Read idege 2 ỊSAMWẸLỤ 1 Bible Online

2 ỊSAMWẸLỤ 1 - idege bible

2 ỊSAMWẸLỤ 1

¹Ụka ká ịSọlụ gbu kpá, ká ịDevidi nyà bwu ẹwụ ọlẹ kọ da kụrụ ala Amalẹkị. Ọọwa, ọ hụ i-iSikilagị ẹnụtụrụ imiiye lẹlẹ.

²Ahị ọpyẹpyẹ ọọnamwụ, ọlẹng ọhẹ bwu ịkampụ nya angịdẹwụ nya ịSọlụ wẹ ẹga nya iDevidi. Ọlẹng ọọwa gu ịwụrụ nyamwụ ene, gu ịpyị chị egbeju nyọka mẹ ọjụjụ ọlẹpwụ nyamwụ jẹ. Ọọwa, ọ hirikpẹẹ juwa da ọbayile ha iDevidi ẹ-ẹpwụ nya ihi ojuju lẹlẹ.

³Ọọwa, iDevidi à tọọ wo yẹkẹẹ, “Ale ā tị́ wẹẹ bwu ene-è?” Ọ wẹ byi iDevidi yẹkẹẹ, “Ịkampụ nya angịdẹwụ nya ala Isirẹlụ m̄ be bwu-ù wẹ lẹ.”

⁴IDevidi byoo yẹkẹẹ, “Ya jem wẹẹ. Egeji tị́ lanyị?” Ọlẹng ọọwa wẹ byi iDevidi yẹkẹẹ, “Angịdẹwụ nyahị rụnyẹ rụ bwu ọgbẹwụ. Ị̄ nwụ iru nya angịnyị nyahị. Ị̄ nwụ ịSọlụ bala iJonatan ọnyị nyamwụ ịnyịnyị.”

⁵Ọọwa, iDevidi à tọọ wo yẹkẹẹ, “À tị́ họ anyị ká jẹ ịSọlụ bala iJonatan nyị gbu-ù?”

⁶Ọlẹng ọwẹ à wọọ yẹkẹẹ, “M̀ wẹ̄ ọ-ọgbọdọ nya iGilibowa. Ọọwa, m̄ chẹhị ka yẹ ịSọlụ kọ juwa kpụnịrọ ụwangga nyamwụ, ká alẹwụ ị-kụ anyịrẹ bala ị-kụ ang ịrụnyẹ ịlẹ ká anyịrẹ kaa gbile kị juwa yaa dada lẹlẹ.

⁷Ụka kọ jahị kpata kọ yẹm lẹ, ọ be ẹkọ wụrụm lẹ, m̄ myị lẹlẹ.

⁸Ọọwa, ọ tọm wo oowo am nyaà tị́ ri ene-è. M̀ byoo ya ma am ri ọla Amalẹkị.

⁹Ọọwa, ọ byim yẹkẹẹ, ‘Kẹwẹ wẹ ẹgẹlẹ ká nwụm mẹ. Ị̄ họm ang aboji-aboji jam. Ọ hi pyịnyẹng kam ka gbu lẹ.’

¹⁰Ọọwa, m̄ kele ka ẹga nyamwụ lẹ̀, m̄ nwọọ lẹlẹ. M̀ họ ịnyị chajị m̀ jẹ ang olẹ kị họọ lụmẹ kpoye nyọka hịhị. Ọọwa, m̄ nwụla okpo-adịrahụ bwu egbeju nyamwụ bala ọ-pwọ ang ọdụụbwọ nyamwụ lẹẹ kpa wang lẹ, ayịbam.”

¹¹Ọọwa, iDevidi à gu ịwụrụ nya ịlọmwụ ene ẹ-ẹpwụ nya olujwo ọtọtọ lẹlẹ. Angịnyị nyamwụ wuu họ ịnyịnyị.

¹²Ịwa wuu jida juwa bida bala ọ-hụ limyi gbee da ka alobyi chajị nya ịSọlụ bala iJonatan bala ala Isirẹlụ angịnyị nya Amkpaa ịlẹ wuu kị gbu ẹ-ẹwụ ẹnẹwẹ.

