Read idege 2 ỊSAMWẸLỤ 24 Bible Online

2 ỊSAMWẸLỤ 24 - idege bible

2 ỊSAMWẸLỤ 24

¹Ụka ọkịla ọhẹ juwa ká Amkpaa wụ ẹjẹ ta ala Isirẹlụ lẹ, ọ du iDevidi jwaa lẹlẹ. Ọ byi iDevidi yẹkẹẹ, “Kele ka wa ala Isirẹlụ bala ala iJuda mẹ.”

²Ọọwa, iDevidi à byi iJowabụ bala alegbeju nya angịdẹwụ ịlẹ kọ juwa balọọ yẹkẹẹ, “Anụ jẹ tụ imwawụ nya Isirẹlụ wuu da bwu ọbaba ọla ịDan lalaala ka ju ka iBiyẹchẹba kanụ wa angịnyị chajị kam ka jẹ ụmụmẹ nyaa mẹ.”

³IJowabụ tị byi adịrahụ yẹkẹẹ, “Ohe Oluhye ā myị ká angịnyị nyang ā ju iru ugbabwọ ohu mwụ aba ba iru ojuju nyaa ọlẹẹlẹẹ mẹ, Agaba Idu. Ịyẹ kpangga à tị du ká tịtọ nyọka wa angịnyị ụka ọlẹ ẹne-e?”

⁴Ẹla ọwẹwẹ nya adịrahụ tị pyị ịnya iJowabụ anyị da ka ọka. Ọọwa, ị kele kaka wa ala Isirẹlụ lẹlẹ.

⁵Ị jẹ kpoye nya Ihu ịJọdan kele ka chịkụ e-edii nya epweji nya Aroyẹẹ ọlẹ kọ kụ ẹ-ẹpwarịrị nya ọkpọọ o-oye nya ịGadị. Ọọwa, ị jẹ bwu ẹgẹwẹ kele ka ịJasẹẹ

⁶gbee ka pwụ iGiliyadị bala oye nya ịTatim-iHodichi bala ịDan-ịJaan gbee kị pwụ ịSayịdọn lẹlẹ.

⁷Ị jẹ ka edii koye nya ube ọtụka nya epweji nya ịTaya lalaala ka pwụ epweji nya ala iHivayị bala iKenan gbee kị pwụ iBiyẹchẹba ọ-ọpyị ọkanggba oledii nya iJuda.

⁸Ị jẹ tụ ẹga myị ẹga wụ da ẹ-ẹpwụ nya ịya ihikichu da ẹnụtụrụ iwo imiiye lẹ, ị nyà tịrẹkpẹ wẹ iJerusalẹm lẹlẹ.

⁹Ọọwa, ị ya je adịrahụ jaabwọ ká alẹng ị-ka dẹwụ myị ju iru ka ba wuu lẹlẹ. Angị bwu Isirẹlụ wuu la angị ụnọ ohu ineku (800,000). Angị bwu iJuda la angị ụnọ ohu ịrụ (500,000)

¹⁰Ọọwa, ọkịlẹtụ à tị dọmwụ nyọka ya akama ha iDevidi ụka kọ wa angịnyị kpá lẹ, ọ byi Amkpaa yẹkẹẹ, “M̀ họ ang onyobyi ọtụka bwula ang ọlẹ kam họ-ọ̀ wẹ lẹ. Chuchuu, hịnyọhi ham mẹ. M̀ họ ẹla uchi lẹ.”

¹¹Ene ká iDevidi ka chahị kpehe lahị ọpyẹpyẹ ọọnamwụ kpá, Amkpaa ya ẹla ta ịGadị ọlọmwụ nya iDevidi yẹkẹẹ,

¹²“Kele ká byi iDevidi mẹ, m̀ jam ka chị ang ịta nọ họọ lẹ. Ọlẹ kọ họọ kọ chụ m̄ ka họ lẹ.”

¹³Ọọwa, ịGadị à kele ka ya ẹlẹwẹ je iDevid bwula ọ-tọọ wo yẹkẹẹ, “Oyina ā tị́ chụ? Uhi o-ji ọpyị nyang ẹka ịta lee aluji nyang ọ-ka kung ká ka juwa rụnyẹ rụ hyaa ẹka ịta gbẹgbịlẹ lee ẹdụrụ onyobyi-obyi ọ-jụ alọpyị nyang ẹnụtụrụ ịta tị́ị̀? Me irya jwoo ká ya jem ọlẹ kam ka kpa ka ya je Amkpaa ọlẹ kọ dum ẹrụ mẹ.”

