Read idege 2 ỊSAMWẸLỤ 12 Bible Online

2 ỊSAMWẸLỤ 12 - idege bible

2 ỊSAMWẸLỤ 12

¹Ụka ọọwa, Amkpaa du ịNatan ọlọmwụ ka ẹga nya iDevidi. Ụka kọ pwụ ụwa, ọ ja iDevidi oja yẹkẹẹ, “Alẹng imiiye ịhyẹ kụ e-epweji ọhẹ. Ọngọhẹ nyaa ri ọlụdụ. Ọngọwụlẹ ri ọlẹbyahị.

²Ọlụdụ ọọwa la iru nya ịkpịlọ bala ịna.

³Ọlẹbyahị tị la ịngịngịhyẹ dala ọnyị-ọkpịlọ ochiche ọhẹ kọ ra kaka. Ọ kpa ang oriri ha ọkpịlọ ọọwa gbee kọ nwa tụ odu tụ ẹnụ lala anyị nya ịlọmwụ. Ọkpịlọ ọọwa dọmwụ kaa ri ang bwu ẹja bala ọ-nwa enyi bwu ukoku nya ọlẹng ọwẹ. Ọ kaa wu ọkpịlọ ọwẹ jwẹjẹ. Ọkpịlọ ọọwa lọọ lala ọnyị ọnyang nya ịlọmwụ.

⁴Ẹnẹhẹ lẹ, ọngga-à ju ọlụdụ ọọwa lẹlẹ. Ọ tịtọ kọ ka họ ang oriri họọ, ọ́ tị tịtọ kọ ka wu ọkpịlọ lee ẹna nya ịlọmwụ nwụ ka. Ọkọkọ nya ọọwa lẹ, ọ wu ọnyị-ọkpịlọ nya ọlẹbyahị nwụ ha ọngga nyamwụ.”

⁵Ọọwa, iDevidi à wụ ẹjẹ nya ịlẹhị-ịlẹhị jahị da ọlụdụ ọọwa lẹ, ọ byi ịNatan yẹkẹẹ, “M̀ kpa ẹnyị nya Amkpaa ya nya ịlẹhị ịlẹhị yẹkẹẹ, ọngọ họ ẹla ọlịịwẹ chịla kị ka nwọọ!

⁶Ẹlẹwẹ kọ họ-ọ̀ wẹ la ọ jujwo nya ọlẹbyahị ọwẹ kpong-kpong ka lẹ, ọ ka nwụ uri nya ọnyị-ọkpịlọ ọwẹ mwụ aba ba ugbabwọ ine.”

⁷Ọọwa, ịNatan à byi iDevidi yẹkẹẹ, “Ahụ kpakpaakpa à ri ọngọọwa lẹ. Wo mẹ, Amkpaa Ohe Oluhye nya ala Isirẹlụ jam bying yẹkẹẹ, ‘M̀ hung adịrahụ nya ala Isirẹlụ bala ọ-gbang kpehe bwu ẹpwụtụbwọ nya ịSọlụ.

⁸M̀ hu ẹpwa nyamwụ tụ ịhụ nyamwụ hang. M̀ yang ri adịrahụ nya ọpyị nya Isirẹlụ bala iJuda. Ịwẹ-ẹ́ nwanwa ka, m̀ ka ya ang ịkịla daa u-uhye myị.

⁹Ee lẹ, ịyẹ tị́ du ká nyẹẹkpẹ da ehile nyam, ká họ ang onyobyi ọwẹ-ẹ̀? À nwụ Uriya ọla iHiiti ẹ-ẹwụ. À họ ala Amọn nwọọ ọ-ọgbẹwụ lẹ, ā ya ahụ nyamwụ ye lẹlẹ!

¹⁰Ajị nyọlẹ ká jum ihi ka ká wu ahụ nya Uriya ye-è wẹ lẹ, ẹwụ-ụ́ ka pwuru la o-ri alugbiyegu nyang ịnyịnyịịnyị kaka.

¹¹Ugbiyegu-ugbiyegu nyang m̄ ka kpa akama bwu chịng ọgụ lẹ. À ka kpẹhị nya ịlọng yẹ gede-gede kam ka go ịhụ nyang ha ọngọkịla kọ ka ka uhye nyaa u-ugbọdọda.

¹²Ahụ lẹ, à họ ẹla-ibyi ọwẹ kwiikwii, m̀ tị ka họ jaabwọ kam ya wẹ u-ugbọdọda ká ala Isirẹlụ wuu ka yẹ.’ ”

¹³Ọọwa, iDevidi à byi ịNatan yẹkẹẹ, “M̀ họ ang onyobyi ba Amkpaa lẹ.” ỊNatan wẹ byi iDevidi yẹkẹẹ, “Ee, ịnyịlẹhị ịnyị. Amkpaa tị hịnyọhi ọhọbịrị nyang lẹ. Á ka gbu kaka.

¹⁴À tị ya ẹpẹpẹ ju Amkpaa[8] bwula ọ-họ ẹlẹwẹ lẹlẹ, ọnyị nyang ka gbu.”

¹⁵Ọọwa, ịNatan à rụ ka ẹpwa nyamwụ lẹlẹ. Ụka ọọwa, Amkpaa họ ẹdụrụ ọtụka-ọtụka jụ ọnyị ọlẹ ká Uriya ma ha iDevidi.

¹⁶IDevidi bịlẹ Ohe Oluhye chajị ká ọnyị ọwẹ ka la gogo. Ọ́ myị ri ang ka. Alodu ọ kaa ka ube kaka nọnọ ị-ịpyị.

¹⁷Alụkụrwọ nyamwụ kele ka ẹga nyamwụ kaka bịlọọ kọ ka wuleji bwu ịpyị. Ọ́ tị myị wuleji lee o-ri ang taa ka.