¹³Ọọwa, iDevidi à tọ ọlẹng ọlẹ kọ kpa oja ọwẹ kaka mileji wo yẹkẹẹ, “Ale ā tị́ bwu ene-è?” Ọ wẹ byoo yẹkẹẹ, “M̀ ri ọngga o-bwu Amalẹkị. M̀ tị kụ am ọ-ọpyị nyanụ.”

¹⁴IDevidi myịmyị tọọ wo yẹkẹẹ, “Ányị à tị́ du kpong-kpong ká byẹjẹ nwụ adịrahụ ọlẹ ká Amkpaa chụ ịnyị-ị̀?”

¹⁵Ọọwa, iDevidi à wụrụ ọngịnyị nyamwụ ọhẹ lẹ, ọ byoo yẹkẹẹ, “Họọ elego kọ yẹ.” Ọọwa, ọ ya oge nyamwụ chọọ lẹ, ọla Amalẹkị ọwẹ à gbu lẹlẹ.

¹⁶Ene kọọ gbu, iDevidi byoo yẹkẹẹ, “Uruuru à wụrụ enyi do ịlọmwụ lẹ! Ahụ à tị́ kpa ọnụ nya ịlọng ya wẹ ọwa nyị nwụ adịrahụ ọlẹ ká Amkpaa chụ.”

¹⁷IDevidi mwu eje nya ida ọbaba chajị nya ịSọlụ bala iJonatan ọnyị nya ịSọlụ.

¹⁸Ẹnyị nya eje ọọwa-à ri Eje nya Uda lẹ. IDevidi da ehile ya nyị mọọ jẹ ala iJuda. Ụ-ụpwụ nya ịJachaa ị da eje ọlẹ lẹ.

¹⁹Igirima nyahị tụrụ lẹ ọọ! Ẹbyị họ angịrị ịlịlahị nyahị i-ikiti nya Isirẹlụ.

²⁰Ānụ tịrọnụ nya ẹlẹwẹ ị-ịGaatị, lee o-opeje nya Achịkẹlọn koo. Ānụ họ ká anyang nya ala iFilisitiya-ā hụlọọhị ẹhụ koo, lee anyị nya angị kpụ́ ijiga ọ-ka chị ọkẹkẹnị ka.

²¹“Ikiti ịla iGilibowa ee! Enyi ā donu kaka, amwụ ā kpụnụ kaka. ọpyị nyanụ ka ta ụma, chajị ị chị oyoyi ju ọkụmada nya igirima ụ-ụwa. Ọkụmada nya ịSọlụ-ụ́ ju o-gu ida tudu kaka.

²²Ịcha nya iJonatan-ńǹ chụrụ tịrẹkpẹ ka, ọọ kpa ogirima nọnọ. Oge nya ịSọlụ lụrụ-ụrụ, ọọ kpa oluji nọnọ.

²³“ỊSọlụ bala iJonatan— alụ́hị ị-há angịnyị há. Ẹ-ẹpwụ nya ọhịhị nyaa, tụ ụka nya igu nyaa, Ị́ chị ebwo hi awụlẹ ka. Ị lịmịla gụ ịchịnụ idu, Ị logogo gụ egabẹ.

²⁴“Anyang nya ala Isirẹlụ ee! Anụ bida chajị nya ịSọlụ mẹ— ọngọ gá ang-ịnyangga lịpwụ ịnyịmịla kụrụụnụ, kọ họnụ kanụ rụ ịyang la ịjang nya okpoko ịgọm.

²⁵“Cháahohoo! Angịdẹwụ ịtụka ị kpa nọnọ ịịwẹ lẹ-ẹ́! Ị nwaa ẹ-ẹwụ. IJonatan gbu dalẹ pátaa i-ikiti.

²⁶“IJonatan ọọnam ee, m̀ bida chajị nyang, ahụ ọngọ ham há. M̀ tị̀tị̀ chakpa hán̄g chọ́ọ̀! Ọ gụ ọháha nya ọnyang ẹ-ẹga nya ọrụmwụ.

²⁷“Cháahohoo! Angịdẹwụ ịtụka ị kpa nọnọ ịịwẹ lẹ-ẹ́! Ang-abwọ nya ẹwụ nyaa tụwa ẹ-ẹwụ lẹ!”