Read idege 2 ỊSAMWẸLỤ 13 Bible Online

2 ỊSAMWẸLỤ 13 - idege bible

2 ỊSAMWẸLỤ 13

¹Ụka ọọwa, ọnyịnịna ọnyang nya Abụsalọm ọnyị nya iDevidi ọhẹ juwa kị wurụ ịTamaa. ịTamaa ọọwa há ụhị lụmẹ. Amnọn ọnyadịda nya ịTamaa ọwẹ ji igu ta ịTamaa.

²Ẹla nya ịTamaa ji olegu nya Amọn lụmẹ gbee kọ ju ịlọmwụ ẹdụrụ. ịTamaa ayịdang tị ri onjwo ịyang. I-irya nya Amnọn lẹ, ọ́ jẹ jaabwọ kọ ka họ kọ ka wu ịTamaa ọyị kaka.

³Amọn la oligu ọhẹ ká ẹnyị nyamwụ ri iJonadabụ. Ọ ri olijẹẹhị ọtụka. ỊChama ọnyịnịna ọlẹng nya iDevidi à mọọ lẹ.

⁴IJonadabụ byi Amnọn ẹnẹhẹ yẹkẹẹ, “Ọ́ọnyị nya adịrahụ ā ri ka-á? Ya jem wẹ-ẹ̀. Ịyẹ tị du kaa bwọ ayiiji ẹnụ myị ẹnụ ịnyị-ị̀?” Amnọn wẹ byoo yẹkẹẹ, “ỊTamaa ọnyadam ọnyịnịna nya Abụsalọm jum ẹ-ẹhị lụmẹ, m̀ tịtọ kam ka tụ aha nyamwụ.”

⁵Ọọwa, iJonadabụ à byoo yẹkẹẹ, “Kpa ịlọng lala ọlẹdụrụ, ká kele kaka nọnọ mẹ. Ụka ká adang-ńg wẹ kaka yẹng lẹ, à byoo kọ du ịTamaa warị kaka họ ang oriri hang, kọ họ ang ọọwa a-ahị nyang chajị ka ka kpẹhị yẹ bala ọ-ka ri ang bwu ụbwọ nyamwụ mẹ.”

⁶Ọọwa, Amnọn à họ ihwirihwa lẹ, ọ kele kaka nọnọ lala ẹdụrụ nyaa jwọọ lẹlẹ. Ụka ká Adịrahụ iDevidi kele kaka yọọ, ọ byi adịrahụ yẹkẹẹ, “Chuchuu, ba ka ịTamaa ọnyadam a wẹ ka họ ịkaa ịmanyị-ịmanyị ham, kam ri ang ọlụbwọ nyamwụ chẹẹ mẹ-ẹ̀.”

⁷Ọọwa, iDevidi à du ẹrụ kaka byi ịTamaa yẹkẹẹ, “Kele ka ẹpwa nya Amnọn ọnyadang ká họ ang oriri họọ wẹẹ.”

⁸Ọọwa, ịTamaa à kele ka ẹpwa nya Amnọn ọnyadamwụ lẹlẹ. Amnọn nọnọ nụwa ụka ọọwa. Ọọwa, ịTamaa-à chụ ọrụ nya ang ọ-kpa họ ịkaa, yoo julawụlẹ wuu a-ahị nya Amnọn lẹ, ọ họ ịkaa họọ lẹlẹ.

⁹Ọọwa, ọ ya ịkaa yẹju ẹja ha Amnọn kọ ka ri lẹlẹ. Ọ́ tị myị ri ka. Ọ byi ọng myị ọng wuu nyị kpehe bwu ẹpwang ọọwa. Ọọwa, ị kpehe lẹlẹ.

¹⁰Ọọwa, Amnọn à byi ịTamaa yẹkẹẹ, “Kpa ang oriri wẹ ikwowe nyam kam ka ye ri bwu ụbwọ nyang mẹ.” ịTamaa hu ịkaa ịịwa lẹ, ọ kpa bọọ ka ikwowe lẹlẹ.

¹¹Ụka ká ịTamaa juwa ya ang oriri ha Amnọn lẹ, Amnọn à woo pyẹẹ́ẹ lẹ, ọ byoo yẹkẹẹ, “Ọnyịnam ee, kẹwẹ kahị bá nọnọ mẹ.”

¹²ỊTamaa-à byoo yẹkẹẹ, “Eheehe, ā họm ẹla ọlịịwẹ koo, ọnyịnam. Ẹla ọlịịwẹ-ẹ́ pwoku am̀ Isirẹlụ koo. Uguru nya ẹla-à wẹ lẹ.

