Read idege 2 ỊSAMWẸLỤ 18 Bible Online

2 ỊSAMWẸLỤ 18 - idege bible

2 ỊSAMWẸLỤ 18

¹IDevidi Adịrahụ tụ angịdẹwụ nyamwụ michi, chaa ebwo ịlẹ ká ịhyẹ ri angị ụnụnụụnọ. Ịkịla ri ebwo nya angị ohwohwoohu. Ọọwa, ọ chụ alegbeju kpẹhị rịrị ebwo ọnyọnyọọnyị lẹlẹ.

²IDevidi daa kpehe ebwo ịta. Ọngọngọọng nya iJowabụ bala Abichayị ọnyịnịna nya iJowabụ bala Itayị ọla ịGaatị anyị kpẹhị rịrị ebwo ookpokpo-ookpokpo. Ọọwa, ọ byaa yẹkẹẹ, “Am lịlọm ka baanụ kele.”

³Ị tị wẹ byoo yẹkẹẹ, “Eheehe, á ka baahị ka. Ụnyẹ-ẹ́ kpeji kahị juwa rụ lee ị nwụ ẹhya nyahị nwụ, ọ kpụ ịngịhyẹ nya angịnyị nya Abụsalọm koo. Ahụ ị ka yahị da lẹ. À tị ju apyobwuna gụ angị ụnọ iwo nyahị wẹẹ. Ọ ka hagụ ká ka hụ ám e-epweji ka ka du ẹrụ kaka dahị ụbwọ ụka kọ baba.”

⁴Ọọwa, iDevidi à byaa yẹkẹẹ, “Ọlẹ kọ ka hagụ jaabwọ kanụ me irya m̄ ka họ lẹlẹ.” Ọọwa, ọ godayị ịkịka nya ogirigba ụka ká angịdẹwụ juwa chị ẹwụ kam̀ ogwogwoogu nya angị ohwohwoohu bala angị ụnụnụụnọ nyaa lẹlẹ.

⁵Adịrahụ da iJowabụ bala Abichayị bala Itayị anyị ehile yẹkẹẹ, “Ánụ-ụ̀ chajị nyam kanụ họ Abụsalọm ịngịngịhyẹ ọtịpyọ koo.” Angịdẹwụ wuu wo ụka ká iDevidi da ehile ọwẹ.

⁶Ọọwa, angịdẹwụ nya iDevidi à kpehe ka ẹpwụmẹ nyọka da ala Isirẹlụ ẹwụ lẹlẹ. Ị dẹwụ ọọwa i-ipyinu nya imwawụ nya Ifurem.

⁷Angịdẹwụ nya iDevidi kụrụ ala Isirẹlụ. Ị kụrwaa aboji-aboji. Ị nwụ angị ụnọ iwo imiiye (20,000) lẹpwụ-lẹpwụ nya ala Isirẹlụ ẹnụ ọọwa.

⁸Ẹwụ pyẹ yịrị ẹga myị ẹga wuu. Iru ojuju nya angịlẹ kị gbu ẹ-ẹpwụ nya ipyinu wuu gụ angịlẹ kị nwụ ọ-ọgbẹwụ.

⁹Ọọwa lẹ, Abụsalọm à tọ angịnyị nya iDevidi ịhyẹ lụka ọmwaaa lẹlẹ. Abụsalọm kụ ụnyịrẹ. Ụka ká ụnyịrẹ ọọwa wẹẹ bwu ekpeleji nya okoji ọtụka nya ooku ọhẹ lẹ, Abụsalọm à ya inyi dabarị ábwọ nyamwụ lẹlẹ. Ọlẹ kọ ya inyi dabarị okoji lẹ, ụnyịrẹ à rụnyẹ hyoo pịlẹ daa nụwa u-uhye ọhụ lẹlẹ.

¹⁰Ọngọdẹwụ nya iDevidi ọhẹ yọọ lẹ, ọ ya je iJowabụ yẹkẹẹ, “Ayịbahị ee, m yẹ Abụsalọm kọ chọpịla lalẹẹ u-uhye nya okoji ooku-ū!”

¹¹Ọọwa, iJowabụ à wọọ yẹkẹẹ, “Ó-ri ká yọọ ịnyị, anyị a tị́ du ká nwọọ ọ-ọgbọgba ka? Am lịlọm ka ya okpoko onyoowuru iwo bala ugba ọchọhị nwụng uri ịnọ.”

¹²Ma, ọlẹng ọwẹ wẹ yẹkẹẹ, “Ó-ri ká dọmwụ ya okpoko onyoowuru ohu (100) ham wẹwẹ, am-ḿ juwa hu ụkụchụ nyam hwaa me ọnyị nya adịrahụ ka. Ahị wo jaabwọ ká adịrahụ dang bala Abichayị bala Itayị ehile ya nya ajị nyọwa lẹ, anụ nyị yụbwọ gu Abụsalọm okolobya nyọwa ọwẹ koo.

