Read idege 2 ỊSAMWẸLỤ 14 Bible Online

2 ỊSAMWẸLỤ 14 - idege bible

2 ỊSAMWẸLỤ 14

¹Ụka ọọwa, iJowabụ yẹ jaabwọ ká Adịrahụ iDevidi juwa wu iwoo nya Abụsalọm lụmẹ ka ba.

²Ọọwa, ọ du kaka wụrụ ọnyang ọ-jẹ ẹla ọhẹ bwu epweji nya iTekowa lẹlẹ. Ụka ká ọnyang ọọwa pwụ eji, iJowabụ byoo yẹkẹẹ, “Họ ihwirihwa ká kpa ịlọng lala ọngọ juwa ẹ-ẹpwụ nya ida ọbaba mẹ. Go ịwụrụ nya owuru ọkpakpa kụrụ ká pẹhi inyi nyang dachị-dachị mẹ. Ā gu ida wụ ene koo, ká kpa ịlọng lala ọnyang ọlẹ kọ juwa ẹ-ẹpwụ nya ida ọbaba lụka ọtata lẹ mẹ.

³Á họ ịnyị lẹ, à kele ka ẹga nya adịrahụ ká byoo jaabwọ kam wẹẹ ka ya jeng mẹ.” Ọọwa, iJowabụ à ya joo jaabwọ kọ ka ya lẹlẹ.

⁴Ọnyang ọọwa ka ẹga nya adịrahụ, hirikpẹẹ họọ ẹ-ẹpwụ nya ihi ojuju lẹ, ọ byoo yẹkẹẹ, “Agaba Idu ee, dam ụbwọ mẹ!”

⁵Adịrahụ à tọọ wo yẹkẹẹ, “Ẹla-ịyẹ tị́ ene-è.” Ọnyang ọwẹ wẹ byi adịrahụ yẹkẹẹ, “Ahụ-ogu okpehika m̄ ri lẹ.

⁶M̀ ma anyị alẹng imiiye ene. Ẹnẹhẹ lẹ, ị ma uya ta awụlẹ ẹ-ẹrụ lẹlẹ. Ọngọhẹ-ẹ́ tị juwa kpụ ọ káa hi awụlẹ ka. Ọọwa, ọngọhẹ nyaa à nwụ ọngọkịla lẹlẹ.

⁷Tị yẹ mẹ, ayịbam, aanam wuu juwa jahị dam byim am nyị gba ọnyị ọlẹng ohihi kpehe hịwa kịịwa nyị nwọọ chajị nyọlẹ kọ nwụ ọnyịnamwụ. Ó-ri kam họ ịnyị, m̀ tị ka kụ abwabwọ. Ọngọngọhẹ-ẹ́ ka hi ri ọnyị ọtụma nya ọrụm ọlẹ kọ ka wo ẹnyị ehe nyamwụ kaka.”

⁸Ọọwa, adịrahụ à byi ọnyang ọwẹ yẹkẹẹ, “Rụ tịrẹkpẹ ka ẹpwa nyang mẹ. M̀ ka chị ẹlẹwẹ eju hang lẹ.”

⁹Ọnyang ọwẹ à byi adịrahụ yẹkẹẹ, “Ọ hiigu, Agaba Idu, jaabwọ myị abwọ ká họ, abyị ā ri ịnyam bala ugbiyegu nyam mẹ. Ọ ka gung bala alugbiyegu nyang kaka.”

¹⁰Ọọwa, adịrahụ à byoo yẹkẹẹ, “Ó-ri ká ọngọhẹ-ẹ́ hwàhwa jahị dang, aa kpa ọngọọwa wẹ ẹga nyam mẹ aalẹ, ọ́ ka tịtọ nya ẹla nyang gụ ọọwa kaka.”

¹¹Ọnyang ọwẹ byi adịrahụ yẹkẹẹ, “Myị ọnụ ham lẹnyị nya Amkpaa Ohe Oluhye nyang mẹ, Agaba Idu, ká ọngọlẹ kị ya ụchụ me nyọka byi uri nya ọnyị nyam ọlẹ kọ gbu á ka nwụ ọnyị ọkịla kaka mẹ.” Ọọwa, adịrahụ à byoo yẹkẹẹ, “M̀ kpa ẹnyị nya Amkpaa ọlẹ kọ juwa hịhị ya nya ịlẹhị-ịlẹhị ya uke-inyi ọhẹ-lọhẹ nya ọnyị nyang-ńg ka wo deeji bwu egbeju nyamwụ ka.”

