Read idege 2 ỊSAMWẸLỤ 17 Bible Online

2 ỊSAMWẸLỤ 17 - idege bible

2 ỊSAMWẸLỤ 17

¹Ọọwa lẹ, Ahitofẹlụ à byi Abụsalọm yẹkẹẹ, “M̄ chụ alẹng angị ụnọ iwo kụrụ imiiye (12,000) kam kpaa wuleji jahị da iDevidi la odu alẹ mẹ.

²M̀ ka gba mịlọọ ụka ká ọkịlẹtụ kpọọ enyi ká ịnyịrọ chọọ pyẹpyẹ. Ọọwa ka chị uhi jwoo. Angịnyị nyamwụ wuu ka rụnyẹ rụ. Adịrahụ kem m̄ tị ka nwụ lẹ.

³Ọọwa, m̄ ka kpa ọng myị ọng wuu nyà chịng ọgụ lala ahụ onyeewe à nyà wẹ ẹga nya ọrụmwụ lẹlẹ. Ọngọ ookpokpo ọlẹ ká wẹẹ tịtọ-ọ̀ wẹẹ, áhị nwọọ kpá lẹ, angị ihihi wuu ka nyà lokpunyi lẹ.”

⁴Ọọwa, irya ọwẹ à há Abụsalọm bala alegbeju nya ala Isirẹlụ ịkịla wuu lẹlẹ.

⁵Ọọwa, Abụsalọm à yẹkẹẹ, “Anụ wụrụ iHuchayị ọla Aakị warị kahị wo ẹla ọlẹ kọ ka ya wẹẹ.”

⁶Lẹ, ụka ká iHuchayị warị lẹ, Abụsalọm à tọọ wo yẹkẹẹ, “Irya ọlẹ ká Ahitofẹlụ juhi à lẹẹ lẹ, ahị myị jwoo mẹ-ẹ́? Ọ́ tị ri ịnyị kaka lẹ aalẹ, à gba irya nyang kpehe kahị wo mẹ.”

⁷IHuchayị wọọ yẹkẹẹ, “Irya ọlẹ ká Ahitofẹlụ jung ugbẹnyị wẹẹ-ẹ́ há koo.

⁸À tị́ jẹ ká iDevidi adang bala alẹng nyamwụ la ọngịrị-ọngịrị ẹ-ẹpwụ nya ẹwụ ọdada. Ịnyịnyị ị la uhi-uhi lala ikirom ọlẹ kị go anyị nyamwụ hyoo lẹ. Adang ri ọngọ jẹ ẹwụ onyogo-onyogo. Ọ́ kaa hụ ta angịdẹwụ nyamwụ lodu ka.

⁹Ọhẹka, ụka ọlẹ, ọ ka rụ kaka kpịbaa ẹ-ẹpwụ nya ụ́gbụ ọhẹ lee ọ-rụ ka ẹga ọkịla lẹ. Ó-ri ká iDevidi-í gba mịla angịnyị nyang ká angịhyẹ-ẹ́ gbu, ọng myị ọng kọ wo ẹla ọọwa ka me irya ya nyị kụrụ angịnyị nyang lẹ.

¹⁰Ọọwa lẹ, angịlẹ kịị ju ugbodu ju lala egabẹ à ka dapwụ hụ amẹ lẹlẹ. Ang odudu ri ala Isirẹlụ wuu jẹ ká adang ri ọngọdẹwụ ọtụka, angị bọọ jẹ tịtị ri angịdẹwụ i-ju ugbodu lụmẹ ịnyịnyị.

¹¹Irya ọlẹ kam ka ya hang ri à ka wụrụ ala Isirẹlụ tụchawụlẹ bwu ọbaba nya ọpyị ọla ịDan lalaala ka ju ka ọbaba ọla iBiyẹchẹba. Aalẹ, angịdẹwụ nyang ka ju iru lala apwụ bala amẹ. Ahụ lịlọng à tị ka kpa ịlahị nya ẹwụ lẹ.

¹²Ahị ka yẹ iDevidi ẹ-ẹga myị ẹga kọ ji kahị ka gba mịlọọ kitim lụka ọkpahị ju-ka. Ọwa lee ọngọngọhẹ nya angịnyị nyamwụ-ụ́ tụtụm ka be rụ lọhịhị kaka.

¹³Ó-ri kọ wa wii yẹtẹ chị epweji ọhẹ, ala Isirẹlụ angịnyị nyahị wuu ka kpa ichiri warị kaka bwọ epweji ọọwa, gbiloo da ka ọkpọọ. Ọọwa, ahị ka tọọ tudu eji hịlẹ-hịlẹ la ẹjwọ ọhẹ-lọhẹ ka hi nịrọ ọkịla kaka lẹlẹ.”

¹⁴Ọọwa lẹ, Abụsalọm bala ala Isirẹlụ wuu à yẹkẹẹ, “Ọmẹjẹ nya iHuchayị hagụ ịnya Ahitofẹlụ.” Amkpaa ayịdang họ chajị kị ka ba irya ọmẹjẹ ọnyịịla nya Ahitofẹlụ jẹ ka. Bwula ọọwa, Abụsalọm ka chabwọ kpụ ẹpwụ nya akama.

¹⁵Ọọwa, iHuchayị à ya je ịSadọkọ bala Abiyata angịkiliya irya ọlẹ ká Ahitofẹlụ ju Abụsalọm bala alegbeju nya ala Isirẹlụ lẹlẹ. Ọ ya jaa irya ọlẹ kọọwa ayịdang gba kpehe ịnyịnyị.

