Read idege 2 ỊSAMWẸLỤ 2 Bible Online

2 ỊSAMWẸLỤ 2 - idege bible

2 ỊSAMWẸLỤ 2

¹Ụka kọ nọ chẹẹ lẹ, iDevidi à tọ Amkpaa wo yẹkẹẹ, “M̄ tịrẹkpẹ ka epweji ọhẹ nya iJuda mẹ-ẹ̄ẹ́?” Amkpaa wẹ byoo yẹkẹẹ, “Ee, kele mẹ.” IDevidi myịmyị tọọ wo yẹkẹẹ, “Epweji oyina kpangga m̄ tị́ ka ka?” Amkpaa wẹ byoo yẹkẹẹ, “Epweji nya iHebirọn ịnyị.”

²Ọọwa, iDevid à kele ka iHebirọn lẹlẹ. Ọ kpa ịhụ nyamwụ angị ịmiiye dịrẹ ịlọmwụ. Ẹnyị nyaa ri Ahinowam ọlẹ kọ ye bwu iJesiryẹlụ bala Abigẹlụ ahụ nyamwụ ọlẹ kọ ri ahụ-ogu nya ịNabalụ ọla ịKaamẹlụ.

³IDevidi kpa angịnyị nyamwụ tụ alugbiyegu nyaa ba ịlọmwụ ịnyịnyị. Ọọwa, ị kele kaka kụ e-epweji ị-ba iHebirọn ba lẹlẹ.

⁴Ọọwa, ala iJuda à wẹ iHebirọn lẹ, ị ya ida hụ iDevidi kọ ka ri adịrahụ nya iJuda lẹlẹ. Ụka ká iDevidi wo oja ya ala ịJabẹchị ọla iGiliyadị nyị ju ogu nya ịSọlụ eji,

⁵ọ du ẹrụ kaka byaa yẹkẹẹ, “Amkpaa ā wahị hanụ chajị nyọlẹ kanụ mẹ ihi ojuju nyanụ ọlẹga nya adịrahụ nyanụ jẹ bwula o-jwoo eji mẹ.

⁶Amkpaa ā kịnyaa juwa họnụ ọnahị bala ọ-họ ọnụ ọmyịmyị nyamwụ jịra ẹ-ẹga nyanụ mẹ. Am ayịdang ka kpanụ yẹẹyẹẹ chajị nya ang ọlẹ kanụ họ-ọ̀ wẹ.

⁷Anụ-ụ̀ godayị giri-giri, kanụ ju ugbodu mẹ. ỊSọlụ adịrahụ nyanụ lẹ-ẹ, ọ gbu lẹ. Ala iJuda tị hum adịrahụ nyaa lẹ.”

⁸Ụka ọwẹ, Abụnẹẹ ọnyị nya ịNẹẹ à ri ọgẹwụ nya angịdẹwụ nya ịSọlụ lẹ. Ọ kpa Ichibochẹtị ọnyị nya ịSọlụ rụ ka ịMahanayim.

⁹Ọọwa, Abụnẹẹ à hu Ichibochẹtị ri adịrahụ nya ịpyị nya iGiliyadị wuu lẹlẹ. Epweji ịlụwa ri Achẹẹ[1] bala iJesiryẹlụ bala Ifurem bala iBenjamịn bala ọpyị nya Isirẹlụ wuu.

¹⁰Ichibochẹtị gu ẹka iwo ine ụka kị hwoo adịrahụ nya ala Isirẹlụ ọri adịrahụ ẹka imiiye. Alimwawụ nya iJuda tị lẹ, ịwa myị ju iDevid lala adịrahụ nyaa.

¹¹Ọ hụ i-iHebirọn ri adịrahụ nya iJuda ẹka irwiye da ọya ịrwọnyẹ gbẹgbịlẹ.

¹²Ụka ọhẹ lẹ, Abụnẹẹ bala angịdẹwụ nya Ichibochẹtị à hu ang bwu ịMahanayim kele ka epweji nya iGibyọn lẹlẹ.

¹³IJowabụ ọlẹ ká ẹnyị nya ịnamwụ ri iSeruya bala angịdẹwụ nya iDevidi à kele ka taa ẹ-ẹmwụ-enyi ọlụwa lẹlẹ. Alebwo ọhẹ hụhụ o-oye ọhẹ nya ẹmwụ-enyi ọwẹ jahị da alebwo ọkịla kị hụhụ o-oye ọkịla nyamwụ.

¹⁴Ọọwa, Abụnẹẹ à be ẹkọ byi iJowabụ yẹkẹẹ, “Ahị chị ikolobya nyahị ịhyẹ dawụlẹ kị ma awụlẹ yẹ mẹ-ẹ̀.” Ọọwa, iJowabụ à myị jwoo lẹlẹ.

¹⁵Ọọwa, angịnyị nya Ichibochẹtị angị iwo kụrụ imiiye ịhyẹ bwu imwawụ nya iBenjamịn bala angịnyị nya iDevidi angị iwo kụrụ imiiye à wuleji jahị dawụlẹ lẹlẹ.

¹⁶Ọngọngọọng nyaa yụbwọ dụrụ oluya nyamwụ i-inyi kịrẹkpẹ, ya oge gwoo a-aka hùrúmm. Ọọwa, ịwa alebwo imimiiye ịwẹ wuu à gbu chụwa bẹlẹ-bẹlẹ lẹlẹ. Bwu ụka ọwẹ kịlahị lẹ, ị̄ wụrụ ẹga ọla iGibyọn ọwẹ “Ọpyị nya Ìge”[2] lẹlẹ.

