Read idege ỌMWỤ ỌDADA 46 Bible Online

ỌMWỤ ỌDADA 46 - idege bible

ỌMWỤ ỌDADA 46

¹Ụka ọọwa, Isirẹlụ hu ang ẹdịyẹ nya Ijipiti la ang myị ang nyamwụ ịlẹ wuu kọ la. Ụka kọ jẹ pwụ iBiyẹchẹba, ọ kịla iya ha Ohe Oluhye a nya Ayịsiki adamwụ.

²Ohe Oluhye ya ẹla ta Isirẹlụ a-arụrụ lodu ụ-ụwa. Ohe Oluhye be ẹkọ yẹkẹẹ, “iJekọbụ, iJekọbụ.” Ụka ọọwa, iJekọbụ myị yẹkẹẹ, “Ee, m lẹẹ ẹgẹlẹ.”

³Ọọwa, Ohe Oluhye ya ẹla tọọ yẹkẹẹ, “Am kpakpakpa a ri Ohe Oluhye nya adang Ayịsiki lẹ. A ju uhi nya ọmwụmwụ kele ka ọpyị nya Ijipiti ka. M̀ ka họ ká ka pyẹ lụmẹ-lụmẹ gbee ká anyị ịtụma nyang ka ri ẹpwụma ọtụka-ọtụka ụ-ụwa i-Ijipiti ị-ịlahị wẹẹ.

⁴Am ayịdang ka kpang chị kele ka ọpyị nya Ijipiti gbee kam ka kpa anyị ịtụma nyang tịrẹkpẹ nya warị wẹ ọpyị ọlẹ myịmyị ị-ịlahị wẹẹ. IJosẹfụ ọnyị nyang ka kpẹhị rịrịng gbee pwụ ụka ká ka gbu.”

⁵Ụka ká Ohe Oluhye ya ẹla ta Isirẹlụ i-iBiyẹchẹba kpá lẹ, iJekọbụ á yegiri bwu ụwa juwa rụ kele ka ọpyị nya Ijipiti lẹlẹ. Ụka ọọwa, anyị nya Isirẹlụ ịwẹ kpa adaa bala anjwo ichiche nyaa bala ịhụ nyaa wuu rụ ẹ-ẹpwụ nya ang ọrụnyẹ nya ịtịrọọkụ ịlẹ ká iFero ya du kaka kpaa nya.

⁶Ị kpa ịna bala ịmwụ nyaa wuu bala ang myị ang ịkịla ịlẹ wuu kị la ọ-ọpyị nya iKenan ba ịlaa kele ka Ijipiti. Ịịwẹ iJekọbụ a bwu mwụ rụ kele ka ọpyị nya Ijipiti bala alọdọdẹpwa nyamwụ wuu lẹ.

⁷IJekọbụ kpa anyị alẹng nyamwụ wuu bala anyị alẹng nya anyị nyamwụ. Ọ kpa anyị anyang nyamwụ ọwa ayịdang bala anyị anyang ịlẹ ká anyị alẹng nyamwụ ma wuu ba ịlọmwụ mwụ rụ kele ka Ijipiti ịnyịnyị, jaabwọ ká alọdọdẹpwa nyamwụ wuu ju iru kaka ba.

⁸Ẹnyị nya alọdọdẹpwa nya Isirẹlụ ịlẹ wuu kị bọọ kele ka Ijipiti a lẹẹ lẹ: iJekọbụ ayịdang bala anyị alẹng nyamwụ wuu. IRubẹn ọlẹ kọ ri ọnyị ọgbahị nya iJekọbụ

⁹bala ịHanọkụ bala ịPalu bala iHesirọn bala Kaamị ịlẹ kị ri anyị alẹng nya iRubẹn.

¹⁰ISimyọn ayịdang bala iJemwẹlụ bala ịJamin bala Ọhadị bala ịJachin bala iSohaa bala ịChawulu ịlẹ kị ri anyị alẹng nyamwụ. ISimyọn ye ịnịna nya ịChawulu bwu ọpyị nya iKenan.