¹⁸Ẹnụtụrụ ọharwiye nyọlẹ ká ẹdụrụ jụ ọnyị ọwẹ lẹ, ọ gbu lẹlẹ. Alụkụrwọ nya iDevidi tị ju uhi nyọka ya ẹlẹwẹ joo. Ị juwa byị awụlẹ yẹkẹẹ, “Ụka ká ọnyị ọlẹ jam ji lọhịhị lẹ, áhị ya ẹla, iDevidi-í myị wẹẹhị ka. Anyị āhị tị́ ka bwu ya ẹla nya igu nya ọnyị ọlẹ joo kpá lẹẹ mẹ? Ọ́ ka họ ịlọmwụ ang myị!”

¹⁹Ụka ọọwa, iDevidi yẹ kị juwa chayị nya ẹla ta awụlẹ. Ọọwa, ọ jẹ ká ọnyị gbu lẹlẹ. Lẹ, ọ taa wo yẹkẹẹ, “Ọnyị gbu lẹ-ẹ́?” Ị wẹ byoo yẹkẹẹ, “Ee, ọ gbu lẹ.”

²⁰Ọọwa, iDevidi à wuleji bwu ịpyị lẹ, ọ hyo enyi, gu ida wụ bala ọ-ya ang ịkịla kụrụ lẹlẹ. Ọ rụ ka ube nya Amkpaa lẹ, ọ gbịgba ụ-ụwa lẹlẹ. Ụka kọ họ ịnyị kpá, kọ nyà ka ẹpwa lẹ, ọ tịtọ nya ang oriri. Ọọwa, anchẹ nyamwụ à ya ang oriri họọ lẹ, ọ ri lẹlẹ.

²¹Ụka ọọwa, anchẹ nyamwụ tọọ wo yẹkẹẹ, “Ịyẹ tị́ du ká wẹẹ họ ịịwẹ-ẹ̀? Ụka ká ọnyị jam lọhịhị, à pwa ang oriri, juwa jida. Ugbẹnyị kọ gbu, à tị wuleji juwa ri ang.”

²²IDevidi wẹ byaa yẹkẹẹ, “Ụka ká ọnyị jam lọhịhị lẹ, ḿ myị ri ang ka. M̀ jida. Irya nyam ri yẹkẹẹ, m̀ jéējèē, ọhẹka m̀ ka la Amkpaa ahyẹẹrwẹrwa kpụ̀ ọ ka chị ọnyị ọlẹ da.

²³Ti yẹ-ẹ̀ wẹ mẹ, ọnyị tị gbu lẹ. Ee lẹ, m̀ tị́ ka wu ịlọm hụ limyi chajị nya ịyẹ wẹẹ? Ḿ ka jẹ-ẹ̀ kpọọ tịrẹkpẹ kaka hịhị kaka. Am-am à ka jẹ-ẹ̀ bọọ ẹnẹhẹ wẹẹ̀ lẹlẹ. Ọwa-á ka jẹ-ẹ̀ nyà tịrẹkpẹ chịm ọgụ kaka.”

²⁴Ọọwa, iDevidi à kpụ́ ịBatịchẹba ahụ nyamwụ ẹjẹ lẹlẹ. Ụka kọ nọ chẹẹ, kọ ma ọnyị ọlẹng ọkịla lẹ, iDevdi à wụrụ ẹnyị nya ọnyị ọọwa iSolomọn lẹlẹ. ISolomọn há Amkpaa.

²⁵Amkpaa du ọlọmwụ ịNatan ẹrụ kaka ju ọnyị ọwẹ ẹnyị ọkịla chajị nyọlẹ kọ há Amkpaa. Ẹnyị ọọwa ri iJedidiya[9]

²⁶Ụka ọọwa, iJowabụ kịnyaa juwa dẹwụ ta epweji nya ịRaba ọlẹ kọ ri ẹpwa-ụtụrụ nya ala Amọn wẹẹ ka kụrụ epweji ọwẹ.

²⁷Ọọwa, ọ du ẹrụ kaka byi iDevidi yẹkẹẹ, “M̀ dẹwụ ta epweji nya ịRaba kpụ m nu ẹ̀ga-ogo nya alụwa lẹ.

²⁸Lẹẹlẹ, kpa angịdẹwụ ịkịla warị lawụlẹ kị gba mịla epweji ọwẹ mẹ. Ahụ ā ye epweji ọwẹ mẹ, ó-ri ịnyị ka, ḿ dẹwụ kụrwọọ, ị ka ya ẹnyị nyamwụ wụrụm!”

²⁹Ọọwa, iDevidi à tụ angịdẹwụ nyamwụ wuu guru, kpaa ka dẹwụ tụ ịRaba pyịpyị lẹ, ị ye la lẹlẹ.

³⁰IDevidi pwọ okpo-adịrahụ bwu egbeju nya adịrahụ nya alụwa ya kụrụ ịlọmwụ e-egbeju. Ilo ọlala nya okpo ọọwa ri okolo iwo ịta da ịrụ. Ị ya ajwọ ịlịnya-lịnya jwoo. IDevidi go ang-ụdụ lụmẹ-lụmẹ kpa rụ bwu epweji ọwẹ.

³¹Ọ gba alụwa kpehe juwa taa ụbwọ ba ụkụrwọ nya ekeji o-gu ene bala ịwụ obebe leje. Ọ kpaa me ebe la ịbịlọọkụ ịnyịnyị. ỊDevidi họ ịịwẹ ta epweji ịkịla nya ala Amọn ịnyịnyị. Ọọwa lẹ, ọwa bala angịdẹwụ nyamwụ wuu à rụ tịrẹkpẹ ka iJerusalẹm lẹlẹ.