Read idege 2 ỊSAMWẸLỤ 19 Bible Online

2 ỊSAMWẸLỤ 19 - idege bible

2 ỊSAMWẸLỤ 19

¹Ụka ọọwa, iJowabụ wo ya adịrahụ nyị juwa jida bala ọ-bida nya igu nya Abụsalọm.

²Ụka ká angịdẹwụ nya iDevidi wo ya nyị juwa bida chajị nya ọnyị nyamwụ, ọkẹkẹnị ọlẹ kị chị u-uhye nyọlẹ kị kụrụ ẹnẹwẹ mwọọgịlẹ yẹ la ayiiji ọbwọbwọ.

³Ọọwa, ị ba yeee nyà wẹ epweji lala angịdẹwụ ịlẹ kị kụrwaa ẹ-ẹwụ kịị yi oyi ẹpẹtẹ bwu ẹwụ rụ loyi-loyi lẹlẹ.

⁴Adịrahụ dang kụrụ ahị lẹ, ọ be ẹkọ ida ngịrọrọ yẹkẹẹ, “Abụsalọm ọnyị nyam ee! Abụsalọm ọnyị nyam ee!”

⁵IJowabụ à ka ẹpwang nya adịrahụ lẹ, ọ byoo yẹkẹẹ, “Alẹ ọlẹ ā chị oyoyi ju angịdẹwụ nyang lala ang onyobyi nyaa họ. Yẹ wẹẹ, angịwẹ à chịng bala anyị alẹng bala anyị anyang bala ịhụ nyang tụ ịhụ-anchẹ nyang wuu da lẹ.

⁶Ọ lala ahụ nyaa dachichi tụ angịlẹ ká waa ẹjẹ ba ịnyịrọ nyẹẹkpẹ da angịlẹ kị wẹẹ tụkụ ying lẹ. À mẹjẹ gede-gede nyori ahị alegbeju nya angịdẹwụ tụ angịdẹwụ nyang ịlẹ-ẹ́ ri ịngịngịhyẹ ẹ-ẹga nyang ka. Ọọwa ri ọ-ka ri ang nya ọkẹkẹnị hang ó-ri kaahị wuu-ú gbu ká Abụsalọm-ḿ jam lọhịhị.

⁷Wo mẹ, wu ịlọng kpa ká kele kaka dọhụ ju angịnyị nyang mẹ. M̀ jam kpa ẹnyị Amkpaa ya nya ịlẹhị-ịlẹhị ya ó-ri ká họ jaabwọ kam ya wẹ ka aalẹ, ọngọngọhẹ nyaa-á ka hi ji oye nyang da ka alụtụrụ koo. Ọọwa tị ka yang ju ka ẹpwụ nya akama ọ-gụ akama ọhẹ-lọhẹ ká yẹ ẹ-ẹpwụ nya ọhịhị nyang wuu.”

⁸Ọọwa, adịrahụ à wuleji lẹ, ọ kele ka hụhụ ọ-ọnụ nya ogirigba nya epweji lẹlẹ. Ụka ká angịdẹwụ nyamwụ wo adịrahụ nyị juwa lẹ, ị kele kaka dagaga jwoo lẹlẹ. Ụka ọwẹ, ala Isirẹlụ ịlẹ kị myị ẹla ju Abụsalọm wuu lẹẹ rụnyẹ rụ ka ẹpwa nya ịlaa lẹ.

⁹Ụka ọọwa, alimwawụ datị-datị nya ala Isirẹlụ juwa kpa ẹla ju awụlẹ ju bwu ụwa byi awụlẹ yẹkẹẹ, “Anụ yẹ wẹẹ, ịDevidi Adịrahụ kpá kọ chịhị da bwu ẹga nya ala iFilisitiya aluji nyahị lẹẹ, ọwa Abụsalọm à mwọọgịlẹ ku rụ hi ọpyị nyahị-ị̀ wẹ lẹka-á?

¹⁰Abụsalọm kahị tị ya ida hụ nyọka ri adịrahụ nyahị gbu ẹ-ẹwụ lẹ! Āhị tị̀ tị̄ du ka kpa iDevidi nyà kaka ri adịrahụ nyahị myịmyị mẹ-ẹ̀.”

