Read idege 2 ỊSAMWẸLỤ 16 Bible Online

2 ỊSAMWẸLỤ 16 - idege bible

2 ỊSAMWẸLỤ 16

¹Ụka ká iDevidi jẹ kpoye nya achinege nya ikiti chẹẹ lẹ, ọ tọ iSiba ọnchẹ nya iMefibochẹtị lọmwaaa lẹlẹ. ISiba kpa ibyiyó imiiye ịlẹ kọ ju olo chụ la abẹ nya ịkaa ohu imiiye (200). Ị kpa ẹkpa nya ịkama nya alakọnụ bala iku ohu ookpokpo (100) nya egbe nya ekeji inyeewe bala ugba nya ere ịnyịnyị.

²Ọọwa, Adịrahụ iDevidi à tọọ wo yẹkẹẹ, “Ịyẹ ā tị́ ka họ la ang ịwẹ wuu?” ISiba wọọ yẹkẹẹ, “Ibyiyó ri nya ugbiyegu nya Agaba Idu kị ka kpa kụ. Ịkaa bala egbe nya ekeji tị ri nya alẹng kị ka ri. Ere à ri ọlẹ ká angịlẹ ká ẹdịyẹ jụ u-ugbileji ka nwa lẹ.”

³Ọọwa, adịrahụ à tọọ wo yẹkẹẹ, “IMefibochẹtị ọnyị ọlẹng nya ayịbang ịSọlụ tị́ ji ale?” ISiba wọọ yẹkẹẹ, “Ọ juwa i-iJerusalẹm, chajị ọ la ahị ọdahịle ya ala Isirẹlụ nyị ka tịrị ọngịrị nya ọpyị ọkpakpa nya adamwụ-ọgbahị ịSọlụ ẹkpẹ họọ ugbẹnyị lẹ.”

⁴Ọọwa, adịrahụ à byi iSiba yẹkẹẹ, “Ang myị ang ịlẹ kị ri nya iMefibochẹtị ene-ene lẹ, m̀ ya ang ịịwa wuu hang lẹ.” ISiba à wẹ yẹkẹẹ, “Ọnchẹ nyang m̄ tị́ ri, Agaba Idu. Ohe Oluhye ā myị kam họ kpụng ịpyọ pyịyọọ mẹ.”

⁵Ụka ká iDevidi Adịrahụ jẹ pwụ ịBahurim, ọlẹng ọhẹ kọ bwu bala ịSọlụ ká ẹnyị nyamwụ ri iChimeyi, ká adamwụ ri ịGẹra, à kpehe bwu epweji ọwẹ juwa kpa ido do iDevidi lẹlẹ.

⁶Ọọwa, iChimeyi à dọmwụ nya ọ-chị Devidi Adịrahụ bala angịnyị nyamwụ ajwọ lẹlẹ. Ụka ọwẹ, alegbeju bala angị gbe iDevidi kụ dagaga jwoo oyiye-oyiye.

⁷IChimeyi doo ido juwa byoo yẹkẹẹ, “Tụ kịnyaa pyíiì! Tụ kịnyaa pyíiì! Ahụ ọngọ nwụ angịnyị! Ahụ ọngọ hideeji ọwẹ lee!

⁸Amkpaa-à wẹẹ yẹng akama chajị nya iru nya alugbiyegu nya ịSọlụ ịlẹ ká nwụ lẹ. À nu ọngịrị nya ọpyị ọkpakpa bwu ụbwọ nya ịSọlụ. À tị́ yẹ-ẹ̀ wẹ lẹ! Amkpaa tị̀tị̀ nung ọngịrị ọọwa ya ju Abụsalọm ọnyị-ọnyị nya ịlọng ụ-ụbwọ lẹ. À ri enyi gu obyi lẹ! Ahụ ọngọ nwụ angịnyị ọwẹ.”

⁹Ọọwa lẹ, Abichayị ọlẹ ká ịnamwụ ri iSeruya à byi adịrahụ yẹkẹẹ, “Agaba Idu, ányị tị́ du ká ba hi ọngọ ju apyobwuna ka lala ogu nya ebwu ọwẹ kọ wẹẹ dong ịịweẹ-ẹ̀? Ba kam jẹ kele kam chọọ egbeju mẹ.”

¹⁰Ma, adịrahụ byi Abichayị bala iJowabụ ọnyịnamwụ yẹkẹẹ, “Ẹlẹwẹ-ẹ́ ri nyanụ ka. Ó-ri Amkpaa kọ byoo nyị dom ịịwẹ, oowo tị́ ka la ọngịrị tọọ wo ang odudu kọ wẹ-ẹ̀ dom ịnyị-ị̀?”

