Read idege ỌMWỤ ỌDADA 50 Bible Online

ỌMWỤ ỌDADA 50 - idege bible

ỌMWỤ ỌDADA 50

¹Ahyaahị ká iJekọbụ gbu, iJosẹfụ ọnyị nyamwụ kele kaka kpụ ba ogu nya adamwụ, juwa jwoo ọnụ leko-leko.

²Ụka ká iJosẹfụ ba la ida ojeje kpá, ọ wụrụ ịdọngkịta ilekpeleji nyamwụ ịhyẹ ịlẹ kịị chịga ju ogu kele kị ka ya etiji wụ ogu nya adamwụ. Ịnyị, idongkita ịịwa a họ jaabwọ kọ byaa lẹlẹ.

³Idọngkịta ịwẹ bịrị ụtụrụ iwo ine ene kịị họ ụkụrwọ nya ida ọ-wụ ogu wụ ọọwa kpá. Ụka ọọwa, ala Ijipiti wuu kpa ụtụrụ iwo irwiye lẹpwụ-lẹpwụ bida nya iJekọbụ.

⁴Ụka ká ẹnụtụrụ nya ida ọbaba ịwẹ chịpwụrụ kpá, iJosẹfụ wụrụ angịhyẹ bwu ọdọdẹpwa nya iFero Adịrahụ byaa yẹkẹẹ, “Ó-ri ká ẹla nyam á kpụnụ ịpyọ lẹ aalẹ, anụ kele kaka ya ẹla ọlẹ ta iFero ham mẹ.

⁵Anụ byi iFero yẹkẹẹ, ‘Ene ká adam ka gbu lẹ, ọ byim ya am nyị nwa iro họwa ya am nyị ka kpa ọwa kaka ju eji i-iworu ọlẹ kọọwa nyị wu dụwa gbe ịlọọwa ụ-ụwa ọ-ọpyị nya iKenan pyii mẹ.’ Lẹ, am nwa iro ọọwa họọ jaabwọ kọ ya ene kọọ gbu. Lẹ, m tịtọ ká iFero ka tụụbwọ him kam ka kele kaka ju ogu nya adam eji ụ-ụwa ị-iKenan. Ụka kam jwọọ eji kpá, m ka nya tịrẹkpẹ warị ahyaahị.”

⁶Ụka ká iFero wo, ọ wẹ byi iJosẹfụ yẹkẹẹ, “IJosẹfụ, kele kaka ju ogu nya adang eji ị-iKenan jaabwọ ká nwa iro họọ ene-ene mẹ.”

⁷Ịnyị, iJosẹfụ, a nwụlanọ bala angịgbahị ịlọdọdẹpwa nya iFero bala alukido nyamwụ bala ịgabwọ nya ala Ijipiti lụmẹ-lụmẹ lẹ, ị hu ang ẹdịyẹ juwa kpa ogu nya iJekọbụ kele ka ọpyị nya iKenan lẹlẹ.

⁸Alẹpwa nya iJosẹfụ ayịdang, anyadamwụ ịkịla wuu bala alọdọdẹpwa nya iJekọbụ wuu baa rụ kele ịnyịnyị. Anjwo ichiche bala iyo ịlẹpwa nyaa wuu kẹnẹ-kẹnẹ a hi juwa i-iGochin gbaa lẹlẹ.

⁹Angịlẹ kị bajẹ bala iJosẹfụ wuu ju iru lụmẹ kaka kpoye. Angịhyẹ nyaa kpa ang ọrụnyẹ. Angị ịkịla nyaa juwa kụ anyịrẹ nyaa ịnyịnyị.

¹⁰Ụka kị jẹ gbee kị kpoye nya Ihu ịJọdan bwaaa, ị pwụ ẹga o-ru ajẹ nya amẹ ọhẹ ọlẹ kị wụrụ Atadị. Ị gọdayị mwụ ịnyọ ụ-ụwa lẹ, ị juwa jida ọtụka-ọtụka nya ịlẹhị-ịlẹhị ụ-ụwa lẹlẹ. IJosẹfụ gọdayị bida nya adamwụ ẹ-ẹgẹwẹ ẹnụtụrụ irwiye lẹpwụ-lẹpwụ.

¹¹Ụka ká alọpyị nya iKenan ịlụwa yẹ jaabwọ ká iJosẹfụ bala ala Ijipiti anyị ịwẹ wuu juwa bida ọtụka-ọtụka ọlịnyị lẹ, ala iKenan ịịwa a yẹkẹẹ, “Ahyuu! Ida-ida ala Ijipiti ịwẹ a wẹẹ ba ju ogu ịịwẹ lẹ?” Ịnyị a du ká ala iKenan wụrụ Atadị ọwẹ, Ebẹlụ-imisirayim jaabwọ ká etu nyamwụ ri la oja nyaa lẹ. Ẹga ọọwa ju Ihu ịJọdan chwẹẹ lụmẹ.

¹²Ịịwẹ anyị nya iJekọbụ a bwu họ jaabwọ ká adaa byaa ene kọọ gbu lẹ.

¹³Ị kpa ogu nya iJekọbụ adaa kele kaka ju eji ụ-ụwa ụgbụ ọlọpyị o-ju ogu eji nyaa ọla iKenan. Ọpyị ọọwa juwa ị-ịMakịpẹla o-oye nya ọmwẹnụ-ụtụrụ nya ịMamrẹ. Ebiraham ra ọpyị ọọwa bwu ẹpwụtụbwọ nya Efurọn ọla iHiiti dụwa chajị kọ ka ri ọpyị o-ju ogu eji nya alụma nyamwụ wuu.

