Read idege ỌMWỤ ỌDADA 5 Bible Online

ỌMWỤ ỌDADA 5 - idege bible

ỌMWỤ ỌDADA 5

¹Ọlẹ à ri ego ogbegbe nya anyị ịtụma nya Adam lẹ. Ụka ọlẹ ká Ohe Oluhye họ ọngịnyị ehe nya ọgbanyẹ, ọ họọ la ụma nya ịlọmwụ.

²Ọlẹng ookpokpo bala ọnyang ookpokpo, Ohe Oluhye a họ nya ọgbanyẹ-ọgbanyẹ lẹ. Ụka kọ wahị kụrwaa kpá lẹ, ọ wụrwaa “angịnyị ehe” lẹlẹ.

³Ụka ká Adam gu ẹka ohu da iwo ịta (130), ọ ma ọnyị ọlẹng ọhẹ. Ọnyị ọọwa me Adam ayịdang lụmẹ. Adam wụrụ ẹnyị nya ọnyị ọọwa, ịSẹtị.

⁴Bwu ụka ọlẹ kị ma ịSẹtị kpá, Adam myịmyị ri ehe lala ẹka ohu ineku (800). Adam ma anyị alẹng bala anyị anyang ịkịla hile Sẹtị ọwẹ.

⁵Ẹka nya ehe oriri nya Adam wuu ri ẹka ohu ihikichu da ẹka iwo ịta (930) gbẹgbịlẹ ene kọọ gbu.

⁶Ụka ká ịSẹtị gu ẹka ohu ookpokpo kụrụ ẹka ịrụ (105), ọ ma ọnyị ọlẹng. Ọ wụrụ ẹnyị nyamwụ Ẹnọchị.

⁷Bwu ụka ọlẹ kị ma Ẹnọchị kpá, ịSẹtị myịmyị gu ẹka ohu ineku kụrụ irwiye (807) ene kọọ gbu. Ọ ma anyị alẹng bala anyị anyang ịkịla hile Ẹnọchị ịnyịnyị.

⁸ỊSẹtị ri ehe lala ẹka ohu ihikichu da ẹka iwo kụrụ imiiye (912) gbẹgbịlẹ ene kọọ gbu.

⁹Ụka ká Ẹnọchị gu ẹka iwo ihikichu, ọ ma ọnyị ọlẹng ọlẹ kọ wụrụ iKenan.

¹⁰Ẹnọchị myịmyị ri ehe lala ẹka ohu ineku da ẹka iwo kụrụ ịrụ (815) bwu ụka ọlẹ kọ ma iKenan kpá ene kọọ gbu. Ọ myịmyị ma anyị alẹng bala anyị anyang ịkịla hile iKenan.

¹¹Ẹnọchị ri ehe lala ẹka ohu ihikichu kụrụ ẹka ịrụ (905) ene kọọ gbu.

¹²Ụka ká iKenan gu ẹka iwo irwiye, ọ ma ọnyị ọlẹng ọlẹ kọ wụrụ ịMahalalẹlụ.

¹³IKenan myịmyị ri ehe bwu ụka ọlẹ kọ ma ịMahalalẹlụ kpá lala ẹka ohu ineku da ẹka iwo ine (840) ene kọọ gbu. Ọ ma anyị alẹng bala anyị anyang ịkịla hile ịMahalalẹlụ ịnyịnyị.

¹⁴Ẹka nya ehe oriri nya iKenan wuu tụchawụlẹ ri ẹka ohu ihikichu da ẹka iwo (910) ene kọọ gbu.

¹⁵Ụka ká ịMahalalẹlụ gu ẹka iwo ịrwọnyẹ kụrụ ịrụ, ọ ma ọnyị ọlẹng ọlẹ kọ wụrụ ịJarẹdị.

¹⁶ỊMahalalẹlụ myịmyị ri ehe lala ẹka ohu ineku da ẹka iwo ịta (830) bwu ụka ọlẹ kọ ma ịJarẹdị. Ọ myịmyị ma anyị alẹng bala anyị anyang ịkịla hile ịJarẹdị ịnyịnyị.

¹⁷Ehe oriri nya ịMahalalẹlụ wuu tụchawụlẹ ri ẹka ohu ineku da ẹka iwo ihikichu kụrụ ịrụ (895) ene kọọ gbu.