¹¹Oja nya ẹlẹwẹ kị wẹẹ kpa ya pwụ ụrụ nya iDevidi. Ọọwa, ọ du ẹrụ tọ ịSadọkọ bala Abiyata angịkiliya lẹlẹ. Ọ byaa nyị tọ ịgabwọ nya ala iJuda wo yẹkẹẹ, “M̀ wo nyori ala Isirẹlụ ịkịla wuu nwụlanọ nyọka tịrịm ẹkpẹ kaka ri adịrahụ lẹ. Ọ tị lanyị kaanụ kem à wẹẹ yẹta rịrị ẹ-ẹkpẹ ẹ-ẹpwụ nya angịkịla wuu mẹ?

¹²Anụ kanụ ri aanam mịlẹ-mịlẹ, ká ịwọ tị chị ụka gụ enyi, anụ tị hụ́ anụ nyọka dam ọwụrụba nyà tịrẹkpẹ lẹka lẹ.”

¹³IDevidi daa ẹrụ ịnyịnyị nyị byi Amasa yẹkẹẹ, “Ọọnam kpangga ā tị́ ri. M̀ jam yang ri olegbeju nya angịdẹwụ nyam ku ọmwakpa nya iJowabụ bwu ọlẹẹlẹẹ kịlahị lẹ. M̀ kpa ẹnyị nya Ohe Oluhye ya nya ịlẹhị-ịlẹhị nyori Ohe ā nwụm kẹhị-kẹhị ó-ri kam họ jaabwọ kam ya wẹ ka!”

¹⁴Ẹla oyaya nya iDevidi há urwe ẹ-ẹga nya ala iJuda kpụ ị ye myị wuu lọkịlẹtụ ookpokpo. Ọọwa, ị du ẹrụ tọọ nyị nyà bala alegbeju ịkịla ịlẹ kị juwa tọọ mẹ lẹlẹ.

¹⁵Ọọwa, adịrahụ à yegiri nyọka nyà tịrẹkpẹ ka iJerusalẹm lẹlẹ. Ụka kọ jẹ pwụ Ihu ịJọdan, ala iJuda ịlẹ kị wẹ iGiligalụ nyọka kpọọ chị kpoye nya ihu warị kaka tọọ.

¹⁶Ụka ọọwa, iChimeyi ọnyị nya ịGẹra bwu epweji nya ịBahurim ọla iBenjamịn chị agaga kele ka Ihu ịJọdan kaka da iDevid Adịrahụ ọwụrụba ịnyịnyị.

¹⁷Ọ kpa alẹng angị ụnọ bwu imwawụ nya iBenjamịn ba ịlọmwụ. ISiba ọnchẹ nya ịSọlụ kpa anyị alẹng nyamwụ angị iwo kụrụ ịrụ bala anchẹ iwo imiiye ba ịlọmwụ kele. Ị chị agaga kele ka Ihu ịJọdan lẹ, ị pwụ ụwa jene nya adịrahụ lẹlẹ.

¹⁸Ọọwa, ị kpa iDevidi adịrahụ bala alugbiyegu nyamwụ kpoye nya Ihu ịJọdan, juwa họ ang myị ọlẹ ká adịrahụ ya nyị họ họọ lẹlẹ. Jaabwọ ká dịrahụ juwa nwụla ịlọmwụ nọ nyọka kpoye nya Ihu ịJọdan lẹ, iChimeyi à hị nọnọ ị-ịlahị nyamwụ juwa bịlọọ

¹⁹yẹkẹẹ, “Agaba Idu ee, chuchuuu, hịnyọhi ham mẹ. Deeri hi ẹla-abyị ọlẹ kam họ ẹnụ ká rụ bwu iJerusalẹm mẹ. Ā ya eje nya abyị ọwẹ wum lee ọ-kpịtịya nyamwụ myịmyị kaka.

²⁰Ayịbahị, m̀ jẹ kam họ tịpyọ lẹ. Ịnyị à du ká am à tịtị ri ọngịnyị nya ọgbanyẹ-ọgbanyẹ bwu ọpyị-adịrahụ ọlẹtẹ nya Isirẹlụ nyọka wẹ kaka tọng ahụ Agaba Idu wẹ alẹ ọlẹ lẹ.”