¹³M̀ tị́ ka họ anyị ká oyoyi nya ẹlẹwẹ ka myị him ẹnẹnẹhẹ? Ahụ ị ka wụrụ olukpilo ám Isirẹlụ lẹlẹ. Ya ta adịrahụ mẹ, ọ ka myị-ị̀ yam hang ye.”

¹⁴Amnọn-ń tị myị pẹ hyoo ka. Ọ la gogo gụ ịTamaa, lẹẹ lẹ, ọ woo lagbụrụ lẹ, ọ chọọ beji lẹlẹ.

¹⁵Ọọwa, Amnọn à bọọ ẹtẹ onyobyi-obyi lẹlẹ. Ọ dọmwụ bọọ ẹtẹ kpoye nya ọháha ọlẹ kọ la ẹ-ẹga nyamwụ ene. Ọọwa, ọ byi ịTamaa yẹkẹẹ, “Wuleji ká kpehe rụ kele him pyiiì!”

¹⁶Ma, ịTamaa wẹ byoo yẹkẹẹ, “Ọ́ ka jẹ-ẹ̀ lịnyị koo. O-kum ku rụ dọmwụ ta atịra gụ ẹlẹwẹ ká họ tam-m̀ wẹ ịnịịnọ.” Amnọn-ń tị myị ke ụrụ lọọ kpong-kpong ka.

¹⁷Ọ wụrụ ọnchẹ nyamwụ ọhẹ lẹ, ọ byoo yẹkẹẹ, “Ku ọnyang ọlẹ kpehe hi ẹhị nyam, ká tụ ụgbẹyị kwoo.”

¹⁸Ịnyị, ọnchẹ ọọwa-à kwoo kpehe lẹ, ọ da ụgbẹyị chị lẹlẹ. Ụka ọọwa, ịTamaa ayịdang kụrụ awụrụ ogbileji ọlabwọ gbọng, chajị ụma nya ang ọlịnyị anyị anyang nya adịrahụ ịlẹ kị rwọ ọrụ lẹka à kaa kụrụ loyi ọọwa lẹ.

¹⁹ỊTamaa gu agbụ chị egbeju, gu awụrụ ogbileji nyamwụ ene lẹ, ọ yabwọ chị egbeju juwa jẹ rụ lida ngịrọrọọrọ lẹlẹ.

²⁰Ọọwa, Abụsalọm ọnyịnamwụ à yọọ lẹ, ọ tọọ wo yẹkẹẹ, “Ọọwa ri Amnọn wẹ ẹga nyang-ńg? Bà lida mẹ, ọnyịnam. Ọnyịnang ọ ri lẹ. Ā myị ká ẹlẹwẹ ā hu imahị hang kaka.” Ọọwa, ịTamaa à hụ ẹ-ẹpwa nya Abụsalọm layiiji bala onwee lẹlẹ.

²¹Ụka ká Adịrahụ iDevidi wo ẹlẹwẹ, ọ wọọ ẹjẹ lụmẹ.

²²Abụsalọm tị lẹ, ọ́ ya ẹla okpunyii lee ọ-da ide ju ọngịnyị a-ahị ọhẹ-lọhẹ ta Amnọn ka, Amnọn tị wọọ ẹjẹ chajị nyọlẹ kọ wu ịTamaa ọnyịnamwụ chị beji.

²³Ụka ká ẹka imiiye kám kpá, ká alụkụrwọ juwa pwọ ịkpịlọ nya Abụsalọm egbii ị-ịBaalụ-ịhasọ ju epweji nya Ifurem chwẹẹ lẹ, Abụsalọm à wụrụ anyị alẹng nya adịrahụ wuu kị ka wẹ ụwa lẹlẹ.

²⁴Ọ kele ka ẹga nya Adịrahụ iDevidi lẹ, ọ byoo yẹkẹẹ, “Agaba Idu ee, alụkụrwọ nyam jam ka pwọ ịkpịlọ nyam egbii lẹ. Ee lẹ, ọ tị́ ka lanyị, ahụ bala alegbeju ịtụkụ ying ā wẹ ọhụhụ ọlẹ kam wụrụ chajị nya ọọwa mẹ-ẹ̀.”

²⁵Adịrahụ à wẹ byoo yẹkẹẹ, “Eheehe, ọnyị nyam. Aahị wuu à ka wẹ kaka, olo nya ụga kà lụmẹ hang.” Abụsalọm yẹrịrọọ, adịrahụ-ụ́ tị myị ọnụ nyọkaka ka, kẹnẹ-kẹnẹ ri ọ byi Abụsalọm ya nyị pyẹ̀ẹẹ ka ọhụhụ mẹ.

