Read idege 2 ỊSAMWẸLỤ 23 Bible Online

2 ỊSAMWẸLỤ 23 - idege bible

2 ỊSAMWẸLỤ 23

¹Ọlẹ à ri ẹla ohyẹẹkpẹ nya iDevidi lẹ: IDevidi ri ọnyị nya iJesi, ọ ri ọlẹng ọlẹ ká Ohe Oluhye kọ kụ du kọ lehe, ọngọlẹ ká Ohe Oluhye nya iJekọbụ hu adịrahụ, kọ ri ọngọ mwu eje ịnyịịla nya ala Isirẹlụ.

²“Olegu nya Amkpaa kpam ya ẹla. Ọ ya ẹla jum ọ-ọnụ lẹ.

³Ohe Oluhye nya ala Isirẹlụ ya ẹla lẹ. Ọngọgbegbe nya ala Isirẹlụ byim yẹkẹẹ, ‘Adịrahụ ọ-kpa ọpyị labwẹla ọnyịịla, kọ ju ihi nya Ohe Oluhye.

⁴Ọ lala ahịgboo nya ẹnụ obeeji lụtụrụ ẹnụ ká egbamwụ-ụ́ ji ka. Ọ lala ahịgboo ọlụka ká enyi do kpá, ọlẹ kọọ họ ká amẹ-ẹ̀ hụ́ myịrị-myịrị.’

⁵“Ịịwẹ ugbiyegu nyam à la kpakpa ẹ-ẹga nya Ohe Oluhye lẹ. Ọ nwa iro o-gbe oyi myị oyị tam, ọnụ ọmyịmyị ọlẹ kọ yeji giri-giri. Ọ ka chịm da, ọ ka họ ọbaba nyam wuu ham.

⁶Angị jẹ Ohe Oluhye ka lala ejwo ịlẹ kịị go chịịrụ, kịị gyaa lụbwọ ododu ka.

⁷Ịkịlọ lee oje-ọkpachị ịị kpa tụ́ ejwo hụrụ lẹ, ọọwa, ị ka chaa ila hụrụ wuu lẹlẹ.”

⁸Ẹnyị nya angịdẹwụ ịtụka ịta nya iDevidi a lẹẹ lẹ: Ọngọhẹ nyaa ri iJochebu-ịbachẹbẹtị. Ọwa-à ri olegbeju ẹ-ẹpwụ nya angị ịta ịịwa lẹ. Ọ kpa ụwangga-ụwanga dẹwụ ta angị ohu ineku (800), ọ tị nwaa wuu ẹ-ẹwụ ọlụka ookpokpo.

⁹Ọngọ oheeye olehe ba ọngịnyị nya ọgbanyẹ ba ri Eliyesa ọnyị nya iDodayị bwu ogang nya Ahohi. Ẹnẹhẹ, ọwa bala iDevidi da ala iFilisitiya uya ụka kị tụguru nyọka dẹwụ ta ala Isirẹlụ. Ẹnụ ọọwa, ọng myị ọng nya angịdẹwụ nya ala Isirẹlụ rụnyẹ rụ

¹⁰kẹnẹ-kẹnẹ ka hi Eliyesa. Ọwa godayị kpọọọ, dẹwụ ta ala iFilisitiya. Ọ nwaa gbee ká ekpiiji ịlabwọ nyamwụ hwo kịrọchịị du ká ụbwọ nyamwụ-ụ́ jẹ pẹhi iji nya oge nyamwụ kaka. Amkpaa ya ọkụrụ-kụrụ ọtụka họọ ẹnẹwẹ. Ọ kụrụ ẹwụ ọwẹ kpá wuu ene ká angịdẹwụ nya ala Isirẹlụ ịkịla-à nyà tịrẹkpẹ kaka go ang-ẹwụ kpa rụ.

¹¹Ọngọdẹwụ ọtụka ba Eliyesa ba ri ịChama ọnyị nya Agee ọlẹ kọ bwu ịHararị. Ala iFilisitiya tụguru lẹẹ tụguru ẹ-ẹrụ nya achị-ekeji ọhẹ. Angịdẹwụ nya ala Isirẹlụ rụnyẹ rụ,

¹²ịChama tị godayị kpọọ ẹ-ẹpwarịrị nya ẹrụ ọọwa. Ọ jẹ chị ẹrụ ọwẹ da, nwụ ala iFilisitiya ịịwa. Amkpaa ya ọkụrụ-kụrụ ọtụka ha angịnyị nyamwụ ẹnẹwẹ.

¹³Ụka ọhẹ lụka nya ang-ẹrụ ọwụwụ, angị ịta ẹ-ẹpwụ nya ịbagọ angị iwo ịta nya angịnyị nya iDevidi kele ka ụgbụ nya Adulam ẹga ká iDevidi ji. Ụka ọọwa, angịdẹwụ nya ala iFilisitiya chịkụ ọ-Ọkpọọ nya iRefayim,

¹⁴ị tị lẹẹ yẹ epweji nya ịBẹtịlẹhẹm juju lẹ. IDevidi ayịdang juwa ẹ-ẹga ọkpịbaa i-ikiti ọhẹ.

¹⁵IDevidi juwa wu iwoo nya ẹpwa lẹ, ọ yẹkẹẹ, “Ang pyii ká ọngọhẹ ka jẹ-ẹ̀ ya ang chị enyi ọnyịịla bwu ịwẹẹlụ ọlọnụ-ogirigba nya ịBẹtịlẹhẹm kpa wam-m̄ nwa. Ịnọ, anyị ọọ hám há!”

