Read idege 2 ỊSAMWẸLỤ 3 Bible Online

2 ỊSAMWẸLỤ 3 - idege bible

2 ỊSAMWẸLỤ 3

¹Ẹwụ ọdada nya angịdẹwụ ị-myị ẹla ju ịSọlụ bala angịdẹwụ ịkịla ịlẹ kị myị ẹla ju iDevidi ọwẹ gbileji lụka ọtata. IDevidi juwa lọngịrị gụ ọọwa kịlahị-ịlahị, ma ọngịrị nya aloye nya ịSọlụ juwa la myịnẹ-myịnẹ gụ ọọwa kịlahị-ịlahị.

²IDevidi ma anyị alẹng angị ịrwọnyẹ ụka kọ kụ i-iHebirọn. Ọnyị ọlẹng nya ọgbanyẹ nyamwụ ri Amọn ọlẹ ká ẹnyị nya ịnamwụ ri Ahinowam ọla iJesiryẹlụ.

³Ọnyị oheeye nyamwụ ri iKiliyabụ ọlẹ ká ẹnyị nya ịnamwụ ri Abigẹlụ ahụ-ogu nya ịNabalụ ọla ịKaamẹlụ. Ọnyị ọhata ri Abụsalọm ọlẹ ká ẹnyị nya ịnamwụ ri ịMaaka ọnyị ọnyang nya ịTalịmayị Adịrahụ nya ala iGechuu.

⁴Ọnyị ohene nyamwụ ri Adonija ọlẹ ká ẹnyị nya ịnamwụ ri ịHagiti. Ọnyị ọharụ nyamwụ ri ịChẹfatiya ọlẹ ká ẹnyị nya ịnamwụ ri Abitalụ.

⁵Ọnyị ọharwọnyẹ nyamwụ ri Itiriyam ọlẹ ká ẹnyị nya ịnamwụ ri Ẹgịla. I-iHebirọn iDevidi à ma anyị ịwẹ wuu lẹ.

⁶Ụka ọlẹ ká angịnyị nya ịSọlụ bala angịnyị nya iDevidi juwa kịnyaa la ẹwụ ọdada, Abụnẹẹ ri olegbeju ọlẹ kọ juwa la ọngịrị gụ olene-ene ẹ-ẹpwụ nya angị myị ẹla ju ugbiyegu nya ịSọlụ.

⁷Ẹnẹhẹ, Ichibochẹtị ọnyị nya ịSọlụ chẹla ba Abụnẹẹ juwa tọọ wo yẹkẹẹ, “Ịyẹ tị́ du ká doru kịla iRisipa ahụ-ọnchẹ nya adam ọlẹ ká ẹnyị nya ịnamwụ ri Aya mẹ?”

⁸Ụka ká Abụnẹẹ wo ẹlẹwẹ, ọ wọọ ẹjẹ lụmẹ-lụmẹ. Ọọwa, ọ byi Ichibochẹtị yẹkẹẹ, “À me irya kam ka myị-ị̀ ju ịSọlụ ẹpẹ-ẹ́? À me kam ji oye nya iJuda lẹ-ẹ́? Bwu ọmwụ-ọmwụ ọdada, m̀ lẹẹ ju ihi nya ịSọlụ adang bala anyịnamwụ bala aligu nyamwụ. Ḿ myị kpong-kpong iDevidi kụrụụnụ bwu ẹwụ ka. Ọọwa, ā jam chẹla bam ọọ-lajị nya ọnyang lẹ-ẹ́?

⁹Ó-ri kam da iDevidi ụbwọ kpụ ọ ye ang ọlẹ ká Amkpaa myị ọnụ họọ ka aalẹ, Ohe Oluhye ā yẹm akama.

¹⁰Amkpaa lẹẹ myị ọnụ kọ ka ye ọpyị ọkpakpa bwu ẹga nya ịSọlụ bala anyị ịtụma nyamwụ kọ ka hu iDevid ri adịrahụ nya ala Isirẹlụ bala iJuda wuu bwu ọbaba oloye nya ịDan lalaala ka ju ka iBiyẹchẹba.”

¹¹Ichibochẹtị ju uhi nya Abụnẹẹ lụmẹ gbee kọ wẹ ẹla ọhẹ-lọhẹ myị kpong-kpong ka.

¹²Ọọwa, Abụnẹẹ à du ẹrụ kaka byi iDevidi i-iHebirọn yẹkẹẹ, “Ọpyị ọlẹ wuu ka ri nyang. Ahị nwa iro ha awụlẹ mẹ. M̀ ka họ ká ala Isirẹlụ wuu ka yẹ kpáta kaka ji oye nyang.”