¹³Ó-ri kam ya ụrụ nyi ẹla nya adịrahụ ajị kam nwụ Abụsalọm, ọ ka wo ịnọ lẹ, ẹlẹhẹ-ẹ́ẹ̀ kpọọ ịbaa koo. À tị nyẹẹkpẹ dam.”

¹⁴Ọọwa, iJowabụ à byoo yẹkẹẹ, “Ḿ ka bịrị ịlọm ụka gụ ọwẹ ẹ-ẹga nyang kaka.” Ọ go awangga ịta lẹ ọ ya gu Abụsalọm pyịị ọ-ọkịlẹtụ lụka kọ nụwa apịlada lahị-lahị u-uhye nya okoji ọọwa lẹlẹ.

¹⁵Ọọwa lẹ, angịdẹwụ nya iJowabụ angị iwo ịhyẹ à wẹ gidi-gidi kaka dagaga ju Abụsalọm lẹ, ị myọọ myị nwụ lẹlẹ.

¹⁶Ọọwa lẹ, iJowabụ à ya ị chị ẹkụrwẹ nyọka kpụba lẹwụ ọdada lẹ, angịdẹwụ nyamwụ à tịrẹkpẹ hi ala Isirẹlụ lẹlẹ.

¹⁷Ọọwa lẹ, ị hu ogu nya Abụsalọm, kpọọ ka da ju ka ụjẹ ọtụka ọhẹ ẹ-ẹpwụ nya ipyinu wurum lẹ, ị go ajwọ iru nya ajwọ tọọ ku lẹlẹ. Angịdẹwụ nya ala Isirẹlụ rụnyẹ rụ ka ẹpwa nyaa ụka ọwẹ lẹ.

¹⁸Lụka nya ọhịhị nya Abụsalọm lẹ, ọ me ipila ọgbọrị-gbọrị ọhẹ rịrị ọ-Ọkpọọ nya Adịrahụ nyọka kpa kpịtịya nya ịlọmwụ, chajị ọwa ayịdang ya ọwa nyị ma ọnyị ọlẹng ọhẹ ọlẹ kịị nyị ka wo ẹnyị-ehe nyọwa ka. Ọ ya ipila ọọwa wụrụ ịlọmwụ, ị tịị wụrụ ipila ọọwa Ipila nya Abụsalọm pyịyọọ daalẹ wẹẹ.

¹⁹Ọọwa lẹ, Ahịmaasị ọnyị nya ịSadọkọ à byi iJowabụ yẹkẹẹ, “Ba mẹ kam kpa oja ọnyịịla ọlẹ rụnyẹ kaka ya je Adịrahụ iDevidi nyori Amkpaa chọọ da bwu ẹpwụtụbwọ nya aluji nyamwụ lẹ mẹ.”

²⁰Ọọwa, iJowabụ à wọọ yẹkẹẹ, “Eheehe, alẹ lẹ, á ka kpa oja ọnyịịla ọhẹ ka ẹga nya adịrahụ ka. À ka họ ịnyị myị ị-ịlahị myị, áalẹ tị ka, chajị alẹ ọnyị nya adịrahụ à gbu-ù wẹ lẹ.”

²¹Ọọwa lẹ, iJowabụ a byi ọnchẹ nyamwụ ọla Itiyopyiya yẹkẹẹ, “Kele ka ya je adịrahụ ang ọlẹ ká yẹ-ẹ̀ wẹ mẹ.” Ọnchẹ ọwẹ à hirikpẹẹ họọ lihi-ihi lẹ, ọ hu ang kele lẹlẹ.

²²Ahimaasị tị yẹ rịrị yẹkẹẹ, “Ọ́ ka ri ọnyị myị ọnyị ri, bà him kam kele ịnyịnyị mẹ.” Ọọwa lẹ, iJowabụ à tọọ wo yẹkẹẹ, “Ọnyịm ee, ányị tị́ du ká tịtọ ká ka ka pyii-ì? Ịyẹ ị tị́ juwa ka ya nwụng uri chajị nya ọọwa-āà?”

²³Ahimaasị à byoo yẹkẹẹ, “Ọ́ ri ọnyị myị ọnyị ri m̀ ka ka pyii lẹ.” Ọọwa, iJowabụ à byoo yẹkẹẹ, “Hu ang kele mẹ-ẹ̀!” Ọọwa lẹ, Ahimaasị à ya ẹta ga ụnyẹ yahị da ka ụgbẹyị o-bwu koye nya Ọkpọọ nya ịJọdan lẹ, ọ jẹ kaka be ọnchẹ nya iJowabụ lẹlẹ.