¹⁴Ọọwa, iDevidi à byi ịGadị yẹkẹẹ, “M̀ ji ẹpwụ nya iwe-ahụrụ olujwo ọtụka lẹ! Áhị kpụ ẹpwụ nya ẹla nya Amkpaa, ọ hagụ, chajị ọ ri ọngọ yẹ ahyẹẹrwẹrwa. Amkpaa ā yam ju angịnyị ehe ụ-ụbwọ koo.”

¹⁵Ịnyị, Amkpaa-à du ẹdụrụ onyobyi-obyi wẹ Isirẹlụ bwu alụtụrụ ọọwa gbee pwụ ụka kọ hunọ lẹlẹ. Bwu ọbaba nya Isirẹlụ ọhẹ kele ka ọkịla, angị ụnọ iwo irwiye (70,000) nya ala Isirẹlụ gbu lụka ọọwa.

¹⁶Ụka ká olegu-ẹrụ nya Amkpaa juwa ka ta iJerusalẹm ayịreji lẹ, Amkpaa-à nwụ irya me lẹ, ọ byi olegu-ẹrụ ọọwa yẹkẹẹ, “Ọ nwa lẹ! Ba mẹ!” Ụka ọwẹ, olegu-ẹrụ ọọwa juwa ẹ-ẹga o-ru ajẹ nya ang-ẹrụ nya Arawụna ọla iJebusi.

¹⁷IDevidi yẹ olegu-ẹrụ ọlẹ kọ wẹẹ nwụ angịnyị, ọọwa, ọ byi Amkpaa yẹkẹẹ, “Am à ri ọngọ họ abyị lẹ. Am à họ tịpyọ lẹ. Ịnya ikpehika nya angịlẹ tị́ ri anyị? Yẹm bala alugbiyegu nyam akama kem mẹ.”

¹⁸Ẹnẹwẹ-ẹnẹwẹ, ịGadị ka ẹga nya iDevidi kaka byoo yẹkẹẹ, “Kele ka ẹga o-ru ang nya Arawụna, ká me ogidi ha Amkpaa mẹ.”

¹⁹Ịnyị, iDevidi à ju ihi nya ehile nya Amkpaa jaabwọ ká ịGadị byoo lẹlẹ.

²⁰Ụka ká Arawụna hu ahị hwaa, ọ yẹ adịrahụ bala angịnyị nyamwụ kị juwa jẹ yahị dọọ. Ọọwa, ọ kele kaka hịnọnọ ị-ịpyị juwa da ọbayịle haa lẹlẹ.

²¹Arawụna tọọ wo yẹkẹẹ, “Agaba Idu ee, anyị tị́ ká wẹ ẹgẹlẹ-ẹ̀?” IDevidi wẹ byoo yẹkẹẹ, “M̀ wẹ kam ka ra ẹga o-ru ang nyang ọlẹ chajị kam ka me ogidi ám ha Amkpaa ká ẹdụrụ onyobyi-obyi ọlẹ ka kpụba.”

²²Arawụna wẹ byoo yẹkẹẹ, “Ye mẹ-ẹ̀! Hu ang myị ang kọ hang ẹgẹlẹ ká ya kịla iya ha Amkpaa mẹ. Ịna lẹẹ ká ka ya kịla iya. Ekeji nyaa bala eginikpo i-ru ang tị lẹẹ ká ka ya ju ila lẹ.”

²³Arawụna ya ang ịwẹ wuu ha adịrahụ. Ọọwa, ọ byi adịrahụ ịnyịnyị yẹkẹẹ, “Amkpaa Ohe Oluhye nyang ā ye ọhaha nyang mẹ.”

²⁴Adịrahụ tị byi Arawụna yẹkẹẹ, “Eheehe, m̀ ka rọọ ra. Aang ọlẹ kam la lorwaahị m̄ ka ya kịla iya ha Amkpaa Ohe Oluhye nyam ka.” Ọọwa, iDevidi à ra ẹga o-ru ang ọwẹ bala ịna ịịwa lokpoko onyoowuru iwo ịrụ lẹlẹ.

²⁵Ọọwa, iDevid à me ogidi ha Amkpaa ụ-ụwa lẹ, ọ kịla iya ọ-rụ ila bala iya nya ọhọlawụlẹ lẹlẹ. Amkpaa wo ọbịlẹ-bịlẹ nya iDevidi lẹ, ẹdụrụ onyobyi-obyi ọọwa-à kpụba lẹlẹ.