¹³Ọọwa, iDevidi à wẹ byoo yẹkẹẹ, “Ọ hiigu. M̀ ka nwa iro tang. Ene kam tị ka yẹng ẹ-ẹhị, à ka kpa iMikalụ ọnyị ọnyang nya ịSọlụ warị wam ụka ká ka wẹ.”

¹⁴Ọọwa, iDevidi à du ẹrụ kaka byi Ichibochẹtị yẹkẹẹ, “Ya iMikalụ ahụ nyam du tịrẹkpẹ wam mẹ. Ọhịhị[3] nya ala iFilisitiya angị ohu (100) m̄ kpa nọnọ ene kam-m̀ yoo lẹ.”

¹⁵Ọọwa, Ichibochẹtị à du kaka wule iMikalụ eji bwu ẹpwa nya ọrụmwụ ịPalụtịyẹlụ ọnyị nya ịLayichi lẹlẹ.

¹⁶Ọrụmwụ ọwẹ tị dịrọọ lida-lida lalaala ka pwụ epweji nya ịBahurim. Ọọwa, Abụnẹẹ à byoo yẹkẹẹ, “Yegiri! Rụ tịrẹkpẹ ka ẹpwa”. Ọọwa, ọ rụ lẹlẹ.

¹⁷Ọọwa, Abụnẹẹ à kele kaka tọ alegbeju nya ala Isirẹlụ lẹ, ọ byaa yẹkẹẹ, “Ọ tata chẹẹ nyọlẹ kanụ lẹẹ tịtọ nyọka hu iDevidi adịrahụ nyanụ lẹ̀.

¹⁸Lẹẹlẹ, anụ họ ịnyị mẹ-ẹ̀. Amkpaa lẹẹ ya neeji ene ya ọwa nyị chụ iDevidi nya ọnchẹ nyọwa ọlẹ kịị nyị ka gba ala Isirẹlụ angịnyị nyọwa kpehe bwu ụbwọ nya ala iFilisitiya bala aluji nyaa ịkịla wuu.”

¹⁹Abụnẹẹ ya ẹla ta alimwawụ nya iBenjamịn ịnyịnyị. Ọọwa, ọ rụ kele ka iHebirọn kaka ya je iDevidi ang ọlẹ ká ala iBenjamịn bala ala Isirẹlụ myị ọnụ nyọka họ lẹlẹ.

²⁰Ụka ká Abụnẹẹ kpa angịnyị nyamwụ angị iwo imiiye ba ịlọmwụ ka ẹga nya iDevidi i-iHebirọn, iDevidi haa ụga ọtụka-ọtụka.

²¹Abụnẹẹ byi iDevidi yẹkẹẹ, “Agaba Idu, m̀ ka kele ka kpa ala Isirẹlụ wuu warị kị ka myị ọnụ jung nyọka ri adịrahụ nyaa lẹ. Ọọwa, ọpyị ọlẹ wuu tụ angịlẹ kị hán̄g i-irya à ka ji ekpeleji nyang lẹlẹ.” Ọọwa, iDevidi à da Abụnẹẹ ọkpahị lẹ, Abụnẹẹ à rụ lokpunyi lẹlẹ.

²²Ụka kọ nọ chẹẹ, iJowabụ kpa angịdẹwụ nya iDevid nyà bwu ẹwụ ọhẹ la iru nya ang ịlẹ kị go kpa nyà. Abụnẹẹ-ẹ́ tị juwa ta iDevidi ụka ọwẹ i-iHebirọn kaka. IDevidi lẹẹ myị ọnụ họọ nyị rụ lokpunyi mẹ.

²³Ụka ká iJowabụ anyị nyà, ọngọhẹ ya joo Abụnẹẹ nyị wẹ kaka ju iDevid Adịrahụ ụga, adịrahụ nyị tị pẹ hyoo rụ lokpunyi lẹ̀.

²⁴Ọọwa, iJowabụ à ka ẹga nya adịrahụ kaka byoo yẹkẹẹ, “Ányị ā tị́ họ ịnyị mẹ? Abụnẹẹ wẹ ẹgẹlẹ. À tị pẹ hyoo rụ gịlala.

²⁵Abụnẹẹ ọwẹ warị kaka dang lụgbaa kọ ka jẹ ang myị ang ịlẹ ká kaa họ bala ẹga myị ẹga ká kaa ka ịnyị-ị̄.”

²⁶Ụka ká iJowabụ rụ bwu ẹga nya iDevidi kpá, ọ du angịhyẹ kele ka wu Abụnẹẹ. Ị yọọ ẹ-ẹga nya ịwẹẹlụ nya iSira lẹ, ị kpọọ nyà tịrẹkpẹ lẹlẹ. IDevidi-í tị jẹ ẹlẹwẹ ka.