²¹Ọọwa, Abichayị ọnyị nya iSeruya à yẹkẹẹ, “Ọ chịla kị ka nwụ iChimeyi, chajị ọ gọlọ o-do adịrahụ ọlẹ ká Amkpaa hu.”

²²Ma, iDevidi byi Abichayị bala iJowabụ ọnyịnamwụ yẹkẹẹ, “Ḿ la ịngịngịhyẹ ka họ bala anụ anyị nya iSeruya kaka! Alẹ ọlẹ-ẹ́ ri ẹnụ kị ka nwụ ọngọngọhẹ am̀ Isirẹlụ koo. Ẹnụ nya ọkẹkẹnị à lẹẹ lẹ, chajị m̀ myịmyị ri adịrahụ nya ala Isirẹlụ alẹ lẹ!”

²³Ọọwa, ọ jahị kpata byi iChimeyi yẹkẹẹ, “M̀ ya nya ịlẹhị-ịlẹhị ya ọngọngọhẹ-ẹ́ ka nwụng ka!”

²⁴Ọọwa, iMefibochẹtị ọnyị ọtụma nya ịSọlụ à pwụ eji bwu iJerusalẹm nyọka tọ adịrahụ lẹlẹ. Ọ́ ya enyi gu ẹta nyamwụ lee ọ-pwọ ịchwọ nyamwụ lee ọ-hụ ang ịkụrụ-kụrụ nyamwụ mwiiji nyọlẹ ká adịrahụ rụ hi iJerusalẹm ka gbee kọọ nyà tịrẹkpẹ.

²⁵Ụka ká iMefibochẹtị pwụ iJerusalẹm nyọka tọ adịrahụ lẹ, adịrahụ à tọọ wo yẹkẹẹ, “IMefibochẹtị ee, ịyẹ tị́ du ká bam rụ ụka ọlaanyị ka-à?”

²⁶Ọọwa, ọ wẹ yẹkẹẹ, “À tị́ jẹ lẹ, Agaba Idu, ọwẹ kam jẹ-ẹ̀ jẹdịyẹ lịlọm ka-à wẹẹ, m̀ byi iSiba ọnchẹ nyam kọ ka gba ụnyịrẹ kpehe ham kam ka kụ bang ọ tị dam chị ọpyị.

²⁷Ọọwa, bịrịm chịkẹ-chịkẹ ẹ-ẹga nyang ya am nyị́ tịtọ nyọka bang ba ka lẹ, Agaba Idu. À tị lala olegu-ẹrụ nya Ohe Oluhye lẹ, ang ọlẹ ká yẹ kọ chịla lẹ, à họ mẹ.

²⁸Agaba Idu ee, ahị alugbiyegu nya adam wuu chịla ká ka nwụhị. À tị họm ọnahị ya iwe da ham nyọka ri ọngọhẹ ẹ-ẹpwụ nya angị kaa ri ang ẹ-ẹpwa nyang lẹ. Ẹla-ịyẹ m̄ tị́ tụtụm ka bịlẹng gụ ọwẹ wẹẹ?”

²⁹Adịrahụ wọọ yẹkẹẹ, “Á la ẹla ọhẹ ka ya gbọng myịmyị kaka. M̀ chị eje ọ-ọkịlẹtụ nyam nyori ahụ bala iSiba ā ya ọpyị nya ịSọlụ gịla awulẹ mẹ.”

³⁰Ọọwa, iMefibochetị à yẹkẹẹ, “ISiba ā ya la wuu ụbwọọmwụ mẹ, Agaba Idu. Ọlẹ ká kiji nyà pwụ ẹpwa lokpunyi wẹ lẹ, ọ nwam lẹ.”

³¹Ọlẹng ọhẹ kị wụrụ iGiliyadị bwu iRogelim warị kọ ka kpa adịrahụ chị kpoye nya Ihu ịJọdan ịnyịnyị.

³²ỊBasịlayị ọwẹ ayịdang chị okwirichi lẹ. Ọ gu ẹka iwo ineku. Ọ kpụ ụdụ lụmẹ. Ọwa-à ri ọngọlẹ kọ kpa adịrahụ la ang oriri ụka kọ juwa ị-ịMahanayim lẹ.

³³Ọọwa, adịrahụ à byoo yẹkẹẹ, “Bam wẹ iJerusalẹm mẹ, m̀ ka kpẹhị rịrịng ụ-ụwa.”

