Read idege ỌMWỤ ỌDADA 49 Bible Online

ỌMWỤ ỌDADA 49 - idege bible

ỌMWỤ ỌDADA 49

¹Ụka ọọwa, iJekọbụ be ẹkọ wụrụ anyị nyamwụ wuu byaa yẹkẹẹ, “Anụ anyị nyam, anụ wụrụ ịlọnụ warị wuu kam ya ang ọlẹ kọ ka họ ẹ-ẹga nya ọngọngọọng nyanụ ụ-ụwa ị-ịlahị jenu alẹ mẹ.”

²Ọ byaa yẹkẹẹ, “Anụ anyị nya iJekọbụ wuu, anụ ke ụrụ la ẹla ọlẹ kam Isirẹlụ adanụ wẹẹ ka ya jenu alẹ mẹ.” IJekọbụ wahị yẹkẹẹ,

³“IRubẹn, ahụ a ri ọnyị nya ọgbanyẹ nyam kam ma la ịwọ nya okolobya bala ogogo nyam lẹ. Ahụ a nwa ọbọọchẹ, myịmyị la ọngịrị lala ugẹbẹ kpá gụ anyị nyam ịkịla wuu lẹlẹ.

⁴Ahụ ayịdang á la olegu nya o-wu ịlọng kpa myị kpong-kpong ka, lala ọhụụ nya enyi ọlẹ kọ kaa mwụ ang myị ang wuu kpa rụ, chajị a da ẹla-ahụ nyam adang, a chị oyoyi jum am adang lụmẹ kaka kpoye bwula ọlẹ ká jẹbyị ta ahụ-ọnchẹ ọlẹ kam ye. Lẹẹlẹ, m nung ọngịrị ọlala bala ihi ọtụka nyang alẹ lẹ.”

⁵IJekọbụ myịmyị wahị yẹkẹẹ, “ISimyọn bala iLivayị lẹ, anụ tị bwu ịnịna ịnyịlẹhị mẹ! Anụ angị imimiiye ri alẹga ịlẹ kanụ kaa kpa oge nyanụ dẹwụ lụmẹ.

⁶Ugbodu okpukpuru nyam á juwa tanụ ẹ-ẹpwụ nya obyi omeme onyobyi nyanụ ọhẹ-lọhẹ ka. Olegu nyam á tị myị junu ẹ-ẹpwụ nya ogu ọwẹ kanụ ji kpong-kpong ka ịnyịnyị. Agbama ojuju nyanụ kaa kpanụ kaka nwụ angịnyị ododu. Bwula ọkwọ ọlala nyanụ, anụ kaa mwụ ịna nya angịnyị ata ododu chajị kị ka jẹdịyẹ kaka ịnyịnyị.

⁷Inyiribyi a ri nyanụ chajị nya agbama ojuju ọ-bịrị ang nyanụ ọwẹ bala ịkẹjẹ awụrụ nya ọkwọ ọlala nyanụ ọwẹ. Ị ka chị ịgọ nyanụ juwa chịnụ ebwo ọdọdẹpwa nyam, am ị-iJekọbụ ọlẹ. Ị ka nyiinu epepe ụ-ụma nya ala Isirẹlụ wuu ịnyịnyị.”

⁸IJekọbụ myịmyị wahị yẹkẹẹ, “IJuda, ahụ lẹ, anyadang ịkịla wuu ka ya ẹla ọnyịịla nyang. Ọkụrụ-kụrụ nya oluji nyang wuu ka juwa ẹ-ẹpwụtụbwọ nyang pyịyọọ lẹ. Ahụ-ahụ, anyadang ịkịla wuu a ka chị arụụ eji ha pyịyọọ lẹlẹ.

⁹IJuda ọnyịm, a lala okolobya nya ugẹbẹ ọlẹ kọ kaa kele kaka wu iyo kpa nya wẹ ẹpwa, boo ri wuu, hị nọnọ gu ahị nyamwụ gboo nya oboogo-oboogo. Angịnyị wuu ka ju uhi nyang, chajị ahụ ayịdang a la ọngịrị-ọngịrị lala ịnịna nya ugẹbẹ ọlẹ kọ kaa myị ọngọngọhẹ kaa tụ ba anyị nyamwụ myị kpong-kpong ka.

¹⁰IJuda wo mẹ, ahụ m̄ ya ọkụta bala ụgbang nya adịrahụ oriri ju ụ-ụbwọ lẹlẹ. Okoji ahụrụ nya adịrahụ oriri á ka tụ kịnyaa hi imwawụ nyang ahụ iJuda kpá ẹnẹnẹhẹ kaka gbee pwụ ụka ọlẹ ká Adịrahụ Agụgụ ayịdang ka bwu imwawụ nyang kpehe. Ọngọọwa, alepwoja myị alepwoja wuu a ka ju ihi, juwa gbịgba ha wuu ị-ịlahị lẹlẹ.

