Read idege 2 ỊSAMWẸLỤ 10 Bible Online

2 ỊSAMWẸLỤ 10 - idege bible

2 ỊSAMWẸLỤ 10

¹Ụka kọ nọ chẹẹ, ịNahachị Adịrahụ nya ala Amọn gbu. Ọọwa, ịHanun ọnyị nyamwụ à ri adịrahụ ku iwa nyamwụ lẹlẹ.

²Ọọwa, iDevidi à yẹkẹẹ, “ỊNahachị họ hiigu ẹ-ẹga nyam. Lẹẹlẹ, m̀ tịtị ka họ hiigu ẹ-ẹga nya ịHanun ọnyị nyamwụ ịnyịnyị.” Ịnyị, iDevidi à du alegbeju ịtụkụ yoo ẹrụ kele ka Amọn kaka da ịHanun ogogo-ẹdụrụ nya igu nya adamwụ lẹlẹ. Ụka ká alegbeju ịtụka yi iDevidi ịwẹ pwụ Amọn,

³alegbeju nya ala Amọn tị byi ịHanun ayịbaa yẹkẹẹ, “Aajị nya ihi nya adang à du ká iDevidi du angịnyị nyamwụ warị ka kpụng ẹjẹ koo. Á jẹ ka aalẹ, ọ daa warị chajị kị ka wụla ọpyị nyahị yẹ, kị ka wẹ ka nuhi ịnyị!”

⁴Ọọwa, ịHanun à wu angịnyị nya iDevidi ịịwa lẹlẹ. Ọ chị oyoyi jwaa bwula ọ-pwaa ịchwọ ịlụpa ọhẹ hi ọkịla bala ọ-chị awụrụ nyaa eku pwaarịị hi iwa da ọ-ọmwụ. Ọọwa, ọ kwaa lakụ-lakụ rụ lẹlẹ.

⁵Ụka ká angịnyị ya ẹlẹwẹ je iDevidi, ọ du alẹrụ kaka tọ alegbeju nyamwụ ịịwa, chajị ọ laa oyoyi lụmẹ. IDevid Adịrahụ du kaka byaa yẹkẹẹ, “Anụ hụ i-iJeriko gbee ká ịchwọ nyanụ ka myị̀ ene kanụ ka nyà pwụ ẹpwa mẹ.”

⁶Ala Amọn ayịdang jẹ ịwa nyị ju iDevidi uji lẹ̀. Ọọwa, ị kele kaka diro angịdẹwụ angị ụnọ iwo imiiye (20,000) nya ala iSiriya bwu epweji nya ịBẹtị-ịrehọbụ bala epweji nya iSoba lẹlẹ. Ị diro adịrahụ nya ịMaaka la angịdẹwụ nyamwụ angị ụnọ ookpokpo bala angịdẹwụ angị ụnọ iwo kụrụ imiiye (12,000) bwu epweji nya iTobu ịnyịnyị.

⁷Ụka ká iDevidi wo ọnwụlanọ nyaa, ọ du iJowabụ la angịdẹwụ nyamwụ wuu kele.

⁸Ala Amọn ju agidi nya ẹwụ kpehe wẹ ogirigba nya epweji. Ala iSiriya i-bwu iSoba bala iRehọbụ bala angị bwu iTobu tụ ịMaaka ju ogu nya ịlaa kaka kụ ẹ-ẹpwụmẹ.

⁹IJowabụ yẹ jaabwọ ká aluji ji ịlahị bala o-ji ẹkpẹ nyamwụ ji. Ọọwa, ọ chụ angịdẹwụ ịlahịchịng nya ala Isirẹlụ ịhyẹ lẹ, ọ yaa kụ ẹwụ ta ala iSiriya lẹlẹ.

¹⁰Ọ ya angịdẹwụ ihihi ji ekpeleji nya Abichayị ọnyịnamwụ lẹ, ọ daa ịwa kaka dẹwụ ta ala Amọn lẹlẹ.

¹¹Ọọwa, iJowabụ à byi Abichayị yẹkẹẹ, “Ó-ri ká ala iSiriya-á juwa yẹm jiíí lụmẹ lẹ, aa wẹ kaka dam ụbwọ mẹ. Ọ́ tị ri ká ala Amọm-ń juwa yẹng jiíí lụmẹ, m̀ ka wẹ kaka dang ụbwọ ịnyịnyị.

¹²Aa godayị gịrị-gịrị lugbodu ojuju mẹ. Ahị ka dẹwụ ọlẹ yẹ angịnyị nyahị bala epweji nya Ohe Oluhye ịlẹ dada. Amkpaa ā họ ang ọlẹ kọ ri irya nyamwụ mẹ.”

¹³Ọọwa, iJowabụ bala angịdẹwụ ịlẹga nyamwụ à jẹ kele kị ka gba mịla ala iSiriya lẹ, ala iSiriya à rụnyẹ rụ lẹlẹ.

¹⁴Ụka ká ala Amọn yẹ ka ala iSiriya juwa rụnyẹ rụ lẹ, ịwa à tịtị rụnyẹ rụ hi Abichayị tịrẹkpẹ ka epweji nya ịlaa lẹlẹ. Ọọwa, iJowabụ à hịnyọ la ọ-da ala Amọn ẹwụ lẹ, ọ nyà ka iJerusalẹm lẹlẹ.

¹⁵Ụka ká ala iSiriya yẹ ka ala Isirẹlụ kụrwaa, ị ya angịdẹwụ nyaa julawụlẹ ri ogu ookpokpo.

¹⁶ỊHadadẹsẹẹ Adịrahụ du ẹrụ kele kaka kpa ala iSiriya ịlọmwẹnụ-ụtụrụ nyà bwu Ihu iYufuretisi. Ọọwa, iChobakị ọgẹwụ nya angịdẹwụ nya ịHadadẹsẹẹ à kpaa hi kele ka epweji nya iHelam lẹlẹ.

¹⁷Ụka ká iDevidi wo ẹlẹwẹ, ọ tụ angịdẹwụ nya Isirẹlụ wuu guru. Ị chẹwụ kpoye nya Ihu ịJọdan kele ka iHelam. Ala iSiriya nwụlanọ nya ẹwụ jahị da iDevidi lẹ, ị mwẹla tọọ ụ-ụwa lẹlẹ.

¹⁸Ala iSiriya ịwẹ tị rụnyẹ rụ hi ala Isirẹlụ. IDevidi nwụ angị kụ ang ịrụnyẹ ịlẹ ká anyịrẹ kaa gbile nya ala iSiriya ịwẹ angị ohu irwiye (700) bala angị kpa anyịrẹ dẹwụ nyaa angị ụnọ iwo ine (40,000). Ị họ iChobakị ọgẹwụ nya angịdẹwụ nya ala iSiriya ang ụjụjwọ. Ọọwa, ọ gbu lẹlẹ

¹⁹Ụka ká ịdịrịhụ ịlẹ kịị myị ẹrụ ha ịHadadẹsẹẹ ene-ene yẹ ká ala Isirẹlụ kụrwaa lẹ, ị họ okpunyi balaa lẹ, ị yẹ ka ri anchẹ nya ala Isirẹlụ lẹlẹ. Ụka ọọwa, ala iSiriya ju uhi lẹ, ị́ myị ọnụ nyọka da ala Amọn ụbwọ myịmyị kaka.