Read idege 2 ỊSAMWẸLỤ 15 Bible Online

2 ỊSAMWẸLỤ 15 - idege bible

2 ỊSAMWẸLỤ 15

¹Ụka ká ẹlẹwẹ họ kpá, Abụsalọm chụ ang ọrụnyẹ ọhẹ ọlẹ ká ụnyịrẹ kaa gbile ha ịlọmwụ. Ọ chụ anyịrẹ lụmẹ-lụmẹ ha ịlọmwụ ịnyịnyị. Ọọwa, ọ go alẹng iwo ịrụ kị ka kpọọ chị lẹlẹ.

²Abụsalọm kaa chahị wuleji lụtụrụ gbegbegbe kaka godayị rịrị ụ-ụgbẹyị o-bwu ka ogirigba nya epweji. Ụka myị ụka ká ọngọngọhẹ-ẹ́ juwa kpa ẹla o-hyoo ọnụ ka ẹga nya adịrahụ kọ ka ya ọnụ jwoo nyọka myị ẹla ọọwa, Abụsalọm kaa wụrụ ọngọọwa, tọọ wo nya ẹga kọ bwu. Ụka ká ọngọọwa-á ya jọọ imwawụ ọlẹ kọ bwu kpá,

³Abụsalọm kaa byoo yẹkẹẹ, “Ahụ à ri oku ẹ-ẹpwụ nya ẹlẹwẹ ká kpa lẹ. Tị yẹ mẹ, ọngọhẹ-ẹ́ tị jam ku ọmwakpa nya adịrahụ ka wo ẹla nyang ọwẹ tang ka.”

⁴Ọọwa, Abụsalọm à kaa byoo myịmyị yẹkẹẹ, “Ang pyíì kam ka ri ọngọleje! Ó-ri ịnyị ịnọ, m̀ ka chị oku ha ọng myị ọng ọlẹ kọ kpa ẹla o-hyoo ọnụ kaka tọm.”

⁵Ụka ká ọngọhẹ-ẹ́ ka ẹga nya Abụsalọm, kọ ka hịrịkpẹẹ họọ, Abụsalọm kaa woo bajẹ bala o-jwoo ọnụ.

⁶Abụsalọm kaa họ ịịwẹ ẹ-ẹga nya ala Isirẹlụ ọnyị myị ọnyị kọ wẹ ẹga nya adịrahụ kpa ẹla o-hyoo ọnụ wẹ ẹga nyamwụ. Ọọwa, ọ ji olegu nya angịnyị wuu da wẹ ẹga nya ịlọmwụ lẹlẹ.

⁷Ụka ká ẹka ine[13] kam kpá, Abụsalọm bịlẹ iDevidi yẹkẹẹ, “Adam ee, hi iwe da ham kam ka iHebirọn kaka họ ọnụ ọlẹ kam myị ha Amkpaa jịra mẹ.

⁸Ụka kam kụ ụ-ụwa i-iGechu nya iSiriya, m̀ myị ọnụ ha Amkpaa ya ó-ri kọ kpam nyà tịrẹkpẹ pwụ iJerusalẹm la okpunyi aalẹ, m̀ ka gbịgba họọ i-iHebirọn.”

⁹Ọọwa, adịrahụ à byọọ yẹkẹẹ, “Aa jẹ la lokpunyi kele mẹ.” Ọọwa, Abụsalọm à rụ kele ka iHebirọn lẹlẹ.

¹⁰Ma, Abụsalọm tị du ẹrụ chị imwawụ nya ala Isirẹlụ wuu ọnụ yẹkẹẹ, “Ụka kanụ wo omyi nya ẹkụrwẹ lẹ aalẹ, anụ-ụ̀ chị ụkwa yẹkẹẹ, ‘Abụsalọm ri adịrahụ lalẹẹ i-iHebirọn lẹ oo!’ ”

¹¹Abụsalọm diro alẹng angị ohu imiiye (200) bwu iJerusalẹm ka iHebirọn. Angịịwa kele lọkịlẹtụ ọgbagbịla chajị ị́ wo ẹla ọhẹ-lọhẹ nya obyi omeme nya Abụsalọm ene ka.