¹²Ọnyang ọwẹ à byi adịrahụ yẹkẹẹ, “Agaba Idu, chuchuu, m̄ ya ẹla ookpokpo ọkịla chẹẹ mẹ.” Adịrahụ wọọ yẹkẹẹ, “Ịnọọ, ya mẹ-ẹ̀.”

¹³Ọọwa, ọnyang ọwẹ à byi adịrahụ yẹkẹẹ, “Ee lẹ, ịyẹ tị́ tị̀ tị̄ du ká wẹẹ họ ang ọlịnyị-ịnyị tụ angịnyị nya Ohe Oluhye pyịpyị mẹ? Ẹlẹwẹ ká ya wẹ ọwa nyị ka chẹkpẹ jum, ká tị myị kpa ọnyị nyang ọlẹ kọ rụ hi ẹpwa lalẹẹ nyà ka-à wẹẹ, à ya ká ya eje wu ịlọng ka-á?

¹⁴Angịnyị ehe kaa gbu. Jaabwọ ká enyi-í hụrụ ị-ịpyị kpá, kị jẹ-ẹ̀ yiloo kaka, ịnyịnyị-ịnyịnyị ahị la lẹ. Ohe Oluhye lịlọmwụ-ụ́ ta ọhịhị nya angịnyị ayịreji ịịwẹ ka. Ọkọkọ nya ọọwa lẹ, ọ kaa họ ká angịlẹ kị ku rụ hi ẹpwa ka jẹ-ẹ̀ nyà tịrẹkpẹ[12].

¹⁵“Agaba Idu ee, ang odudu kam wẹ kaka ya ẹlẹwẹ tang ri ajị nyọlẹ ká angịnyị hwàhwa jahị dam lụmẹ. Ọọwa, m̄ ya m̀ ka wẹ kaka ya ẹla tang la ahị ọdahịle ká ka dam ụbwọ lẹ.

¹⁶M̀ jẹ ká ka wo lam ká ka gbam bala ọnyị nyam kpehe bwu ẹpwụtụbwọ nya ọngọlẹ kọ wẹẹ tịtọ kọ ka nwụhị hi ọpyị ọlẹ ká Ohe Oluhye ya hahị.

¹⁷Ẹla ọlọnụ nyang ahụ ayịbam ka ya ọmwịịnyọ ham, chajị à lala olegu-ẹrụ, ā kaa jẹ ang ọnyịịla datị hi ang ọtịpyọ. Amkpaa Ohe Oluhye nyang ā juwa tang mẹ.”

¹⁸Ọọwa, Adịrahụ à byi ọnyang ọwẹ yẹkẹẹ, “Ā ya ẹlẹhẹ kpịbaa him koo. Aa wẹm ịtọ ọwẹ kam wẹẹ ka tọng.” Ọnyang ọwẹ à wẹ yẹkẹẹ, “Tọm ịtọ ọlẹ kọ hang mẹ, Agaba Idu.”

¹⁹Ọọwa, adịrahụ à tọọ wo yẹkẹẹ, “À ya ká iJowabụ à jung irya ọlẹ wuu ka-á?” Ọnyang ọwẹ à wẹ yẹkẹẹ, “M̀ jam kpa ẹnyị nyang ahụ Agaba Idu ya nya ịlẹhị-ịlẹhị ya ẹla o-ya kele warị-ị́ juwa koo. IJowabụ ọlụkụrwọ nyang à ya ala ịwẹ kam ya tang-ǹg wẹ jum ọ-ọnụ lẹ.

²⁰Ọ họ ịnyị chajị nyọka kpa ẹlẹwẹ ka tọng ụ-ụgbẹyị ọkịla ká ang ka nwụrịrị. À tị jẹ ẹla lala olegu-ẹrụ. À jẹ ang myị ang ọlẹ kọ jam họ ọ-ọpyị ọlẹ.”

²¹Ọọwa, adịrahụ à wụrụ iJowabụ lẹ, ọ byoo yẹkẹẹ, “Ọ hiigu. M̀ myị ẹla ọlẹ ká tịtọ lẹ. Kele ká kpa Abụsalọm ọnyị nyam nyà warị mẹ.”

