Read idege ỌMWỤ ỌDADA 8 Bible Online

ỌMWỤ ỌDADA 8 - idege bible

ỌMWỤ ỌDADA 8

¹Ụka ọọwa, Ohe Oluhye ayịdang á deeri nya iNuwa bala iyo ịlẹpwa bala ịlẹpwamẹ ịlẹ wuu kị juwa ẹ-ẹpwụ nya ụgbọ ọọwa ta iNuwa wuu ka. Ohe Oluhye họ ká ịgbachịwụ juwa da gbee ká enyi ọtụka ọwẹ juwa pwọ ịnyịnyịịnyị.

²Ene nya ịgbachịwụ ọọwa lẹ, Ohe Oluhye họ ká ukpenyi ododo ọọwa chị, chajị ọ tụ iwindo nya epwoohe ku lẹ. Ọ myịmyị kpụ enyi ọlẹ kọ juwa hu bwu eji ba ịnyịnyị lẹ.

³Ịnyị lẹ, enyi ọtụka ọọwa a juwa dọmwụ nya ọpwọpwọ ịnyịnyịịnyị kịlahị-ịlahị lẹlẹ. Ụka kọ ka pwụ ẹnụtụrụ ohu ookpokpo da ẹnụtụrụ iwo ịrụ (150) lẹ, enyi ọọwa pwọ hiigu-hiigu lẹlẹ.

⁴Ụka ọlẹ kọ ri ẹnụtụrụ iwo kụrụ irwiye nya ọya oharwiye lẹ, ụgbọ a kele kaka gọdayị rịrị u-uhye nya ọgbọdọ ọhẹ ụ-ụwa Araratị lẹlẹ.

⁵Ụka ká enyi ọọwa juwa nwụ ịnyịnyịịnyị gbee pwụ ẹnụtụrụ ọhọhẹ nya ọya okiriwo lẹ, achinege nya ịgbọdọ ịtụka ilodehe ọlẹ wuu a hyeehe la angịnyị jẹ juwa yaa ẹ-ẹhị lẹlẹ.

⁶Ụka ká ẹnụtụrụ iwo ine chịpwụrụ, ẹkpẹ nyọlẹ ká ịgbọdọ ịwẹ hyeehe lẹ, iNuwa a wụrụ iwindo ọlẹ kọ chị ẹ-ẹpwụ nya ụgbọ nya enyi ọọwa lẹlẹ.

⁷Ọọwa lẹ, iNuwa a du ọchịnụ ọhẹ ọlẹ kọ lala opyeekpo kpehe bwu iwindo ọọwa lẹlẹ. Ọchịnụ ọwẹ kele lẹ, ọ́ nya kele ka ẹpwụ nya ụgbọ nya enyi ọwẹ kaka. Ọ juwa hụ tụ ang-ang da kam-kale gbegbegbe ká enyi ọtụka ọwẹ nwụ wuu, la ọpyị chọhụ kịra-kịra.

⁸INuwa wu enewulo du kpehe bwu iwindo myịmyị chajị kọ ka jẹ, ọ́-ri ká enyi ọọwa-á nwụ lẹ.

⁹Ịnyị lẹ, enewulo ọọwa a hụ tịrẹkpẹ warị wẹ ẹga nya iNuwa ahyaahị chajị enyi ọọwa lụmẹ wẹẹ lẹ, enewulo ọwẹ á ye ẹgẹgẹhẹ kụ kpong-kpong ka. Ọọwa lẹ, iNuwa a nịra ụbwọ nyamwụ kpaaa kaka wu enewulo ọwẹ tịrẹkpẹ bwu iwindo ju ka ẹpwụ nya ụgbọ nya enyi myịmyị lẹlẹ.

¹⁰Ụka ká ụtụrụ irwiye chịpwụrụ kpá, iNuwa myịmyị du enewulo ọọwa kpehe kaka wụla eji yẹ ụka oheeye.

¹¹Ụka ká enewulo ọọwa kele, ọ hụ ụ-ụwa gbee ká obyi hi. Ụka kọ ka tịrẹkpẹ lobyi, ọ chị ụpwụ nya olivu olukpo-lukpo ọhẹ kpa ọ-ọnụ nyamwụ warị wẹ ẹga nya iNuwa. Ọọwa lẹ, iNuwa a jẹ yẹkẹẹ, enyi ọọwa nyị nwụ lụmẹ-lụmẹ lẹlẹ.

