Read idege 2 ỊSAMWẸLỤ 20 Bible Online

2 ỊSAMWẸLỤ 20 - idege bible

2 ỊSAMWẸLỤ 20

¹Ụka ọọwa, olukpilo ọhẹ juwa i-iGiligalụ kị wụrụ ịChẹba. Ẹnyị nya adamwụ ri iBikiri ọlẹ kọ bwu imwawụ nya iBenjamin. Ọ kpáa lẹkụrwẹ ju ọnụ, chọ gboo lẹ, ọ da ọna gboo ịnyịnyị byi angịnyị yẹkẹẹ, “Anụ ala Isirẹlụ, an yụbwọ la iDevidi ọnyị nya iJesi beji mẹ oo! Áhị ka bọọ jẹ kaka oo, āhị rụ ka ẹpwa mẹ!”

²Ọọwa, ala Isirẹlụ à nyẹẹkpẹ da iDevidi lẹ, ị ba ịChẹba rụ lẹlẹ. Ala iJuda tị lẹ, ị yẹba iDevidi juwa bọọ jẹ bwu ịJọdan kele ka iJerusalẹm.

³Ụka ká iDevidi pwụ ẹpwa nyamwụ i-iJerusalẹm, ọ go ịhụ-anchẹ iwo nyamwụ ịlẹ kọ ya kpẹhị rịrị ẹpwa nyamwụ ene kọọ rụ lẹ, ọ chaa ebwo hi ịlọmwụ yaa kụ ẹ-ẹga kị ka gbaa lẹlẹ. Ọọ ya ang ịlẹ kị tịtọ haa, ọ́ ka ẹga nya ọngọngọhẹ nyaa kaka. Ịịwẹ ị hụ ụbwaa-ụbwaa lala ịhụ-egu gbee ẹ-ẹpwụ nya ọhịhị nyaa wuu lẹlẹ.

⁴Ọọwa, adịrahụ a byi Amasa yẹkẹẹ, “Wụrụ angịdẹwụ nya ala iJuda da lawụlẹ ká kpaa warị wẹ ẹgẹlẹ ẹnụtụrụ ọhata bwu alẹ kịlahị.”

⁵Amasa kele nyọka wụrwaa, ọ́ tị tịrẹkpẹ ụka ọlẹ ká adịrahụ hunọ ka.

⁶Ọọwa, adịrahụ à byi Abichayị yẹkẹẹ, “ỊChẹba olukpilo ọwẹ juwa ka hu akama hahị gụ ọlẹ ká Abụsalọm ya hahị wẹẹ. Kpa angịdẹwụ nyam kele kanụ kwoo ka wu mẹ. Ó-ri ịnyị ka, ọ ka rụ ka epweji ọlẹ kị me ugulọ dagaga ju ọhẹ ọlẹ kahị ka jwọọ wu myị ka.”

⁷Ọọwa, angịdẹwụ nya iJowabụ bala angịgbeji ẹ-ẹpwa nya adịrahụ bala angịdẹwụ ịkịla wuu à wuleji bwu iJerusalem ba Abichayị nyọka ku ịChẹba lẹlẹ.

⁸Ụka kị jẹ ka pwụ ẹjwọ ọtụka ọla iGibyọn lẹ, Amasa à taa juwa jẹ bwu ịlahị nyaa warị lẹlẹ. IJowabụ ju agidi nya ẹwụ loge chọhụ. Ụka kọ juwa kịlahị nyọka dọnụ chị Amasa lẹ, oge nyamwụ à gba deeji lẹlẹ.

⁹IJowabụ à byi Amasa yẹkẹẹ, “À há mẹ, ẹnwa?” Lẹ, ọ yụbwọ upwuriri woo pyẹẹ ị-ịchwọ kọ ka jwoo ọnụ lẹlẹ.

¹⁰Amasa-á tị kpahị ju nyori iJowabụ kpa oge ụ-ụpụpịla juwa ka. Ọọwa, iJowabụ à ya oge ọọwa gu Amasa ẹ-ẹpwụ hurumm la, ebwu nyamwụ à yẹbwọọ gu e-eji lẹlẹ. Ọ gbu ọ-ọgbọgba lẹ, iJowabụ-ụ́ myịmyị họọ ịngịhyẹ gụ ọọwa kaka. IJowabụ bala Abichayị ọnyịnamwụ à kịnyaa juwa ku ịChẹba lẹlẹ.

¹¹Ọngọhẹ nya angịdẹwụ nya iJowabụ hi godayị chahị ju ogu nya Amasa. Ọọwa, ọ juwa da akọ gboo yẹkẹẹ, “Ọng myị ọng kọ ji oye nya iJowabụ bala iDevidi Adịrahụ lẹ aalẹ, ọngọọwa-ā ba iJowabụ me oo!”

¹²Ogu nya Amasa dụwa ẹ-ẹpwụ nya ịwọ nyamwụ ẹ-ẹpwarịrị nya ụgbẹyị. Ọngọdẹwụ nya iJowabụ ọwẹ yẹ ká ọng myị ọng kọ chịpwụrụ bwu ụwa juwa chị godayị ụ-ụwa. Ọọwa, ọ gbiloo da ka ẹpwụmẹ lẹ, ọ ya apwụ dakụrwọọ ụ-ụwa lẹlẹ.