¹¹ILivayị bala ịGẹẹchọn bala iKohatị bala iMerarị ịlẹ kị ri anyị alẹng nyamwụ.

¹²IJuda ma anyị alẹng ịlẹ ká ẹnyị nyaa ri Ẹẹrị bala Ọnan bala iChela bala ịPẹrisi bala ịSẹra. Ẹẹrị bala Ọnan gbu ọ-ọpyị nya iKenan. ỊPẹrisi ma anyị alẹng imiiye ịlẹ kị wụrụ iHesirọn bala ịHamulu.

¹³Ịsakaa bala iTola bala iPuva bala Iyọbụ bala iChimrọn ịlẹ kị ri anyị alẹng nyamwụ.

¹⁴ISebulọn bala ịSẹrẹdị bala Elọn bala ịJaliili ịlẹ kị ri anyị alẹng nyamwụ.

¹⁵Anyị alẹng nya iJekọbụ ịwẹ a ri anyị ịlẹ ká iLiya ma họọ ụka kị kụ ụwa ị-ịPadan-aram wẹẹ lẹ. ILiya ma ọnyị ọnyang ookpokpo ọlẹ kị wụrụ ịDayịna ha iJekọbụ ịnyịnyị. Anyị nya iJekọbụ ịlẹ kị bwu ẹpwụ nya iLiya kpehe wuu lala angị iwo ịta kụrụ ịta.

¹⁶ỊGadị ayịdang bala iSifiyọn bala ịHagi bala iChunị bala Ẹchịbọn bala Eri bala Arodu bala Areli ịlẹ kị ri anyị alẹng nyamwụ.

¹⁷Achẹẹ ayịdang bala Imna bala Ichiva bala Ichivi bala iBeriya ịlẹ kị ri anyị alẹng nyamwụ. Ọnyị ọnyang la ookpokpo ọlẹ kị wụrụ Sera. IBeriya ma anyị alẹng imiiye ịlẹ kị wụrụ ịHẹbẹẹ bala ịMalụkiyẹlụ.

¹⁸Ịịwẹ anyị alẹng nya iJekọbụ ịlẹ kị bwu ẹpwụ nya iSilipa a la lẹ. Ịwa wuu la angịnyị angị iwo kụrụ ịrwọnyẹ. ISilipa ọwẹ iLeban a hu ha iLiya nya ọnchẹ ọnyang lẹ.

¹⁹Anyị alẹng nya iRichẹlụ ri iJosẹfụ bala iBenjamịn.

²⁰Ụka ọlẹ ká iJosẹfụ juwa i-Ijipiti, ọ ye Asẹnatị ọnyị ọnyang nya ịPọtịfa ọngọkiliya nya ala Ọn ọlẹ kị wụrụ iHeliyopolisi ịnyịnyị. Asẹnatị ma anyị alẹng imiiye ịlẹ kị wụrụ ịManasẹ bala Ifurem ha iJosẹfụ.

²¹Anyị alẹng nya iBenjamịn ri iBela bala ịBẹkẹẹ bala Achibẹlụ bala ịGẹra bala ịNaaman bala Ẹhị bala iRochi bala iMupim bala iHupim bala Aridi.

²²Ịịwẹ anyị alẹng nya iJekọbụ ịlẹ kị bwu ẹpwụ nya iRichẹlụ kpehe a la lẹlẹ. Ịwa wuu la angịnyị angị iwo kụrụ ine.

²³ỊDan ọnyị nya iJekọbụ ma ọnyị ọlẹng ọlẹ kị wụrụ iHuchim.

²⁴Anyị nya ịNafụtali ri iJasili bala iGuni bala ịJẹsẹẹ bala iChilẹm.

²⁵Ịịwẹ anyị alẹng nya iJekọbụ ịlẹ kị bwu ẹpwụ nya iBiliha a la lẹ. Ịwa wuu la angịnyị angị irwiye kọ ma ha iJekọbụ. IBiliha ọwẹ iLeban a hu ha iRichẹlụ nya ọnchẹ ọnyang lẹ.

