Read idege 2 ỊSAMWẸLỤ 11 Bible Online

2 ỊSAMWẸLỤ 11 - idege bible

2 ỊSAMWẸLỤ 11

¹Lụka nya ụrwẹnụ ọlẹ ká ịdịrịhụ kaa ka ẹwụ, iDevidi du iJowabụ bala alegbeju nya angịdẹwụ nyamwụ bala angịdẹwụ nya ala Isirẹlụ wuu ka ẹwụ. I ta ala Amọn ayịreji. Ị hị ọgba nya ẹwụ yẹ alepweji nya ịRaba dada. IDevidi ayịdang tị hụ ẹ-ẹpwa i-iJerusalẹm.

²Lẹnụ-obyi ọhẹ, iDevid chahị bwu une juwa tụ́ gàaa ẹ-ẹpwayịrẹtẹ nya ẹpwang nyamwụ. Ọọwa, ọ chẹhị kaka yẹ ọnyang ọlụhị ọhẹ kọ juwa hyo enyi lẹlẹ.

³Ụka ká iDevidi du ọnchẹ nyamwụ ọhẹ kaka tịtọ wo ọngọlẹ ká ọnyang ọwẹ ri, ọnchẹ ọọwa nyà kaka byoo yẹkẹẹ, “ỊBatịchẹba ọnyị nya Eliyam à lalẹẹ lẹ. Ahụ nya Uriya ọla iHiiti ọ ri lẹ.”

⁴Ọọwa, iDevidi à du alẹrụ kaka wụrụ ịBatịchẹba lẹlẹ. Ụka kọ kele, iDevidi nọ tọọ. Ọọwa, ọ rụ tịrẹkpẹ ka ẹpwa lẹlẹ. ỊBatịchẹba tị lẹẹ kpehe bwu odehe ojiji nyamwụ ụka ọwẹ lẹ.

⁵Ụka kọ nọ ká ịBatịchẹba jẹ ọwa nyị kpẹnyị lẹ, ọ du kaka byi iDevidi yẹkẹẹ, “M̀ kpẹnyị lẹ̀ẹ̄.”

⁶Ọọwa, iDevidi à du tọ iJowabụ yẹkẹẹ, “Ya Uriya ọla iHiiti ọwe du wam wẹ́ẹ̀.” IJowabụ à yọọ du kịla iDevidi lẹlẹ.

⁷Ụka ká Uriya pwụ ụwa, iDevidi tọọ wo yẹkẹẹ, “IJowabụ bala angịdẹwụ ịkịla juwa lokpunyi-í? Ẹwụ tị́ lanyị wẹ ene-è?”

⁸Ọọwa, iDevidi à byi Uriya yẹkẹẹ, “Kele ka ẹpwa nyang ká mwụ ịnyọ chẹẹ wẹ́ẹ̀.” Ọọwa, ọ rụ lẹ, iDevidi à ya ang-ahị du kịlọọ lẹlẹ.

⁹Uriya-á tị ka ẹpwa nya ịlọmwụ ka. Ọ nune odehe nya ọnụ ogirigba nya adịrahụ ẹ-ẹga nya angịgbeji.

¹⁰Ụka ká iDevidi wo ya Uriya nyị́ ka ẹpwa ka, ọ wẹ kaka byoo yẹkẹẹ, “Ānyị ọtata ā tị́ nyà bwu-u wẹ ịnịịnọ. Ịyẹ tị́ du ká ka ẹpwa ka-à?”

¹¹Uriya wẹ byoo yẹkẹẹ, “Yẹ wẹẹ, adịrahụ. Akpa nya Iro bala alẹng nya ala Isirẹlụ bala ala iJuda lalẹẹ ọ-ọgbẹwụ. IJowabụ ọgẹwụ nyam bala alegbeju nya angịdẹwụ ịkịla chị lalẹẹ ẹ-ẹpwụmẹ. Ọọwa m̄ ka jẹ-ẹ̀ nyà wẹ ẹpwa kaka ri ang, nwa ere bala onune bala ahụ nyam lẹ-ẹ́? Ịgọgọ ẹnẹnẹhẹ. M̀ jam ya nya ịlẹhị-ịlẹhị yẹkẹẹ, ḿ ka họ ẹla ọlịịwẹ ẹnẹnẹhẹ ka!”

¹²Ọọwa, iDevidi à byi Uriya yẹkẹẹ, “Hụ ám̀ i-iJerusalẹm alẹ mẹ. Ijuju lẹ, m̄ ka ya ẹga hang ká ka rụ tịrẹkpẹ lẹlẹ.” Ọọwa, Uriya à hụ ụwa ẹnẹwẹ lẹlẹ. Ahị ọpyẹpyẹ ọọnamwụ lẹ,

¹³iDevidi à wụrwọọ ẹpwa kaka ri ang nya obyi tọọ lẹlẹ. Ọ tụ ere rịrọọ gbee kọ gbu ere. Ẹnewẹ ịnyịnyị ọ́ tị ka ẹpwa ka. Ọ nune ẹ-ẹga nya angịgbeji ịnyịnyị.

