Read idege 2 ỊSAMWẸLỤ 21 Bible Online

2 ỊSAMWẸLỤ 21 - idege bible

2 ỊSAMWẸLỤ 21

¹Lụka nya adịrahụ oriri nya iDevidi adịrahụ, ūhī ọtụka-ọtụka ji ẹ-ẹpwụ nya ẹka ịta gbẹgbịlẹ. Ọọwa, iDevidi a tọ Amkpaa wo ang ọ-kpụ ọmwụ nya ūhī ọọwa lẹlẹ. Amkpaa byoo yẹkẹẹ, “Ūhī ọlẹ kọ da weji-ì wẹ ri ajị nya ọngịnyị ọnwụnwụ. ỊSọlụ bala alugbiyegu nyamwụ nwụ ala iGibyọn.”

²Ala iGibyọn ayịdang á ri ala Isirẹlụ ka. Ị ri angị ịmanyị-ịmanyị nya ala Amọ ịlẹ kị hi lọhịhị. Ala Isirẹlụ lẹẹ nwa iro ịwa nyị́ ka nwaa ka. Ọhụkoko nya ịSọlụ o-ri adịrahụ nya ala Isirẹlụ tụ ịnya iJuda tị du kọ lẹẹ maga nyọka taa ayịreji gbanggbang. Ọọwa, iDevid à wụrụ ala iGibyọn kaka jịra lẹ,

³ọ taa wo yẹkẹẹ, “Ịyẹ m̄ tị́ ka họ hanụ lẹẹ mẹ? M̀ tịtọ kam ka jwo ijwo hanụ chajị nya ang onyobyi ọlẹ kị họnụ lụka ọkẹkpẹ, chajị kanụ ka họpyẹ̀ẹẹ kụrụ angịnyị nya Amkpaa.”

⁴Ala iGibyọn wọọ yẹkẹẹ, “Ẹẹla nyọka jwo ijwo lokpoko u-uhye nya ẹla ọlẹ kahị kpa ta ịSọlụ bala ugbiyegu nyamwụ koo. Áhị tị ka jẹ-ẹ̀ ya ị wu ọngọngọhẹ am̀ Isirẹlụ nwụ u-uhye nya ọọwa koo.” IDevidi taa wo myịmyị yẹkẹẹ, “Ịyẹ à tị́ haanụ? Ang ọlẹ kọ baba hanụ lẹ, anụ ya jem tị̀tị̄ mẹ, m̀ ka họọ hanụ.”

⁵Ọọwa, ị wẹ byi iDevidi yẹkẹẹ, “ỊSọlụ ayịdang à tịtọ kọ ka tahị wuu ayịreji la ọngọngohe nyahị ka hi lahị am̀ ọ-ọpyị nya Isirẹlụ kaka lẹ.

⁶Lẹẹlẹ, ya anyị ịtụma alẹng irwiye nyamwụ hahị mẹ. Ahị ka jwaa orinwa i-ijata nya Amkpaa i-iGibiya ọlẹ kọ ri epweji nya ịSọlụ adịrahụ ọlẹ ká Amkpaa chụ.” Ọọwa, adịrahụ a byaa yẹkẹẹ, “M̀ ka pẹhyaa junu ụ-ụbwọ.”

⁷IMefibochẹtị ọnyị nya iJonatan ri ọnyị ọtụma nya ịSọlụ, iDevidi tị chọọ da ọọ-lajị nya iro ọlẹ kọọwa bala iJonatan nwa tawụlẹ.

⁸Ọ ya Aamọnị bala iMefibochẹtị anyị alẹng imiiye ịlẹ ká iRisipa ọnyị nya Aya ma ha ịSọlụ haa. Angịkịla ịlẹ ká iDevidi ya ha ala iGibyọn ịnyịnyị ri anyị alẹng angị ịrụ ịlẹ ká iMerabụ ọnyị nya ịSọlụ ma ha Adirẹlụ ọnyị nya ịBasilayị ọla iMehola.

⁹IDevidi ya angịwẹ wuu ha ala iGibyọn lẹ, ị jwaa orinwa ọ-ọgbọdọ ọhẹ ị-ịlahị nya Amkpaa lẹlẹ. Ị nwụ angị irwiye ịwẹ wuu gbu lawụlẹ ụka ookpokpo pwoku ụka nya ọmwụ ọdada nya ịbali ọchịchị.