²⁶Ọọwa, Abụsalọm à byoo yẹkẹẹ, “Ọ́ tị̀ tị̄ ri ịnyị lẹ, à ya iwe da ká Amnọn ọnyịnam ā wẹ ọhụhụ chẹẹ mẹ-ẹ̀.” Adịrahụ tọọ wo yẹkẹẹ, “Ajị nya ịyẹ à tị́ du kọ ka wẹ?”

²⁷Abụsalọm tị yẹrịrị iDevidi gbee kọ myị Amnọn bala anyị alẹng nya adịrahụ ịkịla wuu nyị ka ọhụhụ ọọwa mẹ.

²⁸Ọọwa, Abụsalọm à ya ehile da angịnyị nyamwụ e-eji yẹkẹẹ, “Anụ kpẹhị chịng kanụ jẹ ụka ká ere jụ Amnọn. Ḿ kpẹhị-ẹhị ya ẹla tanụ lẹ, anụ nwọọ mẹ. Am à byinu ịnyị lẹ, ānụ ju uhi ka. Anụ ju ugbodu kanụ họ ịnyị mẹ.”

²⁹Ịnyị, anchẹ nya Abụsalọm à nwụ Amnọn jaabwọ kọ byaa lẹlẹ. Ọọwa, anyị alẹng nya adịrahụ wuu à gba kụ anyịrẹ nyaa lẹ, ị rụnyẹ rụ lẹlẹ.

³⁰Ụka kị juwa ụ-ụgbẹyị nya ọrụrụ wẹẹ, ọngọhẹ kele ka ya je iDevidi yẹkẹẹ, “Abụsalọm go anyị alẹng nyang nwụ wuu lẹ. Ọngọngọhẹ nyaa-á hi kaka!”

³¹Ọọwa, Adịrahụ iDevidi à wuleji, gu awụrụ nyamwụ ene ẹ-ẹpwụ nya ọjụjụ lẹ, ọ hịnọnọ ị-ịpyị lẹlẹ. Anchẹ ịlẹ kị juwa tọọ gu ịwụrụ nyaa ene ịnyịnyị.

³²Ụka ọọwa lẹ, iJonadabụ ọnyị nya iChimiya ọnyịnịna nya iDevidi à wẹ lẹ, ọ tị byi iDevidi yẹkẹẹ, “Agaba Idu ee, Ị́ nwụ anyị alẹng nyang wuu ịnyịlẹhị ka. Amnọn kẹnẹ-kẹnẹ ị nwụ lẹ. Abụsalọm ayịdang la irya nya ẹlẹwẹ ọhọhọ bwu ụka-ụka ká Amnọn wu ịTamaa ọnyịnamwụ chị beji.

³³Lẹẹlẹ, ā myị ju oja nyori nyị nwụ anyị alẹng nyang wuu koo. Amnọn kẹnẹ-kẹnẹ à gbu lẹ.”

³⁴Ụka ọọwẹ lẹ, Abụsalọm tị rụnyẹ rụ lẹ. Ụka ọọwa, ọngọgbeji ọhẹ kọ ji ụkụrwọ lụka ọwẹ à chẹhị ka yẹ iru nya angịnyị kị juwa hireji bwu uhye nya ikiti tụ ụgbẹyị o-bwu ịHọrọnayim da warị. Ọọwa, ọ kele kaka byi adịrahụ yẹkẹẹ, “M̀ yẹ iru nya angịnyị kị lalẹẹ tụ ụgbẹyị o-bwu epweji nya ịHọrọnayim[10] da bwu ịkịka nya ikiti warị.”

³⁵Ọọwa, iJonadabụ à byi adịrahụ yẹkẹẹ, “Agaba Idu, yẹ-ẹ̀ wẹ mẹ, anyị nyang lalẹẹ nyà jaabwọ kam ya lẹ.”

³⁶Ọlẹ kọ ya ẹla kpá bwaaa lẹ, anyị nya iDevidi à pwụ eji lẹ, ị dọmwụ nya ida ojeje gboo lẹlẹ. IDevidi ayịdang bala alụkụrwọ nyamwụ wuu à juwa jida onyuujujwo ịnyịnyị lẹlẹ.

³⁷IDevidi bida nya Amnọn ọnyị nyamwụ lụka ọtata. Abụsalọm tị rụnyẹ rụ ka ẹga nya adamwụ-ọgbahị[11] ịTalịmayị adịrahụ nya ala ịGẹchuu ọlẹ kọ ri ọnyị nya Amihudu.

³⁸Ọ hụ ụwa ị-ịGẹchuu ẹka ịta lẹpwụ-lẹpwụ.

³⁹Ụka ká iDevidi kpụba la o-wu ẹhyọ chajị nya igu nya Amnọn lẹ, ọ dọmwụ nyọka wu iwoo nya Abụsalọm ọnyị nyamwụ lẹlẹ.