¹²Ụka ká iNuwa myịmyị gọdayị lala ụtụrụ irwiye ọkịla, ọ myịmyị du enewulo ọwẹ kpehe kaka wụla eji yẹ. Ịnyị lẹ, enewulo a kele lẹ, ọ́ myịmyị tịrẹkpẹ kele ka ẹpwụ nya ụgbọ nya enyi ọwẹ kaka lẹlẹ.

¹³Ụka ọwẹ lẹ, iNuwa gu ẹka ohu ịrwọnyẹ kụrụ ẹka ookpokpo (601) lẹ. Ẹ-ẹpwụ nya ẹnụtụrụ ọhọhẹ nya ọya ọhọhẹ ọlẹ kọ ba ẹka ọọwa ba, iNuwa wụrụ ang hi ụgbọ nya enyi nyamwụ u-uhye-ọgba lẹ, ọ chẹhị kele keji lẹlẹ. Ọọwa lẹ, ọ yẹ jaabwọ ká ọpyị chọhụ yẹẹyẹẹ wuu lẹlẹ.

¹⁴Ụka ká ọya oheeye gu ụtụrụ iwo imiiye kụrụ irwiye lẹ, ọpyị a chọhụ wuu yẹẹyẹẹ lẹlẹ.

¹⁵Ụka ká enyi ọwẹ nwụ wuu ká ọpyị chọhụ wuu, la ọngịrị yẹẹyẹẹ lẹ, Ohe Oluhye a ya ẹla ta iNuwa lẹlẹ.

¹⁶Ịnyị lẹ, Ohe Oluhye a byi iNuwa yẹkẹẹ, “INuwa ee, ahụ ayịdang bala ahụ nyang bala anyị alẹng nyang bala ịhụ nyaa wuu, anụ gba kpehe hi ẹpwụ nya ụgbọ nya enyi ọlẹ alẹ mẹ.

¹⁷Ká gba ang myị ang ọlẹ wuu kọ la ọhịhị kpehe bwu ẹpwụ nya ụgbọ nya enyi ịnyịnyị mẹ, tụ iyo myị iyo ịlẹ wuu ká wu ju kele bala ịchịnụ wuu bala ang ịwụlọọ-wụlọ wuu mẹ. Chajị kị ka juwa ma anyị juwa pyẹ yịrị odehe ọlẹ yịrị wuu mẹ.”

¹⁸Ịnyị lẹ, iNuwa ayịdang bala ahụ nyamwụ bala anyị alẹng nyamwụ bala ịhụ nyaa wuu a gba kpehe hi ẹpwụ nya ụgbọ nya enyi jaabwọ ká Ohe Oluhye byaa ya nyị họ mẹ lẹlẹ.

¹⁹Ụka ọọwa, iyo wuu bala ịchịnụ wuu bala ang ịwụlọọ-wụlọ wuu ịlẹ kị juwa ẹ-ẹpwụ nya ụgbọ nya enyi ta iNuwa anyị a gba kpehe wuu la ogwogwoogu nya ụma nyaa wuu ịnyịnyị lẹlẹ.

²⁰Ụka kị gba kpehe kpá, iNuwa kele kaka nwụla ogidi okiliya ha Amkpaa nọ ahyaahị. Ọọwa lẹ, ọ wu iyo bala ịchịnụ ịcharị-charị datị-datị lẹ, ọ ya kịla iya ọ-rụ ila wuu ha Amkpaa ụ-ụwa lẹlẹ.

²¹Ụka ká Amkpaa wo oru nya iya ọkịlakịla ọọwa, ọ chọọ oru kwọkwọ lụmẹ lẹ, ọ ya ẹ-ẹ-pwụ-ẹpwụ yẹkẹẹ, “Ọ ri nya ịlẹhị irya nya angịnyị ehe wuu lẹ, ọ́-ri ibyibyi ụka wuu lẹ, ma ḿ tị ka gọlọ ju ọpyị lee ọ-ta ang myị ang ayịreji o-oluhye nya ang onyobyi ọhọhọ nya ọngịnyị ehe kpá ẹnẹnẹhẹ gụ ọlẹ kaka.”

²²Ịnyị lẹ, Ohe Oluhye a yẹkẹẹ, “Jaabwọ myị abwọ ká odehe-é tata ka ba, ụka nya ang ọtọtọ bala ang ọwụwụ ka ji pyịyọọ. Ụka nya ohu ọhọhọ bala ụka nya ịnyịrọ ochipwuu ka ji pyịyọọ. Ụka nya inehe bala ụka nya ụhyọọ ka ji pyịyọọ. Ahị ọpyẹpyẹ bala odu ọhịhị tị ka ji pyịyọọ ịnyịnyị.”