¹¹Ọọwa, iDevidi à byi Abichayị bala angịnyị nyamwụ ịkịla wuu yẹkẹẹ, “Ọnyị ọlẹng o-bwu igbeene nyam à wẹẹ tịtọ kọ ka nwụm nwụ wẹẹ lẹ. Ee lẹ, ḿ ka ri iyo-ọlụmẹ nya ọngọ bwu imwawụ nya iBenjamịn ka-á? Ba hyoo kọ dom jaabwọ kọ họọ mẹ. Amkpaa-à ya ẹga da họọ lẹ.

¹²Ọhẹka Amkpaa ka yẹ akama ọyẹyẹ nyam, ọ ka wahị kụrụm ku ọmwakpa nya ido ọwẹ kọ wẹẹ dom myị.”

¹³Ọọwa, iDevidi bala angịnyị nyamwụ à kịnyaa la ẹdịyẹ nyaa tụ ụgbẹyị da lẹlẹ. IChimeyi tị juwa tụ ịkịka nya ikiti da ba ọka nya ụgbẹyị ba. Ụka ọwẹ, ọ kịnyaa la ido ododo bala ọ-da iDevidi anyị ajwọ bala ọ-chụ ịpyị hwaa.

¹⁴Ụka ká adịrahụ bala angịnyị nyamwụ wuu jẹ kaka pwụ ịJodan[14], ịnyịrọ chaa pyẹpyẹ. Ọọwa, ị mwụ ịnyọ lẹlẹ.

¹⁵Ụka ọwẹ, Abụsalọm bala ala Isirẹlụ ịkịla ịlẹ kị bọọ wuu jẹ̀ pwụ iJerusalẹm lẹ. Ahitofẹlụ juwa balaa ịnyịnyị.

¹⁶Ụka ká iHuchayị oligu nya iDevidi jẹ kaka tọ Abụsalọm, ọ dakọ gboo yẹkẹẹ, “À ka ri ehe tata, adịrahụ! À ka ri ehe tata, adịrahụ!”

¹⁷Ọọwa, Abụsalọm à tọọ wo yẹkẹẹ, “À nyẹẹkpẹ da iDevidi oligu nyang lẹ̀-ẹ́? Ịyẹ tị́ du ka bọọ jẹ ka?”

¹⁸Ọọwa lẹ, iHuchayị à wẹ yẹkẹẹ, “Eheehe. Ḿ bọọ jẹ koo. Oye nyang ahụ ọngọlẹ ká Amkpaa bala angịlẹ bala ala Isirẹlụ wuu chụ m̄ ji lẹ. Lẹẹlẹ, ahụ m̄ ka hụ ta lẹ.

¹⁹Oowo tị́ dọmwụ chịla kam ka myị ẹrụ ha ene-è? Ọnyị nya iDevidi ayịbam ịnyị. Jaabwọ kam myị ẹrụ ha adang, ịnyịnyị-ịnyịnyị m̄ ka myị ẹrụ hang lẹ.”

²⁰Ọọwa lẹ, Abụsalọm à ji kpata ka ẹga nya Ahitofẹlụ lẹ, ọ tọọ wo yẹkẹẹ, “Ya irya nyang jehi wẹ́ẹ̀, ịyẹ à tị́ ri ang ọkịla ọlẹ kahị ka họ?”

²¹Ahitofẹlụ wẹ yẹkẹẹ, “Kele ká nọ ta ịhụ-anchẹ nya adang ịlẹ wuu kọ pẹhi kpẹhị rịrị ẹpwa nyamwụ nya ang-ẹjẹẹ nyori à ye ẹchị nya adang lẹ mẹ. Ọọwa, ọng myị ọng nya ala Isirẹlụ à ka jẹ ya ahụ nyị chị oyoyi ju adang lẹlẹ. Ọọwa ka du ká angị ji oye nyang ka chẹkpẹ jung lụmẹ gụ olene.”

²²Ọọwa, ị ya ọdụ dakụrụ eji ẹ-ẹpwayịrẹtẹ nya ẹpwang nya adịrahụ ha Abụsalọm lẹlẹ. Ụ-ụwa ọ nọ ta ịhụ-anchẹ nya adamwụ a-ahị nya ala Isirẹlụ wuu lẹ.

²³Lụka ọọwa, irya ọmẹjẹ nya Ahitofẹlụ wuu kaa hiigu lala ẹla o-bwu ẹga nya Ohe Oluhye ayịdang. Jaabwọ ká iDevidi bala Abụsalọm kaa myị ju ẹla ọọwa kaa kpa họ ụkụrwọ à wẹ lẹ.