²⁴Ụka ọọwa, iDevidi hụhụ apewa nya ogirigba ọlẹpwụ bala olodehe nya epweji ọwẹ wẹẹ. Ọngọgbeji à kpụ uhye nya ugulọ kele ka dayị u-uhye ẹ-ẹpwayịrẹtẹ nya ịnawụ nya ogirigba, chẹhị kpẹẹ lẹ, ọ yẹ ọlẹng ọhẹ kọ juwa rụnyẹ ụbwọọmwụ-ụbwọọmwụ lẹlẹ.

²⁵Ọ be ẹkọ weji kaka ya je adịrahụ lẹ, adịrahụ à yẹkẹẹ, “Ó-ri kọ jẹ ụbwọọmwụ aalẹ, oja ọnyịịla ọ ka wẹẹ kpa warị lẹ.” Ọlẹng ọọwa juwa wẹ lụnyẹ-lụnyẹ tụ jwaa chwẹẹ gụ olene-ene.

²⁶Ọọwa, ọngọgbeji à yẹ ọlẹng ọkịla kọ juwa rụnyẹ warị ụbwọọmwụ ịnyịnyị lẹ, ọ be ẹkọ weji kaka ya je ọngọgbe ogirigba yẹkẹẹ, “Yẹ lalẹ wẹẹ, ọlẹng ọkịla lalẹẹ rụnyẹ warị.” Adịrahụ wẹ yẹkẹẹ, “Ọwa juwa ka kpa oja ọnyịịla warị ịnyịnyị.”

²⁷Ọọwa, ọngọgbeji à yẹkẹẹ, “Ọngịnyị nya ọgbanyẹ ọlẹ kam yẹ lalẹẹ lẹ, ọ rụnyẹ mem Ahimaasị ọnyị nya ịSadọkọ.” Ọọwa, adịrahụ à yẹkẹẹ, “Ọngịnyị ọnyịịla ịnyị lẹ, oja ọnyịịla ọ wẹẹ kpa warị lẹ.”

²⁸Ọọwa, Ahimaasị à be ẹkọ wụrụ adịrahụ nya ọnụ ọdachị lẹlẹ. Ọ hị da ka ịpyị ẹ-ẹpwụ nya ihi o-jwoo ju lẹ, ọ byoo yẹkẹẹ, “Ogbo ogwogwo ā juwa ha Amkpaa Ohe Oluhye nyang mẹ! Ọ ya ọkụrụ-kụrụ hang ẹ-ẹga nya angịlẹ kị la egbeju-ọngịrị tang lẹ, Agaba Idu!”

²⁹Ọọwa, adịrahụ à tọọ wo yẹkẹẹ, “Abụsalọm okolobya nyam juwa lokpunyi-í?” Ahimaasị wọọ yẹkẹẹ, “Ụka ká iJowabụ lẹẹ dum ẹrụ ọlẹ lẹ, ayịbahị, m̀ yẹ ojigi-jigi ọtụka-ọtụka. Ọ́ tị la kpụ m̄ jẹ ọlẹ kọ ri kpangga ka.”

³⁰Ọọwa, adịrahụ à byoo yẹkẹẹ, “Nwụ̀ dayị koye ọlaanyị wẹẹ.” Ọọwa, ọ kele kaka dayị ụ-ụwa lẹlẹ.

³¹Ọọwa, ọla Itiyopyiya ọwẹ à tị pwụ eji lẹ ọ byi adịrahụ yẹkẹẹ, “Agaba Idu, m̀ kpa oja ọnyịịla warị wang. Alẹ ọlẹ Amkpaa họ ka kụrụ angịlẹ wuu kị ba ẹla tang lẹ.”

³²Adịrahụ à tọọ wo yẹkẹẹ, “Abụsalọm okolobya nyam juwa lokpunyi-i?” Ọọwa, ọnchẹ ọwẹ à wẹ yẹkẹẹ, “Ohe ā myị ká ẹla ọlẹ kọ la okolobya ọwẹ wẹ ā la aluji nyang wuu bala angịlẹ kịị la egbeju-ọngịrị tang.”

³³Ụka ọọwa, adịrahụ-ụ́ wu ịlọmwụ kpa myị kaka. Ọ rụ kele ka ube nyamwụ u-uhye nya ogirigba nya epweji lẹ, ọ jida lẹlẹ. Ọ juwa kpa ẹdịyẹ je kele lida-lida yẹkẹẹ, “Oo ọnyịnyam ee! Abụsalọm ọnyị nyam ee! Ang pyii ká am à ka gbu igu ọwẹ wọnụ nyang ju. Ọnyị nyam! Abụsalọm ọnyị nyam ẹẹ!”