¹⁴Alụtụrụ nya ahị ọpyẹpyẹ ọọnamwụ lẹ, iDevidi à da ileta du Uriya ẹrụ kịla iJowabụ lẹlẹ.

¹⁵IDevidi da ẹ-ẹpwụ nya ileta ọọwa yẹkẹẹ, “Ya Uriya kụ ọgba ọlịlahị nya ẹwụ ẹga ká ẹwụ chị ila gụgụ wuu, kanụ chị hụlẹ hyoo chajị kị ka nwọọ mẹ.”

¹⁶Ụka ká iJowabụ anyị juwa be epweji ọhẹ ẹpwa lẹ, ọ ya Uriya kụ ẹga ka aluji juwa dẹwụ chị ila-ila lụmẹ lẹlẹ.

¹⁷Aluji kpehe bwọọọ bwu epweji ọwẹ juwa mwẹla ta angịdẹwụ nya iJowabụ. Ị nwụ alegbeju nya angịdẹwụ nyamwụ ịhyẹ. Ị nwụ Uriya ịnyịnyị.

¹⁸Ọọwa, iJowabụ à du ẹrụ kaka tịrọnụ je iDevidi jaabwọ ka ẹwụ la lẹlẹ.

¹⁹Ọ byi ọlẹrụ nyamwụ ọọwa yẹkẹẹ, “Ụka ká tịrọnụ je adịrahụ kpá,

²⁰ó-ri kọ wụ ẹjẹ, kọ tọng wo yẹkẹẹ, ‘Ịyẹ tị du kanụ tụ ju epweji chwẹẹ lụmẹ nyọka mwẹla ta alụwa ene-è? Ánụ jẹ aluji ka danụ ịcha bwu uhye nya ugulọ ka-á?

²¹Ánụ kpịtịya jaabwọ kị bwu nwụ Abimẹlẹkị ọnyị nya iGidiyọn lẹẹ ugbeene ka-á? Ọnyang ọhẹ à tị́ hu igo o-go ang da bwu uhye nya ugulọ kaka nwọọ lẹẹ ị-ịTẹbẹsị. Ee lẹ, ịyẹ tị́ du kanụ jẹ tụ ju ugulọ nyaa chwẹẹ lụmẹ ịnyị?’ lẹ, à byoo ịịlẹ mẹ: Uriya ọngọdẹwụ nyang gbu ịnyịnyị.”

²²Ọọwa, ọlẹrụ ọwẹ à kele ka ẹga nya iDevidi kaka tịrọnụ ya joo ẹrụ ọlẹ ka iJowabụ doo lẹlẹ.

²³Ọlẹrụ tịrọnụ ya joo yẹkẹẹ, “Aluji nyahị yẹẹhị jiií-jiií lụmẹ. I kpehe bwu epweji nyaa kaka mwẹla tahị ẹ-ẹpwụmẹ. Ahị tị kwaa tịrẹkpẹ lalaala ka pwụ ọnụ ogirigba nya epweji nyaa.

²⁴Ị tị dahị ịcha bwu uhye nya ugulọ gbee kị nwụ alegbeju nya angịdẹwụ nyang ịhyẹ. Ị nwụ Uriya ọla iHiiti ịnyịnyị.”

²⁵Ọọwa, iDevid à byi ọlẹrụ yẹkẹẹ, “Aa ju iJowabụ ọhụ, ká byoo mẹ, ẹlẹwẹ ā kpọọ ọkịlẹtụ enyi koo. Ọngọhẹ-ẹ̀ jẹ ọngọlẹ ká ẹwụ ka ri datị ka. Ọ ngịra kpiií gụ olene kọ ye epweji ọwẹ la mẹ.”

²⁶Ụka ká ịBatịchẹba ahụ nya Uriya wo ya nyị nwụ ọrụmwụ ẹ-ẹwụ, ọ bida chajị nyamwụ.

²⁷Ụka ká ụka nya owuru ọkpakpa chajị nya ọrụmwụ myị kpá, iDevidi du ẹrụ kaka kpọọ wẹ ẹpwa nya ịlọmwụ. Ọọwa, ọ ri ahụ nya iDevidi lẹ, ọ ma ọnyị ọlẹng họọ lẹlẹ. Ẹlẹwẹ ká iDevidi họ-ọ̀ wẹ tị wụ Amkpaa ẹjẹ.