¹⁰Ụka ọọwa, iRisipa ahụ-ọnchẹ nya ịSọlụ hu apwụ nya owuru ọkpakpa da u-uhye nya ẹjwọ ọhẹ nyọka ke ịlọmwụ lẹ, ọ hụhụ ụ-ụwa chahị ju egu ịwẹ lẹlẹ. Ọ hụ ụwa bwu ọmwụ ọdada nya ang-ẹrụ ọchịchị gbee da ka ụka nya enyi ododo. Alẹnụ ọ kaa ku epwu hi egu ịwẹ. Lụka nya odu ohihi, ọ kaa ku iyo ịlẹpwamẹ hyaa ịnyịnyị.

¹¹Ụka ká iDevidi wo ang ọlẹ ka iRisipa họ-ọ̀ wẹ,

¹²ọ kele ka ye ekpinegu nya ịSọlụ bala ịnya iJonathan ọnyị nyamwụ bwu ẹga nya ala ịJabẹchị ọla iGiliyadị. Ala iGililyadị lẹẹ go egu nyaa yoyi bwu ojiya nya ala ịBẹti-ịchan ẹga ka ala iFilisitiya gyaa chọpịla ẹnụ kị nwụ ịSọlụ ọ-Ọgbọdọ nya iGilibowa.

¹³IDevidi go ekpinegu nya ịSọlụ bala ịnya iJonatan tụ ịnya alẹng angị irwiye ịlẹ ká ala iGibyọn ju orinwa.

¹⁴Ọọwa, i jwaa eji wuu i-iworu nya iKichi adịda nya ịSọlụ i-iSela o-ọpyị nya iBenjamin lẹlẹ. Ị họ kpẹẹkpẹẹ jaabwọ ká adịrahụ ya. Ụka kị họ ịnyị kpá lẹ, Ohe Oluhye a wẹ abwọ ịlẹ kị rị chajị nya ọpyị nyaa lẹlẹ.

¹⁵Ala iFilisitiya dẹwụ ta ala Isirẹlụ myịmyị. IDevidi bala angịnyị nyamwụ kele kaka dẹwụ ọọwa. Lụka nya ẹwụ ọọwa, ịnyịrọ chị iDevidi pyẹpyẹ.

¹⁶Ụka ọọwa, ogirima ọhẹ ọlẹ kị wụrụ Ichibibenọbụ ọnyị ọtụma nya ịRefa kpa ụwangga nya okpoko ọnyọmịla ọlẹ ká ilo nyamwụ lala ang ọ-myị̀ okolo ịta ba ẹhya. Ọ kpa oge onyeewe ụ-ụwa ịnyịnyị. Ọ yẹ iDevidi dada hi pyịnyẹng kọ ka nwọọ.

¹⁷Abichayị ọnyị nya iSeruya tị wẹ kaka da iDevidi ụbwọ lẹ, ọ nwụ ogirima ọọwa lẹlẹ. Ọọwa, angịnyị nya iDevidi a byoo yẹkẹẹ, “Alẹ ba lẹ! Á ka baahị ka ẹwụ gụ ọlẹ kaka! Ahụ à ri ẹngịrị ọlịlahị nyahị ahị ala Isirẹlụ lẹ. Āhị ka ya iwe da ọ ka wo koo!”

¹⁸Ụka kọ nọ chẹẹ, ị da ẹwụ ọkịla ta ala iFilisitiya ị-ịGọọbụ. Ụka ọwẹ iSibekayị ọla iHucha a nwụ ogirima ọkịla ọlẹ kị wụrụ ịSafụ lẹ.

¹⁹Ụka ká ẹwụ ọkịla myịmyị kpeji ị-ịGọọbụ, Elihanan ọnyị nya ịJayii ọla ịBẹtịlẹhẹm nwụ iGolayatị ọla ịGaatị ọlẹ ká ekilo nya ụwangga nyamwụ hye lala ojekpa ọnapwụ.

²⁰Ẹwụ ọkịla ọhẹ myịmyị kpeji ị-ịGaatị. Olugbẹnyị lẹ, ogirima ọtụka ọhẹ juwa kọ ju akachụ ịrwọnyẹ a-abwiye-abwiye bala achụụ ịrwọnyẹ a-atiye-atiye kọ ri ọnyị ọtụma nya igirima.

²¹Ogirima ọọwa hu ọnụ da ala Isirẹlụ lụmẹ. Ọọwa, iJonatan ọnyị nya ịChama ọnyịnịna nya iDevidi à nwọọ lẹlẹ.

²²Angị ine ịwẹ ri anyị ịtụma nya igirima ịla ịGaatị. IDevidi bala angịdẹwụ nyamwụ à tị nwaa wuu lẹ.