Read idege ỌMWỤ ỌDADA 7 Bible Online

ỌMWỤ ỌDADA 7 - idege bible

ỌMWỤ ỌDADA 7

¹Ụka ká iNuwa kọ ụgbọ nya enyi ọọwa kpá, Amkpaa Ohe Oluhye byoo yẹkẹẹ, “INuwa, kẹwẹ kaahụ bala alẹpwa nyang wuu a ju ka ẹpwụ nya ụgbọ ọwẹ mẹ. Chajị ahụ ụbwọng a ri ọngịnyị ọnyịịla ị-ịlahị nyam am Ohe Oluhye ẹ-ẹpwụ nya aloyi nyanụ ọlẹ wuu lẹlẹ.

²INuwa wo mẹ! Kele ka ẹpwụ nya ụma nya iyo ịcharị-charị ká wu anyang irwiye bala alẹng irwiye nya ebwo ọnyị myị ọnyị nyaa, ká kpaa kele kaka ju ka ẹpwụ nya ụgbọ nya enyi ọwẹ mẹ. Ká kele ka ẹpwụ nya ụma nya iyo ịlẹ kị ri ịcharị-charị-ka, ká wu ọnyang ookpokpo bala ọlẹng ookpokpo nya ọnyị myị ọnyị nyaa kem, ká kpaa kele kaka ju ka ẹpwụ nya ụgbọ ọwẹ ịnyịnyị mẹ.

³Aa wu anyang irwiye bala alẹng irwiye nya ụma nya ịchịnụ ebwo myị ebwo la datị-datị juwa ẹ-ẹpwụ nya ụgbọ ọwẹ chajị ká ụma nya anyị-iyo ịwẹ á ka ta ayịreji hi odehe ọlẹ kaka mẹ.”

⁴Ohe Oluhye myịmyị yẹkẹẹ, “INuwa wo mẹ! Ọ hi lala ẹnụtụrụ irwiye kem kam ayịdang juwa ka do ukpenyi ọtụka-ọtụka ahị ọpyẹpyẹ iwo ine tụ odu iwo ine gbẹgbịlẹ lẹ! Chajị ká ang myị ang ọlẹ wuu kam Ohe Oluhye họ odehe ọlẹ ka ta ayịreji gbanggbang.”

⁵Ịnyị lẹ, iNuwa a họ ang myị ang ọlẹ wuu ká Ohe Oluhye byoo ya nyị họ jịra ịnyịlẹhị lẹlẹ.

⁶Ụka ọlẹ ká ukpenyi ọtụka-ọtụka ọọwa do bịrị odehe ọlẹ lẹ, iNuwa gu ẹka ohu ịrwọnyẹ (600) gbẹgbịlẹ.

⁷Ịnyị lẹ, iNuwa ayịdang bala ahụ nyamwụ tụ anyị alẹng nyaa angịnyị angị ịta-ịta bala ịhụ nyaa wuu a rụ ju ka ẹpwụ nya ụgbọ nya enyi ọọwa chajị ká enyi ọọwa a ka jẹ-ẹ waa ịwa kaka lẹlẹ.

⁸Ụma nya iyo ịcharị-charị datị-datị wuu tụ ụma nya ịlẹ kị ri ịcharị-charị-ka bala ịchịnụ wuu tụ anyị-iyo ịlẹ kị kaa kpa apwụ gbileji wuu rụ ba iNuwa ju ka ẹpwụ nya ụgbọ nya enyi ọwẹ ịnyịnyị.

⁹Ọnyang bala ọlẹng nya ụma nya ịwẹ wuu ba iNuwa rụ kele ka ẹpwụ nya ụgbọ ọwẹ jaabwọ ká Ohe Oluhye ayịdang da iNuwa ehile ya, nyị họ mẹ.

¹⁰Ụka ká ẹnụtụrụ oharwiye ọọwa pwụ eji lẹ, Ohe Oluhye a do ukpenyi ọtụka-ọtụka ọọwa ịnyịlẹhị lẹlẹ.

¹¹Ukpenyi ọọwa dọmwụ nya ododo ẹ-ẹpwụ nya ẹnụtụrụ iwo kụrụ irwiye nya ọya oheeye nya ẹka ọlẹ ká iNuwa gu ẹka ohu ịrwọnyẹ (600). Enyi hu bwu eji juwa da ọba, ukpenyi ọtụka-ọtụka ayịdang juwa nya pwụrụrụrụrụ, chajị Ohe Oluhye ayịdang wụrụ iwindo nya uhye-ọgba da dodo ha enyi ododo ọwẹ lẹ.

