Read idege ỌMWỤ ỌDADA 9 Bible Online

ỌMWỤ ỌDADA 9 - idege bible

ỌMWỤ ỌDADA 9

¹Ụka ọọwa, Ohe Oluhye wahị kụrụ iNuwa bala anyị nyamwụ wuu yẹkẹẹ, “Anụ ka pyẹ kpanggbaaa, chajị ká anyị nyanụ ka ju iru myị ụwa ẹ-ẹga myị ẹga nya odehe ọlẹ wuu.

²Anụ wo mẹ! Anụ ka la iyo wuu uhi-uhi tụ ịchịnụ iluhye-ọgba wuu bala ang myị ang ịlẹ wuu kị juwa wụlọọ-wụlọ ị-ịpyị tụ iyo myị iyo ịlẹpwụ enyi wuu ka ju uhi nyanụ. M̀ hwaa wuu junu ụ-ụbwọ lẹ.

³M̀ hu iyo ịwẹ wuu bala apwụ bala amẹ wuu hanụ kị ka ri ang oriri nyanụ bwu alẹ ọlẹ kele kịlahị ịnyịnyị pyịyọọ lẹ.

⁴Ang ọlẹ kam wẹẹ danụ ehile nyamwụ kẹnẹ-kẹnẹ ri ānụ ka ri iyo ọhẹ-lọhẹ lịwọ-lịwọ ka, chajị ẹ-ẹpwụ nya ịwọ ayịdang ọhịhị nya iyo à ji lẹ.

⁵Ang ọkịla ri, ọng myị ọng ọlẹ kọ nwụ ọngịnyị ehe ọọnamwụ aalẹ, m̀ ka nwụ ọngọọwa kwiwa pyii. Lee ó-ri iyo oleji kọ nwụ ọngịnyị ehe aalẹ, m̀ ka nwụ iyo ọọwa kwiwa pyii lẹ. Ọng myị ọng ọlẹ kọ chị iwo nya ọngịnyị ehe lẹ, ẹ-ẹpwụtụbwọ nya ọngọọwa m̄ ka tịtọ nya ịwọ ọọwa ka pyii kwiwa lẹlẹ.

⁶Ọng myị ọng ọlẹ kọ nwụ ọngịnyị ehe ọọnamwụ lẹ aalẹ, ọngịnyị ehe ọkịla ka nwụ ọngọọwa ayịdang kwiwa ịnyịnyị pyii lẹ. Chajị m̀ họ ọngịnyị ehe labwụma nya ịlọm.”

⁷Ohe Oluhye myịmyị wahị kụrwaa yẹkẹẹ, “Anụ-ụ̀ pyẹ ju iru lala apwụ bala amẹ ká anyị nyanụ ā pyẹ yịrị odehe ọlẹ yịrị mẹ.”

⁸Ụka ọọwa, Ohe Oluhye byi iNuwa bala anyị nyamwụ ịnyịnyị yẹkẹẹ,

⁹“INuwa, ahụ bala anyị nyang, anụ wo mẹ. M̀ jam myị ọnụ ọtụka hang ahụ ayịdang bala anyị nyang wuu ju ka anyị ịtụma nyaa wuu alẹ lẹ.

¹⁰Ọnụ ọmyịmyị ọlẹ ka juwa ha iyo wuu tụ iyo ịlẹpwa bala ịchịnụ wuu bala ang ọdịhụ ọnyị myị ọnyị ọlẹ wuu kọ gba kpehe bwu ẹpwụ nya ụgbọ nya enyi ọwẹ tanụ ịnyịnyị.

¹¹Ọnụ ọmyịmyị ọọwa ri am Ohe Oluhye-é ka kpa ukpenyi ododo ọtụka ta angịnyị ehe ayịreji bala ịngịngịhyẹ ọkịla olodehe ọlẹ gụ ọwẹ kpong-kpong kaka.

¹²Lẹ, m̀ jam ka hu ang-ẹjẹẹ nọ hang bala anyị ịtụma nyang wuu bala ang ọdịhụ ọnyị myị ọnyị ọkịla wuu gbee pwụ ụka myị ụka lẹ.

¹³Ang-ẹjẹẹ ọọwa ri ọwọ ọlẹ kam ka chị ụ-ụwa u-uhye nya egbamwụ. Ọwọ ọchịchị ọwẹ a ka ri ibeenu nyam bala anụ alodehe wuu lẹlẹ.

¹⁴Ụka myị ụka ká egbamwụ á tụguru kam chị ọwọ ụ-ụwa u-uhye nya egbamwụ lẹ aalẹ,

¹⁵m̄ ka kpịtịya nya iro ọlẹ kam lẹẹ nwa hanụ alẹ lẹlẹ. Ḿ ka kpa ukpenyi ododo ọtụka ta angịnyị ehe ayịreji bala ang ọdịhụ ịkịla ilodehe ọlẹ wuu kpá ẹnẹnẹhẹ gụ ọwẹ kaka.

