Read idege ỌMWỤ ỌDADA 47 Bible Online

ỌMWỤ ỌDADA 47 - idege bible

ỌMWỤ ỌDADA 47

¹Ọọwa lẹ, iJosẹfụ a kele ka ẹga nya iFero lẹ, ọ byoo yẹkẹẹ, “IFero, Isirẹlụ adam bala alẹpwa nyahị ịkịla wuu mwụ bwu iKenan warị chịm ọgụ alẹ lẹ. Ị kpa ịna nyaa wuu bala ịmwụ ịlẹ kị la wuu bala ang myị ang ọlẹpwa nyaa wuu warị ịnyịnyị lẹ. Ị juwa i-iGochin lẹẹlẹẹ lẹ.”

²IJosẹfụ chụ angịnyị angị ịrụ bwu ẹpwụ nya anyadamwụ kpa ba ịlọmwụ kele ka ẹga nya iFero. Ụka kọ pwụ ụwa, ọ ya anyadamwụ ịịwa dodehe je iFero.

³Ụka ọọwa, iFero taa ịtọ yẹkẹẹ, “Ụkụrwọ ọlanyị, anụ tị́-ị họ ene?” Ị wẹ yẹkẹẹ, “Ahị anchẹ nyang ri angịgbikpịlọ lala adahị-adahị anyị.”

⁴Ị myịmyị byi iFero yẹkẹẹ, “Agaba Idu, ahị warị kahị ka bịlẹng ọpyị nya iGochin kahị ka hụ ụwa lee ọ tị́ lanyị adam, chajị ang ọlẹ kọ kuhi rụ bwu ọpyị nya iKenan ri uhi ọtụka ọlẹ kọ ji lụmẹ gbee ká ụmẹ ọhẹ-lọhẹ á ji ha ịna bala ịmwụ nyahị, ị ka ri ụ-ụwa kpong-kpong kaka.”

⁵Ụka ọọwa, iFero wẹ byi iJosẹfụ yẹkẹẹ, “IJosẹfụ, adang bala anyadang warị chịng ọgụ ịnyịlẹhị lẹ?

⁶Ọpyị nya Ijipiti wuu dụwẹ haa lẹ. Ị kele kaka kụ ẹpwa ụ-ụwa i-iGochin ọlẹ kọ ri ọpyị ohiigu gụ ịpyị ịkịla wuu i-Ijipiti mẹ.” IFero myịmyị yẹkẹẹ, “Ó-ri ká angị jẹ gbe ịkpịlọ yẹẹyẹẹ á juwa ẹ-ẹpwụ nyaa aalẹ, aa bịlẹ angịịwa kị ka kpẹhị rịrị ịna bala ịmwụ nyam ham ịnyịnyị chẹẹ mẹ?”

⁷Ụka ọọwa, iJosẹfụ kpa iJekọbụ adamwụ kaka da ọnụ chị iFero. Ụka ká iJekọbụ yẹ iFero, ọ wahị họọ lụmẹ-lụmẹ.

⁸Ụka ọọwa, iFero tọ iJekọbụ ịtọ yẹkẹẹ, “IJekọbụ, Ẹka ịmanyịnya ehe oriri ā tị́ gu lẹẹlẹẹ-ẹ̀ wẹẹ?”

⁹IJekọbụ wẹ byoo yẹkẹẹ, “Adịrahụ, ḿ ri ehe tata lala adam anyị myị lẹka. Akama nyam lụmẹ odehe ọlẹ kaka kpoye. Ẹka ohu da ẹka iwo ịta kem, m gu wẹẹ lẹ.”

¹⁰Ọọwa lẹ, iJekọbụ a myịmyị wahị ha iFero lẹ, ọ rụ kpehe lẹlẹ.

¹¹Ụka ọọwa, iJosẹfụ kpa adamwụ bala alẹpwa nyaa wuu kele kaka kụ i-iGochin ọlẹ kị wụrụ ịRamisisi ịnyịnyị jaabwọ ká iFero byi iJosẹfụ ya, nyị họ lẹ. Ọpyị nya iGochin ọwẹ a ju eyo kpá gụ ọpyị nya ala Ijipiti wuu lẹlẹ.

¹²Ụka ọọwa, iJosẹfụ juwa kpa adamwụ bala anyadamwụ bala alọdọdẹpwa nyaa wuu jaabwọ kị ju iru kaka ba, la ang oriri la odu bala alẹnụ ụka wuu.

¹³Ụka ká uhi ọtụka ọwẹ jẹ kaka chaarịrị lẹ, ọ chị angịrị gụ olene-ene gbee ká ang oriri nya ala Ijipiti wuu ju kele ka ọpyị nya ala iKenan wuu myị gbanggbang lẹlẹ. Ọọwa lẹ, ịwa wuu a hi ekpinegu-ekpinegu kwangchaa wuu lẹlẹ.