¹⁴Ụka ká iJosẹfụ bala anyadamwụ bala ala Ijipiti ịlẹ wuu kị kpa ida nya iJekọbụ ka ẹpwa, họ ida i-iKenan kpá lẹ, ịwa wuu a rụ tịrẹkpẹ kele ka Ijipiti lẹlẹ.

¹⁵Ahyaahị ká iJekọbụ gbu, anyadịda nya iJosẹfụ juwa ju uhi nya iJosẹfụ. Ị byi awụlẹ yẹkẹẹ, “Ọhẹka, iJosẹfụ ka juwa mẹ irya nyọka họhị ẹla kwiwa nya ang onyobyi ọlẹ kahị họọ lalẹẹ ugbeene wẹẹ.”

¹⁶Ụka kị mẹ obyi nyaa kpá, ị du ọngọhẹ ẹrụ kaka byi iJosẹfụ yẹkẹẹ, “Ene ká adahị ka gbu ẹnụmwụ lẹ, ọ duuhi ẹrụ ọhẹ tọng.

¹⁷Ọ ya ahị nyị bying ahụ iJosẹfụ ọnyadahị mẹ, ọwa adang nyị ya ahụ nyị chuchuu kaahụ nyị hịnyọhi ang onyobyi ọlẹ kaahị nyị họ bang hahị mẹ. Lẹ, adam, ahị yụbwọ kụ eji hang ká ka hịnyọhi ang onyobyi nyahị ahị anchẹ nya Ohe Oluhye nya adang hahị lẹ.” Ụka kị juwa kpa ẹla ọọwa ya ta iJosẹfụ, ọ tọọ olujwo lụmẹ gbee kọ juwa jida.

¹⁸Ụka kị juwa kpa ẹla ọọwa ya ta iJosẹfụ, ịwa wuu kele kaka hị nọnọ ụ-ụwa ị-ịlahị nyamwụ. Ị byoo yẹkẹẹ, “Ba hiihi mẹ. Ahị wuu myị ọnụ nyọka ri anyịhị nyang bwu alẹ kele kịlahị lẹ.”

¹⁹Ụka ọọwa, iJosẹfụ byaa yẹkẹẹ, “Anụ ba adam, anụ ju uhi ka. Ọ họnụ kwiwa ọọwa lẹ, anụ meme kaam ayịdang a ri Ohe Oluhye riri?

²⁰Ọ ri nya ịlẹhị ịnọ, anụ mẹ irya onyobyi jahị dam. Ma, Ohe Oluhye tị yọọ la ang ọnyịịla ham lẹ. Ohe Oluhye họ ịnyị chajị kam ka chị ọhịhị nya aluche nya angịnyị ehe da. Jaabwọ kaanụ ayịdang wẹẹ ri ibeenu alẹ lẹ.”

²¹IJosẹfụ myịmyị byaa yẹkẹẹ, “Anụ ju uhi nyam kaka. Ḿ ka họnụ abwaabwọhẹ ka. M ka kpanụ bala anyị nyanụ wuu hiigu-hiigu.” Ịịwẹ iJosẹfụ a bwu kpụ́ anyadamwụ ịwẹ ẹjẹ, juwa jwaa ọhụ ịnyịnyị lẹlẹ.

²²Ụka ọọwa, iJosẹfụ kụ ụ-ụwa i-Ijipiti ta alẹpwa nya adamwụ anyị wuu pyịyọọ pwụ ẹnụ nya igu nyamwụ. Ọ gu ẹka ohu da ẹka iwo (110) chiriri ene kọọ gbu.

²³IJosẹfụ ri ehe gbee kọ yẹ anyị nya anyị nya Ifurem pwụ ogu ọhata ene kọọ gbu. IJosẹfụ hu anyị nya ịMakii ọlẹ kọ ri ọnyị nya ịManasẹ lala anyị nya ịlọmwụ ịlẹ kọ ma bwu ẹpwụ ịnyịnyị.

²⁴Ụka ká iJosẹfụ juwa ka gbu, ọ wụrụ anyadamwụ wuu. Ọ byaa yẹkẹẹ, “Anụ yẹ mẹ! M jam ka gbu lẹ. Ma, Ohe Oluhye ka ya ẹhị rịrịịnụ pyịyọọ. Ọ ka kpanụ rụ hi ọpyị ọlẹ tịrẹkpẹ kele ka ọpyị nya iKenan, jaabwọ kọ nwa iro ha adahị Ebiraham bala Ayịsiki bala iJekọbụ anyị, ya ọpyị ọwẹ nyị ka ri nyaa pyịyọọ.”

²⁵Ụka ọọwa iJosẹfụ byaa yẹkẹẹ, anụ nyị nwa iro ha ọwa yẹkẹẹ, ịwa nyị́ ka dayi la ọ-kpa ekpinegu nya ọọwa iJosẹfụ ọlẹ rụ ba ịlịịwa kele ka iKenan ụka ọlẹ ká Ohe Oluhye nyị ka dịwa ụbwọ kịịwa nyị ka rụ tịrẹkpẹ ka iKenan ụ-ụwa ị-ịlahị kaka.

²⁶Ịnyị lẹ, iJosẹfụ a gbu lụka ọlẹ kọ gu ẹka ohu da ẹka iwo chiriri lẹlẹ. Ụka kị ya etiji wụ ogu nyamwụ kpá lẹ, ị hwoo ju ẹ-ẹpwụ nya akpa nya ogu rụwa i-Ijipiti chịng lẹlẹ.