²⁶Anyị ịlẹ wuu kị ri angị bwu ẹpwụ nya iJekọbụ kpehe tụ anyị nya anyị alẹng nyamwụ wuu la angịnyị angị iwo ịrwọnyẹ da angịnyị angị ịrwọnyẹ, kọ ri ká, ị́ wa ịhụ nya anyị nya iJekọbụ ju laa kpong-kpong ka. Alụma nya iJekọbụ ịwẹ wuu tụ ịhụ nya anyị alẹng nyamwụ ịwẹ wuu tị bọọ kele ka Ijipiti ịnyịnyị.

²⁷iJosẹfụ lẹẹ lẹ, ọwa ma anyị alẹng imiiye juwa ọ-ọpyị nya Ijipiti ene-ene lẹ. Angịlẹ kị ri alọdọdẹpwa nya iJekọbụ lụbwọ lụbwọ ịlẹ kị bọọ kele ka Ijipiti wuu la angịnyị angị iwo irwiye gbẹgbịlẹ.

²⁸Ụka kị jẹ ju iGochin chwẹẹ, iJekọbụ du iJuda ọnyị nyamwụ ẹrụ ji ịlahị kele kaka wụrụ iJosẹfụ kọ ka warị kaka taa i-iGochin. Ịnyị lẹ, iJekọbụ bala anjwo nyamwụ a jẹ gbee kị pwụ iGochin lẹlẹ.

²⁹Ahyaahị ká iJosẹfụ wo ẹrụ nya adamwụ, ọ nwụlanọ, hu ang ọrụnyẹ nyamwụ lẹ, ọ kele kaka ju ka iGochin lẹ, ọ wu Isirẹlụ adamwụ bajẹ, juwa jwoo ọnụ lida-lida gbegbegbe ụ-ụwa lẹlẹ.

³⁰Ụka ọọwa, Isirẹlụ byi iJosẹfụ ọnyị nyamwụ yẹkẹẹ, “IJosẹfụ ọnyị nyam, ahụ a wẹ lahị-lahị lẹ? Ẹla á juwa ka. Am ya ẹhị nyam ọlẹ gung gu wẹ lẹlẹ, igu ogbugbu ka lam ịpyọ alẹ lẹ.”

³¹Ụka ọọwa, iJosẹfụ byi anyadamwụ bala alẹpwa nya iJekọbụ wuu yẹkẹẹ, “Anụ wo mẹ, am jam ka kele ka ẹga nya iFero Adịrahụ lẹ. Ḿ kele, m ka byoo yẹkẹẹ, ‘IFero Adịrahụ ee, adam bala anyị nyamwụ wuu bala alẹpwa nyamwụ wuu mwụ bwu ọpyị nya iKenan chịm ọgụ warị alẹ lẹẹ.’

³²M ka myịmyị byoo yẹkẹẹ, ‘Alẹpwa nyahị wuu ri angịgbikpịlọ bala ịna. Ụkụrwọ ọọwa, ị maa la lẹ. Chajị nya ọọwa lẹ, ị kpa ịna bala ịmwụ nyaa wuu ba ịlaa warị lalẹẹ ịnyịnyị.’

³³Ụka ká iFero Adịrahụ á be ẹkọ wụrụụnụ, kọ tọnụ ịtọ wo yẹkẹẹ, ‘Ịịyẹ a tị́ ri ụkụrwọ nyanụ ene?’

³⁴Anụ-ụ̀ wẹ byoo yẹkẹẹ, ‘Ụkụrwọ nya ịkpịlọ bala ịna ogbegbe, ịwa nyaa kaa họ bwu enjwo-enjwo nyịwa lẹ. Adịdịwa ogogo anyị nyị ri angịgbikpịlọ bwu orogo-orogo ịnyịnyị mẹ.’ Ó-ri kanụ ya anyị lẹ aalẹ, iFero ka tụụbwọ hi ọpyị nya iGochin ọlẹ hanụ kanụ ka kụ ụwa lẹ, chajị ọ rigọgọ nyaa ịwa ala Ijipiti ọ-ka yẹjula awụlẹ bala angịgbikpịlọ lala anụ-anụ.”