¹⁴Ụka ọọwa, iJosẹfụ kịla okpoko myị okpoko ọlẹ wuu kọ juwa ị-ịpyị nya ala Ijipiti bala ọlọpyị nya ala iKenan wuu bwula ambakpa ịlẹ kọ juwa kpa ra wuu lẹ. IJosẹfụ a go ikpoko ịịwa wuu kpa kele kịla IFero Adịrahụ lẹlẹ.

¹⁵Ụka ká okpoko nya ala Ijipiti wuu bala okpoko nya ala iKenan wuu myị gbanggbang la ideri ọhẹ-lọhẹ hi juwa kaka lẹ, ọọwa, ala Ijipiti wuu a kpa ịlaa kele kaka jịra ẹ-ẹpwa nya iJosẹfụ juwa jida nya imyi jwoo lẹlẹ. Ị byoo yẹkẹẹ, “IJosẹfụ, wo mẹ. Ahị jam ka gbu igu-imyi lẹ. Ma, ideri, acha, ahị tị la kaka. Lẹ, ya ang oriri hahị mẹ. Ọ ri ịnyị ka tụbwọ aalẹ, ahị jam ka gbu igu-imyi hang lẹ!”

¹⁶IJosẹfụ wẹ byaa yẹkẹẹ, “Ó-ri ká okpoko nyanụ á myị lẹ aalẹ, anụ kpa iyo ịlẹpwa nyanụ warị wam, kam ya ang oriri hanụ kwiwa nyaa mẹ.”

¹⁷Ọọwa lẹ, ụka kị kpa iyo ịlẹpwa nyaa lala anyịrẹ bala ịna bala ịmwụ bala ibyiyó nyaa wuu kele kịla iJosẹfụ lẹ, iJosẹfụ a mẹ ambakpa haa ịwa wuu kwiwa nya iyo ịlẹpwa nyaa ịịwa lala ẹka lẹpwụ-lẹpwụ lẹlẹ.

¹⁸Ụka ká ẹka ọwẹ myị, ala Ijipiti myịmyị kele ka ẹga nya iJosẹfụ la ọmwụ ọdada nya ẹka onyeewe. Ị byoo yẹkẹẹ, “Agaba Idu, wo mẹ. Ahị́ juwa ka ya ẹla nyahị ọlẹ kọng kọ kaka. Jaabwọ kọ la wuu, ahị ka ya jeng lẹlẹ. Wo mẹ, okpoko myị okpoko nyahị wuu myị kpá kwengkweng lẹ, ịmwụ, ịna bala iyo myị iyo ịlẹpwa nyahị wuu mwụ rụ ka ẹpwụtụbwọ nyang wuu ịnyịnyị lẹ. Ịnyịrọ-ịnyịrọ nyahị bala ịpyị nyahị a ri ang ọlẹ kahị la ụbwọọmwụ lẹẹ lẹlẹ.

¹⁹Ọkọkọ kahị ka gbu igu-imyi cham ká ọpyị nyahị ka dam ododu lẹ, ahị ka hu ịlọhị rịra iFero bala ọpyị nyahị kahị ka ri anyịhị nyamwụ kwiwa nya ang oriri ọlẹ ká ka ya hahị lẹ. Ịpyị ịlẹ kahị la ene-ene a ri nya iFero mẹ, chajị kahị ka ye ang oriri ri kahị ka hị bala ajẹ nya ambakpa ịlẹ kahị ka ya tọ ẹ-ẹrụ nyahị, chajị ká ọpyị nyahị á ka dam ododu kaka mẹ.”

²⁰Ịịwẹ iJosẹfụ a bwu ra ọpyị nya ọng myị ọng ọla Ijipiti wuu ha iFero, chajị nyọlẹ ká uhi ọtụka onyobyi ọwẹ chị angịrị lụmẹ kaka kpoye ụ-ụwa lẹ. Ọọwa lẹ, ọpyị nya ala Ijipiti wuu ka ẹga kọ ba, a yẹ ri ọpyị nya iFero bwu ẹnụtụrụ ọọwa kele kịlahị lẹlẹ.

²¹Angịnyị ehe ayịdang ịla Ijipiti wuu ka ẹga kị ba lẹ, ịwa wuu yẹ ri anyịhị nya iFero ịnyịlẹhị jaabwọ kị byi iJosẹfụ.

²²Ọpyị nya angịlẹ ká iFero á ra kaka i-Ijipiti wuu ụbwọọmwụ, a ri ọpyị nya ọng myị ọng ọlẹ kọ ri ọngọkiliya nya ojiga nyaa lẹlẹ. Ang odudu ká ịnyaa ịwa la ịnyị ri iFero ayịdang kaa nwaa ịwa uri nya ọya. Ịnyị a du ká ọpyị nyaa ịwa chịda haa lẹ.