¹³Ụka kị hu ogu ọwẹ kpa rụ hi ụgbẹyị kpá lẹ, ọng myị ọng wuu à juwa dịrẹ iJowabụ juwa ku ịChẹba lẹlẹ.

¹⁴IChẹba chịpwụrụ bwu imwawụ ọnyị myị ọnyị nya Isirẹlụ gbee kọọ pwụ Ebẹlụ-ịbẹtị-ịmaaka. Ọọwa, alogang nya iBikiri wuu à tụguru, hu ang dịrọọ yẹtẹ chị epweji ọọwa lẹlẹ.

¹⁵Angịdẹwụ nya iJowabụ wo lẹ, ị wẹ kaka dokoko ju epweji ọwẹ lẹlẹ. Ị me ang ẹga kị ka bwu wule ugulọ nya epweji ọọwa. Ị wu itiwe nya egwalọ nya epweji ọwẹ hụrwa-hụrwa kị ka tụrụ.

¹⁶Ọnyang ọ-jẹ ẹla ọhẹ tị juwa e-epweji ọwẹ. Ọ dakọ gboo byi iJowabụ yẹkẹẹ, “Anụ ke ụrụ oo! Anụ ke ụrụ! Anụ byi iJowabụ kọ kẹwẹ wẹẹ. M̀ tịtọ kam ka ya ẹla tọọ.”

¹⁷IJowabụ kele lẹ, ọ tọọ wo yẹkẹẹ, “Ahụ à ri iJowabụ lẹ-ẹ́?” IJowabụ woo yẹkẹẹ, “Am à ri ịnyị lẹ.” Ọọwa, ọnyang ọwẹ à byoo yẹkẹẹ, “Ke ụrụ lam wẹẹ.” Ụka ká iJowabụ byoo ọwa nyị juwa ke ụrụ lẹ, ọnyang ọwẹ à byoo yẹkẹẹ,

¹⁸“Lụka nya oyi onyogo lẹ, angịnyị kaa kpa byi awụlẹ yẹkẹẹ, ‘Ẹla myị ẹla ká tịtọ lẹ, à kele ká alepweji nya Ebẹlụ ā jung irya mẹ.’ Ịnyị ị tịị họ ịnyịlẹhị lẹ.

¹⁹Epweji nyahị ọlẹ ri epweji nya okpunyi bala o-ju ihi am̀ Isirẹlụ. Ịyẹ tị́ du kanụ wẹẹ ka ta epweji ọlẹ kọ lala ịnanjwo ayireji mẹ? Anụ tịtọ nyọka bịrị epweji ọlẹ kọ rị nya Amkpaa lụbwọ-lẹta-á?”

²⁰IJowabụ wọọ yẹkẹẹ, “Ịgọgọ ẹnẹnẹhẹ-ẹ̄! Ḿ juwa ka ta epweji nyanụ ayịreji koo!

²¹Iirya nyahị à wẹ koo. Ọlẹng ọhẹ kị wụrụ ịChẹba ọnyị nya iBikiri ọlẹ kọ bwu ọpyị ilikit nya Ifurem dọmwụ nya egbeju ọnyọọngịrị ọlala ta iDevidi Adịrahụ lẹ. Anụ gbọọ dodehe ham mẹ aalẹ, ahị ka tụ hi epweji nyanụ lẹ.” Ọnyang ọọwa wẹ byoo yẹkẹẹ, “Ọ hiigu. Ahị ka ya egbeju nyamwụ da ẹjwọ wule ugulọ wanụ lẹ.”

²²Ọọwa, ọnyang ọwẹ a tịrẹkpẹ ka epweji kaka ya irya nyamwụ ọwẹ je alụwa lẹ, ị chị ịChẹba egbeju nmuru lẹ, ị ya da kpoye nya ugulọ kịla iJowabụ lẹlẹ. Ọọwa, ọ chị ẹkụrwẹ wụrụ angịdẹwụ nyamwụ tịrẹkpẹ hi epweji ọwẹ lẹ, ịwa wuu à rụ ka ẹpwa lẹlẹ. iJowabụ nyà wẹ ẹga nya adịrahụ i-iJerusalẹm.

²³IJowabụ à ri olegbeju nya angịdẹwụ nya ala Isirẹlụ wuu myịmyị lẹ. IBenaya ọnyị nya iJehoyada ri olegbeju nya angị gbe iDevidi.

²⁴Adoniram[15] kpẹhị rịrị ụkụrwọ ọ-họ ligwabwọ. IJehchafatị ọnyị nya Ahiludu ri ọng kpẹhị rịrị apwụ nya ego ịlẹpwa nya adịrahụ.

²⁵ỊChẹva ri akịraa nya ịkọtị. ỊSadọkọ bala Abiyata anyị ri angịkiliya.

²⁶Ira kọ bwu epweji nya ịJayii ri ọngọkiliya ọhẹ nya iDevidi ịnyịnyị.