¹²Ụka ká Abụsalọm juwa kpa iya kịla, ọ du ẹrụ tọ Ahitofẹlụ kele ka epweji nya iGilo. Ahitofẹlụ ayịdang ri ọngọhẹ lẹpwụ nya angị-ị ju iDevidi irya. Ọọwa, obyi ọlẹ kị meju iDevidi à la kpọngkpọng lẹ, angị ji oye nya Abụsalọm à juwa ju iru kịlahị-ịlahị lẹlẹ.

¹³Ụka ọọwa, ọngọhẹ kele kaka byi iDevidi yẹkẹẹ, “Ala Isirẹlụ wuu myị ọnụ nyọka dịrẹ Abụsalọm lala olegeju nyaa lẹẹ.”

¹⁴Ọọwa lẹ, iDevidi à byi alegbeju ịtụkụ yoo ịlẹ kị juwa i-iJerusalẹm tọọ yẹkẹẹ, “Ahị rụnyẹ rụ ahyaahị, chajị kahị ka be hi Abụsalọm mẹ. Anụ chị agaga mẹ, ó-ri ịnyị ka, ọ̄ wuhi am̀ e-epweji lẹ, ọ ka kụrụụhị bala ọ-nwụ ọng myị ọng nyahị lẹlẹ.”

¹⁵Ọọwa, ị wẹ byoo yẹkẹẹ, “Agaba Idu ee, ahị ka họ ang myị ang ọlẹ kaahụ ayịbaba nyahị ya ahị nyị họ.”

¹⁶Ọọwa, adịrahụ à rụ bala alugbiyegu bala alegbeju ịtụkụ yoo lẹlẹ. Ịhụ-anchẹ angị iwo kẹnẹ-kẹnẹ ọ pẹhi kị ka kpẹhị rịrị ẹpwa lẹlẹ.

¹⁷Ụka ká adịrahụ bala angị bọọ jẹ wuu juwa gba kpehe bwu epweji ọwẹ, ị godayị ẹ-ẹpwa o-ku ẹkpẹ ọlọbaba nya epweji.

¹⁸Ụka ọọwa, angịnyị nyamwụ wuu ịlẹ kị ri angị gbe adịrahụ bala angịdẹwụ angị ohu ịrwọnyẹ (600) ịlẹ kị bọọ bwu epweji nya ịGaatị chịpwụrụ bwu ịlahị nyamwụ.

¹⁹Ọọwa, adịrahụ à byi Itayị ọla ịGaatị, olegbeju nya angịdẹwụ ịwẹ yẹkẹẹ, “Ịyẹ tị́ du ká juwa baahị rụ-ụ̀? Tịrẹkpẹ rụ ka ẹga nya adịrahụ Abụsalọm mẹ-ẹ̀! Ọngga ā tị́ ri. À wẹ ka bẹ̀ ọpyị nyahị bẹ̀ kụ ịnyị.

²⁰Á hụ ẹgẹlẹ hụ tata lẹka. Lẹ, m̀ ka jẹ-ẹ̀ kpang ba ịlọm tụ ang-ang da-á? Am ayịdang á dọmwụ jẹ ẹga kam wẹẹ jẹ ka kpong-kpong datị lẹka. Tịrẹkpẹ bala angịdẹwụ nyang mẹ. Amkpaa ā họnụ ọnahị, kọ họ hiigu ẹga nyanụ ịnyịnyị mẹ.”

²¹Ma, Itayị wẹ byoo yẹkẹẹ, “Agaba Idu ee, m̀ kpa ẹnyị nya Amkpaa ọlẹ kọ juwa hịhị nwa iro hang ya m̀ ka dịrẹng ka ẹga myị ẹga pyịyọọ, ó-ri ọhịhị lee ó-ri igu.”

²²Ọọwa, iDevidi à wẹ yẹkẹẹ, “Ọ hiigu! Tị̀tị chẹwụ kịnyaa mẹ.” Ọọwa, Itayị bala angịnyị nyamwụ bala alugbiyegu nyaa wuu à hu ang kịnyaa lẹlẹ.

²³Ala iJerusalẹm ya eko kpọnụ gbooo ụka ká angị dịrẹ iDevidi juwa jẹ rụ. Adịrahụ iDevidi kpoye nya ọ̀bá nya iKidirọn. Ọọwa angịnyị nyamwụ wuu lawụlẹ à bọọ yahị da ka ugbileji lẹlẹ.