²³Ụka ọọwa, iJosẹfụ byi ala Ijipiti wuu yẹkẹẹ, “Anụ ala Ijipiti wuu, anụ wo gbe ijuju mẹ. M̀ ranụ wuu bala ọpyị nya ẹrụ nyanụ ha iFero alẹ lẹẹ!” Ọ myịmyị byaa yẹkẹẹ, “Anụ kẹwẹ kaka ye ajẹ nya ambakpa kanụ kpa rụ kaka tọ ẹ-ẹrụ nyanụ mẹ.

²⁴Ụka ká ang nya ẹrụ á há kanụ kpaa nya wẹpwa lẹ, anụ-ụ chaa ebwo ịrụ, kanụ hu ebwo ookpokpo nyamwụ kpa kịla iFero Adịrahụ mẹ. Ebwo ine ohihi a ka ri nyanụ anụ, kanụ ka kpa kpa ọdọdẹpwa nyanụ bala ọlẹ kanụ ka ya ju ịtọ gbe ẹka ọkịla lẹlẹ.”

²⁵Ala Ijipiti ịwẹ wuu wẹ byi iJosẹfụ yẹkẹẹ, “Agaba Idu, ahị chị ọkẹkẹnị lụmẹ chajị nyọlẹ ká kpahị la ang oriri lụka nya uhi ọtụka onyobyi ọlẹ, du kahị hị lẹẹ daalẹ. Lẹ, ahị myị ọnụ nyọka ri anyịhị nya iFero Adịrahụ lẹ, adam.”

²⁶Ịnyị lẹ, iJosẹfụ a da ehile ọ-ọpyị nya Ijipiti wuu lẹlẹ. Ehile ọọwa ri “Ọng myị ọng ọlọpyị nya Ijipiti wuu ka hu ebwo ọhẹ ẹ-ẹpwụ nya ebwo ịrụ ha iFero Adịrahụ pyii bwu ẹpwụ nya ang ohuhu nya ẹrụ nyaa wuu, kẹnẹ-kẹnẹ kaka hi ọpyị nya angịlẹ wuu kị ri angịkiliya nya ojiga nya ala Ijipiti.” Ehile ọọwa juwa ọ-ọpyị nya Ijipiti pyịyọọ daalẹ ọlẹ wẹẹ.

²⁷Ụka ká Isirẹlụ kụ iGochin ụ-ụwa i-Ijipiti, ọwa ayịdang bala anyị nyamwụ kpụ ụdụ ọtụka ụ-ụwa. Ị pyẹ ju iru lụmẹ-lụmẹ ụ-ụwa ịnyịnyị.

²⁸IJekọbụ kụ ụ-ụwa i-Ijipiti lala ẹka iwo kụrụ irwiye ene kọ gbu. Ẹka ogugu nya iJekọbụ wuu tụchawụlẹ ri ẹka ohu da ẹka iwo ine kụrụ irwiye ene kọọ gbu ọ-ọpyị nya Ijipiti.

²⁹Ụka ká Isirẹlụ jẹ ọwa nyị juwa ka gbu lẹ, ọ be ẹkọ wụrụ iJosẹfụ kele ka ẹga nya ịlọmwụ. Ọ byoo yẹkẹẹ, “IJosẹfụ, ọnyị nyam, ọ́-ri kam háng nya ịlẹhị-ịlẹhị lẹ aalẹ, a tụ warị ká yụbwọ nyang bam ugbẹta, ká nwa iro ọlẹ ham nya ịlẹhị-ịlẹhị mẹ. A ka nwa iro ọọwa yẹkẹẹ, ọwa iJosẹfụ nyị́ ka jum eji ám ọ-ọpyị nya ala Ijipiti ọlẹ kpong-kpong kaka,

³⁰chajị m tịtọ ká ka hu ogu nyam kpa rụ kele kaka ju eji ọ-ọpyị nya iKenan ẹ-ẹga ọlẹ kị ju adam anyị eji pyii.” Ọọwa lẹ, iJosẹfụ a wẹ byoo yẹkẹẹ, “Ọ hiigu, ḿ ka jung eji ọ-ọpyị nya ala Ijipiti ọlẹ kpong-kpong ka ịnyịlẹhị.”

³¹Ọọwa lẹ, Isirẹlụ a byi iJosẹfụ yẹkẹẹ, “IJosẹfụ nwa iro ọọwa ham jaabwọ kam ya wẹ mẹ.” Ọọwa lẹ, iJosẹfụ a nwa iro ọọwa họọ lẹlẹ. Ọọwa lẹ, Isirẹlụ a hiri egbeju nyamwụ kpẹẹ, juwa gbịgba ha Ohe Oluhye u-uhye nya ịbẹẹdị nyamwụ lẹlẹ.