¹⁶Ọọwa, angịdẹwụ ịtụka angị ịta ịịwa-à be bwụụụ bwu ẹpwụ nya angịdẹwụ nya ala iFilisitiya kaka chị enyi bwu ịwẹẹlụ ọlọnụ-ogirigba nya ịBẹtịlẹhẹm kpa nyà wẹ iDevidi lẹlẹ. Ọ́ tị myị kpọọ ka ọnụ ka. Ọkọkọ nya ọọwa, ọ yọọ hụrụ lala iya ọkịlaakịla ha Amkpaa lẹ,

¹⁷ọ yẹkẹẹ, “Ịgọgọ ẹnẹnẹhẹ! Ḿ ka byị ẹjẹ-ẹ̀ kpa enyi ọwẹ ka ọnụ koo. Ọ lam lala ịwọ nya alẹng ịwẹ kị ya ịlaa ga ha igu ene kịị chọọ kpa nyà. Lẹẹlẹ, ọ́ myị nwọọ ka.” Ẹla-ogu ịlẹ ká angịdẹwụ ịtụka angị ịta ju ugbodu họ à wẹ lẹlẹ.

¹⁸Abichayị ọnyịnịna nya iJowabụ ọlẹ ká ẹnyị nya ịnaa ri iSeruya à ri olegbeju ọ-kụ ịlahị nya ịbagọ angị iwo ịta nya iDevidi lẹ. Ọ kpa ụwangga-ụwangga nyamwụ mwẹla ta angị ohu ịta (300), nwaa wuu ẹ-ẹpwụ nya ẹwụ ọlụka ookpokpo. Ọkụrụ-kụrụ nyamwụ ọwẹ du kọ lehe lala angịdẹwụ ịtụka angị ịta ịwẹ ịnyịnyị.

¹⁹Ọwa-à lehe gụ ẹ-ẹpwụ nya angị iwo ịta ịịwa wuu lẹ. Ọwa-à ri olegbeju ọ-kụ ịlahị nyaa lẹ, ọ́ tị lehe lala angịdẹwụ ịtụka angị ịta myị ka.

²⁰IBenaya ọnyị nya iJehoyada ọla ịKabisiilu ri ọngọdẹwụ olehe ọkịla ọlẹ kọ họ ẹla-ogu lụmẹ-lụmẹ. Ọ nwụ angịdẹwụ ịlahịchịng nya ala iMowabụ angị imiiye. Ọ ku ugẹbẹ chàchachaacha ka ju ka ụjẹ ẹnụ ká Ohe juwa do ekpawẹ ihule-hule. Ọ nwụ ugẹbẹ ọọwa.

²¹Ọ nwụ ogirima nya ala Ijipiti ọhẹ kọ kpa ụwangga. Ịnọ, eku-okoji kem iBenaya-à kpa lẹ, ọ tị mịla ogirima ọọwa nmoo, noo ụwangga lẹ, ọ kpa ụwangga ọọwa nwọọ lẹlẹ.

²²Ẹla-ogu ịlẹ ká iBenaya họ du kọ lehe lala ịbagọ angị iwo ịta-à wẹ lẹlẹ.

²³Ọwa ayịdang lẹ, ihi ọlala kụ gịlọ-gịlọ ẹ-ẹpwụ nya ịbagọ angị iwo ịta, ọ́ tị lehe lala angịdẹwụ ịtụka angị ịta myị ka. IDevidi hwoo ri olegbeju nya angịgboo gbe.

²⁴Angịkịla ẹ-ẹpwụ nya ịbagọ angị iwo ịta ri Asahẹlụ ọnyịnịna nya iJowabụ bala Elihanan ọnyị nya iDodo ọla ịBẹtịlẹhẹm

²⁵bala ịChama ọla ịHarodu bala Elika ọla ịHarodu

²⁶bala ịHẹlẹsị ọla ịPaliti bala Ira ọnyị nya Ịkẹchị ọla iTekowa Angịkịla nyaa ri

²⁷Abiyesẹẹ ọla Anatotu bala iMebunayị ọla iHucha

²⁸bala ịSalụmọn ọla Ahohi bala ịMaharayị ọla iNetofa

²⁹bala ịHẹlẹbụ ọnyị nya ịBaana ọla iNetofa bala Itayị ọnyị nya iRibayị bwu iGibiya ụ-ụwa i-iBenjamịn. Angịkịla nyaa ri

³⁰iBenaya ọla iPiratọn bala iHidayị ọla ọkpọọ ịla ịGaachị

³¹bala Abi-alibọn ọla Araba bala Asimavẹtị ọla ịBahurim

³²Eliyahaba ọla ịChaalịbọn bala anyị nya ịJachẹn. Angịkịla nyaa ri

³³bala iJonatan bala ịChama ọla ịHararị bala Ahịyam ọnyị nya ịChararị ọla ịHararị

³⁴bala Elifẹlẹtị ọnyị nya Ahasibayị ọla ịMaaka bala Eliyam ọnyị nya Ahitofẹlụ ọla iGilo

³⁵bala iHesiro ọla ịKaamẹlụ bala ịPaarayị ọla Arabụ. Angịkịla nyaa ri

³⁶Igalụ ọnyị nya ịNatan ọla iSoba bala ịBana ọla ịGadị

³⁷bala ịSẹlẹkị ọla Amọn bala ịNaharayị ọla iBiyerotu ọlẹ kọ ri ọngọ kaa kpa ang-abwọ nya ẹwụ nya iJowabụ

³⁸bala Ira bala ịGarẹba kị ri ala ịJatii

³⁹bala Uriya ọla iHiiti. Ọtụchawụlẹ nyaa wuu ri angị iwo ịta kụrụ irwiye.