¹⁷Ọọwa, ẹwụ ọdada à kpeji lẹlẹ. Angịdẹwụ nya iDevidị kụrụ angịdẹwụ nya Abụnẹẹ bala ala Isirẹlụ wuu.

¹⁸IJowabụ bala Abichayị bala Asahẹlụ anyị alẹng angị ịta nya iSeruya juwa ụ-ụwa. Asahẹlụ ayịdang la ịmịla lala apyị.

¹⁹Ọ rụnyẹ ku Abụnẹẹ la ọchụrụ tịrẹkpẹ ka.

²⁰Ụka ká Abụnẹẹ chẹhị kẹkpẹ, ọ tọ wo yẹkẹẹ, “Asahẹlụ ee, ahụ à wẹ lẹ-ẹ́?” Asahẹlụ wọọ yẹkẹẹ, “Ee, am ịnyị.”

²¹Ọọwa, Abụnẹẹ à byoo yẹkẹẹ, “Yẹm chịng, ká tụ́tụ ku ọngọhẹ nya angịdẹwụ ịkịla ịwẹ kaka wu, ká noo ang ịlẹ kọ la mẹ.” Asahẹlụ-ụ́ tị hwabwọ la o-kwoo ku ka.

²²Abụnẹẹ myịmyị byoo yẹkẹẹ, “Hwabwọ la o-kum-m̀ ku wẹ mẹ. Ọ-họ kam ka kpụbwọ wẹ uhye nyang tị́ ri anyị? Ḿ ka jẹ-ẹ̀ la o-wo lawụlẹ bala iJowabụ ọnyịnang kaka.”

²³Asahẹlụ-ụ́ tị myị hịnyọ ka. Ọọwa, Abụnẹẹ à chị ọkpụ nya ụwangga nyamwụ pìri kẹkpẹ kaka gu Asahẹlụ ẹ-ẹpwụ bwurwoo kpoye kaka hyehe ẹ-ẹkpẹ lẹlẹ. Ọọwa, ọ hị mileji ụ-ụwa, gbu ọ-ọgbọgba lẹlẹ. Ọng myị ọng kọ jẹ̀ ka pwụ ẹga ká Asahẹlụ gbu da-à wẹ kaa kpụba, godayị rịrị ụ-ụwa chịng.

²⁴IJowabụ bala Abichayị tị dọmwụ nyọka ku Abụnẹẹ. Lụka nya ẹnụ obyibyi lẹ, ị jẹ kaka pwụ ikiti nya Ama ọlẹ kọ ji ka ọmwẹnụ-ụtụrụ nya iGiya ụ-ụgbẹyị o-bwu ka ugbileji nya iGibyọn lẹlẹ.

²⁵Ọọwa, angịdẹwụ i-bwu imwawụ nya iBenjamịn à tụ ịlaa michi dagaga ju Abụnẹẹ lẹ, ị ya àgba weji godayị uhye nya ikiti ọhẹ lẹlẹ.

²⁶Ọọwa Abụnẹẹ à be ẹkọ tọ iJowabụ wo yẹkẹẹ, “Ẹwụ āhị ka dawụlẹ pyịyọọ lẹlẹ-ẹ́? Olujwo ọtọtọ kem ọwẹ à ka kpa wahị ụka ohyẹẹkpẹ lẹ. Byi angịdẹwụ nyang kị bahiihi mẹ. Aanịna ahị bala anụ à ri lẹ.”

²⁷IJowabụ wẹ byoo yẹkẹẹ, “M̀ kpa ẹnyị nya Ohe Oluhye ọlẹ kọ juwa hịhị ya nya ịlẹhị-ịlẹhị ya ó-ri ẹla ọlẹ ká ya wẹ ka ịnọ, ijuju-ijuju lụtụrụ angịnyị nyam à ka bà la o-kunu ku lẹlẹ.”

²⁸Ọọwa, iJowabụ à chị opyike lẹ, angịdẹwụ nyamwụ à bà la o-ku ala Isirẹlụ lẹlẹ. Lẹ, ẹwụ à kpụba lẹlẹ.

²⁹Ọọwa, Abụnẹẹ bala angịdẹwụ nyamwụ à chẹwụ bwu Ọkpọọ nya ịJọdan lodu ọọwa wuu lẹlẹ. Ị kpoye nya Ihu ịJọdan lẹ, ị kịnyaa la ẹwụ ọchịchị ọwẹ lụka nya ọhyẹnụ nya ahị ọpyẹpyẹ ọọnamwụ gbee kị pwụ ịMahanayim lẹlẹ.

³⁰Ụka ká iJowabụ hwabwọ la Abụnẹẹ okuku, ọ tụ angịnyị nyamwụ wuu guru. Ụka kọ waa, ọ jẹ ká ẹwụ ri angịnyị nyamwụ angị iwo kụrụ ihikichu datị hi Asahẹlụ.

³¹Angịdẹwụ nya iDevidi tị lẹẹ nwụ angị ohu ịta da angị iwo ịrwọnyẹ (360) nya angịnyị nya Abụnẹẹ i-bwu imwawụ nya iBenjamịn.

³²IJowabụ bala angịnyị nyamwụ hu ogu nya Asahẹlụ kpa ka ju eji i-iworu nya ugbiyegu nya adamwụ anyị ị-ịBẹtịlẹhẹm. Ị chẹwụ tịrẹkpẹ lodu-odu ọwẹ gbee kị nyà pwụ iHebirọn lewu-ụtụrụ lẹlẹ.