²⁷Ụka ká Abụnẹẹ nyà pwụ iHebirọn, iJowabụ kpọọ jẹ ka ọka nya ogirigba lala ịnyaa juwa ka ya ẹla tọọ ịbaa-ịbaa lẹlẹ. Ọọwa, ọ ya ẹma gu Abụnẹẹ ẹpwụ huruḿm lẹlẹ. Ọ nwụ Abụnẹẹ kwiwa nyọlẹ ká Abụnẹẹ nwụ Asahẹlụ ọnyịnamwụ.

²⁸Ụka ká iDevidi wo ẹlẹwẹ, ọ yẹkẹẹ, “Amkpaa ri ibeenu ya ụbwọ-lẹta nyam bala ịnya angịnyị nyam-ḿ juwa ẹ-ẹpwụ nya igu nya Abụnẹẹ koo.

²⁹Ị̄ ya uri nya ẹlẹwẹ wu iJowabụ bala alugbiyegu nyamwụ mẹ. Loyi nya iJowabụ bala anyị ịtụma nyamwụ pyịyọọ ọngọhẹ nyaa ka ri ọngọ chènyi lee ọngọ jụ ẹdụrụ olugba nya ịnyịrọ ọ-chị kịla ọngịnyị lee ọlịhyẹ lee ọngọ gbu igu ẹwụ lee ọngọ ye ang ri kpụ ịlọmwụ ka pyịyọọ!”

³⁰Lẹẹlẹ, iJowabụ bala Abichayị ọnyịnamwụ nwụ Abụnẹẹ kwiwa nyọlẹ kọ nwụ Asahẹlụ ọnyịnaa ẹ-ẹwụ ọlẹ kị da i-iGibyọn lẹ.

³¹Ọọwa, iDevidi à byi iJowabụ bala angịnyị wuu yẹkẹẹ, “Anụ gu ịwụrụ nyanụ ene, kanụ kụrụ ang nya owuru ọkpakpa, kanụ bida chajị nya Abụnẹẹ mẹ.” Adịrahụ iDevidi ayịdang jẹ̀ tụ ogu nya Abụnẹẹ da e-ejida nyamwụ.

³²Ị ju Abụnẹẹ eji i-iHebirọn. Adịrahụ jida gboo i-iworu nyamwụ. Ịnyịnyị-ịnyịnyị angịnyị wuu à jida lẹ.

³³Ọọwa, iDevidi à mwu eje nya ida ọbaba ịịlẹ yẹkẹẹ:

³⁴“Ọngọhẹ-ẹ́ wung abwọ kpa ka, Ọngọhẹ-ẹ́ jung ori a-ata ka. Ị nwụng jaabwọ ká alọkwọ-ọ̀ nwụ ọngịnyị timajẹ.” Ọọwa, angịnyị à myịmyị jida lẹlẹ.

³⁵Angịnyị wuu wẹ kaka bịlẹ iDevidi kọ ka kpa ang kọnụ ene ká ẹnụ ka byi. Ma, ọ pwa gbanggbang juwa yọnụ deeji yẹkẹẹ, “Ọhe Oluhye ā yẹm akama nya ịlẹhị-ịlẹhị ó-ri kam kpa ịngịngịhyẹ kọnụ ene ká ẹnụ ka byi!”

³⁶Angịnyị yẹ ọhọhọ ọọwa lẹ, ọ kpaa ugbodu nyii. Ẹla myị ẹla ọlẹ ká adịrahụ họ wuu kpụ angịnyị ịpyọ.

³⁷Lẹẹlẹ, angịnyị nya iDevidi bala ala Isirẹlụ wuu jẹ ụbwọ-lẹta nya iDevidi nyị́ ji ẹpwụ nya igu nya Abụnẹẹ ka.

³⁸Ọọwa, adịrahụ à byi alegbeju ịtụkụ yoo yẹkẹẹ, “Ánụ jẹ ka aalẹ, olegbeju ọtụka à tụrụ-ụ̀ wẹ Isirẹlụ alẹ ọlẹ lẹ.

³⁹Ọ ri ịnyịlẹhị am Ohe Oluhye à chụ nya adịrahụ lẹ, m̀ tị la dẹwụ-dẹwụ lụmẹ alẹ. IJowabụ bala Abichayị anyị alẹng nya iSeruya ịwẹ ayịdang lọngịrị kịlam am kịla. Amkpaa ā nwaa uri nya ang ọtịpyọ nyaa mẹ.”