¹⁶Ọọwa lẹ, iHuchayị à ya ịnyịnyị yẹkẹẹ, “Du ẹrụ kaka byi iDevidi ahyaahị mẹ, ọ hyehe ẹ-ẹga i-bwu kpoye nya ihu u-ugbileji lodu alẹ koo. Ọ rụ kpoye nya Ihu ịJọdan i-ijata, chajị kị ka woo bala angịnyị nyamwụ nwụ kaka mẹ.”

¹⁷IJonatan ọnyị nya Abiyata bala Ahimaasị ọnyị nya ịSadọkọ kaa godayị ọ-ọnụ nya ẹnwụ-enyi ọla Ẹnrogẹlụ odehe nya iJerusalẹm. Ị́ị majẹ tụ kpoye nya ogirigba ọ-ka epweji ọwẹ myị ka. Ị dayị ọ-ọnụ nya ẹmwụ-enyi nya Ẹnrogẹlụ ẹ-ẹkpẹ nya iJerusalẹm. Ọnyị ọnchẹ ọnyang ọhẹ a kaa ya jaa ịnyịnyịịnyị ang ọlẹ kọ juwa họ lẹ. Ọọwa, ị kaa kele ka ya je iDevidi Adịrahụ lẹlẹ.

¹⁸Ẹnẹhẹ juwa ka ọnyị ọlẹng ọhẹ ya ẹhị waa oyi lẹ, ọ ya je Abụsalọm lẹlẹ. Ị chị agaga kele kaka kpịbaa ẹ-ẹpwa nya ọlẹng ọhẹ ị-ịBahurim lẹlẹ. Ọ la ịwẹẹlụ ju ẹpwa nyamwụ chwẹẹ. Ọọwa, ị ju kele lẹlẹ.

¹⁹Ọọwa, ahụ nya ọlẹng ọwẹ à hu ang kụrụ ọnụ nya ịwẹẹlụ ọwẹ lẹ, ọ ya ajẹ nya ang yịrị ụ-ụwa chajị ká ọngọhẹ á ka jẹ kaka lẹlẹ.

²⁰Alegbeju iloye nya Abụsalọm wẹ kaka tọ ọnyang ọwẹ wo yẹkẹẹ, “Ahimaasị bala iJonatan tị lee?” Ọ waa yẹkẹẹ, “Ị chị ihu eku koye ọlaanyị.” Alẹng ịwẹ tịtọ nyaa ma, ị́ tị yaa kaka lẹ, ị tịrẹkpẹ kam ka iJerusalẹm lẹlẹ.

²¹Ụka kị rụ kpá lẹ, Ahimaasị bala iJonatan a kpehe bwu ịwẹẹlụ lẹ, ị rụ kele kaka ya je iDevidi Adịrahụ lẹlẹ. Ị ya joo ang ọlẹ ká Ahitofẹlụ nwụlanọ jahị dọọ lẹ, ị byọọ yẹkẹẹ, “Anụ chị agaga kanụ kpoye nya ihu mẹ.”

²²Ọọwa lẹ, iDevidi bala alẹng nyamwụ a dọmwụ nya ọ-chị Ihu ịJọdan eku lẹ, ahị à ka pyẹ kpá lẹ, ịwa wuu a juwa o-oye ọlaanyị nya ihu lẹlẹ.

²³Ụka ká Ahitofẹlụ yẹ ka ọngọhẹ a ye ọmẹjẹ nyamwụ kaka lẹ, ọ gba kụ obyiyó nyamwụ lẹ, ọ tịrẹkpẹ rụ ka ẹpweji nyamwụ lẹlẹ. Ụka kọ nwụ ang nyamwụ guru kẹmkẹm wuu lẹ, ọ ju ịlọmwụ orinwa lẹlẹ. Ọọwa, ị jwoo eji i-iworu nya ugbiyegu nyaa lẹlẹ.

²⁴Ụka ká Abụsalọm bala angịdẹwụ nya Isirẹlụ ka kpoye nya Ihu ịJọdan kpá lẹ, iDevidi pwụ epweji nya ịMahanayịm le.

²⁵Ụka ọwẹ, Abụsalọm lẹẹ ya Amasa ri olegbeju nya angịdẹwụ ku ọmwakpa nya iJowabụ lẹ. Amasa ri ọnyị ọlẹng nya ịJẹtẹẹ ọla iChimẹlụ. Ịnamwụ à ri Abigẹlụ ọnyị nya ịNahachị lẹ. Ịnamwụ ọwẹ ri ọnyịnịna nya iSeruya ịnịna nya iJowabụ ịnyịnyị.

²⁶Abụsalọm bala angịnyị nyamwụ chịkụ ọ-ọpyị nya iGiliyadị.

²⁷Ụka ká iDevidi anyị pwụ ịMahanayịm, iChobi ọnyị nya ịNahachị kọ bwu epweji nya ịRaba ụ-ụwa Amọn bala ịMakii ọnyị nya Amiyẹlụ bwu ịLodebaa bala ịBaasilayị ọlẹ kọ bwu iRogelim i-iGiliyadị wẹ kaka taa.

²⁸Ị kpa ịba ị-da nune bala ịchụ ị-kpa kpụ ang bala ịja bala ọrụ nya iwiiti bala ịbali bala ajẹ nya ang-ẹrụ ịlẹ kị hyahya bala achị bala achị-ekeji

²⁹bala inwa bala ịbọta bala ịkpịlọ enyi-ẹmẹ nya ẹna warị wẹ iDevidi bala angịnyị nyamwụ. Ị kpa ang oriri bala ang ịkịla ịwẹ wuu wẹ iDevid bala angịnyị nyamwụ, chajị ị jẹ ká ịnyịrọ ka chaa pyẹpyẹ lụmẹ bala imyi bala imyi-enyi ka nwaa ẹ-ẹpwụ nya ẹdịyẹ ọlẹ kị wẹẹ jẹ bwu ugbileji.