¹¹Ụgba nya ụnyịrẹ ọkụkụ nyamwụ bwọ eji ọ-ọmwụ nya ụma nya alakọnụ ọhẹ. Ụgba nya ụnyịrẹ nyamwụ bwọ eji ọ-ọmwụ nya alakọnụ ọlẹ kọ hiigu lụmẹ. Ọ ka kpa ere hụ́ ịwụrụ nyamwụ. Ọ ka kpa ere nya alakọnụ ọlẹ kọ la ọmịla lala ịwọ hụ́ awụrụ ogbileji nyamwụ ịnyịnyị.

¹²Ẹgbahị nyamwụ wọmẹ biletete lụmẹ gụ ọmịlẹtẹ wẹẹ. Angịrị nyamwụ pwo owuru keri-keri gụ enyi ẹmẹ nya ẹna ịnyịnyị.”

¹³IJekọbụ wahị myịmyị yẹkẹẹ, “ISebulọn, ahụ lẹ, a ka kụ ẹpwa nyang ahụ ụ-ụwa ọ-ọnụ nya ihu ọtụka-ọtụka ọlaanyị. Ọnụụka nya ihu ọtụka ọlọpyị nyang ọọwa a ka ri iwe ọmwịịnyọ ọtụka nya ụgbọ nya enyi ọlẹ ká angịnyị ka juwa ju olo nyaa ụ-ụwa lẹlẹ. Ọpyị nyang ka pyẹ kele lalaala kaka ju ka ọpyị nya ịSayịdọn.”

¹⁴IJekọbụ myịmyị yẹkẹẹ, “Isakaa, ahụ lẹ, a juwa kpa olo ọtụka ọlẹ kọ kịlang kịla lala ụnyịrẹ ọlẹ kọ la gogo lụmẹ.

¹⁵Chajị ahụ ayịdang ya ọwa nyị tị́ ka ye ẹga ọmwịịnyọ la olo ọkpakpa ụ-ụgbẹyị lẹ. Ọpyị nyị tị myịmyị hiigu lụmẹ lẹ. Ọọwa lẹ, aa wẹẹ gá erungbo gbe olo ọkpakpa, du kị juwa hung nya ọnyọhị, juwa kpang yẹ ụhị ododoodu lẹka lee?”

¹⁶IJekọbụ myịmyị wahị yẹkẹẹ, “ỊDan, ahụ lẹ, alimwawụ nyang ka ri alegbeju nya ịlaa lala alimwawụ ịkịla nya ala Isirẹlụ ịkịla wuu ịnyịnyị.

¹⁷A ka lala ilo ọlẹ kọọ kpịbaa ọ-ọnụ ụgbẹyị. A ka lala ọgbịjị ọlẹ kọ kaa kwịịnya ọ-ọnụ ụgbẹyị, kọ kaa chị ụnyịrẹ ẹ-ẹta, du ká ọngọ kụ ụnyịrẹ ọọwa kaa chabwọ mileji gbuduga.”

¹⁸IJekọbụ bịlẹ Ohe Oluhye yẹkẹẹ, “Amkpaa, chuchuu chịm da bwu ẹpwụtụbwọ nya ọngọ onyobyi ọlịịwẹ.”

¹⁹IJekọbụ myịmyị wahị yẹkẹẹ, “ỊGadị, ahụ lẹ, alagbụrụ ka gba mịlang. Ma, a tị ka kwaa wuu nyi epepe hi ịlọng wuu chaka-chaka.”

²⁰IJekọbụ myịmyị wahị yẹkẹẹ, “Achẹẹ, ahụ lẹ, a ka ri ọgịrẹjị. A ka ye ang oriri ọnyịịla-ọnyịịla ri bwu ẹpwụ nya ẹrụ nyang. Ang oriri ọlẹrụ nyang ka hiigu lụmẹ-lụmẹ gbee lala ịnyaa ka kpa kpa ịdịrịhụ.”

²¹IJekọbụ myịmyị wahị yẹkẹẹ, “ỊNafụtali, ahụ lẹ, a ri igbee ọlụnyẹ ọtụka ọlẹ kọ ma anyị, ká anyị nyamwụ ịịwa kaa hụhị lụmẹ.”

²²IJekọbụ myịmyị wahị yẹkẹẹ, “IJosẹfụ, ahụ lẹ, a lala okoji ọlẹ kọ bwu rịrị ụ-ụwa ụtọ ọlẹ kọ kaa gwabwọ kẹtẹtẹ ka edii-edii nya iku.

²³Aluji nyang dẹwụ tang lụmẹ. Ị kpa eda bala ịcha nyaa kung la ụnyẹ la ọngịrị-ọngịrị lụmẹ.