¹⁸Ụka ká ịJarẹdị gu ẹka ohu da ẹka iwo ịrwọnyẹ kụrụ imiiye (162), ọ ma ọnyị ọlẹng ọlẹ kọ wụrụ Ịnọkụ.

¹⁹ỊJarẹdị myịmyị ri ehe lala ẹka ohu ineku (800) gbẹgbịlẹ bwu ụka ọlẹ kọ ma Ịnọkụ kpá, ene kọọ gbu. Ọ myịmyị ma anyị alẹng bala anyị anyang ịkịla hile Jarẹd ịnyịnyị.

²⁰Ehe oriri nya ịJarẹdị wuu tụchawụlẹ ri ẹka ohu ihikichu da ẹka iwo ịrwọnyẹ kụrụ imiiye (962) ene kọọ gbu.

²¹Ụka ká Ịnọkụ gu ẹka iwo ịrwọnyẹ kụrụ ịrụ, ọ ma ọnyị ọlẹng ọlẹ kọ wụrụ iMetusẹla.

²²Ịnọkụ jẹdịyẹ lihi ojuju ị-ịlahị nya Ohe Oluhye bwu ụka ọlẹ kọ ma iMetusẹla pyịyọọ lala ẹka ohu ịta (300) gbẹgbịlẹ. Ọ ma anyị alẹng bala anyị anyang ịkịla hile iMetusẹla ịnyịnyị.

²³Ehe oriri nya Ịnọkụ wuu tụchawụlẹ ri ẹka ohu ịta da ẹka iwo ịrwọnyẹ kụrụ ịrụ (365).

²⁴Ajị nyọlẹ ká Ịnọkụ jẹdịyẹ ị-ịlahị nya Ohe Oluhye lihi ojuju lẹ, Ohe Oluhye kpọọ rụ lahị-lahị. Ọ́ gbu lala angịkịla ene kpong-kpong kaka.

²⁵Ụka ká iMetusẹla gu ẹka ohu da ẹka iwo ineku kụrụ irwiye (187), ọ ma ọnyị ọlẹng ọlẹ kọ wụrụ ịLamẹkị.

²⁶IMetusẹla myịmyị ri ehe ẹka ohu irwiye da ẹka iwo ineku kụrụ imiiye (782) ene kọọ gbu. Ọ ma anyị alẹng bala anyị anyang ịkịla hile ịLamẹkị ịnyịnyị.

²⁷Ehe oriri nya iMetusẹla wuu tụchawụlẹ ri ẹka ohu ihikichu da ẹka iwo ịrwọnyẹ kụrụ ihikichu (969) ene kọọ gbu.

²⁸Ụka ká ịLamẹkị gu ẹka ohu ookpokpo da iwo ineku kụrụ imiiye (182), ọ ma ọnyị ọlẹng ọhẹ.

²⁹Ụka ọọwa, ịLamẹkị yẹkẹẹ, “Ẹhẹẹ! Ọnyị ọlẹ ka dahị ụbwọ ẹ-ẹpwụ nya ẹrụ owuwu nyahị tahị lẹ: ọnyị ọlẹ ayịdang a ri ọngọlẹ kọ ka kpa ọhagụ warị wahị bwu ẹpwụ nya ọpyị ọlẹ ká Amkpaa gọlọ ju ugbẹnyị lẹlẹ.” Ịnyị a du ká ịLamẹkị wụrụ ẹnyị nya ọnyị ọọwa, iNuwa lẹ.

³⁰ỊLamẹkị myịmyị ri ehe ẹka ohu ịrụ da ẹka iwo ihikichu kụrụ ịrụ (595) ene kọọ gbu. Ọ myịmyị ma anyị alẹng bala anyị anyang ịkịla hile iNuwa.

³¹Ehe oriri nya ịLamẹkị wuu tụchawụlẹ ri ẹka ohu irwiye da ẹka i'wo irwiye kụrụ irwiye (777) ene kọọ gbu.

³²Ụka ká iNuwa gu ẹka ohu ịrụ (500), ọ ma anyị alẹng ịlẹ kọ wụrụ ịChẹm bala ịHam bala ịJafẹtị.