²²Ọọwa, iJowabụ à hịnọnọ juwa da ọbayịle ha adịrahụ ẹ-ẹpwụ nya ihi ojuju lẹlẹ. Ọ byi adịrahụ yẹkẹẹ, “Ohe Oluhye ā wahị hang mẹ, Agaba Idu. M̀ jẹ ugbẹnyị ká ẹla nyam kpụng ịpyọ lẹ, chajị à họ ọbịlẹ-bịlẹ nyam am ọnchẹ nyang lẹ.”

²³Ọọwa, iJowabụ à yegiri kele ka iGechuu lẹ, ọ kpa Abụsalọm nyà wẹ iJerusalẹm lẹlẹ.

²⁴Adịrahụ tị da ehile yẹkẹẹ, “IDevidi ā kụ ụ-ụwa ẹ-ẹpwa nyamwụ chweee mẹ, ọ wẹ ẹga nyam nyọka yẹm-m yẹ koo.” Ịnyị, Abụsalọm à kele ka ẹpwa nya ịlọmwụ lẹ, ọ ka ẹga nya adịrahụ kaka lẹlẹ.

²⁵Ụka ọọwa ọ-ọpyị nya Isirẹlụ, ọngọngọhẹ-ẹ́ ji kị mịla oja chajị nya ụ́hị nyamwụ lala Abụsalọm kaka. Bwu eji ka uhye, ẹgẹhẹ nyamwụ-ụ́ tịpyọ ka.

²⁶Ọ kaa pwọ inyi nyamwụ ụka ookpokpo ẹ-ẹpwụ nya ẹka ụka myị̀ pyọ̀lọ-pyọ̀lọ bala ochowu. Inyi ịịwa kaa la ilo lala okolo imiiye nya ang ọ-kpa me ang ẹ-ẹpwa nya adịrahụ.

²⁷Abụsalọm ma anyị alẹng angị ịta bala ọnyị ọnyang ookpokpo ọlẹ ká ẹnyị nyamwụ ri ịTamaa. ỊTamaa ọwẹ ri ọlụ́hị.

²⁸Ụka ọọwa, Abụsalọm kụ i-iJerusalẹm ẹka imiiye lẹpwụ-lẹpwụ la ọ-yẹ iDevidi adamwụ ẹ-ẹhị ka.

²⁹Ọọwa, Abụsalọm à du kaka wụrụ iJowabụ chajị kọ ka doo ẹrụ ka ẹga nya adịrahụ lẹlẹ. IJowabụ-ụ́ tị myị wẹ ka. Ọ du ẹrụ ẹpẹtẹ oheeye bọọ, ọ́ tị myị wẹ ka ịnyịnyị.

³⁰Ọọwa, Abụsalọm à byi anchẹ nyamwụ yẹkẹẹ, “Anụ tị́ yẹ ẹrụ nya iJowabụ ọlẹ kọ ba ịnyam ba lalẹẹ, ịbali ọ wu ụ-ụwa lẹ. Anụ kele ka jwọọ ila!” Ịnyị, anchẹ nyamwụ à jwọọ ila jaabwọ kọ byaa lẹlẹ.

³¹Ọọwa, iJowabụ à wuleji kele ka ẹga nya Abụsalọm kaka tọọ wo yẹkẹẹ, “Ịyẹ tị́ du ká anchẹ nyang jụ ẹrụ nyam ila-à?”

³²Abụsalọm wọọ yẹkẹẹ, “Ang odudu ri, m̀ du tọng, ká ka wẹ kam ka dung kaka tọ adịrahụ wo ham yẹkẹẹ, ‘M̀ tị́ nyà bwu iGechuu kaka họ ịyẹ-ẹ̀? Ḿ hụ ụwa hụ lẹẹ, ọ ham gụ ọlẹ lẹ.’ Á tị myị wẹ̀ ka. Lẹẹlẹ, ba kam kele kaka yẹ adịrahụ mẹ. Ó-ri kam da ẹla-abyị lẹ, ọ nwụm mẹ.”

³³Ịnyị, iJowabụ à kele ka ya je adịrahụ ẹlẹwẹ ká Abụsalọm ya lẹlẹ. Adịrahụ du ka wụrụ Abụsalọm lẹ, ọ kele lẹ, ọ hirikpẹẹ ha adịrahụ lẹ, adịrahụ à jwoo ọnụ dọọ ọwụraba lẹlẹ.