi lala ẹka ịrụ lẹpwụ-lẹpwụ ká uhi ọtụka onyobyi ọlẹ ka jam odehe ọlẹ wẹẹ.”

¹²IJosẹfụ myịmyị byaa yẹkẹẹ, “Anụ anyadam wuu bala iBenjamịn ọnyịnam, am iJosẹfụ ayịdang a wẹẹ kanụ wẹẹ yẹ lẹhị-lẹhị nyanụ alẹ lẹlẹ. Am iJosẹfụ a tị wẹẹ ya ẹla tanụ la ọnụ nya ịlọm ịnyịnyị alẹ lẹlẹ.

¹³Ánụ́ kele lẹ, anụ-ụ ya je adam yẹẹyẹẹ jaabwọ kaanụ ayịdang wẹẹ yẹ kaka ba bala jaabwọ kaam ayịdang la ihi lụmẹ kaka ba, ám ọ-ọpyị nya ala Ijipiti ọlẹ wuu lẹẹ ịnyịnyị mẹ. Anụ́-ụ kpa adam nya wam ahyaahị mẹ.”

¹⁴Ụka ká iJosẹfụ ya ala ịwẹ kpá lẹ, ọ kele kaka wu iBenjamịn ba ajẹ juwa jwoo ọnụ lida-lida lẹlẹ. IBenjamịn ayịdang tịtị wu ọọ ba ajẹ, juwa jida ụka ọọwa ịnyịnyị.

¹⁵IJosẹfụ ju anyadamwụ ịwẹ wuu ọnụ lida-lida ịnyịnyị. Ụka kọ họ ịnyị kpá lẹ, anyadamwụ ịwẹ a ya ẹla ta iJosẹfụ myị lẹlẹ.

¹⁶Ụka ká alẹpwa nya iFero wo ya anyadịda nya iJosẹfụ nyị warị lẹ, ọ kpụ iFero ayịdang ịpyọ lụmẹ bala alẹpwa nyamwụ wuu.

¹⁷Ụka ọọwa, iFero byi iJosẹfụ yẹkẹẹ, “IJosẹfụ, kele kaka byi anyadang kị ju olo chụ anyịrẹ nyaa, kị rụ tịrẹkpẹ kele ka ọpyị nya iKenan mẹ.

¹⁸Ká byaa kị kpa adanụ nya wam bala alọdọdẹpwa nyamwụ wuu mẹ. Am iFero ayịdang ka hu ọpyị ọlẹ kọ ju eyo gụgụ wuu i-Ijipiti haa. Ọ-ọpyị ọọwa, ị ka la ang oriri bala ang myị ang ọkịla lụmẹ-lụmẹ gbee kọ ka nwa hi lẹlẹ.”

¹⁹Ụka ọọwa, iFero ya ọngịrị ha iJosẹfụ yẹkẹẹ, “Go ang ọrụnyẹ ị-lala ịtịrọọkụ ịlẹ ká ịna kaa gbile lụmẹ-lụmẹ haa kpa rụ kele ka ọpyị nya iKenan mẹ. Kị ka kpa ang ọrụnyẹ nya ịtịrọọkụ ịịwa kpa olo nyaa wuu bala iJekọbụ adaa bala ịhụ nyaa wuu bala anyị nyaa wuu warị wẹ Ijipiti mẹ.”

²⁰IFero myịmyị byaa yẹkẹẹ, “Anụ mẹ ịmahị chajị nya ang myị ang nyanụ ịlẹ kanụ ka rụ hi ị-iKenan kaka. Chajị ang ịnyịịla-ịnyịịla jam lụmẹ ọ-ọpyị nya Ijipiti gbenu lẹ.”

²¹Ụka ká iFero ya ẹla nyamwụ kpá lẹ, anyị nya Isirẹlụ ịwẹ a myị ọnụ ha iFero yẹkẹẹ, ịwa nyị ka họ jaabwọ kịị nyị byi ịwa lẹlẹ. Ọọwa lẹ, iJosẹfụ a kele kaka go ang ọrụnyẹ nya ịtịrọọkụ lụmẹ-lụmẹ kpa kịla anyadamwụ jaabwọ ká iFero byi iJosẹfụ nyị họ mẹ lẹlẹ. Ọọwa lẹ, iJosẹfụ a hu ang oriri ọlẹ kị ka ri ụ-ụgbẹyị haa ịnyịnyị lẹlẹ.

²²IJosẹfụ hu awụrụ onyeewe ookpokpo ọnyịịla-ọnyịịla ha ọngọngọọng lẹpwụ nya anyadamwụ ịwẹ wuu. Ọ hu okpoko onyoowuru ohu ịta (300) ha iBenjamịn bala ịwụrụ inyeewe ịnyịịla-ịnyịịla ịrụ ịnyịnyị.

²³IJosẹfụ go ang ịnyịịla ịlọpyị nya Ijipiti ebwo datị-datị ju olo u-uhye nya ibyiyó iwo chiriri du ẹrụ kịla adamwụ. Ọ myịmyị ju olo nya ang oriri ụma datị-datị u-uhye nya ibyiyó iwo chiriri ịkịla du kịla adamwụ kọ ka ri ụ-ụgbẹyị ụka kọ ka rụ nya wẹ Ijipiti.

²⁴Ụka ká anyadamwụ nwụlanọ kpá, kị juwa ka rụ, ene ká iJosẹfụ juwa ka daa ọkpahị mẹ, ọ byaa yẹkẹẹ, “Anụ mwẹla ta awụlẹ ụ-ụgbẹyị koo! Anụ pyẹẹ mẹ.”

²⁵Ọọwa lẹ, anyadịda nya iJosẹfụ a rụ bwu Ijipiti kele ka ẹga nya adaa ọ-ọpyị nya iKenan lẹlẹ.

²⁶Ụka kị pwụ ụwa, ị byi iJekọbụ adaa yẹkẹẹ, “IJosẹfụ ọnyị nyang á gbu ka. Ọ juwa la ọhịhị ọ-ọpyị nya Ijipiti. Ọwa kpakpakpa a ri agaba nya ala Ijipiti wuu lẹ.” Ahyaahị ká iJekọbụ wo oja yẹkẹẹ, ọnyị nya ọọwa nyị juwa la ọhịhị wẹẹ lẹ, iJekọbụ a gbu nwọnwụ rịrị kọkọ lẹlẹ. Ụka ọọwa, ọ lọọ lala ọnọọkịla anyị nyamwụ ịwẹ nyaa wẹẹ mẹ jwoo.

²⁷Ma, ụka kị juwa ya nya ịlẹhị-ịlẹhị joo jaabwọ kịịwa ayịdang yẹ iJosẹfụ lẹhị-lẹhị nya ịlaa bala ẹrụ ọlẹ wuu kọ daa tọọ bala ang ọrụnyẹ nya ịtịrọọkụ ịlẹ wuu kọ ya du kele kị ka kpa kpa adaa bala anjwo nyamwụ wuu lẹ, olegu nya Isirẹlụ a wuleji ẹ-ẹpwụ nyamwụ lẹlẹ.

²⁸Ụka ọọwa, ọ yẹkẹẹ, “Am hu ẹla nyanụ ọwẹ nya ịlẹhị ugbẹnyị lẹ. IJosẹfụ ọnyị nyam kiji juwa la ọhịhị wẹẹ! Ọ hiigu. M̀ ka kele kam ka yọọ ẹ-ẹhị nyam ọlẹ ene kam ka gbu pyii lẹ.”