Read idege ỌMWỤ ỌDADA 48 Bible Online

ỌMWỤ ỌDADA 48 - idege bible

ỌMWỤ ỌDADA 48

¹Ụka kọ nọ chẹẹ lẹ, angịhyẹ a kele kaka ya je iJosẹfụ yẹkẹẹ, ẹdụrụ nyị jụ iJekọbụ adamwụ lụmẹ lẹ, ọọwa lẹ, iJosẹfụ a be ẹkọ wụrụ ịManasẹ bala Ifurem anyị alẹng nyamwụ lẹ, ọ kpaa ba ịlọmwụ kaka yẹ adamwụ lẹlẹ.

²Ụka ká iJosẹfụ pwụ ụwa lẹ, ị ya je adamwụ yẹkẹẹ, “IJosẹfụ nyị warị,” ọọwa lẹ, Isirẹlụ a cheri wule ịlọmwụ eji hụhụ kọkọ ị-ịbẹẹdị nyamwụ lẹlẹ.

³Ụka ọọwa, iJekọbụ byi iJosẹfụ yẹkẹẹ, “IJosẹfụ wo mẹ, Ohe Oluhye Agụgụ chị ịlọmwụ ehe mẹjẹm ụ-ụwa i-iLusi ọ-ọpyị nya iKenan lẹ, ọ wahị kụrụm ụ-ụwa ẹnụ ọọwa lẹlẹ.

⁴Ọ wahị kụrụm yẹkẹẹ, ‘IJekọbụ wo mẹ, am Ohe Oluhye ka wahị kụrụng. M ka họ ká ka ma anyị ju iru myị ẹga myị ẹga gbe ká anyị ịtụma nyang ka yẹ ri alẹpwụma datị-datị ị-ịlahị wẹẹ. Am Ohe Oluhye ka hu ọpyị nya iKenan ọlẹ ha anyị nyang kọ ka ri ang-ugu nyaa pyịyọọ gbe ọyị myị oyi ịnyịnyị lẹ.’ ”

⁵IJekọbụ myịmyị byi iJosẹfụ yẹkẹẹ, “IJosẹfụ yẹ mẹ, anyị alẹng imiiye nyang ịManasẹ bala Ifurem ịlẹ ká ma lẹẹ, i-Ijipiti ene kam bang warị lẹ, m ka hwaa ịwa angị imimiiye lala iRubẹn bala iSimyọn ịlẹ kị ri angịlẹ kam hu ẹta rịrị u-ugulọ nyaa ịnyịnyị lẹ. Anyị nya ịlọm, ị ri lụbwọ-lẹta lẹlẹ.

⁶Ma, ọ́-ri ká ma anyị ịkịla ịhyẹ myịmyị hile Ifurem bala ịManasẹ wẹẹ aalẹ, anyị ịịwa, á ka ri ịnyam am kaka. Anyị nyang ihyẹẹkpẹ ịịwa á tị ka la ang-ugu nyam nya ụbwọ nya ịlaa lala Ifurem bala ịManasẹ kaka. Ó-ri kị ka kụ ẹkpẹ nya Ifurem bala ịManasẹ lẹ mẹ ịnyị.

⁷IJosẹfụ wo mẹ, ang odudu kam wẹẹ hu anyị alẹng nyang ịwẹ nya anyị nya ịlọm ri chajị nya iRichẹlụ ịnang. Igu ọlẹ kọ nwụ ịnang ugbeene lẹ, ọ tọm olujwo lụmẹ kaka kpoye. Ụka kam juwa jẹ nya bwu ịPadan-aram ọ-ọpyị nya iKenan lẹ, iRichẹlụ ịnang a gbu ọ-ọnụ nya Efuratị ọlẹ kị wụrụ ịBẹtịlẹhẹm lẹ. Ọ-ọnụ ụgbẹyị ọọwa, m jwoo eji ẹnụmwụ lẹ.”

⁸Ụka ká Isirẹlụ chẹhị kaka yẹ anyị alẹng nya iJosẹfụ ịwẹ kị gọdayị rịrị ụ-ụwa, ọ tọ iJosẹfụ wo yẹkẹẹ, “Oowo, anyị nyaa tị́ wẹẹ?”

⁹Ụka ọọwa, iJosẹfụ wẹ byi adamwụ yẹkẹẹ, “Anyị nyam ịlẹ ká Ohe Oluhye ya ham ẹ-ẹgẹlẹ a wẹ lẹ.” Isirẹlụ byi iJosẹfụ yẹkẹẹ, “Tụ anyị nyam ịwẹ bam warị kam wahị kụrwaa ịnọ.”

¹⁰Ụka ọwẹ lẹ, ẹhị nya Isirẹlụ chị okwirichi lụmẹ lẹ, ọ́ jẹ kpa yọyị yẹẹyẹẹ myị kaka. Ọọwa lẹ, iJosẹfụ a yụbwọ chị anyị nyamwụ kpa kịla adamwụ lẹ, Isirẹlụ a waa ba ajẹ, juwa jwaa ọnụ ịnyịnyị lẹlẹ.

