Read idege 2 ỊSAMWẸLỤ 22 Bible Online

2 ỊSAMWẸLỤ 22 - idege bible

2 ỊSAMWẸLỤ 22

¹Ụka ká Amkpaa chị iDevidi da bwu ẹpwụtụbwọ nya ịSọlụ bala aluji nyamwụ ịkịla kpá, iDevidi à mwu eje ọlẹ ha Amkpaa lẹ.

²Ọ mwu eje ọọwa yẹkẹẹ, “Amkpaa ri ọngọ chẹwụ kem̄, ri ẹga ọkpịbaa ọtụka bala ọngọchịmda.

³Ohe Oluhye nyam à ri ẹwụ ọ-chike nyam lẹ, ẹga nyamwụ m̄ kaa kpịbaa lẹ. Ọ chẹwụ kem lala ọkụmada, ọ ri ọngịrị ọ-ya ọchịda ham, ọ ri ochirigogo nyam bala ẹga ọkpịbaa nyam. Ọwa-à ri ọngọchịmda lẹ. Ọ kaa chịm da bwu ẹpwụtụbwọ nya alabwẹga.

⁴M̀ wụrụ Amkpaa ọlẹ kọ chịla o-gwogbo ha, ọ chịm da bwu ẹga nya aluji nyam.

⁵“Igu gu ágba lala enyi yẹm dada, igbachịwụ myị̀ yịlọlọ lala enyi kaka birim.

⁶Agba nya igu rịm mẹnẹ-mẹnẹ, iworu gbụrụ ụnya da gbem.

⁷M̀ wụrụ Amkpaa bwu ẹpwụ nya akama nyam, m̀ wụrụ Ohe Oluhye nyam bịlọọ ụbwọ ọdada. Ọ wo omyi nyam pwụ ube nyamwụ, ọ ke ụrụ wo ida nya ụbwọ ọdada ọlẹ kam je.

⁸“Odehe hụ́ kpákpakpaakpa, hụ́ jigi-jigi, itiwe nya uhye-ọgba hụ́ kpùka-kpuka, ị che láta-lata chajị Ohe Oluhye ju agbama.

⁹Ịmwụ kpehe kpúru-kpuru bwu ikwinyi nyamwụ, ila ọ-rụ ang kpehe bwu ọnụ nyamwụ, awụrụ-ila cha kọọọ bwu ụwa ịnyịnyị.

¹⁰Ọ pyẹ uhye-ọgba maaa, ọ hireji warị, egbamwụ ilekpeleji nya apatẹ nyamwụ chị owu kpịlẹ.

¹¹Ọ gba kụ alegu-icherubu, hụ̀ rụ jaaa, juwa jẹ rụ a-achwọ nya igbachịwụ.

¹²Ọ ya ukpowu nwụ ịnawụ kụrụ ịlọmwụ, ke ịlọmwụ legbamwụ nya enyi onyinyi ịlẹ kị chị owu kpịlẹ.

¹³Apya chị kpowu-kpowu kpehe, la ahịgboo hụ́ myịrị-myịrị i-ijata nyamwụ.

¹⁴Amkpaa kpụ ịkpala bwu uhye-ọgba, Agụgụ kpụ ịkata gbirong-ng.

¹⁵Ọ da ịcha nyamwụ nyí aluji epepe, apya nyamwụ chị ila kpowu-kpowu, aluji mwụ ata bịmwụ.

¹⁶Bwula alibyi ọlẹ ká Amkpaa ya la aluji nyamwụ, bala ịkata ọlẹ kọ kpaa, Eji nya ihu pẹ̀tẹẹ dụwa kẹnị-kẹnị, Itiwe nya odehe wụ hụrwa-hụrwa chị odehe.

¹⁷“Ọ bwu uhye kpátakaa weji pẹ̀tẹẹẹ kaka yụbwọ chịm, gbilem kpehe hi ụjẹ-ẹmwụ.

¹⁸Ọ gbam kpehe hi ụbwọ nya aluji nyam ịnyịịngịrị, bwu ẹpwụtụbwọ nya angị bam ẹtẹ, ị lọngịrị kịlam kịla.

¹⁹Ẹnụ kam ji ẹpwụ nya akama, ẹnẹwẹ-ẹnẹwẹ ị wẹ kaka mwẹla tam lẹ, Amkpaa tị dam ụbwọ.

²⁰Ọ gbam kpehe ka ẹga kam ka jẹ-ẹ̀ gbádu, ọ chịm da chajị m̀ họ́ọ.

²¹“Amkpaa nwụm uri chajị m̀ họ ang ọnyịịla, ọ wahị kụrụm chajị ḿ da ẹlẹlẹhẹ ka.

²²M̀ ju ihi nya ehile nya Amkpaa, ḿ nyẹẹkpẹ da Ohe Oluhye nyam kaka họ ang onyobyi ka.

²³M̀ kpa ehile nyamwụ kpẹẹkpẹẹ, ḿ pẹhi ọmẹjẹ nyamwụ deeji ka.

²⁴Ḿ la abyị ẹ-ẹga nya Ohe Oluhye ka, m̀ chị ịlọm ịgọ hi ang onyobyi ọhọhọ.

²⁵Amkpaa nwụm uri chajị m̀ họ ang ọnyịịla, chajị ḿ da ẹlẹlẹhẹ a-ahị nyamwụ ka.