²⁴Ma, ahụ ayịdang tị yụbwọ chị uda nyang gogo hiigu lụmẹ. Ụbwọ nyang ri ụbwọ ọnyọọngịrị bwula ọngịrị nya Ohe Oluhye ọtụka nya iJekọbụ adang ọlẹ kọ ya ọngịrị ọọwa hang. Ohe Oluhye ọọwa a ri ọngọlẹ kọ kaa kpahị lala ọngọgbikpịlọ a kpa ịkpịlọ nyamwụ lẹ. Ọwa ayịdang a ri ẹjwọ ọtụka ọlẹ ká ala Isirẹlụ wuu kaa rụnyẹ rụ kaka kpịbaa ẹ-ẹga nyamwụ ịnyịnyị lẹ.

²⁵IJosẹfụ ọnyị nyam, ká Ohe Oluhye nyam am adang ọlẹ kọ kaa dam ụbwọ, a dang ụbwọ ịnyịnyị. Ohe Oluhye Agụgụ a wahị kụrụng la ang ịnyịịla lụmẹ-lụmẹ bwu uhye-ọgba. Ohe Oluhye ka wahị kụrụng bwula enyi ọlẹ kọ rụ bwu ẹpwụ ịpyị kpehe. Ọ ka wahị kụrụ ugbẹpwụ nya ịhụ nyang la iru nya anyị ịlẹ kị ka ma.

²⁶A ka la ahị ọwawa ọ-lala ịnya iJekọbụ adang, chajị ká ka la ang oriri lụmẹ-lụmẹ bwu ẹpwụ nya ang nya ẹrụ nyang ịlẹ kị ka nwụ egbe lụmẹ-lụmẹ. Ká Ohe Oluhye a hu ahị ọwawa nya ịgbọdọ ịtụka inyogo-inyogo hang, ká Ohe Oluhye a hu ụdụ ọkpụkpụ ọtụka-ọtụka nyamwụ ọlẹ kọ ka ri ehe gụ ịgbọdọ ịtụka-ịtụka inyogo ịwẹ hang ahụ iJosẹfụ ịnyịnyị mẹ. Ahị ọwawa ịwẹ wuu ka do chụng ahụ iJosẹfụ e-egbeju, ahụ ọngọlẹ kị chụng chụ bwu ẹpwarịrị nya anyadang ịkịla wuu.”

²⁷IJekọbụ myịmyị wahị yẹkẹẹ, “IBenjamịn, ahụ lẹ, a lala ikirom ọlẹ kọ juwa ga da urwe nya ang ịlẹ kọ ka wu be ri la ụtụrụ-ụtụrụ hyẹhyẹ gbee ká odu ka hi.”

²⁸Ịịwẹ iJekọbụ a bwu wahị kụrụ anyị alẹng angị iwo kụrụ imiiye nyamwụ lẹ. Ọ wahị kụrwaa ịwa wuu ọngọhẹ-ọngọhẹ ka ẹga kịịwa wuu ba jaabwọ kọ pwoku ọngọngọọng nyaa. Ọngọngọọng nyaa a ri adịda ọgbahị nya imwawụ iwo kụrụ imiiye nya ala Isirẹlụ lẹ.

²⁹Ụka ọọwa, lẹ, iJekọbụ a ya ẹla ohyẹẹkpẹ nyamwụ ta anyị nyamwụ wuu la ụbwọ ogbile ụ-ụrụ yẹkẹẹ, “Anụ anyị nyam, anụ wo mẹ. Am jam ka gbu lẹ! Ma, m tị tịtọ kanụ ka hum kpa kaka ju eji ta adam anyị ụ-ụwa ẹ-ẹpwụ nya ụgbụ ọlẹ kọ juwa ọ-ọpyị nya Efurọn ọla Hiiti.

³⁰Ụgbụ ọọwa juwa ị-ịMakịpẹla lalẹẹ koye nya ọmwẹnụ-ụtụrụ nya ịMamrẹ ọ-ọpyị nya iKenan. Ebiraham a ra ụgbụ ọọwa bala ọpyị ọọwa bwu ẹpwụtụbwọ nya Efurọn chajị ká ọpyị ọọwa ka ri ẹga o-ju ogu eji nyahị lẹ.

³¹Ụ-ụwa ọ-ọpyị ọọwa, ị ju Ebiraham bala iSera ahụ nyamwụ eji lẹ. Ụ-ụwa ụwa, ị ju Ayịsiki bala iRibeka ahụ nyamwụ eji ịnyịnyị lẹ. Am ayịdang ju ogu nya iLiya ahụ nyam eji ụ-ụwa ịnyịnyị.

³²Ẹ-ẹpwụtụbwọ nya ala iHiiti, Ebiraham a ra ụgbụ ọwẹ bala ọpyị ọọwa bwu lẹ.”

³³Ahyaahị ká iJekọbụ ya ẹla ohyẹẹkpẹ nyamwụ kpá bwaaa lẹ, ọ hị nọnọ ị-ịbẹẹdị nyamwụ lẹ, ọ chị ẹjẹ lẹlẹ.