³⁴Ma, ịBasịlayị tị wọọ yẹkẹẹ, “Eheehe, ụtụrụ nyam hi kpii lẹ. M̀ tị́ ka myịmyị-ị̀ bang wẹ iJerusalẹm kaka họ ịyẹ wẹẹ, Agaba Idu?

³⁵Yẹ wẹẹ, m̀ gu ẹka iwo ineku lẹẹlẹẹ lẹ. Ịngịngịhyẹ-ẹ́ tọchị hụm jeje lụmẹ kaka. Ḿ jẹ ịpyọ nya ang oriri lee ịnya enyi ọnwanwa kaka. Alayịlọ-ọ́ dudu, ḿm̀ wo kaka. Olo kem m̄ ka ri olo hang lẹlẹ, Agaba Idu.

³⁶Ḿ dọmwụ họ ọhẹ kpụ ā ka nwụm uri okunggu ọlịịwẹ ka. Lẹẹlẹ, m̀ ka hung ẹta kpoye nya Ihu ịJọdan kem lẹ. Ọọwa nwam lẹ.

³⁷Bà ká am ā tịrẹkpẹ ka ẹpwa nya ịlọm, chajị ụka ká ugo-ọbẹhị nyam-ḿ nwà ọdanọ lẹ, kị yam nọ ẹ-ẹga kị ya adam anyị ju eji mẹ. IKimham ọnyị ọlẹng nyam tị lẹẹ lẹ. Ọwa-ā bang rụ mẹ, Agaba Idu, chajị ká họ ang myị ang kọ ri irya nyang họọ mẹ.”

³⁸Ọọwa, adịrahụ à wẹ byoo yẹkẹẹ, “Ọ hiigu. IKimham ka bam rụ, kam ka họ ang myị ang ọlẹ ká tịtọ họọ. Ang myị ang ká tị tịtọ bwu ẹga nya aalẹ, m̀ ka họọ hang ịnyịnyị.”

³⁹Ọọwa, iDevidi bala angịnyị nyamwụ wuu à kpoye nya Ihu ịJọdan lẹlẹ. Ọ ju ịBasilayị ọnụ nya ọkpahị ọ-dọọda, họ ọpyẹ̀ẹẹwahị kụrwọọ wuu lẹ, ịBasịlayị à tịrẹkpẹ rụ lẹlẹ.

⁴⁰Ụka ká angịdẹwụ nya ala iJuda wuu bala ẹhya nya angịdẹwụ nya ala Isirẹlụ kpa iDevidi Adịrahụ chị kpoye nya Ihu ịJọdan kpá, ọ rụ ka iGiligalụ lẹlẹ. Ọ kpa iKimham ba ịlọmwụ kele.

⁴¹Ọọwa, ala Isirẹlụ wuu à ka ẹga nya adịrahụ lẹ, ị byoo yẹkẹẹ, “Agaba Idu ee, anyị ọ tị́ la ká ala iJuda aanahị me ịwa nyaa pwoku nyọka kpang chị rụ lẹ, kị yoyi ẹpẹtẹ kaka kpang bala alugbiyegu nyang bala angịnyị nyang wuu rụ kpoye nya Ihu ịJọdan mẹ?”

⁴²Ọọwa, ala iJuda à wẹ yẹkẹẹ, “Ahị họ ịnyị chajị adịrahụ ri ọọnahị. Oyina-à tị ri agbama nyanụ-ụ̀ wẹ mẹ? Ọ ya ịngịhyẹ hahị ri lee ọ-ya ịngịhyẹ gà hahị hiinu-ūú?”

⁴³Ọọwa, ala Isirẹlụ à wẹ yẹkẹẹ, “Ahị lụbwọ-lẹta ugbabwọ iwo chiriri mwụ aba baanụ wẹ́ẹ̀. Ịyẹ tị́ du kanụ huuhi tẹbẹlẹ ịịwẹ ene-è? Anụ deeri nyori ahị à ri angị me irya nyọka kpa adịrahụ ọlẹ nyà họhẹ-họhẹ lẹ-ẹ́?” Ị juwa kpa ẹla ju awụlẹ ịnyịnyịịnyị, ala iJuda tị hu ọkọ nọ u-uhye ẹ-ẹpwụ nya ẹla ọwẹwẹ ala Isirẹlụ.