²⁶“Angị myị ẹla jung, à tịtị myị ẹla jwaa, angị la kpẹẹkpẹẹ, à tịtị la kpẹẹkpẹẹ ẹ-ẹga nyaa.

²⁷Angị kpa ịlaa charị-charị ẹ-ẹga nyang, à ka mẹ ọcharị-charị nyang jaa, à tịị kpahị ijwo-ijwo ta angị ri alọkwọ.

²⁸À kaa chị angị la dụmwọọ da, à tịị chị oyoyi ju alọbọọchẹ.

²⁹“Amkpaa ee, ahụ à ri ahịgboo nyam lẹ, à kaa tụ ukpowu ọlẹga nyam kịnyaa.

³⁰Bwula ọngịrị nyang m̀ ka mwẹla ta aluji nyam myị, Bwulang ahụ Ohe Oluhye nyam, m̀ ka be ọ̀hwọọ nya aluji ene myị.

³¹“Ang ịlẹ ká Ohe Oluhye kaa họ la kpẹẹkpẹẹ, ẹla ọlọnụ nyamwụ ju ọdahịhile. Ọwa ayịdang ri ọkụmada nya angị tịtọ nya ẹga ọkpịbaa ka ẹga nyamwụ.

³²Ọngọngọhẹ-ẹ́ ri Ohe Oluhye dala Amkpaa kaka. Ọwa kẹnẹ-kẹnẹ à ri ẹjwọ okeehi lẹ.

³³Ohe Oluhye ọlẹ à ri ẹga ọkpịbaa ọtụka nyam lẹ, ọ họ ká ụgbẹyị nyam ju okpunyi.

³⁴Ọ họ ká ẹpẹtẹ nyam jẹ egeji lala ịnya apyị, juwa kpam lokpunyi tụ ịgbọdọ da.

³⁵Ọ mẹ ẹwụ ọdada jẹm, uda-á kịlẹbyị-kịlẹbyị, ụbwọ nyam chọọ igbe.

³⁶“Amkpaa ee, à ya ọkụmada nyang chẹwụ kem, à chim da. Ụbwọ ọlẹ ká dam họ kam lehe.

³⁷À chị ẹga da gbamgbam du kam ye ẹga ya ẹta rịrị, du kam pyị mileji ka.

³⁸M̀ ku aluji nyam kaka wu, m̀ kụrwaa chẹẹchẹẹ. M̀ tụ ila rịraa gbee kam taa ayịreji.

³⁹M̀ daa abwọ yịgẹ-yịgẹ, ị́ ka jẹ-ẹ̀ wuleji myị kaka. M̀ kpa ẹta táa tudu eji.

⁴⁰À jum ọngịrị ọ-kpa dẹwụ, a kpụ aluji nyam nọnọ ham.

⁴¹À họ aluji nyam mwụ ata bịmwụ him, m̀ ta angị bam ẹtẹ wuu ayịreji.

⁴²Ị chị eko bịlẹ ụbwọ ọdada, ị́ tị ye olewe ka. Ị be ẹkọ wụrụ Amkpaa, ọ tị ya arụ kpịla hyaa.

⁴³M̀ daa abwọ yịgẹ-yịgẹ, kpọrụ pwụrẹ-pwụrẹ lala ọrụ nya ịpyị. M̀ kpa ata bwu uhye nyaa mọọ́-mọ̀ọ-mọọ́ lala ịwa ọlụgbẹyị.

⁴⁴“À kpam be hi angịnyị nyam, bwu ụbwọ nyaa ịwa angị la egbeju-ọngịrị ịwẹ. À gbem lala olegbeju nya alẹpwụma datị-datị. Alepwoja ịlẹ kam jẹjẹ ene-ene ka ri angị myị ẹrụ ham lẹ.

⁴⁵Angị ri angga ri wẹ kaka da obayile ham, ị́ wo ẹla nyam wo lẹ, ịị ju ihi lẹlẹ.

⁴⁶Angga ịwẹ kpa igbeene a-abwabwọ, hụ́ kpákpaakpa kpehe warị bwu ẹga ịkpịbaa ịtụka nyaa.

⁴⁷“Amkpaa juwa hịhị! Anụ gwogbo ha ẹjwọ ọ-chẹwụ kem! Ahụ Ohe Oluhye lụmẹ gidogbooo! Ahụ à ri ẹjwọ ọ chịm da lẹ!

⁴⁸Ọwa-à họ aluji nyam kwiwa ham, bala ọ-kpa alẹpwụma datị-datị kaka ji ekpeleji nyam lẹ.

⁴⁹Ọ chịm da bwu ẹpwụtụbwọ nya aluji nyam, ya godayị gedee hwẹ̀ẹẹ hi angịlẹ kam waa ẹjẹ. Ọ chịm da bwu ụbwọ nya alabwẹga i-jahị dam.

⁵⁰“Chajị nya ọọwa lẹ, m̀ ka gwogbo hang tụ ẹpwụma-ẹpwụma wuu da, m̀ ka gwogbo ha ẹnyị nyang.

⁵¹Ohe Oluhye ya ọkụrụ-kụrụ ịtụka ha adịrahụ ọlẹ kọ chụ, ọ la ọháha o-gbu enyi-ka ẹ-ẹga nya iDevid adịrahụ ọlẹ kọ chụ bala anyị ịtụma nyamwụ gbe oyi myi.”