¹⁶Ụka myị ụka kam yẹ ọwọ ọlẹ kam ka chị e-egbamwụ lẹ aalẹ, m̀ ka kpịtịya nya ọnụ ọmyịmyị o-gbe oyi myị oyi ọlẹ kam lẹẹ myị hanụ alẹ lẹ.

¹⁷Ịịwẹ m̄ hu ọwọ ọchịchị nọ nya ang o-ju ẹjẹẹ ọ-kpa kpịtịya nya iro ọlẹ kam lẹẹ nwa hanụ anụ angịnyị ehe wuu bala odehe ọlẹ wuu lẹpwụ-lẹpwụ alẹ lẹlẹ.”

¹⁸Anyị alẹng nya iNuwa ịlẹ kị gba kpehe bwu ẹpwụ nya ụgbọ nya enyi ri ịChẹm bala ịHam bala ịJafẹtị. ỊHam ọwẹ à ri adịda nya iKenan lẹ.

¹⁹Anyị alẹng angị ịta ịwẹ iNuwa a ma lẹ. Ịwa angị ịta ịwẹ a ri adịda igogo nya angịlẹ wuu kị pyẹ yịrị odehe ọlẹ yịrị lẹẹ wuu lẹ.

²⁰INuwa ọwẹ ayịdang ri ọngọ wu ẹrụ. Ọwa-à ri ọngịnyị nya ọgbanyẹ-ọgbanyẹ ọlẹ kọ wu ẹrụ nya alakọnụ ọlẹ kị kaa kpa chị ere lẹ.

²¹Ụka ọhẹ juwa ká iNuwa nwa ere nya alakọnụ ọwẹ lụmẹ-lụmẹ gbee kọ gbu ere, nọnọ lọhị-lọhị u-ube nya ọdụ nyamwụ.

²²Ụka ká ịHam adịda nya iKenan yẹ iNuwa nọnọ nụwa lọhị-lọhị, ọ kele kaka ya je ịChẹm bala ịJafẹtị anyịnamwụ ụ-ụwa odehe jaabwọ ká adaa nụwa lọhị-lọhị.

²³Ọọwa lẹ, ịChẹm bala ịJafẹtị a hu awụrụ ogbileji ọhẹ da pịlẹ amwachwọ nyaa ịwa angị imimiiye lẹ, ị juwa jẹ lẹkpẹ-ẹkpẹ kele ka ẹga ká adaa juwa nune lẹlẹ. Ụka kị pwụ ẹga nya iNuwa lẹ, ị tụụbwọ hi awụrụ ọwẹ da kụrwọọ ọ-ọhị nyamwụ lẹlẹ. Ị jẹ la ẹkpẹ-ẹkpẹ ịnyị, chajị kị ka jẹ-ẹ yẹ o-ji lọhị-lọhị nya adaa ka.

²⁴Ụka ká iNuwa chị ahị-une bwu ẹpwụ nya ere ogbugbu nyamwụ, ị ya joo jaabwọ ká ọnyị ohyẹẹkpẹ nyamwụ kpahị jwoo lụmẹ.

²⁵Ọọwa, iNuwa a gọlọ ju iKenan ọnyị nya ịHam yẹkẹẹ, “Ahụ iKenan ọwẹ, inyiribyi ā kpụng, ọnyọhị nya anyịnang ịkịla a ka ri pyịyọọ lẹ.

²⁶Ahụ ịChẹm lẹ, Amkpaa Ohe Oluhye nyam a wahị kụrụng. IKenan ọwẹ ka ji ekpeleji nyang ahụ ịChẹm pyii lẹ.”

²⁷INuwa byi ịJafẹtị yẹkẹẹ, “ỊJafẹtị, ahụ lẹ, Ohe Oluhye a họ ká ri ọngọ kpụ ụdụ ọtụka-ọtụka. Ká Ohe Oluhye a họ kaahụ bala ịChẹm ọọnang a kụ la awụlẹ pyịyọọ. IKenan ọwẹ ka ri ọnyọhị nyang ahụ ịJafẹtị pyịyọọ.”

²⁸Ẹ-ẹkpẹ nya ukpenyi ọtụka ọwẹ, iNuwa myịmyị ri ehe ẹka ohu ịta da ẹka iwo ịrụ (350) ene kọọ gbu.

²⁹Ehe oriri nya iNuwa wuu tụchawụlẹ ri ẹka ohu ihikichu da ẹka iwo ịrụ (950) ene kọọ gbu.