²⁴Abiyata bala ịSadọkọ angịkiliya bala ala iLivayị ịkịla juwa kị kpa Akpa nya Iro. Ị ya rịrị e-eji. Ị́ tị hwoo kaka gbee ka angịnyị wuu gba kpehe bwu epweji ọwẹ kpá.

²⁵Ọọwa lẹ, adịrahụ a byi ịSadọkọ yẹkẹẹ, “Hu Akpa nya Iro kpa tịrẹkpẹ ka epweji mẹ. Ó-ri ká ẹla nyam-ḿ kpụ Amkpaa ịpyọ aalẹ, ọ ka kpam nyà tịrẹkpẹ wẹ kaka yẹ Akpa ọwẹ bala ẹga kọ rịrị ẹnẹhẹ wẹ́ẹ̀.

²⁶Ọ́ tị ri ká ẹla nyam-ḿ kpọọ ịpyọ ka aalẹ, ọ họ jaabwọ kọ họọ ẹ-ẹga nyam mẹ.”

²⁷Ọọwa lẹ, adịrahụ à byi ịSadọkọ yẹkẹẹ, “Yẹ mẹ, hu Ahimaasị ọnyị ọlẹng nyang bala iJonatan ọnyị ọlẹng nya Abiyata kanụ rụ tịrẹkpẹ ka epweji la ọkpunyi mẹ.

²⁸Ọlẹẹlẹẹ tị-ị̀ wẹ̄-ẹ, m̀ ka godayị ẹ-ẹga o-bwu kpoye nya ihu u-ugbileji gbee kam ka wo oja bwu ẹga nyang.”

²⁹Ọọwa, ịSadọkọ bala Abiyata à hu Akpa nya Iro kpa tịrẹkpẹ ka iJerusalẹm lẹ, ị hụ ụ-ụwa lẹlẹ.

³⁰Ọọwa, iDevidi à rụ juwa jẹ ka uhye nya Ọgbọdọ nya Olivu lida-lida lẹlẹ. Ọ́ ju ugbẹta ẹ-ẹta ka. Ọ ya apwụ kụrụ egbeju nya ang-ẹjẹẹ nya olujwo ọ-tọọ tọ. Angịlẹ wuu kị bọọ wuu ya ang kụrụ egbeju nyaa juwa wule kele lida-lida ịnyịnyị.

³¹Ụka ọọwa, ọngọhẹ kaka ya je iDevidi yẹkẹẹ, “Ahitofẹlụ juwa ẹ-ẹpwụ nya angị me obyi ta Abụsalọm jahị dang ịnyịnyị lẹẹ.” Ọọwa, iDevidi à raabwọ yẹkẹẹ, “Amkpaa ee, chuchuu, yẹ irya ọmẹjẹ nya Ahitofẹlụ la ang ododu mẹ!”

³²Ụka ká iDevid pwụ uhye nya ikiti ẹga kịị gbịgba, iHuchayị oligu nyamwụ ọla ogang nya Aakị wẹ kaka tọọ. Awụrụ nya iHuchayị gu ene jang-jang, ịpyị rọọ e-egbeju.

³³Ọọwa, iDevidi à byoo yẹkẹẹ, “Ó-ri ká bam jẹ, ahụ ayịdang ka ri olo ham.

³⁴Jaabwọ ká ka bwu dam ụbwọ à lẹẹ lẹ: Rụ tịrẹkpẹ kele ka epweji, ká byi Abụsalọm lịlọng yẹkẹẹ, ‘M̀ wẹ kam ka myị ẹrụ hang lọkịlẹtụ ookpokpo jaabwọ kam kaa myị ẹrụ ha adang ene-ene lẹ.’ Ọọwa, ā ka bịrị irya ọmẹjẹ nya Ahitofẹlụ lẹlẹ.

³⁵ỊSadọkọ bala Abiyata angịkiliya tị́-ị̀ wẹ ụ-ụwa lẹ. Aa ya jaa ẹla myị ẹla ká wo bwu ẹpwa nya adịrahụ mẹ.

³⁶Ahimaasị bala iJonatan anyị alẹng nyaa juwa taa ịnyịnyị. Aa ya ẹla myị ẹla ká wo daa ẹrụ tọm mẹ.”

³⁷Ọọwa, iHuchayị oligu nya iDevidi à nyà tịrẹkpẹ wẹ epweji ụka ká Abụsalọm lịlọmwụ wẹẹ yẹtẹ chị epweji ịnyịnyị lẹlẹ.