¹¹Ụka ọọwa, Isirẹlụ byi iJosẹfụ yẹkẹẹ, “IJosẹfụ, am ayịdang jẹ yẹkẹẹ, ḿ ka jẹ-ẹ ya ẹhị nyam ọlẹ gung ahụ iJosẹfụ ọwẹ ene kam ka gbu la odehe nyam ọlẹ kaka. Lẹ, Ohe Oluhye họ lụmẹ chajị nyọlẹ kam yẹng ahụ ayịdang kaka ba anyị nyang angị imimiiye ịlẹ u-uhye lẹẹ lẹ.”

¹²Ịnyị lẹ, iJosẹfụ a yụbwọ chị anyị nyamwụ ịwẹ wuleji hi ata nya iJekọbụ adamwụ lẹ, iJosẹfụ a hiri egbeju nyamwụ kpẹẹ weji ha adamwụ lẹlẹ.

¹³Ụka ọọwa, iJosẹfụ ya abwiye-abwiye chị anyị nyamwụ ịwẹ angị imimiiye. Ọ kpa Ifurem u-upwuriri nyamwụ hwoo ju iJekọbụ adamwụ ụ-ụpụpịla. Ọ kpa ịManasẹ ụ-ụpụpịla nyamwụ hwoo ju iJekọbụ u-upwuriri nyamwụ ịnyịnyị lẹlẹ.

¹⁴Ụka ọọwa, Isirẹlụ hu upwuriri nyamwụ wẹ ụpụpịla wẹ kaka nịrọ Ifurem kọ ri onjwo e-egbeju lẹ, ọ yụbwọ ụpụpịla nịrọ ịManasẹ kọ ri ọnyị ọgbahị e-egbeju ịnyịnyị lẹlẹ.

¹⁵Ịnyị, Isirẹlụ a wahị kụrụ iJosẹfụ yẹkẹẹ, “IJosẹfụ wo mẹ! Ohe Oluhye ọlẹ ká adahị Ebiraham bala Ayịsiki anyị dịrẹ ẹ-ẹpwụ nya ọhịhị nyaa wuu, kọ kpam bwu enjwo-enjwo nyam pyịyọọ daalẹ

¹⁶bala olegu-ẹrụ ọlẹ ká Ohe Oluhye du ẹrụ kaka gbam kpehe bwu ẹpwụ nya ang onyobyi wuu a wahị kụrụ anyị alẹng nyang ịlẹ ham mẹ. Ká Ohe Oluhye a kpaa kị hị chajị kị ka wo ẹnyị-ehe nyam pyịyọọ bala ẹnyị-ehe nya adahị Ebiraham bala Ayịsiki ịnyịnyị mẹ. Kọ họ kị pyẹ myị ẹga myị ẹga nya odehe ọlẹ wuu ị-ịlahị ịnyịnyị mẹ.”

¹⁷Ụka ká iJosẹfụ yẹ jaabwọ ká adamwụ ya upwuriri nyamwụ nịrọ Ifurem e-egbeju lẹ, ọ́ họ́ọ kpong-kpong ka. Ọọwa lẹ, ọ yụbwọ chị adamwụ u-upwuriri kọ ka kpọọ ụbwọ ọọwa kaka nịrọ ịManasẹ e-egbeju lẹlẹ.

¹⁸Ụka ọọwa, iJosẹfụ byi adamwụ yẹkẹẹ, “Adada ịịwẹ ka, ịManasẹ ọlẹ a ri ọnyị ọgbahị lẹ, ọwa a ka ya upwuriri nyang nịrọ e-egbeju lẹ.”

¹⁹Isirẹlụ pwa, byi iJosẹfụ yẹkẹẹ, “Am ayịdang jẹ jẹ ịnyịnyị ya ịManasẹ nyaa ri ọnyị ọgbahị lẹ. ỊManasẹ ka ri ọngọtụka. Ọ ka pyẹ lụmẹ-lụmẹ. Ma, Ifurem ọlẹ kọ ri onjwo nyamwụ a ka ri ọtụka gwọọ lẹ. Ifurem ọlẹ ka ri adịda nya ẹpwụma lụmẹ-lụmẹ ị-ịlahị wẹẹ.”

²⁰IJekọbụ myịmyị wahị kụrwaa yẹkẹẹ, “Anụ anyị nyam, anụ wo mẹ, ala Isirẹlụ wuu ka kpa ẹnyị nyanụ wahị kụrụ awụlẹ yẹkẹẹ, ‘Ká Ohe Oluhye a wahị kụrụng lala Ifurem bala ịManasẹ.’ ” Ịịwẹ iJekọbụ a hu Ifurem ji ịlahị nya ịManasẹ ẹnụ ọọwa lẹlẹ.

²¹Isirẹlụ byi iJosẹfụ yẹkẹẹ, “IJosẹfụ yẹ mẹ, ọ ri nya ịlẹhị, am ayịdang jam ka gbu lẹ. Ma, Ohe Oluhye ka hụ tang gbee kọ ka kpang tịrẹkpẹ rụ kele ka ọpyị nya iKenan nya adang igogo anyị.”

²²Ọ myịmyị byi iJosẹfụ yẹkẹẹ, “Ọpyị nya iChekem ọla iKenan ọlaanyị kam nu ala Amọ ụka kam kụrwaa bwu ẹwụ ugbeene lẹẹ, m̀ hwoo hang ọkọ kọ nya ọnyadang ọkịla ọhẹ-lọhẹ lẹ.”