¹²Ohe do ukpenyi ọọwa ẹ-ẹpwụ nya ahị ọpyẹpyẹ iwo ine tụ odu iwo ine gbẹgbịlẹ.

¹³Ene ká ukpenyi ọọwa ka dọmwụ nya ododo, iNuwa bala ahụ nyamwụ bala ịChẹm bala ịHam bala ịJafẹtị anyị nyamwụ alẹng bala ịhụ nyaa wuu rụ ju ka ẹpwụ nya ụgbọ nya enyi ọwẹ lẹ.

¹⁴Ụma nya iyo wuu ịlẹ ká iNuwa tụguru rụ kele kaka ju ka ẹpwụ nya ụgbọ ọọwa jaabwọ ká ụmụmụụma nyaa la wuu tụ iyo ịlẹpwa bala ịlẹpwamẹ bala iyo ịkịla ịlẹ kị kaa kpa apwụ nyaa gbileji bala ịchịnụ wuu.

¹⁵Iyo ịwẹ wuu bajẹ imimiiye bala iNuwa ju kele ka ẹpwụ nya ụgbọ nya enyi ọọwa chajị ká ang myị ang ọlẹ kọ juwa hịhị lẹ, ka jẹ-ẹ juwa ẹ-ẹpwụ nya ụgbọ ọọwa jịra jaabwọ ká Ohe Oluhye ayịdang ya.

¹⁶Ụka ká iyo ịwẹ wuu rụ ju ka ẹpwụ nya ụgbọ nya enyi ọọwa kpá, jaabwọ ká Ohe Oluhye da ehile lẹ, Amkpaa Ohe Oluhye a tụ ụgbẹyị nya ụgbọ ọọwa ku la ịlọmwụ lẹlẹ.

¹⁷Ukpenyi ọọwa do jịra ụtụrụ iwo ine ịnyịlẹhị. Ọọwa lẹ, enyi ọwẹ a juwa myị̀ papaapa gbee kọ biri ang myị ang ilodehe ọlẹ wuu lẹlẹ. Ịnyị lẹ, ọ hu ụgbọ nya enyi ọwẹ kpa u-uhye kedeng lẹlẹ.

¹⁸Enyi ọọwa juwa myị kịlahị-ịlahị, juwa kpa ụgbọ nya enyi ọwẹ ga u-uhye nya enyi kudung ịnyịnyịịnyị.

¹⁹Enyi ọọwa juwa myị̀ kịlahị-ịlahị gbee kọ biri ịgbọdọ ịtụka-ịtụka ilodehe ọlẹ wuu.

²⁰Enyi ọọwa myị̀ biri ịgbọdọ ịlẹ kị la uhye gụ ịkịla wuu lala apatẹ iwo imiiye.

²¹Ịnyị lẹ, ang myị ang ọlẹ wuu kọ la ọhịhị am̀ ẹ-ẹpwụ nya odehe ọlẹ a gbu tụ ang myị ang ichiche ịdịhụ ịlẹ kị juwa hụhụ lee juwa wụlọ ị-ịpyị, tụ ịchịnụ wuu iyo ịlẹpwa wuu bala iyo ịkịla wuu bala angịnyị ehe ayịdang wuu gbu gbanggbang.

²²Ang myị ang ọlẹ wuu kọ jẹ-ẹ dịhụ odehe ọlẹ lẹ, ọ gbu ịnyịnyị wuu ẹnụtụrụ ọọwa.

²³Ịnyị, Ohe Oluhye à kpa ukpenyi ọtụka ọwẹ ta ang myị ang ọlẹ kọ ri ang ọdịhụ olodehe ọlẹ wuu ayịreji gbanggbang hi odehe ọlẹ ịnyịlẹhị lẹlẹ. Angịnyị ehe wuu gbu, iyo myị iyo wuu tụ ịlẹ kị kaa kpa apwụ gbileji gbu bala ịchịnụ iluhye-ọgba wuu ịnyịnyị. INuwa bala alẹpwa nyamwụ ịlẹ kị juwa tọọ ẹ-ẹpwụ nya ụgbọ nya enyi ọwẹ, ụbwaa a hi ri angịnyị ehe ịlẹ ká ukpenyi ọọwa á wu kaka lẹlẹ.

²⁴Enyi ọọwa myị̀ yịrị odehe yịrị dụwa hwẹẹlẹẹ ẹnụtụrụ ohu ookpokpo da ẹnụtụrụ iwo ịrụ (150) gbẹgbịlẹ.